Hebreos 12 - TÄ̧DO Ä̧CUÄ̧ I̧HUȨNȨ

Jesúsru a̧mö̧cuä̧rö̧ ttö̧jö̧ huȩnȩ

¹ Ja̧'hua̧nö̧ ja̧'a̧ttö̧ ujutu tä̧do̧tö̧ mi̧nä̧, recuätö ja̧'hua̧nö̧ rö̧ȩnä̧ ttesetina'a amöcuädö, o'ca juiyönä ta̧mö̧cuä̧rö̧'i̧nä̧, suronä jȩtö̧ ujuturu 'chu̧huä̧rö̧'i̧nä̧, pporädö icu, tami 'qui'ächi'ö kä̧nö̧, juhua'a yabonö adiu jotätucuaja.

² Jesús, ujutu tesetäcuru, ujuturu aditö icuru, adiunätä to̧tä̧rä̧tu̧cua̧ja̧. Jesús dau isodänä kä̧nö̧ 'corupäi'omenä, ja̧'hua̧nö̧ 'corupä'i'ö ödäpecua pä'ö amöcuädoca'a ubara ttu'inödo. Chutä huo̧jui̧nö̧do ja̧'hua̧nö̧ ubara ttudu o'ca'a chȩsȩhuä̧cua̧sä̧ pä'ö. Ja̧'hua̧ta̧nö̧ Dios ö̧'o̧mȩ u̧huo̧jua̧'a̧nä̧ pä̧mä̧di̧nö̧do.

³ Ja̧'hua̧ ja̧'a̧ttö̧ Jesús ö̧ji̧nö̧'a̧nö̧ amöcuädätucui. Chutä suronä jȩpä̧tö̧ ttu̧mö̧nä̧ ubara ttu'inödo. Ja̧'hua̧nö̧ ja̧'a̧ttö̧ cuijuiyuhuätucuä'. Ja̧'hua̧ta̧nö̧ 'cuäcuhuächi'ätucuä'.

⁴ Ucutumä surojöcu curohuähuätucuomenä, ji̧nä̧ 'corupä'i'ocotöjä.

⁵ Dios ucuturu, i̧tti̧mö̧rö̧, päinömä ¿unichi'inätöjä tä̧ji̧? Huȩyu̧cuä̧ Huȩnȩ pa̧'a̧nö̧ päa'a: Ttö chi̧tti̧, Tu̧ru̧hua̧ ucuru ro̧ȩpo̧mȩnä̧, korotä cuamöcuädä'chä'. Ja̧'hua̧ta̧nö̧ ucuru ro̧ȩpo̧mȩnä̧, cuijuiyuhuä'.

⁶ Tu̧ru̧hua̧ repeäcuru ro̧'ȩpö̧. Ja̧'hua̧ta̧nö̧ i̧tti̧mö̧ päi'önä ȩmä̧u̧ru̧, tä̧bo̧tö̧.

⁷ Ucuturu ro̧ȩpo̧mȩnä̧, adiu cuami 'qui'ächi'ö ka̧cuä̧tu̧cui̧. Ucutu i̧tti̧mö̧ ta'anö päi'önä jȩä̧u̧jä̧. Ya̧tȩ, jä'o ro̧ȩpo̧co̧cu̧mä̧ ¿kö̧ tä̧ji̧?

⁸ Ja̧'hua̧nö̧ ja̧'a̧nä̧ Dios, korotö i̧tti̧mö̧rö̧ ro̧ȩpö̧'a̧nö̧, ucuturu ro̧ȩpö̧ juiyöttömä, chutä adihuä i̧tti̧mö̧ huocotöjä. Ucutu ja̧'a̧tä̧ huotöjä.

⁹ Ja̧'hua̧ta̧nö̧ ji̧nä̧ ta̧'u̧cuä̧i̧, pi̧jä̧ttö̧ tä̧'o̧tö̧ ujuturu ro̧'ȩpi̧nä̧tö̧do. Ja̧'hua̧nö̧ ro̧ttȩpa̧'a̧, jahuätörö ucuotinätöjä. Ja̧'hua̧ ja̧'a̧ttö̧ Tä'o mo̧ro̧jä̧nä̧ kö̧rö̧ ji̧nä̧ isocu repetö'a̧nö̧ ja̧'a̧, kä̧cuä̧huä̧ i'co tu̧ju̧nä̧ra̧ pä'ö.

¹⁰ Pi̧jä̧ttö̧ tä̧'o̧tö̧mä̧ jitöja adiu ttamöcuädönä beometä ro̧'ȩpi̧nä̧tö̧ ujuturu. Ja̧'hua̧nö̧ ja̧'a̧nä̧ Dios ujuturu iso päi'önä ppä'ädö ro̧'ȩpö̧do. Ja̧u̧mä̧ chutä adihuä i̧sa̧ ö̧jö̧'a̧nö̧, ujutu'inä adihuä isotö päi'önä tö̧ja̧cua̧ pä'ö jȩpö̧do.

