Hebreos 13 - TÄ̧DO Ä̧CUÄ̧ I̧HUȨNȨ

Diosrö eseäcuähuä huȩnȩ

¹ Ttö̧jä̧hua̧tö̧rö̧ repettö'a̧nö̧ korotö, korotönörö repecuhuätucumä jarocuhui'ätucuä'.

² Korotö cuojusodenä do'ächö ichätörö, jahuätörö adiu ppäcuhuäda pä'ö cunichi'ätucuä'. Ja̧'hua̧nö̧ jȩpö̧ korotö ttieruhua'anä ángelesrö ppä'ädinätödo.

³ Ja̧'hua̧ta̧nö̧ cärenä pȩjä̧tö̧rö̧ cunichi'ätucuä'. Jahuätöcu cärenä cu̧'ä̧tu̧cua̧'a̧ jä̧'i̧nö̧'a̧nö̧ amöcuädätucui. Korotö suronä jȩttä̧u̧ru̧ amöcuädö, ucutu'inä jahuätöcu ubara ttucuhuätucua'a jä̧'i̧nö̧'a̧nö̧ ppä'ädätucui.

⁴ O'ca toi'önä cuirecuarö ku̧nä̧rä̧tö̧mä̧, korotö ucuturu ttucuotäcua'a̧nö̧. Karajuru suronä jȩcu̧'ä̧'chä̧tu̧cuä̧'. Ja̧'hua̧nö̧ irecuarö ku̧nä̧rö̧, nä̧tö̧rö̧ suronä jȩpä̧'chö̧rö̧'i̧nä̧, irecua to̧'a̧ nä̧tö̧rö̧ suronä jȩpä̧'chö̧rö̧'i̧nä̧ ö̧tä̧bo̧tä̧cua̧ Dios.

⁵ Pärätä'inä repecuhuätucuä'. Cu̧ju̧nä̧rä̧tu̧cu̧ amöcuädö, esehuätucui. Dios pa̧'a̧nö̧ pä'inödo: “Yoröiso jarochi'ococujä. Yoröiso chicuipococujä.”

⁶ Ja̧'hua̧nö̧ ja̧'a̧ttö̧ ujutu eseunu pätäcua'a̧nö̧: Chu̧ru̧hua̧ ttörö ppä'ädö. Pi̧jä̧ ttö̧ja̧ ttörö jȩttö̧mä̧ yoröiso ye'ecuocösä.

⁷ Ucuturu huo̧juȩtö̧ ppä'ädinätörö'inä, Dios i̧huȩnȩ ucuturu ji'ähuinätörö'inä cunichi'ätucuä'. Jahuätö ttö̧ji̧nö̧'a̧nö̧ amöcuädätucui. Ja̧'hua̧ta̧nö̧ jahuätö ttesetinö'a̧nö̧ esetö ka̧cuä̧tu̧cui̧.

⁸ Jesucristo ni̧po̧'i̧nä̧, jitä'inä, yodoji'inä yoräteunä kö̧do.

⁹ Koro huȩnȩ, jareö huȩnȩ, i̧mi̧cu̧nä̧ jittähuä'chomenä cuesetätucuä'. Iso päi'önä tami iso'quinä Dios ppäda'attö tujuruhuomenä, pi̧jä̧ jähuä cuäcuähuä huȩnȩttö̧'i̧nä̧ abonänö adihua'ado. Ja̧u̧ juäi pi̧jä̧ huȩnȩ esetätörö yoröiso ppädoca'a ji̧na̧'a̧do.

¹⁰ Ujutumä koro sacrificio i̧mi̧cu̧nä̧ juäi ku̧nä̧rä̧tö̧jä̧. Ja̧u̧ sacrificiottö sacerdotes huotö, Diosrö ucuocuäcuähuode tta̧'ä̧rä̧tö̧, cuocotödo.

¹¹ Judíos ttö̧ja̧ttö̧ sacerdote ru̧hua̧ äji cuäcuähuotö ttucuoja Ji̧nä̧ Isocu Adihuo̧ca̧cu̧ ȩpä̧tö̧do, suronä jȩttö̧ jȩpö̧ icuähuä ttiya pä'ö. Ja̧'hua̧nö̧ ja̧'a̧nä̧ ja̧u̧ huotö ttidepä ötahuiyättö'inä abocu ku icuätödo.

¹² Ja̧'hua̧ta̧nö̧ Jesús ötahuiyä abocu 'corupä'i'inödo, pi̧jä̧ ttö̧ja̧rö̧ aditö icua pä'ö chutä ucuojanä.

¹³ Ja̧'hua̧ ja̧'a̧ttö̧ ötahuiyä abocu Jesús ö̧jo̧mȩcu̧ ti̧'chä̧tu̧cua̧do, chutä ubara ttuhuinö'a̧nö̧ ubara ttu'u kä̧nö̧.

