Filipenses 4 - TÄ̧DO Ä̧CUÄ̧ I̧HUȨNȨ

Tu̧ru̧hua̧rö̧ 'cuäopönä eseäcuähuä huȩnȩ

¹ Ja̧'hua̧nö̧ ja̧'a̧ttö̧ adihuä chö̧jä̧hua̧tö̧, iso päi'önä ucuturu repe'ö tocha pä'ösä. Ucuturu topö eseusä. Ja̧'hua̧ta̧nö̧ ucutumä chaditinö micuä huotöjä. 'Cuäopönä Tu̧ru̧hua̧rö̧ esetö, cuami 'qui'ächi'ö ka̧cuä̧tu̧cui̧, chahuaruhuä chö̧jä̧hua̧tö̧.

² Evodiarö'inä, Síntiquerö'inä ji'äusä, Tu̧ru̧hua̧nä̧ tö̧jä̧hua̧tö̧ ttamöcuädö'a̧nö̧, ji̧nä̧ yo̧mȩtȩ amöcuädätucui.

³ Ucuru'inä chu̧mö̧huä̧ya̧ adiu jȩpi̧nö̧rö̧, ji'äusä jahuätörö, tö̧jä̧hua̧tö̧rö̧, ppäcuhuäda pä'ö. Jahuätö adiu aditinätö ttöcu, ttö̧ja̧ suronä jȩttö̧ jȩpö̧ icu huȩnȩ ji'äu. Ja̧'hua̧ta̧nö̧ Clementecu, korotöcu ji̧nä̧ yo̧mȩtȩ aditinätöjä. Jahuätö tti̧mi̧mä̧ huȩyu̧cua̧'a̧ ka̧'a̧ kä̧cuä̧huä̧ i'co cuyäru'tänä.

⁴ Tu̧ru̧hua̧ i̧mi̧nä̧ 'cuäopönä eseäcuähuätucui. Pä'äji ta'anö ji'äusä: ¡Eseäcuähuätucui!

⁵ Adiu amöcuädö jȩcu̧'ä̧tu̧cua̧ja̧ o'ca toi'önärö. Tu̧ru̧hua̧ ichäcuome tö'cöhuächa'a.

⁶ Koro koronö cuamöcuädätucuä'. 'Cuäopönä Diosrö jä'epö ucuocuätucui. Ja̧'hua̧ta̧nö̧ eseunu ucuocuätucuirö.

⁷ Ja̧'hua̧ ja̧'a̧ttö̧ Dios ttö̧ja̧'i̧nä̧ yoröiso ttierunä i̧yä̧cua̧ ucuturu cuami iso'quitucunä eseäcuähuä. Ucutu Cristo Jesúsru cuesetätucuomenä, ja̧u̧ eseäcuähuä cuami iso'quitucunä'inä, cuamöcuädätucunä'inä tta̧huä̧rä̧cua̧.

Adihuä juäitä amöcuädäcuähuä huȩnȩ

⁸ Jitämä chö̧jä̧hua̧tö̧, röjinä ji'äusä. Amöcuädätucui o'ca juiyönä iso päi'önä huȩnȩ'i̧nä̧, ttö̧ja̧rö̧ adiu ucuotäcuähuä'inä, adiu jȩä̧cuä̧hua̧'i̧nä̧, surojö juiyönä amöcuädäcuähuä'inä, adiu topö jȩä̧cuä̧huä̧'i̧nä̧, adiu ucuocuäcuähuä'inä. Ja̧'hua̧ta̧nö̧ o'ca juiyönä adihuä juäi'inä, adiu eseäcuähuä'inä amöcuädätucui.

⁹ O'ca juiyönä chu̧huo̧juȩti̧nö̧ ucuturu, ttö jȩchi̧nö̧ tocu'inätucu'inä, ttö jidähuinö cuä̧ju̧cui̧nä̧tu̧cu̧'i̧nä̧ jȩpä̧tu̧cui̧. Ja̧'hua̧nö̧ jȩcu̧'ä̧tu̧cuo̧mȩnä̧, Dios eseäcuähuä i̧sa̧ ö̧jä̧cua̧ ucutucu.

Filipenses ttö̧ja̧ ofrenda hue'inätödo Pablorö

¹⁰ Jitä'inä Chu̧ru̧hua̧rö̧ rö̧ȩnä̧ eseusä ucuturu, pä'äji ta'anö cuamöcuädätucuomenä ttörö. Juhuorö'inä ttörö unichi'inätöjä pä'ömä, pä'ocösä. Ja̧'hua̧nö̧ ja̧'a̧nä̧ ttö huo̧jua̧sä̧, hueyecuina'a huecuhuätucua pä'ö.

