Gálatas 5 - TÄ̧DO Ä̧CUÄ̧ I̧HUȨNȨ

Cristorö esetö adiu cuettächö huȩnȩ

¹ Cristomä ujuturu surojöttö ejädö icuinö adiunätä cuetächa pä'ö. Ucuturu ejädö icuinö o'ca'a, cuami 'qui'ächi'ö cue'ächätucui, pä'äji ta'anö hueähuä huȩnȩ umöhuäyotö päi'äcuähuä juiyönä.

² Ä̧ju̧cuä̧tu̧cui̧ttö̧. Ttö Pablo pä'ösä ucuturu, ucutumä circuncisión jȩtta̧ huecuhuähuätucuttumä, Cristomä yoröiso ppädoco̧u̧jä̧.

³ Pä'äji ta'anö päda pä'ösä, ya̧tȩ circuncisión jȩttä̧cu̧mä̧, ja̧u̧mä̧ Moisés hueähuä huȩnȩ o'ca juiyönä jȩä̧cua̧.

⁴ Ucutumä Dios ȩmä̧tu̧cua̧cu̧ pä'ö hueähuä huȩnȩ jȩpä̧tö̧mä̧, Cristorö jaropi'inätöjä. Ucutumä Dios adiu ppädäcuähuättö'inä i̧mi̧cu̧nä̧ cue'ächätöjä.

⁵ Ujutumä Espíritu Santo ppäda'anä, Cristorö esetö tta̧'ä̧rä̧tö̧jä̧ Dios jȩa̧ pä'ö ja̧u̧cu̧ ji̧nä̧ ji̧yȩtȩ huotö ta pä'ö.

⁶ Ujutu Cristo Jesúsru tesetomenä, circuncisión jȩä̧cuä̧huä̧'i̧nä̧, circuncisión jȩä̧cuä̧huo̧cö̧'i̧nä̧ yoröiso micuähuocö ujuturu. Ujutumä Cristorö tesetötä adiu micuähua'a. Ja̧'hua̧ta̧nö̧ ja̧u̧ru̧ tesetomenä, tahuaruhuärö repetäu'a̧nö̧ ja̧'a̧.

⁷ Ucutumä adiunä jȩpö̧ ka̧cui̧nä̧tö̧jä̧. ¿Dihuä adihuä juäi jarocuhui'ätucunä jȩi̧nä̧tu̧cuä̧cu̧?

⁸ Dios ucuturu huoinö jähuämäcö̧ ja̧u̧mä̧.

⁹ Yoröiso cunichi'ätucuä': “Pan ppö̧ä̧mö̧ juäi i̧sa̧ppȩ ji̧'qui̧cha̧nö̧tä̧ isähuanä huihuatö rö̧ȩnä̧ ppö̧ä̧mi̧'ö̧.”

¹⁰ Ucuturu amöcuädö, Tu̧ru̧hua̧rö̧ ji̧nä̧ ya̧tȩrö̧ teseta'attö, ucutu i̧mi̧cu̧nä̧ huȩnȩ amöcuädocotöjä huo̧jua̧sä̧. Iso päi'önä Dios ö̧tä̧bo̧tä̧cua̧ ja̧u̧ru̧ ucuturu ja̧'hua̧nö̧ i̧mi̧cu̧nä̧ huo̧juȩtö̧rö̧.

¹¹ Juhuorö'inä chö̧jä̧hua̧tö̧, ttö ji̧nä̧ circuncisión jȩtta̧ pä'ö chu̧huo̧juȩtö̧ttö̧mä̧, judíos ttö̧ja̧ yoröiso ttö̧ra̧huä̧ro̧co̧cu̧sä̧. Ja̧'hua̧nö̧ jö̧ttö̧mä̧ Cristo dau isodänä 'corupäi'inö huȩnȩmä̧ ttä̧ju̧cuo̧mȩnä̧, ra̧huä̧ro̧co̧tö̧ pajatö a̧'cua̧ra̧'a̧.

¹² Ja̧'hua̧nö̧ ja̧'a̧nä̧ jahuätö circuncisión jȩcu̧'ä̧tu̧cua̧ pä'ö huo̧juȩtö̧, suronä jȩpä̧tö̧ ucuturu, jitötä ttamönätä 'cui'ocu tticuado ya'utettötä.

¹³ Chö̧jä̧hua̧tö̧, Dios ucutumä ttumöhuäyotö päi'önä cu̧ja̧cuä̧tu̧cu̧ juiya pä'ö huoinä̧u̧jä̧. Ja̧'hua̧nö̧ ja̧'a̧nä̧ adiunä kä̧nö̧, ucuturutä cuamönätucutä pä̧huä̧ rö̧jö̧mä̧ jȩcu̧'ä̧tu̧cu̧ juiyö'a̧nö̧ ja̧'a̧. Cuahuaruhuärö repe'ö kä̧nö̧, ka̧ra̧ ka̧ra̧nö̧ ppä'ädätucui.

¹⁴ O'ca juiyönä hueähuä huȩnȩmä̧ pi̧yȩ ji̧yȩtȩ hueähuänätä ttu̧huo̧ju̧: “Cua̧hua̧ru̧hua̧rö̧ repe'i, ucutä cuamönä repecuhuäu ta'anö.”

¹⁵ Ja̧'hua̧nö̧ ja̧'a̧nä̧ ucutu cuamönätucunä korotörö pä̧'o̧pä̧rö̧ rohuäu jȩcu̧'ä̧tu̧cu̧ttu̧mä̧, ttu̧ȩcuä̧nä̧ ka̧cuä̧tu̧cui̧, ucututä cuamönätucu becuhui'ächätucu juiyäcua'a̧nö̧.