¹⁴ Pi̧jä̧nä̧ koro ötahuiyä 'cuäopönä jä̧cuȩmä̧, 'quiyä̧cuȩmä̧, yoröiso jui'ätöjä. Ujutumä koro ötahuiyä yodoji ichä̧cuȩmä̧ u̧sä̧rö̧ tta̧'ä̧rä̧tö̧jä̧.

¹⁵ Ja̧'hua̧nö̧ ja̧'a̧ttö̧ Jesucristorö esetö, Diosrö 'cuäopönä eseunu tucuocu'a̧nö̧ ja̧'a̧. Ja̧'hua̧nö̧ eseunu ucuocu, sacrificio päi'önä tiyäcua'a̧nö̧. Ja̧'hua̧nö̧ pä'ö tänä eseunu tucuocuätucuaja.

¹⁶ Adiu jȩä̧cuä̧huä̧nä̧ cunichi'ätucuä'. Ja̧'hua̧ta̧nö̧ cu̧ju̧nä̧rä̧tu̧cu̧ttu̧'i̧nä̧ iyö, korotörö ppäcuhuädätucua pä'ö cunichi'ätucuä'. Ja̧'hua̧nö̧ jȩpö̧, sacrificio päi'önä jȩpä̧tö̧jä̧ Dios esehua'anä.

¹⁷ Ucuturu huo̧juȩtä̧tö̧ pättö ta'anö, adiu jȩpä̧tu̧cui̧. Jahuätörö ucuotätucui. Jahuätö ucutu cua̧'cua̧ru̧hua̧tu̧cu̧ tta̧'ä̧rä̧tö̧do. Jahuätömä ucuturu tta̧ttä̧ro̧mȩnä̧, Dios to̧pä̧rö̧ jahuätörö. Jahuätö ttaditähuä, tta̧'cua̧ tta̧'ȩcu̧ juiyönä, adiunätä räopa pä'ö ppä'ädätucui. Tta̧'cua̧ tta̧'ȩcu̧nu̧ jȩttö̧ttö̧mä̧, ucuturu'inä adihuoca'ado.

¹⁸ Ja̧'hua̧ta̧nö̧ ujuturu'inä Diosrö ucuocuätucui. Ujutu tamöcuädömä adiunä amöcuädätöjä pä'ö huo̧juä̧tö̧jä̧. Ujutu o'ca juiyönä adiunätä jȩta̧ pä'ätöjä.

¹⁹ Ttörö'inä adiunä cucuocuätucua pä'ösä, Dios ttörö huea pä'ö pä'äji ta'anö jurunänö ucutucu chö̧ja̧ pä'ö.

Röjinä teähuinö huȩnȩ

^20-21 Dios, eseäcuähuä Ru̧hua̧, Tu̧ru̧hua̧ Jesucristorö, o̧vȩja̧stö̧ adiu Tta̧huä̧rä̧cuä̧huä̧ I̧sa̧rö̧, ucuojanä jareö huȩnȩ, beipocö huȩnȩ Tta̧huä̧rä̧cuä̧huä̧ I̧sa̧rö̧, 'corupätti'inomettö tto'ädinömä, o'ca juiyönä adihuä isotö päi'önä ucuturu aditö icuäcua'a̧nö̧, churutä pä̧huä̧ rö̧jo̧mȩnä̧ jȩcu̧'ä̧tu̧cua̧ pä'ö. Ja̧'hua̧ta̧nö̧ Jesucristorö teseta'attö, ujuturu o'ca toi'önärö churutä pä̧huä̧ rö̧jo̧mȩnä̧ jȩä̧cua̧'a̧nö̧. ¡'Cuäopönä Cristorö tesehuäcua'a̧nö̧! Amén.

²² Chö̧jä̧hua̧tö̧, pi̧yȩ ppädäcuähuä huȩnȩ topö, cuami 'quicuhuächi'ätucua pä'ösä. Pi̧yȩ ji̧'qui̧cha̧nö̧tä̧ huȩyu̧tä̧ji̧sä̧.

²³ Ucuturu pä'ösä, tö̧jä̧hua̧ Timoteo täcö rättepinäcudo. Jurunänö ichöttömä, ucuturu pä'äji ta'anö topö chichomenä, ja̧u̧ru̧ o̧di̧pä̧cua̧sä̧.

²⁴ Ucuturu huo̧juȩtä̧tö̧rö̧ o'ca toi'önärö'inä, o'ca toi'önä esetätörö'inä te'ähuätucui. Italia rȩjȩnä̧ ka̧cuä̧tö̧ ucuturu te'ähuätödo.

²⁵ Dios o'ca toi'önä ucuturu adiu ppädäcua'a̧nö̧. Amén.