¹¹ Iso päi'önä ujuturu ro̧ȩcuä̧ päi'önä 'cuäopomenä, yotäcumä yoröiso kö'cocotöjä, ujuturu barahua'attö. Ja̧'hua̧nö̧ ja̧'a̧nä̧ ja̧u̧nu̧ o'ca'a ja̧u̧ ro̧ȩcuä̧ amöcuädö tu̧huo̧jui̧'o̧mȩnä̧, eseunutä jȩpö̧, adiu ka̧cuä̧tö̧jä̧.

Dios i̧huȩnȩ töarodö huȩnȩ

¹² Ja̧'hua̧ ja̧'a̧ttö̧ cu̧mö̧nä̧ 'cuäcuhuächi'inätucuä̧mö̧nä̧ jareönä cujuruhuätucuaja. Ja̧'hua̧ta̧nö̧ cuihue'quiyu juiyöpächi'ö'inä jareönä cujuruhuätucuaja.

¹³ Adiu jueä̧mä̧ usätucui. Ja̧'hua̧ ja̧'a̧ttö̧ cu̧jä̧pö̧ surojä̧'u̧mä̧ re'tehuächocö jä̧cua̧'a̧. Adiutä päi'äcua'a.

¹⁴ O'ca toi'önärö adiunä kä̧nö̧, eseunu cu̧ja̧cuä̧tu̧cua̧ja̧. Adiunä ttö̧ja̧cu̧ juiyöttömä, yoröiso topocotö ttäcuotödo Tu̧ru̧hua̧rö̧.

¹⁵ Ya̧tȩttö̧'i̧nä̧ Dios ppädäcuähuä iya päinö ȩmo̧ca̧'a̧ ö̧ji̧pö̧ juiya pä'ö, ttu̧ȩcuä̧nä̧ ka̧cuä̧tu̧cui̧. Ja̧'hua̧ta̧nö̧ koro juäi surä'cua ya̧mö̧'cua̧ bahua'a jä̧'i̧nö̧'a̧nö̧ cu̧ja̧cuä̧tu̧cuä̧'. Ja̧'hua̧nö̧ jȩpö̧ kä̧nö̧, korotörö suronä jȩtta̧ pä'ö cu̧huo̧juȩtä̧tu̧cu̧ juiya pä'ö, ttu̧ȩcuä̧nä̧ ka̧cuä̧tu̧cui̧.

¹⁶ Ja̧'hua̧ta̧nö̧ cuirecuarö cu̧ju̧nä̧rä̧tu̧cuo̧mȩnä̧, karajuru suronä jȩcu̧'ä̧tu̧cuä̧'. Ja̧'hua̧ta̧nö̧ Dios ä'ca jo̧mȩttö̧ adihuä juäinä suronä cujö'cätucuä'. Esaú ja̧'hua̧nö̧ jȩpi̧nö̧do. Chutä ä'canä i̧tti̧ ja̧'a̧nä̧, jä'o hueipinömä iyinödo ö̧jä̧hua̧rö̧ ya'utenätä u̧cuȩ ucua'a micuä päi'önä.

¹⁷ Ucutu huo̧juä̧tö̧jä̧, ja̧u̧nu̧ o'ca'a, Esaú jä'ottö ppädäcuähuä juäi ȩma̧ päomenä, ȩmo̧cö̧ pi̧nö̧do. Rö̧ȩnä̧ ajuähuomenä'inä, pä'äji jȩi̧nö̧ yoröiso pärohuächoca'a ji̧na̧'a̧do.

¹⁸ Ucutumä, Israel ttö̧ja̧ ta'anö, tö'cöpächocotöjä juhuä'ca möä'ca, Sinaí pättä'ca, mȩcu̧huä̧tu̧cua̧ pä'ö. Ja̧'hua̧ta̧nö̧ ocurä'inä rö̧ȩnä̧ cuoä'ca, yo̧ö̧'i̧nä̧, rö̧ȩnä̧ yo̧ä'ca, cu'upä'inä rö̧ȩnä̧ ttörohuä'ca, tö'cöpächocotöjä.

¹⁹ Ja̧'hua̧ta̧nö̧ trompeta rä̧mi̧pö̧'i̧nä̧, Dios i̧huȩnȩ jahuätörö ucuocuina'a'inä ä̧ju̧cuo̧co̧tö̧jä̧. Ja̧u̧ huȩnȩ ä̧ju̧cui̧nä̧tö̧mä̧ juhua'a yabonö ttä̧ju̧cu̧ juiya pä'inätödo.

