Efesios 5 - TÄ̧DO Ä̧CUÄ̧ I̧HUȨNȨ

Dios i̧tti̧mö̧ ttö̧ja̧cuä̧cuȩ huȩnȩ

¹ Ucutumä Dios i̧tti̧mö̧jä̧. Ja̧'hua̧nö̧ ja̧'a̧ttö̧ chutä ta'anö cu̧ja̧cuä̧tu̧cua̧ pä'ö amöcuädätucui.

² Cristo ujuturu repeinö ta'anö, repe'äu ka̧cuä̧tu̧cui̧. Ujuturu repe'ö chutä iyähuinö cuä'ö tticuarö pä'ö, adihuä juäi ameu ta'anö sacrificio päi'önä jȩtta̧rö̧ pä'ö Dios ä'ca jo̧mȩttö̧, Dios esehuarö pä'ö.

³ Dios i̧tti̧mö̧ cu'ätucuttumä, suronä nä̧tö̧rö̧ jȩä̧cuä̧huä̧ cucuocuätucu juiyö'a̧nö̧ huotöjä. Ja̧'hua̧ta̧nö̧ koro juäi suräjuä huȩnȩ'i̧nä̧ cucuocuätucu juiyö'a̧nö̧ huotöjä. Ja̧'hua̧ta̧nö̧ korotö ttu̧ju̧nä̧rö̧ ta'anö, chu̧ju̧nä̧ra̧ päcuhuätucu juiyö'a̧nö̧ huotöjä.

⁴ Dä'ä rö̧jö̧nä̧, päcuhuätucuä'. Amönä yapareu jicuhuähuä'chätucuä'. Suronämä cucuocuätucuä'. Ja̧'hua̧nö̧ jȩcu̧'ä̧tu̧cu̧ttu̧mä̧, yoröiso adihuoca'a. Diosrötä eseunu ucuocuätucui.

⁵ Täcö huo̧juä̧tö̧jä̧, ya̧tȩ irecua pocojuru jȩpö̧'i̧nä̧, koro juäi suronä jȩpö̧'i̧nä̧, korotö ttu̧ju̧nä̧rö̧ ta'anö, u̧ju̧nä̧ra̧ pä'ö'inä, koro ttu̧mö̧nä̧ adicuä juäi pä̧huä̧ rö̧jö̧nä̧ topö'inä, Cristocu Dioscu ttö̧jo̧mȩ yoröiso 'cho̧cö̧.

⁶ Korotö yapareu huȩnȩ, yoröiso micuähuocötä jittähuomenä, cuesetätucuä'. Ja̧'hua̧nö̧ Diosrö jarodä'chö jȩtto̧mȩnä̧, Diostä jahuätörö rö̧ȩnä̧ ö̧tä̧bo̧tä̧cua̧.

⁷ Ja̧'hua̧nö̧ ja̧'a̧ttö̧ ja̧'hua̧nö̧ suronä jȩpä̧tö̧cu̧, cuecuhuächätucuä'.

⁸ Pä'äji yo̧ö̧cu̧ ka̧cui̧nä̧tö̧jä̧ ucutumä. Jitätä Tu̧ru̧hua̧rö̧ esetö, tȩa̧u̧nä̧ ka̧cuä̧tö̧jä̧. Adiunä ka̧cuä̧tu̧cui̧, tȩa̧u̧nä̧ ttö̧ja̧cu̧ ta'anö.

⁹ Tȩa̧u̧nä̧ ka̧cuä̧tö̧mä̧, adiunätä jȩpä̧tö̧ o'ca toi'önärö. Ja̧'hua̧ta̧nö̧ iso päi'önä huȩnȩ jȩpö̧, tta̧'cua̧ pö̧nö̧ ka̧cuä̧tö̧.

¹⁰ Cu̧huo̧jui̧'ä̧tu̧cua̧ pä'ö amöcuädätucui Diosrö pä̧huä̧ rö̧jö̧.

¹¹ Yo̧ö̧cu̧ cue'ächätö micuähuocö juäi jȩttö̧mä̧, jȩcu̧'ä̧tu̧cuä̧'. Pärocua'acu ji'ähuätucuitö tȩa̧u̧nä̧ esetö cuettächäcua'a̧nö̧.

¹² Jahuätö korotö tottoca'anä da̧ja̧huä̧rö̧ jȩttö̧mä̧, dä'ä rö̧jä̧tö̧ jä̧cu̧ ji'ähuocösä.

¹³ Ja̧'hua̧nö̧ ja̧'a̧nä̧ o'ca juiyönä tȩa̧huo̧mȩ ku̧nä̧huä̧mä̧, adiu tȩa̧u̧nä̧ tottäcua'a̧nö̧. Iso päi'önä tȩa̧u̧nä̧ tottomenä, o'ca juiyönä tȩa̧u̧nä̧ topätö.

¹⁴ Ja̧'hua̧nö̧ ja̧'a̧ttö̧ päa'a: Ucu ä̧'ä̧rö̧mä̧, porächi'i. 'Corupätti'inomettö tto'ächi'i. Cristo i̧tȩjä̧dä̧cua̧jä̧.

¹⁵ Ja̧'hua̧nö̧ ja̧'a̧ttö̧ cu̧ja̧cuä̧tu̧cu̧ amöcuädönä ka̧cuä̧tu̧cui̧. Jerupätö ttö̧ja̧cu̧'a̧nö̧mä̧, cu̧ja̧cuä̧tu̧cuä̧'. Huo̧juä̧tö̧ ttö̧jö̧'a̧nö̧ ka̧cuä̧tu̧cui̧.

