Hebreos 3 - TÄ̧DO Ä̧CUÄ̧ I̧HUȨNȨ

Jesúsmä Moisésttö'inä abonänö adihuä i̧sa̧ pi̧nö̧do

¹ Ja̧'hua̧nö̧ ja̧'a̧ttö̧ chö̧jä̧hua̧tö̧, adihuä juäi jȩpä̧tö̧mä̧, Dios huoinä̧u̧jä̧ i̧tti̧mö̧ cu'ätucua pä'ö. Adiu amöcuädätucui Cristo Jesúsru, adihuä huȩ'ä̧hua̧rö̧. Ja̧u̧ru̧ teseta'attö, ja̧u̧tä̧ adihuä sacerdote ru̧hua̧ päi'önä kö̧do.

² Moisés Dios umöhuäyotörö o'ca juiyönä adiunä aditinö ta'anö, Jesucristo'inä, Dios ja̧u̧ru̧ hue'inö ä'ca jo̧mȩttö̧, o'ca juiyönä adiu aditinödo.

³ Ja̧'hua̧ta̧nö̧ isode aditörö, isodettö'inä abonänö ttesehua'a jä̧'i̧nö̧'a̧nö̧, Moisésttö'inä abonänö ttesehuäcua'a̧nö̧ Jesúsru.

⁴ Isodemä aditö toönämä adicuocödo. Ja̧'hua̧nö̧ ja̧'a̧nä̧ Dios o'ca juiyönä ka̧cu̧mä̧ aditinödo.

⁵ Moisés adicuä i̧sa̧ ta'anö adiunätä jȩpi̧nö̧do Dios umöhuäyotörö. Chutä aditähuä päi'önä ucuocuinödo Dios jiähuä̧cuȩtä̧.

⁶ Ja̧'hua̧nö̧ ja̧'a̧nä̧ ya̧tȩ i̧tti̧ ahuaruhuärö adiu jȩö̧'a̧nö̧, adiu jȩpö̧ Cristomä Dios i̧tti̧mö̧rö̧. Adiunä röji mo̧ro̧ päi'ome jubö cä'ädö, eseunu tami 'qui'ächi'önö churutä tta̧tä̧rö̧ttö̧mä̧, Dios i̧tti̧mö̧ päti'äcuotöjä.

Diosrö esetätö 'cuättächi'ö mo̧ro̧ huȩnȩ

^7-8 Ja̧'hua̧nö̧ ja̧'a̧ttö̧ Espíritu Santo pa̧'a̧nö̧ päa'a: Jitä mo̧ro̧ Dios päö cuä̧ju̧cuä̧tu̧cu̧ttu̧mä̧, cuami 'quicuhuätucuä' cuami iso'quitucunä, pä'äji ka̧cui̧nä̧tö̧ ttami 'quittinö'a̧nö̧mä̧. Jahuätömä de'a kä'cottö ka̧cuä̧mö̧ topinätö Diosrö, Dios ami 'qui'ächi'ö toa pä'ö.

⁹ Ju̧huȩnȩ ucutu cuä̧do̧tö̧ mi̧nä̧ ttörö ka̧cuä̧mö̧ topinätö, chami 'quidächi'a pä'ö. Jahuätö cuarenta a̧'ȩ jo̧mȩnä̧ topinätö ttö jȩchi̧nö̧.

¹⁰ Ja̧'hua̧nö̧ ja̧'a̧ttö̧ jahuätörö ra̧huä̧ri̧pi̧nö̧sä̧. Ttö pä'inösä: “'Cuäopönä ttami iso'quinä re'tehuächö cue'ächätö. Ttö chu̧mä̧nä̧ ttu̧huo̧jua̧ pä'ocotö.”

¹¹ Ja̧'hua̧ ji̧yä̧cu̧ ra̧huä̧rö̧ pä'inösä: “Ttöcumä do'ächö 'cuä'ächi'ömä ka̧cuo̧co̧tö̧,” pä'inödo Espíritu Santo.

¹² Chö̧jä̧hua̧tö̧, tta̧'ä̧rä̧cuä̧u̧ ka̧cuä̧tu̧cui̧, ucututä cuami iso'quitucu surojo'quitucunä kä̧nö̧, Dios kö̧rö̧ jarocuhui'ätucu juiya pä'ö, ja̧u̧ru̧ cuesetätucuoca'attö.

¹³ Pärocua'acu mo̧ro̧ji̧nö̧ a̧'u̧cuä̧ eseäcuäu ka̧cuä̧tu̧cui̧ korotörö ppä'ädö, jitä mo̧ro̧ ji̧nä̧ cu̧ja̧cuä̧tu̧cuä̧i̧tä̧, ucututtu ya̧tȩ suronä 'cuäopomenä, cuesetö juiya pä'ö. Ja̧'hua̧ta̧nö̧ cuami iso'quitucunä cuami 'quicuhuächi'ätucu juiya pä'ö ka̧cuä̧tu̧cui̧.

¹⁴ Iso päi'önä äcuomenä tesetinö röji mo̧ro̧ päi'omenä jubö päi'önä tami 'quitächi'öttömä, Cristocu ji̧nä̧ yo̧mȩtȩ tö̧ja̧cuä̧cuo̧tö̧jä̧.

¹⁵ Huȩyu̧cuä̧ Huȩnȩ päa'a: Jitä mo̧ro̧ Dios päö cuä̧ju̧cuä̧tu̧cu̧ttu̧mä̧, cuami 'quicuhuätucuä' cuami iso'quitucunä, pä'äji ka̧cui̧nä̧tö̧ ttami 'quittinö'a̧nö̧mä̧.

¹⁶ ¿Dinö ji̧nä̧ttö̧, Dios i̧huȩnȩ ttä̧ju̧cua̧'a̧nä̧ jarodinätömä? O'ca toi'önä Egipto rȩjȩttö̧ Moisés rä'epö icuinä̧u̧mä̧ ja̧'hua̧nö̧ jarodinätödo.

¹⁷ ¿Dinörö ji̧nä̧ttö̧, cuarentanö a̧'ȩmä̧ Dios ö̧ra̧huä̧ri̧nä̧u̧mä̧? Suronä jȩpi̧nä̧tö̧rö̧ ra̧huä̧ri̧nö̧do. Jahuätö de'a kä'cottö hua'ö icuinätödo.

¹⁸ ¿Dinörö päinättö Dios, “Ttöcu do'ächö 'cuä'ächi'ömä ka̧cuo̧co̧tö̧” päinä̧u̧mä̧? Dios i̧huȩnȩ jarodinätörö pä'inödo.

¹⁹ Ja̧'hua̧ ja̧'a̧ttö̧ topö huo̧juä̧tö̧jä̧, jahuätömä ttesetoca'attö, do'ächocotö pi̧nä̧tö̧do.