²⁰ Jahuätö ja̧'hua̧nö̧ pä'inätödo, ja̧u̧ huȩnȩ hueö'a̧nö̧ yettecua'attö. Ja̧u̧ huȩnȩ päina'ado: “Ya̧tȩ de'a i̧sa̧'i̧nä̧ juhuä'ca möä'canä ö̧jä̧dö̧ttö̧mä̧ ido'quinä icuäu'inä, dacuodänä icuäu'inä cuä'ö icuätucuirö,” päina'ado.

²¹ Jahuätö tottinömä juiyo surojina'ado. Moisés'inä ye'ö pä'inödo: “Ttö ye'ecu ttö̧'ä̧u̧sä̧.”

^22-23 Ja̧'hua̧nö̧ ja̧'a̧nä̧ ucutumä Sión möä'cara̧'a̧'i̧nä̧, Dios kö̧ öäre ötahuiyä, adihuä Jerusalén mo̧ro̧jä̧ra̧'a̧ttö̧'inä̧, recuätö miles jo̧mȩnä̧ ángelesrö Diosrö eseunu ttucuocua pä'ö ca̧ca̧ti̧nä̧tö̧rö̧'i̧nä̧ tö'cöpächinätöjä. Ja̧'hua̧ta̧nö̧ Dios umöhuäyotö i̧tti̧mö̧ mo̧ro̧jä̧nä̧ tti̧mi̧ huȩyu̧cuä̧tö̧rö̧'i̧nä̧ tö'cöpächätöjä. Diosrö, o'ca toi'önä ttö̧ja̧rö̧ pä̧cua̧rö̧, tö'cöpächätöjä. Ja̧'hua̧ta̧nö̧ ttö̧ja̧ adiu jȩpi̧nä̧tö̧ Dios aditö icuinä̧u̧ tta̧'cua̧ru̧hua̧rö̧'i̧nä̧ tö'cöpächätöjä.

²⁴ Jesús, jareö huȩnȩ tta̧huä̧rä̧cuä̧huä̧ i̧sa̧rö̧'i̧nä̧, ucuoja dattepinoya, Abel ucuojattö'inä abonänö adiu ucuocuoya'inä tö'cöpächätöjä.

²⁵ Ja̧'hua̧nö̧ ja̧'a̧ttö̧ ucuturu ucuocuru cujö'cätucu juiyönä jȩcu̧'ä̧tu̧cuo̧ca̧'a̧, ttu̧ȩcuä̧nä̧ ka̧cuä̧tu̧cui̧. Pi̧jä̧nä̧ ka̧cui̧nä̧tö̧ Diosrö jarodinätörö jittähuomenä, tö'ipächö ka̧cui̧po̧co̧tö̧ pi̧nä̧tö̧do. Ujutu'inä kärächi'ö jarodö tötipächöttömä, ka̧cui̧po̧co̧tö̧jä̧ mo̧ro̧jä̧ra̧'a̧ttö̧ jiähuomenä.

²⁶ Ja̧u̧nu̧ pä̧nä̧, Dios i̧huȩnȩ ucuocuomenä, pi̧jä̧ ttö̧ȩpi̧na̧'a̧do. Ja̧'hua̧nö̧ ja̧'a̧nä̧ jitä pä'ödo: “Jitä ya'utenätä ttö̧ȩpa̧ pä'ö jȩchä̧cua̧sä̧. Pi̧jä̧tä̧mä̧cö̧, mo̧ro̧jä̧'i̧nä̧, pi̧jä̧'i̧nä̧ ttö̧ȩpä̧cua̧'a̧.”

²⁷ Jitä ya'utenätä päomenä, o'ca juiyönä Dios aditinö ttö̧ȩpö̧mä̧ jȩpö̧ icuäcua'a huo̧juä̧tö̧jä̧. Ja̧'hua̧ta̧nö̧ ttö̧ȩpo̧cö̧tä̧ ki̧'ä̧cua̧'a̧do.

²⁸ Ujutu hueta pä'ö Dios ujuturu iyä̧cuȩ yoröiso ttö̧ȩpo̧cö̧do. Ja̧'hua̧nö̧ amöcuädö tesehuätucuaja. Ja̧'hua̧ta̧nö̧ churutä pä̧huä̧ rö̧jo̧mȩnä̧, adiunä amöcuädö, eseunu tucuocuätucuaja ja̧u̧ru̧, Diosrötä.

²⁹ Iso päi'önä ujutu Tä̧do̧ ä̧cua̧ Dios, koro juäi ocurä o'ca juiyönä be'epö icuarä jä̧'i̧nö̧'a̧nö̧ hua̧do.