Hebreos 10 - TÄ̧DO Ä̧CUÄ̧ I̧HUȨNȨ

¹ Moisés hueähuä huȩnȩmä̧ koro adihuä juäi ichäcua'a a̧'u̧cuä̧ ji̧na̧'a̧do, iso päi'önä adihuä juäimäcö̧. Ja̧'hua̧ ja̧'a̧ttö̧ ja̧u̧ hueähuä huȩnȩ, koro a̧'ȩ'i̧nä̧, koro a̧'ȩ'i̧nä̧ sacrificios jȩtta̧'a̧ Diosrö ttötö'cöhuächa pä'ö jȩpä̧tö̧rö̧, yoröiso aditö icuocödo.

² Iso päi'önä ja̧u̧ hueähuä huȩnȩ aditö icuttumä, juhua'a yabonö sacrificios jȩpo̧co̧tö̧ pajatö. Ja̧'hua̧nö̧ jö̧ttö̧mä̧ suronä jȩtto̧mȩnä̧, ya'utenä aditö tticu o'ca'a, jȩttö̧mä̧ yoröiso amöcuädocotö pajatö juhua'a yabonö.

³ Ja̧'hua̧nö̧ ja̧'a̧nä̧ ja̧u̧ sacrificios jȩtto̧mȩnä̧, koro a̧'ȩ'i̧nä̧, koro a̧'ȩ'i̧nä̧ suronä jȩttö̧ amöcuädätödo.

⁴ Iso päi'önä pä̧cä̧yö̧'i̧nä̧, o̧vȩja̧stö̧'i̧nä̧ ttucuoja päcua'acutä yoröiso suronä jȩttö̧ jȩpö̧ icuocödo.

⁵ Ja̧'hua̧nö̧ ja̧'a̧ttö̧ Cristo, pi̧jä̧ra̧'a̧ ichö, Diosrö pä'inödo: Sacrificios'inä, ofrendas'inä äji cuäcuähuotöttö pä'ocöjä. Ttö chöäre jä̧ttä̧pä̧ya̧nä̧ aditö cuiyinäcusä.

⁶ Äji cuäcuähuotö ku icu ofrenda päi'önä'inä, sacrificios jȩtta̧'a̧'i̧nä̧ suronä jȩttö̧ jȩpö̧ tticua pä'ö jȩä̧cuä̧huä̧ kö'cocöjä.

⁷ Ja̧u̧nu̧ o'ca'a pä'inödo: “Dios, ucuru pä̧huä̧ rö̧jo̧mȩnä̧, cuyäru'tänä ttörö huȩyu̧cu̧'a̧nö̧ jȩpö̧ ichösä,” pä'inödo Cristo.

⁸ “Äcuomenä äji cuäcuähuotörö ofrendas'inä, sacrificios'inä kö'cocödo Dios”, päa'a. “Ja̧'hua̧ta̧nö̧ äji cuäcuähuotörö ku tticuomenä sacrificios päi'önä, hueähuä huȩnȩ hueö'a̧nö̧ jȩtto̧mȩnä̧, suronä jȩttö̧ jȩpö̧ tticua pä'ö kö'cocödo”, päa'a.

⁹ Ja̧u̧nu̧ o'ca'a päa'a: “Dios, ucuru pä̧huä̧ rö̧jo̧mȩnä̧ jȩpö̧ ichösä.” Ja̧'hua̧nö̧ päomenä, pä'äji sacrificios jȩtti̧nö̧ do'opö icu, koro jareö sacrificio i'cächösä pä'inödo Cristo.

¹⁰ Jesucristo, Diosrö pä̧huä̧ rö̧jo̧mȩnä̧, chutä jä̧ttä̧pä̧ya̧ o'ca toi'önärö sacrificio päi'önä ya'utenätä iyähua'attö, Dios ujuturu aditö icuinödo.

¹¹ Judíos ttö̧ja̧ttö̧ sacerdotes huotö mo̧ro̧ji̧nö̧ a̧'u̧cuä̧ sacrificios jȩpä̧tö̧do. Koronö'inä, koronö'inä jȩtto̧mȩnä̧, ji̧yȩä̧cuȩtä̧, suronä jȩttö̧ jȩpö̧ icuocö juäitä jȩpä̧tö̧do.

¹² Ja̧'hua̧nö̧ ja̧'a̧nä̧ Jesucristo ya'utenätä iyähuinödo, suronä jȩttö̧ 'cuäopönä jȩpö̧ icua pä'ö. Ja̧u̧nu̧ o'ca'a Dios u̧huo̧jua̧'a̧nä̧ pä̧mä̧di̧nö̧do.

¹³ Ju̧huȩnȩ tta̧'ä̧rö̧do, chutä aboiyotörö ö̧jä̧pö̧ dȩa̧'a̧ ötome jubö päi'önä.

