Efesios 6 - TÄ̧DO Ä̧CUÄ̧ I̧HUȨNȨ

Ppo̧'ä̧tö̧ ttä'o hueö jȩttö̧ huȩnȩ

¹ Ppo̧'ä̧tö̧ Diosrö esetätömä, cuä'o hueö eseunu jȩpä̧tu̧cui̧. Cuä'o hueö jȩcu̧'ä̧tu̧cu̧mä̧ adiu.

^2-3 Dios adihuä juäi iya päa'attö, äcuomenä hueinö pi̧yȩmä̧: “Cuä'orö'inä, cua̧ju̧ru̧'i̧nä̧ ucuotönö ka̧cuä̧tu̧cui̧, eseunu cu̧ja̧cuä̧tu̧cuä̧cua̧'a̧nö̧ pi̧jä̧nä̧. Ja̧'hua̧ta̧nö̧ recuonä cu̧ja̧cuä̧tu̧cuä̧cua̧'a̧nö̧ pi̧jä̧nä̧.”

⁴ Ucutu'inä ttä̧'o̧tö̧, cui̧tti̧mö̧ ttami surächi'önämä jȩcu̧'ä̧tu̧cuä̧'. Adiunätä ji'äu huo̧juȩtä̧tu̧cui̧ cui̧tti̧mö̧rö̧, Tu̧ru̧hua̧rö̧ eseunu ttesetäcua'a̧nö̧.

Ttumöhuäyotö ttu̧ru̧hua̧ hueö jȩttö̧ huȩnȩ

⁵ Korotö huettö aditätömä, Cristo i̧huȩnȩ päö ta'anö jȩcu̧'ä̧tu̧cu̧'a̧nö̧, adiu ucuotönö'inä, ye'ecunu'inä adiu jȩpä̧tu̧cui̧ o'ca juiyönä pi̧jä̧ttö̧ cu̧ru̧hua̧ hueömä.

⁶ Cristo i̧huȩnȩ aditätö, Diosrö pä̧huä̧ rö̧jö̧ ttaditö'a̧nö̧, cuami iso'quitucunä adiu aditätucui. Cu̧ru̧hua̧tu̧cu̧ ucuturu topö esehua pä'ö tomenätämä cuaditätucuä'.

⁷ Adiunä aditätucui Diosrö pä̧huä̧ rö̧jo̧mȩnä̧tä̧, pi̧jä̧ ttö̧ja̧rö̧ pä̧huä̧ rö̧jo̧mȩnä̧mä̧cö̧.

⁸ Täcö huo̧juä̧tö̧jä̧ ucutumä, ttu̧ru̧hua̧cu̧ aditätö'inä, ttu̧ru̧hua̧ to'ätö'inä Tu̧ru̧hua̧ Jesucristo iyä̧cuȩ ttȩmä̧cuo̧tö̧do adiu ttaditinö micuä.

⁹ Ucutu'inä ruhuotö, cumöhuäyotörö adiunätä jȩpö̧ ka̧cuä̧tu̧cui̧, suronä ro̧cu̧huȩpä̧tu̧cuo̧ca̧'a̧nä̧. Amöcuädätucui, ucutu'inä, cumöhuäyotö'inä ya̧tȩrö̧tä̧, mo̧ro̧jä̧nä̧ kö̧rö̧, adihuä Tu̧ru̧hua̧rö̧ ku̧nä̧rä̧tö̧jä̧. Chutä tomenä, o'ca toi'önä yorätehuätöjä.

Diosrö esetätö surojöcu törohuäu huȩnȩ

¹⁰ Jitämä chö̧jä̧hua̧tö̧, Dios ujurunä cuami 'qui'ächi'ätucui Tu̧ru̧hua̧rö̧ esetö.

¹¹ Ähuettä ucuturu suronä jȩo̧mȩnä̧, cuami 'qui'ächi'ö ka̧cuä̧tu̧cui̧, o'ca juiyönä Dios ucuturu iyinö ta'anö.

¹² Ujutumä ttö̧ja̧cu̧, ttidepä'inä, ttihue'quiyu'inä ku̧nä̧rä̧tö̧cu̧ rohuähuocotöjä. Pi̧jä̧ isoppanä suronä huȩ'ä̧rä̧tö̧cu̧ rohuähuätöjä. Ja̧'hua̧nö̧ pädomenä, pi̧jä̧ yo̧ö̧cu̧ cue'ächätörö ttujurunä huȩ'ä̧rä̧tö̧cu̧ rohuähuätöjä pä'ösä.

¹³ Ja̧'hua̧nö̧ ja̧'a̧ttö̧ o'ca juiyönä Dios hueinö ȩmä̧tu̧cui̧, suronä 'cuäopomenä, suronä jȩcu̧'ä̧tu̧cuo̧ca̧'a̧nä̧, cuami 'quicuhuächi'ätucuäcua'a̧nö̧.

