Gálatas 1 - TÄ̧DO Ä̧CUÄ̧ I̧HUȨNȨ

Pablo Galacia rȩjȩnä̧ ka̧cuä̧tö̧rö̧ huȩyu̧tu̧ hueinö huȩnȩ

¹ Ttö Pablo Jesucristo huȩ'ä̧hua̧sä̧. Ja̧'hua̧ta̧nö̧ Tä'o Dios, Cristorö 'corupä'i'inätö ttö̧'quȩtȩttö̧ tto'ädinö'inä, huȩ'ä̧hua̧sä̧. Pi̧jä̧ ttö̧ja̧mä̧ hue'ähuocösä.

² Ttö'inä tö̧jä̧hua̧tö̧ chö̧jo̧mȩ ka̧cuä̧tö̧cu̧ huȩyu̧tu̧ hue'ätöjä pi̧yȩ huȩnȩ Galacia rȩjȩnä̧ ka̧cuä̧tö̧rö̧ iglesia ruhuärö ttucuocua pä'ö.

³ Tä'o Dios'inä, Tu̧ru̧hua̧ Jesucristo'inä ucuturu adiu ppättädäcua'a̧nö̧. Ja̧'hua̧ta̧nö̧ adiu kä̧cuä̧huä̧'i̧nä̧ ucuturu ttiyäcua'a̧nö̧.

⁴ Ja̧'hua̧ta̧nö̧ 'corujuoächa pä'ö iyähuinö ujutu suronä jȩtö̧ jȩpö̧ icua pä'ö, pi̧jä̧ surojä̧jä̧ttö̧ ȩma̧tö̧ pä'ö Tä'o Diosrö pä̧huä̧ rö̧jo̧mȩnä̧.

⁵ ¡Diosrö 'cuäopönä tesehuaja! Amén.

Koro huȩnȩ suronä jȩttö̧ jȩpö̧ icuähuä huȩnȩ juiya'a

⁶ Diosrö, Jesucristo ucuturu repea'attö huoinä̧u̧ru̧, koro huȩnȩ suronä jȩttö̧ jȩpö̧ icu pättö huȩnȩ i̧mi̧cu̧nä̧ jö̧ esetö o'ca päi'önä jarocuhui'ätucua'a chä̧ju̧cuo̧mȩnä̧, rö̧ȩnä̧ amöcuädösä ucuturu.

⁷ Koro huȩnȩ suronä jȩttö̧ jȩpö̧ icu pättö huȩnȩ iso päi'önä juiya'a. Korotö ucuturu suronä jȩpä̧tö̧mä̧ ka̧cuä̧tö̧. Jahuätömä pä̧huä̧ rö̧jä̧u̧ Cristo suronä jȩttö̧ jȩpö̧ icu huȩnȩ i̧mi̧cu̧nä̧ jö̧ cuesetiyätucuatö pä'ö.

⁸ Ja̧'hua̧nö̧ ja̧'a̧ ya̧tȩ ucuturu u̧huo̧juȩtö̧ttö̧mä̧ koro huȩnȩ, suronä jȩttö̧ jȩpö̧ icu pättö huȩnȩ, ujutu tu̧huo̧juȩti̧nö̧ttö̧'i̧nä̧ i̧mi̧cu̧nä̧ jö̧, ja̧u̧mä̧ Diostä ö̧tä̧bo̧tä̧cua̧. Ttörötä jö̧ttö̧'i̧nä̧ huäinä jä̧cua̧'a̧. Ja̧'hua̧ta̧nö̧ mo̧ro̧jä̧ra̧'a̧ttö̧ ángel ichö jö̧ttö̧'i̧nä̧ huäinä jä̧cua̧'a̧.

⁹ Ttö täcö ä'canä ji'ähuinösä. Jitä'inä ppa̧'ä̧dö̧ ji'äusä. Ya̧tȩ jiäuttumä koro huȩnȩ suronä jȩttö̧ jȩpö̧ icu pättö huȩnȩ ucutu cuesetinätucuttu'inä i̧mi̧cu̧nä̧ jö̧, ja̧u̧mä̧ Diostä ö̧tä̧bo̧tä̧cua̧.

¹⁰ Ja̧'hua̧nö̧ pädomenämä, ¿ttö̧ja̧ ttöjö'cattö pä'ö päda'a tä̧ji̧? Tta̧'a̧huä̧jä̧. Diostä öjö'cattö pä'ö pä'ösä. ¿Ttö̧ja̧ ttörö pä̧huä̧ rö̧jö̧ tottattö pä'ö jȩcha̧'a̧ tä̧ji̧? Ttö ji̧nä̧ ttö̧ja̧ ttöjö'cattö pä'ö jȩcha̧ pädöttömä, Cristomä u̧mö̧huä̧ya̧ pocö pajisä.

Dios Pablorö ȩmi̧nö̧ huȩnȩ

¹¹ Ja̧'hua̧nö̧ ja̧'a̧nä̧ pi̧yȩ cu̧huo̧juä̧tu̧cua̧ pä'ösä chö̧jä̧hua̧tö̧, suronä jȩttö̧ jȩpö̧ icu huȩnȩ, ttö jidäu huȩnȩ, pi̧jä̧ ttö̧ja̧ i̧sa̧ amöcuädömäcö̧.

