Filemón 1 - TÄ̧DO Ä̧CUÄ̧ I̧HUȨNȨ

Pablo Filemónrö huȩyu̧tu̧ hueinö huȩnȩ

¹ Ttö Pablo, Cristo Jesúsru cheseta'attö cärenä pä̧nö̧, tö̧jä̧hua̧ Timoteocu pi̧yȩ cuyäru huȩyu̧tu̧ hue'ätöjä ucu Filemónrö, ucuru repetäcuru, ujutucu adiu aditörö.

² Iglesia ruhuä cuojusodenä ca̧ca̧cui̧pä̧tö̧rö̧'i̧nä̧, töjähuaju Apiarö'inä, Arquiporö'inä huȩyu̧tu̧ hue'ätöjä. Ja̧u̧mä̧, Arquipomä, adihuä juäinä rohuäu ppä'ädö ujuturu.

³ Tä'o Dios'inä, Tu̧ru̧hua̧ Jesucristo'inä ucuturu adiu ppättädäcua'a̧nö̧. Ja̧'hua̧ta̧nö̧ adiu kä̧cuä̧huä̧'i̧nä̧ ucuturu ttiyäcua'a̧nö̧.

Filemón Diosrö esetö repeinö huȩnȩ

⁴ Ucuru amöcuädö Diosrö 'cuäopönä eseunu ucuocusä.

⁵ Tu̧ru̧hua̧ Jesúsru'inä, o'ca toi'önä Dios i̧tti̧mö̧rö̧'i̧nä̧ adiu esetö repecuhua'a ä̧ju̧cui̧nö̧sä̧.

⁶ Ttö Diosrö jä'epösä, ucuru ä̧ju̧cu̧ esetinätömä, o'ca juiyönä Cristo Jesúsru esetö ppädäcuähuä tu̧ju̧nä̧rö̧mä̧, adiu ttu̧huo̧jui̧'a̧ pä'ö.

⁷ Ucu korotörö repecuhua'a ä̧ju̧cu̧, rö̧ȩnä̧ eseunu amöcuädösä. Ucu, chö̧jä̧hua̧, Jesucristorö esetätörö ttami iso'quinä eseunu ttamöcuäda pä'ö ppä'ädinöjä.

Pablo, Onésimorö, ka̧ra̧cu̧ micuä juiyönä aditinörö i̧huȩyu̧ti̧nö̧ huȩnȩ

⁸ Ja̧'hua̧nö̧ ja̧'a̧ttö̧ Cristo huȩ'ä̧hua̧ cha'attö, ttörö pä̧huä̧ rö̧jö̧ttö̧mä̧ hue'ötä hue'ajisä ucuru.

⁹ Ucuru repe'ö huedoca'anä, jä'epötä jä'epösä. Ttö Pablo, bö̧o̧ i̧sa̧ cha'anä Cristo Jesúsru cheseta'attö cärenä pö̧sä̧.

¹⁰ Ja̧'hua̧nö̧ ja̧'a̧ttö̧ Onésimo pä'ö mi̧cua̧rö̧, cärenä pä̧nö̧ Cristonä chi̧tti̧rö̧, ppäcuhuäda pä'ö jä'epösä.

¹¹ Pä'äjimä ja̧u̧mä̧ ucu cu̧mö̧huä̧ya̧ ja̧'a̧nä̧, adiu ppä'ädocö pi̧nö̧ ucuru. Ja̧'hua̧nö̧ ja̧'a̧nä̧ jitämä ucuru'inä ttörö'inä ppädö'a̧nö̧ ja̧'a̧.

¹² Pä'äji ta'anö ja̧u̧ru̧ hue'ösä ucuru. Ttötä chamönä chichöttömä, ttörö adiu jȩcu̧'a̧ji̧'a̧nö̧ jȩpi̧rö̧.

¹³ Adihuä huȩnȩ esetö cärenä chö̧'o̧mȩnä̧ ucu ttörö ppäcuhuädaji'a̧nö̧ ttörö ppä'ädö ö̧ja̧ päda'anä, ja̧u̧ru̧ hue'ösä ucuru.