¹⁴ Iso päi'önä chutä ya'utenä ofrenda jȩpö̧ o'ca toi'önärö aditö icuä̧u̧ru̧ adihuä isotö pätti'önä jȩi̧nä̧u̧do.

¹⁵ Espíritu Santo'inä ja̧u̧tä̧ ji'äudo. Äcuomenä pä'inödo:

¹⁶ Ja̧u̧nu̧ pä̧nä̧ o'ca'a, jareö huȩnȩ jahuätörö chi̧yä̧cuȩmä̧, pa̧'a̧nö̧ jä̧cua̧'a̧, pä'ödo Tu̧ru̧hua̧: Ttö huedömä ttami iso'quinä chiyäcuötö. Ttamöcuädönä chi̧huȩyu̧tä̧cua̧sä̧ ttö huedömä.

¹⁷ Ja̧u̧nu̧ o'ca'a pä'ödo: Pä'äji ta'anö yoröiso amöcuädocösä suronä jȩttö̧mä̧.

¹⁸ Ja̧'hua̧ ja̧'a̧ttö̧ suronä jȩttö̧mä̧ jȩpö̧ tticuomenä, juhua'a yabonö ofrendas jȩä̧cuä̧huö̧cö̧do suronä jȩttö̧ micuä päi'önä.

Diosrö tötö'cöhuächö huȩnȩ

^19-20 Ja̧'hua̧nö̧ ja̧'a̧ttö̧ chö̧jä̧hua̧tö̧, jitämä Jesucristo ucuojanä esetö, eseunu dotächö'a̧nö̧ ja̧'a̧ Ji̧nä̧ Isocu Adihuo̧ca̧cu̧, chutä jä̧ttä̧pä̧ya̧nä̧ jareö kä̧cuä̧huä̧ mä̧nä̧, chutä iyinä̧mä̧nä̧ i̧sä̧ta̧ abonä 'chä̧nö̧.

²¹ Dios ö̧jo̧mȩttö̧ Jesús ji̧nä̧ isocu sacerdote ru̧hua̧ päi'önä kö̧ ujuturu.

²² Ja̧'hua̧nö̧ ja̧'a̧ttö̧ tami iso'quinä adiu amöcuädö, iso päi'önä esetö kä̧nö̧, Diosrö tötö'cöhuächö'a̧nö̧ ja̧'a̧. Ujutu suronä jȩti̧nö̧ tamöcuädö juiya pä'ö, chutä aditö icuinö tami iso'qui. Ujutu jättäpäyotörö'inä adihuoya, päcuäoyanä töcö icuinä̧u̧jä̧.

²³ Ja̧'hua̧nö̧ tesetomenä, koro tamöcuädoca'a, adiunätä tta̧tä̧rö̧'a̧nö̧ ja̧'a̧. Dios ujuturu iya päinö, o'ca juiyönä i̧yä̧cua̧ päinö ta'anö.

²⁴ Korotö, korotönörö adiu repe'ö, adihuä juäi'inä jȩta̧ pä'ö ppätädö'a̧nö̧ ja̧'a̧, jahuätö'inä korotörö repe'ö, adiu jȩttä̧cua̧'a̧nö̧.

²⁵ Korotö cultora̧'a̧, Diosrö ttucuocuomecu 'cho̧co̧tö̧ jȩttö̧'a̧nö̧mä̧, jȩtö̧ juiyö'a̧nö̧ ja̧'a̧ ujutumä. Ujutumä, korotö korotönörö juhua'a yabonö adiu ppätädö'a̧nö̧ ja̧'a̧. Iso päi'önä Tu̧ru̧hua̧ ichä̧cuȩ mo̧ro̧ ötö'cöhuächa'a topö, ja̧'hua̧nö̧ jȩtö̧'a̧nö̧ ja̧'a̧.

²⁶ Iso päi'önä huȩnȩ esetö tu̧huo̧ju̧ o'ca'a, juhua'a yabonö ujuturutä pä̧huä̧ rö̧jö̧tä̧ suronä jȩtö̧ttö̧mä̧, juhua'a yabonö sacrificios ujutu suronä jȩtö̧ jȩpö̧ icuähuä juiyäcua'a ujuturu.

²⁷ Ja̧'hua̧nö̧ jȩtö̧ttö̧mä̧ rö̧ȩnä̧ suronä ro̧ȩcuä̧cu̧, ocurä rö̧arä cuoaräcu, o'ca toi'önä Dios aboiyotörö be'epäjipö icuähuä, tta̧huä̧ra̧'a̧ ujuturu.