¹² Pi̧jä̧ ttö̧ja̧ttö̧ ȩmo̧cö̧ pi̧nö̧sä̧. Ja̧'hua̧ta̧nö̧ yoröiso huo̧juȩcuo̧cö̧sä̧ pi̧jä̧ ttö̧ja̧ttö̧mä̧. Ja̧'hua̧nö̧ ttu̧huo̧juȩtä̧'i̧nö̧ juäimä, chutä Jesucristotä u̧huo̧juȩti̧nä̧cu̧sä̧.

¹³ Ucutu täcö ä̧ju̧cui̧nä̧tö̧jä̧ ttö ä'coji chö̧ji̧nö̧ huȩnȩ, judíos ttö̧ja̧ ttesetinö jȩchi̧nö̧ huȩnȩ. Ja̧'hua̧ta̧nö̧ huo̧juä̧tö̧jä̧, Diosrö esetätörö ra̧huä̧rö̧ suronä jȩchi̧nö̧. Yoröiso toönä bettipächa pä'ö amöcuädö jȩpi̧nö̧sä̧.

¹⁴ Judíos ttö̧ja̧ ttesetinö esetö korotö chahuaruhuä ttö ta'anö huotöttö'inä abonänö rö̧ȩnä̧ esetinösä ttömä, chä̧do̧tö̧ mi̧nä̧ jȩtti̧nö̧ juäi rö̧ȩnä̧ jȩcha̧'a̧ttö̧.

^15-16 Ja̧'hua̧nö̧ ja̧'a̧nä̧ chuhuäpächö juiyäi Dios ȩmi̧nä̧cu̧sä̧. Ja̧'hua̧ta̧nö̧ ttörö rö̧ȩnä̧ pä̧huä̧ rö̧jä̧cu̧ huoinäcusä. Juhuorö'inä churutä pä̧huä̧ rö̧jo̧mȩnä̧, I̧tti̧rö̧ chu̧huo̧jua̧ pä'ö hueinäcusä, judíos huocotö ttö̧'quȩtȩ suronä jȩttö̧ jȩpö̧ icu huȩnȩ jidähuiyatö pä'ö. Dios ttörö ja̧'hua̧nö̧ hueomenä, korotöcu ucuocuäcuähuocö pi̧nö̧sä̧.

¹⁷ Ttö ä'canä Jesús hue'ähuotö pi̧nä̧tö̧rö̧'i̧nä̧ topö 'cho̧cö̧ pi̧nö̧sä̧ Jerusalén ötahuiyära̧'a̧. Ja̧'hua̧nö̧ ja̧'a̧nä̧ recuo tta̧huä̧rä̧cuä̧huä̧ juiyönä Arabia rȩjȩra̧'a̧tä̧ i̧huä̧ji̧nö̧sä̧. Ju̧huȩnȩ o'comenä, Damasco ötahuiyära̧'a̧ ppa̧'ä̧chi̧nö̧sä̧.

¹⁸ Huäbodäcuä a̧'ȩ ji̧nö̧ o'ca'atä 'chi̧nö̧sä̧ Jerusalén ötahuiyära̧'a̧mä̧. Ja̧u̧nu̧tä̧ topinösä Pedrorö. Ttö̧jä̧pö̧ttö̧nö̧ ya'ute mo̧ro̧ ki̧nö̧sä̧ ja̧u̧cu̧.

¹⁹ Ja̧'hua̧nö̧ ja̧'a̧nä̧ korotö Jesús hue'ähuotörö topocö pi̧nö̧sä̧. Ya̧tȩrö̧tä̧, Tu̧ru̧hua̧ ö̧jä̧hua̧ Jacoborötä, topinösä.

²⁰ Dios ä'ca jo̧mȩttö̧ iso päi'önä pä'ösä ucuturu. Chi̧huȩyu̧tu̧mä̧ iso päi'önä huȩnȩ pä'ösä.

²¹ Ja̧u̧nu̧ o'ca'a Siria rȩjȩra̧'a̧'i̧nä̧, Cilicia rȩjȩra̧'a̧'i̧nä̧ i̧hui̧nö̧sä̧.

²² Chö̧jä̧hua̧tö̧ Cristorö esetinätö, Judea rȩjȩ ttö̧ja̧ yoröiso ttieruhuinäcusä.

²³ Korotö pättö huȩnȩtä̧ ä̧ju̧cui̧nä̧tö̧mä̧ pä'inätö: “Ä'coji ujuturu, Cristorö esetätörö, suronä jȩpi̧nö̧mä̧ suronä jȩttö̧ jȩpö̧ icu huȩnȩ be'epö icua pä'inömä, jitämä ja̧u̧ huȩnȩtä̧ ji'äu cue'ächö,” pätta'a ä̧ju̧cui̧nä̧tö̧.

²⁴ Diosrö adiu esehuinätö ttörö ä̧ju̧cu̧.