¹⁴ Ja̧'hua̧nö̧ ja̧'a̧nä̧ ucuru pä̧huä̧ juiyöttömä, ja̧u̧ ttöcu kä̧nö̧ ppädattö pä'ö hue'ocösä. Ucutä cuamöcuädomenä, ttö huedoca'anä, ppäcuhuäda pä'ösä ttörö.

¹⁵ Chutä Onésimo cuojusodettö a̧'u̧cua̧'a̧tä̧ tö'ipächinö'ca̧, jitämä ppa̧'ä̧chö̧ cu̧mö̧huä̧ya̧ päi'önä ö̧ja̧ pä'ö 'cuäopönä.

¹⁶ Ja̧'hua̧nö̧ ja̧'a̧nä̧ adicuä i̧sa̧ ö̧ji̧nö̧'a̧nö̧mä̧, ko̧cö̧ jä̧cua̧. Jitämä adicuä i̧sa̧ttö̧'i̧nä̧ abonänö adiu ö̧jä̧cua̧, Cristonä adiunä tö̧jä̧hua̧ ja̧'a̧ttö̧. Ttö juiyo repe'ösä ja̧u̧ru̧. Ucu'inä ja̧u̧mä̧ ttö̧ja̧ i̧sa̧ ja̧'a̧ttö̧, ja̧u̧ru̧ repe'öjä. Ja̧'hua̧nö̧ ja̧'a̧nä̧ jitämä Cristonä tö̧jä̧hua̧ ja̧'a̧ttö̧, ttö ja̧u̧ru̧ repedöttö'inä abonänö repe'öjä ja̧u̧ru̧.

¹⁷ Iso päi'önä ji̧nä̧ yo̧mȩtȩ tadita'a cuamöcuädöttömä, ttörö cueseu'a̧nö̧ esehui ja̧u̧ru̧'i̧nä̧.

¹⁸ Koro juäi ucuru suronä jȩi̧nö̧ttö̧mä̧, ucuru imippotöttömä, ttötä chi̧mi̧tä̧cua̧sä̧.

¹⁹ Ttö Pablo, ttötä chu̧mö̧nä̧ huȩyu̧tu̧sä̧ pi̧yȩmä̧. Ttömä o'ca juiyönä chi̧mi̧tä̧cua̧sä̧. Juhuorö'inä ucutä cua̧'cua̧rö̧ ttörö mippotöjä pä'ö jidäu'a̧nö̧ ja̧'a̧nä̧, ji'ähuocösä.

²⁰ Iso päi'önä tö̧jä̧hua̧, Tu̧ru̧hua̧rö̧ cueseta'attö, ttörö ppä'ädi. Cristonä chö̧jä̧hua̧ cu'a'attö, chami iso'quinä eseunu chö̧ja̧ pä'ö ppä'ädittö.

²¹ Pi̧yȩ cuyäru chi̧huȩyu̧to̧mȩnä̧, huo̧jua̧sä̧ ucu jȩcu̧'ä̧cuȩ o'ca juiyönä. Ja̧'hua̧ta̧nö̧ ttö huedöttö'inä abonänö rö̧ȩnä̧ jȩcu̧'ä̧cua̧jä̧.

²² Jitämä koro'inä huȩyu̧tu̧sä̧ ucuru. Aditö ku̧ni̧ chodu. Ucutu Diosrö cucuocuätucua'attö, churutä pä̧huä̧ rö̧jo̧mȩnä̧ cu̧ja̧cuä̧tu̧cua̧'a̧ chicha pä'ö tta̧'ä̧rö̧sä̧.

Röjinä teähuinö huȩnȩ

²³ Epafras, Cristorö eseta'attö ttöcu cärenä pä̧nö̧ te'äu ucuru.

²⁴ Ja̧'hua̧ta̧nö̧ Marcos'inä, Aristarco'inä, Demas'inä, Lucas'inä ttöcu aditätömä te'ähuätö ucuru.

²⁵ Tu̧ru̧hua̧ Jesucristo ucuturu ppädäcua'a̧nö̧. Amén.