²⁸ Ya̧tȩ, ta̧ju̧nu̧, huämetucuänö ttä'ca jo̧mȩttö̧, Moisés hueähuä huȩnȩ jȩpo̧cö̧mä̧, jahuätö jittähuomenä, ja̧u̧ru̧ juhua'a yabonö amöcuädäcuähuä juiyönä cuä'ö tticuinäcudo suronä jȩpi̧nö̧rö̧.

²⁹ Ya̧tȩ, Dios I̧tti̧rö̧ suronä amöcuädö jȩpö̧'i̧nä̧, chutä ucuoja kö'cocö'inä, Espíritu Santo ja̧u̧ru̧ repe'örö, suronä ucuocu'inä, ¿tta̧'a̧nö̧ rö̧ȩnä̧ ro̧ȩcuä̧ ȩmä̧cua̧'a̧jä̧ttö̧? Ja̧u̧tä̧ ucuoja, jareö huȩnȩ iso päi'önä huȩnȩ ja̧'a̧. Ja̧'hua̧ta̧nö̧ ja̧u̧tä̧ ucuoja ja̧u̧ru̧ aditö icuoya.

³⁰ Tu̧ru̧hua̧ pa̧'a̧nö̧ pä'inö huo̧juä̧tö̧jä̧: “Ttömä ro̧ȩcuä̧ Ru̧hua̧sä̧. Ttötä ro̧dȩpä̧cua̧sä̧.” Ja̧'hua̧ta̧nö̧ pä'inödo: “Tu̧ru̧hua̧mä̧, umöhuäyotörö ro̧ȩpä̧cua̧.”

³¹ ¡Iso päi'önä Dios kö̧rö̧ u̧mö̧nä̧ ma̧'ö̧ yoröiso surojäcua'a!

³² Ja̧'hua̧nö̧ ja̧'a̧nä̧ pä'äji tȩa̧u̧ jareönä cuesetätucuomenä, rö̧ȩnä̧ rohuäu kä̧nö̧, cuami 'qui'ächö ubara ttucuhuinätucumä amöcuädätucui.

³³ Ucututtu korotö, o'ca toi'önä ttä'ca jo̧mȩttö̧ suronä ucuocu jȩtti̧nä̧u̧jä̧. Korotömä jahuätörö ja̧'hua̧nö̧ 'cuäopa'a topö, ubara ttu'inätöjä.

³⁴ Ja̧'hua̧ta̧nö̧ cärenä pȩjä̧tö̧rö̧ re rö̧jö̧nä̧ topö amöcuädinätöjä. Cuhuäretucu 'chottipomenä, ja̧'a̧tä̧ eseunu to̧pä̧ri̧nä̧tö̧jä̧. Ja̧'hua̧nö̧ jȩtta̧'a̧ ja̧u̧ juäittö'inä abonänö adihuä juäi, yoröiso beipocö juäi, mo̧ro̧jä̧ra̧'a̧ cu̧ju̧nä̧rä̧tu̧cua̧'a̧ huo̧jui̧nä̧tö̧jä̧.

³⁵ Ja̧'hua̧ ja̧'a̧ttö̧ ja̧u̧ cuesetätucumä, jarocuhui'ätucuä'. Ja̧u̧ cuesetätucumä, adihuä juäi i̧'cä̧chä̧cua̧ ucuturu.

³⁶ Ucutumä Diosrö pä̧huä̧ rö̧jo̧mȩnä̧ jȩcu̧'ä̧tu̧cua̧ pä'ö, cuami 'quicuhuächi'ätucu'a̧nö̧ ja̧'a̧. Ja̧'hua̧nö̧ jȩpö̧, Dios iya päinömä cuȩmä̧cuo̧tö̧jä̧.

³⁷ Huȩyu̧cuä̧ Huȩnȩ, päa'a: Jurunänö, iso päi'önä jurunänö i̧chä̧cua̧mä̧ i̧chä̧cua̧. Recuo tta̧'ä̧ro̧cö̧.

³⁸ Ja̧'hua̧nö̧ ja̧'a̧nä̧ adiu jȩpö̧ chȩmä̧cu̧mä̧, Diosrö esetö ö̧jä̧cua̧. Juhuorö'inä suronä jȩa̧ pä'ö ppa̧huä̧chö̧ttö̧mä̧, ja̧u̧ru̧ esehuocö chä̧cua̧sä̧, päa'a.

³⁹ Ja̧'hua̧nö̧ ja̧'a̧nä̧ o'ca'acu ppa̧'ä̧chö̧, be'ipächätö isotömäcö̧jä̧ ujutumä. Ujutu Diosrö esetätöjä. Ja̧'hua̧nö̧ esetö kä̧nö̧, ta̧'cua̧ru̧hua̧rö̧ adiu tta̧'ä̧rä̧cuä̧huä̧tö̧jä̧.