Gálatas 6 - TÄ̧DO Ä̧CUÄ̧ I̧HUȨNȨ

Korotö korotönö ppädäcuähuä huȩnȩ

¹ Chö̧jä̧hua̧tö̧, ya̧tȩ surojönä ma̧'ä̧chi̧nö̧rö̧ tocu'ätucuttumä, ucutu adiu rö̧ȩnä̧ esetätömä pä'äji ta'anö Dioscu ppa̧huä̧cha̧ ppä'ädätucuirö. Ja̧'hua̧nö̧ ja̧'a̧nä̧ ucutu cuami iso'quitucunä adiu amöcuädö ppä'ädätucuirö. Ja̧'hua̧ta̧nö̧ ucutu o'ca toi'önä ttu̧ȩcuä̧nä̧ tta̧'ä̧rä̧cuä̧huä̧tu̧cui̧, ucuturu'inä surojö 'cuäopö juiyäcua'a̧nö̧.

² Ja̧'hua̧ta̧nö̧ korotö korotönö surojö 'cuäopomenä, ppä'ädäcuähuätucui. Ja̧'hua̧nö̧ jȩpö̧ Cristo hueähuä jȩcu̧'ä̧cuo̧tö̧jä̧.

³ Ya̧tȩ chutä amöcuädäcuäutä ttö̧ja̧ ttucuotattö pä'äumä usurä i̧sa̧ ja̧'a̧nä̧, chutätä yapareu pä'äu.

⁴ O'ca toi'önä ka̧cuä̧mö̧ tottäcuäu'a̧nö̧ ja̧'a̧ jitötä ttamönä jȩttö̧. Ja̧'hua̧nö̧ jo̧mȩnä̧ adiu jȩpö̧sä̧ päöttömä, chutä amönätä ucuotäcuäu korotörö ucuotäcuähuä juiyönä.

⁵ O'ca toi'önä surojö 'cuäopomenä, jitötä ttamönätä ttami 'quittächi'ö'a̧nö̧ ja̧'a̧.

⁶ Ya̧tȩ adihuä juäi huȩnȩ ä̧ju̧cu̧mä̧, churutä huo̧juȩtö̧rö̧ ppä'ädö iyö'a̧nö̧ ja̧'a̧ koro juäi u̧ju̧nä̧rö̧ juäittö.

⁷ Ucututä cuamönätucumä yapareu cuamöcuädäcuähuätucuä'. Diosmä yoröiso ya̧'ä̧huȩ'ä̧cuä̧huo̧cö̧. Ya̧tȩ ku̧nu̧mä̧, u̧ju̧nu̧ u̧huä̧ju̧tä̧ ȩmä̧cua̧.

⁸ Ya̧tȩ churutä pä̧huä̧ rö̧jö̧ amöcuädötä ku̧nu̧mä̧, ja̧u̧ chutä amöcuädö hua'aretä ȩmä̧cua̧. Ja̧'hua̧nö̧ ja̧'a̧nä̧ Espíritu Santorötä pä̧huä̧ rö̧jo̧mȩnä̧ u̧ju̧nu̧ttu̧mä̧, ja̧u̧ru̧ Espíritu Santo kä̧cuä̧huä̧ i'co i̧yä̧cua̧.

⁹ Ja̧'hua̧nö̧ ja̧'a̧ttö̧ adiu jȩpö̧mä̧ 'cuätächi'ö juiyö'a̧nö̧ ja̧'a̧. Ja̧'hua̧nö̧ 'cuätächi'ö juiyöttömä, churutä pä̧huä̧ rö̧jo̧mȩnä̧ tȩmä̧cuo̧tö̧jä̧.

¹⁰ Ja̧'hua̧nö̧ ja̧'a̧ttö̧ koronö'inä o'ca toi'önärö adiu jȩtö̧'a̧nö̧ ja̧'a̧. Iso päi'önä tö̧jä̧hua̧tö̧rö̧ Diosrö esetätörö adiu jȩtö̧'a̧nö̧ ja̧'a̧.

Röjinä teähuinö huȩnȩ

¹¹ Topätucui. Pi̧yȩ chi̧huȩyu̧tu̧mä̧ bäreunä huȩyu̧tu̧sä̧ ucuturu, ttötä chamönä chu̧mö̧nä̧.

¹² Circuncisión jȩcu̧'ä̧tu̧cua̧ pä'ö hue'ätömä, jahuätömä ttö̧ja̧ adiu ttucuotatö pä'ötä jȩpä̧tö̧. Ja̧'hua̧ta̧nö̧ Cristo dau isodänä 'corupäi'inö huȩnȩ ttesetomenä, ttö̧ra̧huä̧rö̧ juiyatö pä'ö jȩpä̧tö̧.

¹³ Iso päi'önä circuncisión jȩpä̧tö̧'i̧nä̧ hueähuä huȩnȩ o'ca juiyönä hueömä jȩpo̧co̧tö̧. Ja̧'hua̧nö̧ ja̧'a̧nä̧ ucutu circuncisión jȩcu̧'ä̧tu̧cua̧ pä'ätö, jitötä ttu̧huo̧juȩti̧nö̧ jȩtti̧yä̧u̧ adiu ttucuocuäcua'a̧nö̧ jahuätörö.

¹⁴ Ttömä ucuturu chu̧huo̧juȩti̧nö̧mä̧ adiu huo̧juȩti̧nö̧sä̧ päda pä'ocösä. Ji̧yȩä̧cuȩtä̧ Chu̧ru̧hua̧ Jesucristo dau isodänä 'corupäi'inötä, ja̧u̧tä̧, adiu chucuocua pä'ösä. Ja̧u̧ Cristorö chesetomenä, pi̧jä̧ jähuä 'corupäi'ina'a jä̧cu̧sä̧ ttömä. Ja̧'hua̧ta̧nö̧ pi̧jä̧ jähuä pä̧huä̧ juida'anä 'corupädi'ina'a ja̧'a̧.

¹⁵ Ja̧'hua̧ta̧nö̧ Cristo Jesúsru tesetomenä, circuncisión jȩä̧cuä̧huä̧'i̧nä̧, circuncisión jȩä̧cuä̧huo̧cö̧'i̧nä̧, yoröiso micuähuocö. Cristorö esetö jareönä ttö̧ja̧ päti'omenätä micuähua'a.

¹⁶ Ucutumä iso päi'önä Diosrö esetätömä, pi̧yȩ huȩnȩ jȩpö̧ ka̧cuä̧tö̧rö̧'i̧nä̧, o'ca toi'önä Dios i̧tti̧mö̧rö̧'i̧nä̧ eseäcuähuä iyäcua'a̧nö̧ Dios. Ja̧'hua̧ta̧nö̧ ucuturu'inä o'ca toi'önä Dios i̧tti̧mö̧rö̧'i̧nä̧ re rö̧jö̧nä̧ toäcua'a̧nö̧.

¹⁷ Jitä kä̧mä̧dö̧ yoröiso pä̧huä̧ juiyäcusä suräjuä huȩnȩ cucuocuätucuattö pä'ömä. Chöttahuiyä huahuächinö topö huo̧juä̧tö̧jä̧, Chu̧ru̧hua̧ Jesús u̧mö̧huä̧ya̧ cha'amä.

¹⁸ Chö̧jä̧hua̧tö̧, ujutu Tu̧ru̧hua̧ Jesucristo ucutu o'ca toi'önärö ppädäcua'a̧nö̧. Amén.