Pi̧jä̧ ttö̧ja̧ ttamöcuädö huȩnȩ

¹⁶ Pi̧yȩjä̧ päda pädömä: Espíritu Santorö pä̧huä̧ rö̧jo̧mȩnä̧ ka̧cuä̧tu̧cui̧. Ja̧'hua̧nö̧ cu̧ja̧cuä̧tu̧cuo̧mȩnä̧mä̧, täcö ja̧u̧nu̧mä̧ cuamöcuädätucu pä̧huä̧ rö̧jo̧mȩnä̧mä̧ ka̧cuo̧co̧tö̧jä̧.

¹⁷ Ujutu tamönä pä̧huä̧ rö̧jö̧mä̧ Espíritu Santo jähuämäcö̧. Ja̧'hua̧ta̧nö̧ Espíritu Santomä ujutu tamönätä pä̧huä̧ rö̧jö̧mä̧ yoröiso kö'cocö. Espíritu Santo öjö'cö'inä, ujutu tamönä pä̧huä̧ rö̧jö̧'i̧nä̧ i̧mi̧cu̧nä̧ jö̧. Ja̧'hua̧nö̧ ja̧'a̧ttö̧ ucuturutä pä̧huä̧ rö̧jö̧mä̧ jȩcu̧'ä̧tu̧cu̧ juiyö'a̧nö̧ ja̧'a̧.

¹⁸ Ja̧'hua̧nö̧ ja̧'a̧ttö̧ Espíritu Santo ucuturu juȩpä̧rö̧ttö̧mä̧, ja̧u̧nu̧mä̧ täcö hueähuä huȩnȩmä̧ hueoco̧u̧jä̧.

¹⁹ Yoröiso huo̧juä̧huo̧tö̧ jitötä ttamönä ttamöcuädötä jȩpä̧tö̧mä̧. Jahuätömä nä̧tö̧rö̧ suronä usätö. Ka̧ra̧ irecuarö'inä suronä jȩpä̧tö̧. Jahuätörö pä̧huä̧ rö̧jo̧mȩnä̧ o'ca juiyönä suronä jȩpä̧tö̧.

²⁰ Ttö̧ja̧ a̧'u̧cuä̧ adicuä esetätö. Ja̧'hua̧ta̧nö̧ yuhuähuä mä̧ri̧mö̧rö̧ esetö jȩpä̧tö̧. Ja̧'hua̧ta̧nö̧ a'cuoyäunu sȩ'ȩpä̧rö̧ rohuähuätö. O'ca päi'önä ra̧huä̧ri̧pä̧tö̧. Jitörötä adihuomenätä jȩpä̧tö̧. Jitötä jö̧ ta'anö amöcuädätörö ca̧ca̧cuä̧rä̧tö̧.

²¹ Korotö ttu̧ju̧nä̧rö̧'a̧nö̧ ttu̧ju̧nä̧ra̧ pä'ätö. Korotörö cuä'ö icuätö. Fiesta jȩpö̧ rö̧ȩnä̧ tä̧'ä̧mä̧tö̧. Koro ja̧'hua̧ta̧nö̧ jö̧'i̧nä̧ jȩpä̧tö̧. Ucuturu ji'äusä ä'coji jidähuinö ta'anö, ja̧'hua̧nö̧ jȩpä̧tö̧mä̧ Dios ö̧jo̧mȩ rȩbȩhuo̧co̧tö̧.

²² Ja̧'hua̧nö̧ ja̧'a̧nä̧ Espíritu Santo ujuturu iyömä repeäcuähuä, eseäcuähuä, tami iso'quinä eseäcuähuä, ta̧'cua̧ pö̧nö̧ jö̧, korotörö adiu ppädäcuähuä, ucuotäcuähuä, o'ca juiyönä yaparehuäcuähuä juiyönä jȩä̧cuä̧huä̧.

²³ Ja̧'hua̧ta̧nö̧ Espíritu Santo iyömä korotörö ujututtu'inä abonänö adiu amöcuädäcuähuä'inä, tamönä tamöcuädötä jȩto̧ca̧'a̧ tami 'quiächi'äcuähuä'inä. Ja̧u̧ juäi surojö pä'ömä hueähuä huȩnȩ juiya'a.

²⁴ Iso päi'önä Cristorö esetätömä Cristocu daunä pȩ'o̧pö̧ ku̧ni̧nä̧tö̧ pi̧jä̧ jähuä jȩä̧cuä̧huä̧'i̧nä̧, jitötä ttamönä ttamöcuädö'inä.

²⁵ Ja̧'hua̧nö̧ Espíritu Santo ujurunä tö̧ja̧'a̧ttö̧, ja̧'hua̧ta̧nö̧ Espíritu Santo juȩpä̧ra̧tö̧ pätö'a̧nö̧ ja̧'a̧ o'ca juiyönä jȩtö̧mä̧.

²⁶ Adihuä isotöjä pätäu juiyö'a̧nö̧ ja̧'a̧, korotö ttö̧ra̧huä̧rö̧ juiyatö pä'ö. Ujutu tö̧'quȩtȩttö̧mä̧ korotö ttu̧ju̧nä̧rö̧'a̧nö̧ tu̧ju̧nä̧ra̧ pätö juiyö'a̧nö̧ ja̧'a̧.