¹⁶ Jitä mo̧ro̧ päi'önä rö̧ȩnä̧ suronä 'cuäopa'attö, adiunä jȩpä̧tu̧cui̧.

¹⁷ Ja̧'a̧tä̧ra̧'a̧ cuecuhuächätucuä'. Tu̧ru̧hua̧rö̧ pä̧huä̧ rö̧jö̧ amöcuädö huo̧jui̧pä̧tu̧cui̧.

¹⁸ Tä̧cu̧huä̧mä̧tu̧cuä̧'. Ja̧'hua̧nö̧ jȩpö̧ be'ipächätöjä. Pärocua'acu rö̧ȩnä̧ ku̧nä̧rä̧tu̧cui̧ Espíritu Santorö cuami iso'quinä su'penö.

¹⁹ Ka̧ra̧ ka̧ra̧nö̧ ucuocu ka̧cuä̧tu̧cui̧ adihuä huȩnȩtä̧. Dios i̧huȩnȩ ra̧huä̧huä̧ ra̧'ö̧ ka̧cuä̧tu̧cui̧. Ja̧'hua̧ta̧nö̧ cuami iso'quitucunä o'ca juiyönä eseunu ra̧'ö̧ eseäcuähuätucui Tu̧ru̧hua̧rö̧.

²⁰ Tu̧ru̧hua̧ Jesucristo i̧mi̧nä̧, o'ca juiyö amöcuädö, eseunu ucuocuätucui Tä'o Diosrö.

Tahuaruhuärö eseunu kä̧cuä̧huä̧ huȩnȩ

²¹ Diosrö cucuotätucuomenä, adiunä kä̧nö̧ korotö korotönö ppä'ädätucui.

²² Nä̧tö̧ Tu̧ru̧hua̧ Jesucristorö ttä̧ju̧cu̧'a̧nö̧, ttä̧ju̧cuä̧cua̧'a̧nö̧ ttirecuorö'inä.

²³ Ubomä irecua ku̧ru̧hua̧ päi'önä kö̧, Cristo Diosrö esetätörö Ttu̧ru̧hua̧ päi'önä ö̧jö̧ ta'anö. Ja̧u̧tä̧ Cristo, chutä jä̧ttä̧pä̧ya̧ huotö, Diosrö esetätö, suronä jȩttö̧ jȩpö̧ icu.

²⁴ Ja̧'hua̧nö̧ ja̧'a̧nä̧ Diosrö esetätö Cristorö ttä̧ju̧cu̧ ta'anö, nä̧tö̧'i̧nä̧ ttirecuo hueö o'ca juiyönä ttä̧ju̧cuä̧cua̧'a̧nö̧.

²⁵ Ja̧'hua̧ta̧nö̧ Cristo Diosrö esetätörö repe'ö 'corupäi'inö ta'anö, u̧mä̧tö̧'i̧nä̧ ttirecuarö repettäcua'a̧nö̧.

²⁶ Ja̧'hua̧nö̧ iyähuinödo, Diosrö esetätörö töcö icu aditö icua pä'ö ajiyanä'inä, chutä i̧huȩnȩnä̧'i̧nä̧.

²⁷ Ja̧'hua̧nö̧ jȩpi̧nö̧do yoröiso surojö juiyönä adiunätä i̧jȩcua̧ pä'ö chutä ä'ca jo̧mȩttö̧.

²⁸ Ya̧tȩ chutä amönä repeäu ta'anö, chutä irecuarötä repeäcua'a̧nö̧. Iso päi'önä irecuarö repe'ömä, chutä'inä repe'äu.

²⁹ Ya̧tȩ'i̧nä̧ yoröiso toa'a chutä amönä jä̧ttä̧pä̧ya̧ kö'cocömä. Chutä adiu jȩpö̧ tta̧'ä̧rä̧cuä̧u̧, u̧cuȩ'i̧nä̧ cuä̧nö̧. Cristo ja̧'hua̧ta̧nö̧ jȩpö̧ Diosrö esetätörö.

³⁰ Iso päi'önä Diosrö esetätömä Cristo jä̧ttä̧pä̧ya̧ huotö. Ujutu'inä idepä'inä ka̧'a̧nä̧, ihue'quiyu'inä ka̧cua̧'a̧nä̧, ja̧u̧ jä̧ttä̧pä̧ya̧ huotöjä ucutumä.

³¹ “Ja̧'hua̧nö̧ ja̧'a̧ttö̧ ya̧tȩ jä'orö'inä, ja̧ju̧ru̧'i̧nä̧ 'quȩ'i̧pä̧chö̧ irecuacutä ö̧ja̧ pä'ö. Jahuätö ta̧ju̧ ya̧tȩtä̧ pä'i'ätö.”

³² Pi̧yȩ adihuä huo̧juȩcuä̧ huȩnȩ. Ja̧u̧ huo̧juȩcuä̧ huȩnȩ Cristo Diosrö esetätörö adiu tta̧huä̧ra̧'a̧ päa'a a̧'cua̧ra̧'a̧, pä'ösä ttömä.

³³ Ja̧'hua̧nö̧ ja̧'a̧nä̧'i̧nä̧ ucuturu'inä päa'a: cui̧rȩcua̧mö̧rö̧'i̧nä̧ eseunu repe'ätucui, ucutu cuamönätucu repecuhuähuätucu ta'anö. Ja̧'hua̧ta̧nö̧ päa'a: isaju'inä ucuotönö kö̧jä̧cua̧'a̧nö̧ kirecuorö.