Filipenses 3 - TÄ̧DO Ä̧CUÄ̧ I̧HUȨNȨ

Ttamönä esetäcuähuänämä surojö

¹ Jitämä chö̧jä̧hua̧tö̧, esehuätucui Tu̧ru̧hua̧nä̧. Pä'äji chi̧huȩyu̧ti̧nö̧ ucuturu, jitä'inä pä'äji ta'anö chi̧huȩyu̧ta̧ pä'ö 'cuä'ächi'ocösä. Iso päi'önä adiu päa'a ucuturu.

² Korotö ä̧hui̧ri̧tö̧ jȩttö̧'a̧nö̧ suronä jȩpä̧tö̧rö̧'i̧nä̧, ttidepä 'cui'opätörö'inä adiu ttu̧ȩcuä̧nä̧ ka̧cuä̧tu̧cui̧.

³ Iso päi'önä ujutumä adiunä circuncidados huotöjä. Ujutumä Cristo Jesúsru esetö Espíritu Santonä eseunu amöcuädö ucuocuätöjä Diosrö. Ujutumä tidepä jähuämä ta̧'cua̧ huȩnä̧ro̧co̧tö̧jä̧.

⁴ Juhuorö'inä ji̧nä̧ ttörö pä̧huä̧ rö̧jö̧ttö̧mä̧, chidepä jähuä cha̧'cua̧ chu̧huȩnä̧rö̧'a̧nö̧ ja̧'a̧. Korotömä ja̧u̧ juäi tta̧'cua̧ ttu̧huȩnä̧ra̧ pättöttömä, ttömä jahuätöttö'inä abonänö rö̧ȩnä̧ cha̧'cua̧ chu̧huȩnä̧rö̧'a̧nö̧ ja̧'a̧.

⁵ Ttörö ko̧ro̧mö̧ttö̧nö̧ huäbodäcuä mo̧ro̧ chuhuäpächinö o'ca'a, circuncisión jȩpi̧nä̧tö̧. Ttömä Israel ttö̧ja̧ i̧sa̧sä̧, Benjamín ahuaruhuättö. Iso päi'önä chuhuäpächinomettö hebreos ttö̧ja̧ i̧sa̧sä̧. Ja̧'hua̧ta̧nö̧ judíos ttö̧ja̧ hueähuä huȩnȩ jȩpö̧, fariseo i̧sa̧ pi̧nö̧sä̧.

⁶ Ja̧'hua̧nö̧ jȩpö̧, yoröiso suronä jȩpi̧nö̧sä̧ Diosrö esetinätörö. Judíos ttö̧ja̧ hueähuä huȩnȩ adiu jȩpö̧ kä̧cuä̧huä̧nä̧ adiu chö̧ja̧'a̧ttö̧, korotömä yoröiso suronä ucuocuocotö pi̧nä̧tö̧ ttörö.

⁷ Ja̧'hua̧nö̧ ja̧'a̧nä̧ ja̧u̧ juäi o'ca juiyönä pä'äji rö̧ȩnä̧ chesetinömä, jitämä yoröiso micuähuocö jä̧'i̧nö̧'a̧nö̧ jä̧cu̧sä̧, Cristorö cheseta'attö.

⁸ Ja̧'hua̧ta̧nö̧ koro'inä ttörö ppädö chesetinömä, yoröiso micuähuocö jä̧'i̧nö̧'a̧nö̧ jä̧cu̧sä̧. Koro, Chu̧ru̧hua̧ Jesucristorö huo̧jui̧cuä̧, iso päi'önä ttörö ppädötä amöcuädösä. Ja̧u̧ru̧ repe'ö, o'ca juiyönä pä'äji chesetinö, koro juäi icuicuä tticuipö'a̧nö̧ icuipinösä, Cristorö rö̧ȩnä̧ cheseta pä'ö.

⁹ Ja̧u̧cu̧tä̧ chö̧ja̧ pä'ösä. Jitämä hueähuä huȩnȩ jȩpö̧, chamönä cha̧'cua̧ adiu jȩchö̧mä̧ jui̧'a̧sä̧. Cristorö esetätörö Dios iyähuä cha̧'cua̧ adiu jȩchö̧mä̧ ku̧nä̧rö̧sä̧, Cristorö cheseta'attö.

