Hebreos 4 - TÄ̧DO Ä̧CUÄ̧ I̧HUȨNȨ

¹ Dioscu 'cuätächi'a päinö huȩnȩ ji̧nä̧ tu̧ju̧nä̧ro̧mȩnä̧, adiu tta̧'ä̧rä̧cuä̧u̧ tö̧ja̧cu̧'a̧nö̧ ja̧'a̧, ya̧tȩ ucututtu ö̧ji̧pö̧ juiyönä o'ca toi'önä docuhuächätucuäcua'a̧nö̧.

² Jahuätö ttä̧ju̧cui̧nö̧ ta'anö, ja̧u̧tä̧ ttö̧ja̧ suronä jȩttö̧ jȩpö̧ icu huȩnȩ ä̧ju̧cui̧nä̧tö̧jä̧ ujutu'inä. Jahuätörö micuähuoca'a ji̧na̧'a̧do, ja̧u̧ huȩnȩ ä̧ju̧cu̧ ttesetoca'a ji̧na̧'a̧ttö̧.

³ Ja̧'hua̧nö̧ ja̧'a̧nä̧ ujututä esetinätötä, dotächäcuotöjädo, 'cuä'ächi'ö tö̧ja̧cua̧ pä'ö. Dios pa̧'a̧nö̧ pä'inödo: Ja̧'hua̧ ji̧yä̧cu̧ ra̧huä̧rö̧ pä'inösä: “Ttöcumä do'ächö 'cuä'ächi'ömä ka̧cuo̧co̧tö̧.” Ja̧'hua̧ ja̧'a̧nä̧ Dios pi̧jä̧ aditö cädomenä, aditähuä cä'ädinödo.

⁴ Ja̧'hua̧ta̧nö̧ koro Huȩyu̧cuä̧ Huȩnȩ, ko̧ro̧mö̧ttö̧nö̧ todäre mo̧ro̧ huȩnȩ, päa'a: Ko̧ro̧mö̧ttö̧nö̧ todäre mo̧ro̧ päi'omenä, Dios aditähuä beipächäcu, 'cuä'ächi'ö pä̧mä̧di̧nö̧.

⁵ Ja̧'hua̧ta̧nö̧ koro Huȩyu̧cuä̧ Huȩnȩ päa'a: Ttöcumä do'ächö 'cuä'ächi'ömä ka̧cuo̧co̧tö̧.

⁶ Ja̧'hua̧nö̧ ja̧'a̧nä̧ korotö'inä dottächäcuotödo 'cuä'ächi'ö ttö̧ja̧cuo̧mȩ. Äcuomenä ttö̧ja̧ suronä jȩttö̧ jȩpö̧ icu huȩnȩ ä̧ju̧cui̧nä̧tö̧mä̧, dodepocotö pi̧nä̧tö̧do, ttesetoca'a ji̧na̧'a̧ttö̧.

⁷ Ja̧'hua̧nö̧ ja̧'a̧ttö̧ Dios pä'äji ta'anö koro mo̧ro̧ hue'inödo ttesetarö pä'ö. Ja̧u̧mä̧ jitä mo̧ro̧tä̧ hue'inödo. David päinö huȩnȩ päö'a̧nö̧ ucuocudo Dios ujuturu. Täcö tucuocuäji ta'anö, ja̧u̧ Huȩyu̧cuä̧ Huȩnȩ päa'a: Jitä mo̧ro̧ Dios päö cuä̧ju̧cuä̧tu̧cu̧ttu̧mä̧, cuami 'quicuhuätucuä' cuami iso'quitucunä.

⁸ Josué, Israel ttö̧ja̧rö̧ Dioscu 'cuä'ächi'ö ttö̧ja̧cuo̧mȩcu̧ hueinöttömä, Dios koro mo̧ro̧ ucuocuocö pi̧na̧ji̧.

⁹ Ja̧'hua̧ ja̧'a̧ttö̧ ji̧nä̧ ka̧cua̧'a̧do adihuä juäi 'cuä'ächi'ö kä̧cuä̧huo̧mȩ, Dios i̧tti̧mö̧ ttö̧ja̧cuo̧mȩ.

¹⁰ Dioscu 'cuä'ächi'ö ö̧ja̧ pä'ö do'ächömä, Dios aditähuättö 'cuä'ächi'ö ö̧'ä̧mä̧di̧nö̧ ta'anö, aditähuättö 'cuä'ächi'ö pä̧mä̧dö̧.

¹¹ Dioscu 'cuä'ächi'ö dotächa pä'ö juruhuächi'ö taditätucuaja. Jahuätö jarodinätö jȩtti̧nö̧'a̧nö̧mä̧, jȩtö̧ juiyö'a̧nö̧ ja̧'a̧.

¹² Dios i̧huȩnȩmä̧ 'cuäopönä kö̧do. Ja̧'hua̧ta̧nö̧ 'cuäopönä juruhua'ado. Curodä pätecu sa̧huȩcuodättö'inä abonänö so̧a̧'a̧do Dios i̧huȩnȩ. Dios i̧huȩnȩmä̧ curodä so̧odänä idepä ttihue'cattö quichö tticua'a jä̧'i̧nö̧'a̧nö̧ jö̧. Dios i̧huȩnȩ ja̧'hua̧nö̧ jä̧'i̧nö̧'a̧nö̧ ja̧'a̧nä̧, jiähua'a ujutu ta̧'cua̧nä̧ tamöcuädömä.

¹³ Diosmä da̧jä̧u̧mä̧ ttö̧ji̧po̧co̧cu̧do yoröisotä. Ja̧u̧ o'ca juiyönä bahuecuächönä topödo. O'ca juiyönä u̧huo̧jua̧'a̧ttö̧, o'ca toi'önä ja̧u̧ru̧ jitähuäcuotöjä o'ca juiyönä jȩtö̧mä̧.

Jesúsmä ji̧nä̧ isocu sacerdote ru̧hua̧ päi'önä kö̧

¹⁴ Jesús, Dios I̧tti̧, do'ächinödo Dios ö̧jo̧mȩ. Ja̧u̧ ji̧nä̧ isocu sacerdote ru̧hua̧ päi'önä kö̧do ujuturu. Ja̧'hua̧nö̧ ja̧'a̧ttö̧ adiunätä esetö tö̧jö̧'a̧nö̧ huotöjä.

¹⁵ Ja̧u̧ sacerdote ru̧hua̧mä̧, ujutu tijuiyuhuomenä, a̧'cua̧ tta̧nö̧ topö ujuturu. Iso päi'önä ujutu o'ca juiyönä ubara ttutu ta'anö, ja̧u̧'i̧nä̧ ubara ttu'inödo. Ja̧'hua̧nö̧ ubara ttuhuomenä, yoröiso suronämä jȩpo̧cö̧ pi̧nö̧do.

¹⁶ Ja̧'hua̧nö̧ ja̧'a̧ttö̧ adihuä Dios ö̧jo̧mȩ, eseunu tötö'cöhuächö'a̧nö̧ ja̧'a̧, ja̧u̧ re rö̧jö̧nä̧ toäcua'a̧nö̧ ujuturu. Ja̧'hua̧ta̧nö̧ ujuturu suronä 'cuäopomenä, adiu ppädäcua'a̧nö̧.