¹¹ Ja̧'hua̧ta̧nö̧ juida'attömä pä'ocösä. Iso päi'önä rö̧ȩnä̧ chu̧ju̧nä̧ro̧mȩnä̧'i̧nä̧, ji̧'qui̧cha̧nö̧tä̧ chu̧ju̧nä̧ro̧mȩnä̧'i̧nä̧ eseunu chö̧ja̧ pä'ö huo̧jui̧pi̧nö̧sä̧.

¹² Ttömä pi̧jä̧ttö̧ jui̧'a̧ chö̧ja̧ pä'ö'inä, huo̧jua̧sä̧. Ja̧'hua̧ta̧nö̧ rö̧ȩnä̧ ka̧'a̧nä̧ chö̧ja̧ pä'ö'inä, huo̧jua̧sä̧. Ja̧u̧ juäi huo̧jui̧pi̧nö̧sä̧, koromettö'inä 'cuäopönä eseunu chö̧ja̧ pä'ö. Ja̧'hua̧ta̧nö̧ suhuädi'önä kä̧nö̧'i̧nä̧, ppäi ttu'u kä̧nö̧'i̧nä̧, rö̧ȩnä̧ ka̧'a̧nä̧'i̧nä̧, jui'ö kä̧nö̧'i̧nä̧ eseunu kö̧sä̧.

¹³ Iso päi'önä Cristo ttörö ppäda'attö, o'ca juiyönä ttörö 'cuäopä̧cuȩ chu̧juru̧huä̧cua̧sä̧.

¹⁴ Ja̧'hua̧nö̧ ja̧'a̧nä̧ ucutu ttörö ppä'ädö adiu jȩpi̧nä̧tö̧jä̧, suronä 'cuäopa'anä ttörö.

¹⁵ Ucutu Filipos ötahuiyättö huo̧juä̧tö̧jä̧, äcuomenä Macedonia rȩjȩttö̧ rä'opö, ttö̧ja̧ suronä jȩttö̧ jȩpö̧ icu huȩnȩ ji'äu chi̧'cho̧mȩnä̧, ucututä iglesiattö ttörö ppä'ädö iyinätöjä, ucuturu adihuä huȩnȩ ji'äu ppädädinö o'ca'a. Korotömä yoröiso ppä'ädocotö pi̧nä̧tö̧.

¹⁶ Ja̧'hua̧ta̧nö̧ ttömä jui'ö chö̧jo̧mȩnä̧ Tesalónica ötahuiyänä, koronö'inä ofrenda ppä'ädö hue'inätöjä ttörö.

¹⁷ Ja̧'hua̧nö̧ pädomenä, pä'äji ta'anö huecuhuätucua pä'ö amöcuädocösä. Iso päi'önä huecuhuätucuomenä, Diosrö eseusä, Dios ä'ca jo̧mȩttö̧ adihuä juäi jȩpä̧tö̧jä̧ pä'ö.

¹⁸ Jitämä o'ca juiyönä ȩmi̧nö̧sä̧. Ja̧'hua̧nö̧ ja̧'a̧ttö̧ rö̧ȩnä̧ ku̧nä̧rö̧sä̧. Epafroditocu röjinä huecuhuinätucu iso päi'önä pärocuä rö̧ȩnä̧ ku̧nä̧rö̧sä̧. Ja̧u̧ huecuhuinätucua'a, ofrenda amehuoyattö ameu'a̧nö̧ ji̧na̧'a̧ ttörö. Ja̧'hua̧ta̧nö̧ sacrificio jȩpö̧ Dios eseunu amöcuädö'a̧nö̧ ji̧na̧'a̧.

¹⁹ Dios adihuä juäi u̧ju̧nä̧rö̧ttö̧ ȩmö̧, eseunu i̧yä̧cua̧ ucuturu o'ca juiyönä, Cristo Jesúsru cuesetätucua'attö.

²⁰ ¡'Cuäopönä tesehuäcuähuätucuaja Tä'o Diosrö! Amén.

Röjinä teähuinö huȩnȩ

²¹ O'ca toi'önä Dios i̧tti̧mö̧rö̧ Jesucristo i̧mi̧nä̧ te'ähuätucui. Korotö chö̧jä̧hua̧tö̧, ttöcu cue'ächätö, te'ähuätö ucuturu.

²² O'ca toi'önä pȩnȩ ka̧cuä̧tö̧mä̧ Dios i̧tti̧mö̧'i̧nä̧, romanos ttu̧ru̧hua̧ ojusodettö'inä te'ähuätö ucuturu.

²³ Ujutu Tu̧ru̧hua̧ Jesucristo ucutu o'ca toi'önärö ppädäcua'a̧nö̧. Amén.