¹⁰ Ttömä Cristorö rö̧ȩnä̧ chu̧huo̧jua̧ pä'ösä. Ja̧'hua̧ta̧nö̧ hua'arettö ttoächinö ujuru chu̧ju̧nä̧ra̧ pä'ösä. Ja̧'hua̧ta̧nö̧ ubara ttuhuinö ta'anö, ubara ttuda pä'ösä. Ja̧'hua̧ta̧nö̧ chutä 'corupäi'inö ta'anö 'corupädi'a pä'ösä.

¹¹ Ttö'inä hua'arettö ttodächa pä'ö tta̧'ä̧rö̧sä̧.

Adihuä juäicu rohuäcuähuä huȩnȩ

¹² Ttömä pä'ocösä täcö o'ca juiyönä ȩmä̧ji̧sä̧ pä'ö. Ja̧'hua̧ta̧nö̧ jitämä adihuä juäitä, surojö juiyönä jȩpö̧sä̧ pä'ö, pä'ocösä. Iso päi'önä Cristo Jesús ttörö ȩmi̧na̧'a̧ttö̧, chutä iyö juäi chu̧ju̧nä̧ra̧ pä'ö, kö̧sä̧.

¹³ Chö̧jä̧hua̧tö̧, ttömä ji'ähuocösä täcö ja̧u̧ ȩmä̧ji̧sä̧ pä'ö. Iso päi'önä pä'äji chesetinö juäimä unichi'ö kö̧sä̧, koro yodoji jä̧cuȩ chu̧ju̧nä̧ra̧ pä'ö.

¹⁴ Ttömä röji beipome amöcuädö kö̧sä̧, adihuä juäi chȩma̧ pä'ö. Ja̧u̧ adihuä juäinä ttörö ȩmö̧, Dios mo̧ro̧jä̧ra̧'a̧ ȩpä̧cua̧ ttörö.

¹⁵ Iso päi'önä ujutumä o'ca toi'önä adiu tesetöttömä, ji̧nä̧ yo̧mȩtȩ amöcuädajatöjä. Juhuorö'inä korotö ucututtu i̧mi̧cu̧nä̧ ttamöcuädöttömä, Dios u̧huo̧juȩtä̧cua̧ jahuätörö.

¹⁶ Ja̧'hua̧nö̧ ja̧'a̧nä̧ jitämä ji̧nä̧ ji̧yȩtȩ tesetinö amöcuädö juhua'a yabonö jȩtä̧tu̧cua̧ja̧.

¹⁷ Chö̧jä̧hua̧tö̧, ttö cuedächinö ta'anö cue'ächätucui. Ja̧'hua̧ta̧nö̧ korotö ujutu cuetächinö ta'anö cue'ächätörö topätucui.

¹⁸ Pä'äji recuo jidähuinö, pä'äji ta'anö ajuäu ji'äusä ucuturu. Korotömä recuätö Cristo dau isodänä 'corupäi'inö huȩnȩ aboiyotö ja̧'a̧nä̧, ka̧cuä̧tö̧ Diosrö esetätö ttö̧'quȩtȩnä̧.

¹⁹ Jahuätömä yoröiso ttottei'äcuotö. Jahuätömä cuä̧nö̧ ttu̧cuä̧ba̧ jähuätä amöcuädätö. Jahuätö koro juäi dä'äcu jȩä̧cuä̧huä̧ juäi, yoröiso eseunu jȩpä̧tö̧. Pi̧jä̧ jähuätä amöcuädätö.

²⁰ Ja̧'hua̧nö̧ ja̧'a̧nä̧ ujutumä pärocua'anä mo̧ro̧jä̧ ttö̧ja̧jä̧. Ujutumä eseunu tta̧'ä̧rä̧tö̧jä̧ Tu̧ru̧hua̧ Jesucristorö, ujutu suronä jȩtö̧ jȩpö̧ icuinörö, mo̧ro̧jä̧ra̧'a̧ttö̧ icha pä'ö.

²¹ Ja̧u̧ ichomenä, ujutu hua'ä tidepä jättäpäyotörö ö̧'ä̧ro̧tä̧cua̧, chutä jä̧ttä̧pä̧ya̧ öadihuä jö̧ ta'anö tö̧ja̧cua̧ pä'ö. Chutä ujurunä koro juäi o'ca juiyönä hueö 'cuäopä̧cuȩ ujurunä jȩä̧cua̧.