¹⁴ Adiu 'quiyönä ka̧cuä̧tu̧cui̧. Ttäcä cureya ra̧'a̧ jä̧'i̧nö̧'a̧nö̧, iso päi'önä huȩnȩ ku̧nä̧rä̧tu̧cui̧. Ya̧tȩ su̧ro̧da̧u̧ i̧sa̧ amöcanä 'quiyö juäi ö̧'ca̧tä̧hua̧'a̧ jä̧'i̧nö̧'a̧nö̧, 'ca̧tä̧dä̧cuä̧huä̧tu̧cui̧ adiunä jȩä̧cuä̧huä̧.

¹⁵ Ya̧tȩ su̧ro̧da̧u̧ i̧sa̧ ö̧jä̧pö̧ isä'ca u̧ju̧nä̧u̧'a̧nö̧ rohuäu i̧'cha̧ pä'ö, ucutu'inä ja̧'huä̧nö̧ jä̧'i̧nö̧'a̧nö̧ jo̧mȩ päi'önä Diosrö eseäcuähuä huȩnȩ jicuhuähuätucua pä'ö adicuätucui.

¹⁶ 'Po̧'a̧ri̧ doächi'a'acu ttu̧mö̧nä̧ 'quiyö juäi 'chu̧ttä̧ra̧'a̧ jä̧'i̧nö̧'a̧nö̧, adiu esetätucui ucutu'inä, o'ca juiyönä ähuettärö jarodi'ö cujuruhuätucuarö pä'ö.

¹⁷ Ttunä cuähuächa'acu ttunä 'quiyö juäi ttu̧huä̧nähua'a jä̧'i̧nö̧'a̧nö̧, tta̧'ä̧rä̧cuä̧huä̧tu̧cui̧ ucutu'inä, suronä jȩttö̧ jȩpö̧ icu huȩnȩ esetö. Ja̧'hua̧ta̧nö̧ curodä ttȩpa̧'a̧ jä̧'i̧nö̧'a̧nö̧, ȩpä̧tu̧cui̧ ucutu'inä adihuä Dios i̧huȩnȩ Espíritu Santo iyä̧u̧.

¹⁸ Espíritu Santo u̧huo̧juȩta̧'a̧nä̧, 'cuäopönä Diosrö jä'epö ucuocuätucui, o'ca juiyönä iyätucuacu pä'ö jäcuhue'ätucumä. Cuamöcuädätucu jaroi'äcuähuä juiyönä, adiu a̧mö̧cuä̧rö̧nö̧ ka̧cuä̧tu̧cui̧. Ja̧'hua̧ta̧nö̧ o'ca toi'önä Diosrö esetätörö amöcuädö, ucuocuätucui Diosrö.

¹⁹ Ttörö'inä amöcuädö ucuocuätucui Diosrö, iyattö pä'ö i̧huȩnȩ chucuocuäcua'a̧nö̧. Ja̧'hua̧ta̧nö̧ yeähuä juiyönä chucuocuäcua'a̧nö̧ korotörö ttieru huȩnȩ, suronä jȩttö̧ jȩpö̧ icu huȩnȩ.

²⁰ Diosmä hueinäcusä ja̧u̧ huȩnȩ jidähua pä'ö. Ja̧'hua̧nö̧ ja̧u̧ huȩnȩ jidähua'attö, cärenä pö̧sä̧ jitämä. Ucuocuätucui Diosrö, pi̧yȩ huȩnȩ yeähuä juiyönä, Diosrö pä̧huä̧ rö̧jo̧mȩnä̧ jidähuäcua'a̧nö̧.

Röjinä teähuinö huȩnȩ

²¹ Tö̧jä̧hua̧ Tíquico ujuturu adiu ppä'ädö Tu̧ru̧hua̧ i̧huȩnȩ taditomenä. Ja̧u̧tä̧ ji̧ä̧huä̧cua̧ ucuturu ttörö 'cuäopö'inä, o'ca juiyönä jȩchö̧'i̧nä̧.

²² Ja̧'hua̧nö̧ ja̧'a̧ttö̧ ja̧u̧ru̧ hue'ösä ucuturu jiähua pä'ö, ujuturu cuä̧ju̧cuä̧tu̧cua̧ pä'ö. Ja̧'hua̧ta̧nö̧ ucuturu jiähuomenä, cuesehuätucua pä'ö ppädäcuotöjä.

²³ Tä'o Dioscu, Tu̧ru̧hua̧ Jesucristocu ucutu tö̧jä̧hua̧tö̧rö̧, adiu esetäcuähuä'inä, eseäcuähuä'inä, repeäcuähuä'inä ttiyäcua'a̧nö̧.

²⁴ Ja̧'hua̧ta̧nö̧ o'ca toi'önä Tu̧ru̧hua̧ Jesucristorö jarotti'oca'a repe'ätörö, Dios ppädäcua'a̧nö̧. Amén.