Efesios 2 - TÄ̧DO Ä̧CUÄ̧ I̧HUȨNȨ

Dios ujuturu repe'ö aditö icuinö huȩnȩ

¹ Pä'äjimä ucutu suronä jȩpö̧ cuecuhuächätucuomenä, 'corupä'i'ätö jä̧'i̧nö̧'a̧nö̧ cue'ächinätöjä.

² Ja̧'hua̧nö̧ jȩpö̧ cuecuhuächätucuomenä, pi̧jä̧ ttö̧ja̧ jȩttö̧ jȩpi̧nä̧tö̧jä̧. Espíritu pi̧jä̧ isoppanä hue'örö pä̧huä̧ rö̧jo̧mȩnä̧ jȩpi̧nä̧tö̧jä̧. Ja̧u̧ espíritu Diosrö esetocotörö hue'ö, suronä jȩtta̧ pä'ö.

³ Ujutu'inä o'ca toi'önä ja̧'hua̧nö̧ ka̧cui̧nä̧tö̧jä̧ pä'äjimä. Ujutu tamönä pä̧huä̧ rö̧jö̧nä̧'i̧nä̧, tamönä tamöcuädäu'inä, tamönä tu̧huo̧ju̧nä̧ jȩä̧cuä̧huä̧'i̧nä̧ ja̧'a̧tä̧ jȩpi̧nä̧tö̧jä̧. Ja̧'hua̧nö̧ ja̧'a̧ttö̧ Dios ujuturu'inä ro̧ȩpö̧ttö̧mä̧ adihua'a, korotörö ro̧ȩpö̧ ta'anö.

⁴ Ja̧'hua̧nö̧ ja̧'a̧nä̧ Dios ujuturu rö̧ȩnä̧ repe'ö, re rö̧jö̧nä̧ toinä̧u̧jä̧.

⁵ Ujutu suronä jȩpö̧ kä̧nö̧, 'cörupä'i'ätö jä̧'i̧nö̧'a̧nö̧ cue'ächö, Cristorö tesetomenä ta̧'cua̧rö̧ iyinä̧u̧jä̧. Ja̧'hua̧nö̧ ja̧'a̧ ucuturu Diosrö pä̧huä̧ rö̧jo̧mȩnä̧ suronä jȩcu̧'i̧nä̧tu̧cu̧ jȩpö̧ icuinödo.

⁶ Ja̧'hua̧ta̧nö̧ Cristorö teseta'attö, Dios Cristo Jesúscu ji̧nä̧ yo̧mȩtȩnä̧ ttoädinä̧u̧jä̧. Ja̧'hua̧ta̧nö̧ chutäcu tö̧'ä̧mä̧da̧ pä'ö hue'inödo mo̧ro̧jä̧ra̧'a̧.

⁷ Chutä ja̧'hua̧nö̧ jȩpi̧nö̧do, iso päi'önä yodoji'inä ujuturu, rö̧ȩnä̧ rȩpȩä̧cua̧ tu̧huo̧jua̧ pä'ö. Ja̧'hua̧ta̧nö̧ o'ca juiyönä adihuä juäi i̧yä̧cua̧ ujuturu Cristo Jesúsru teseta'attö tu̧huo̧jua̧ pä'ö.

⁸ Iso päi'önä Dios ucuturu repea'attö, suronä jȩcu̧'ä̧tu̧cu̧ jȩpö̧ icuinö, Cristorö cuesetätucuomenä. Ucutu cuamönätucunä esetocotö pi̧nä̧tö̧jä̧. Diostä ja̧'hua̧nö̧ mippoönä iyinä̧u̧jä̧ cuesetätucua pä'ö.

⁹ Iso päi'önä ya̧tȩ, chutä amönä amöcuädötä, amöcuädö esetocö. Ja̧'hua̧nö̧ ja̧'a̧ttö̧ ya̧tȩ amönätä jȩpö̧, yoröiso a'cuoyäunu amöcuädö juiyäcua'a̧nö̧.

¹⁰ Diostä ujuturu aditinä̧u̧jä̧. Cristo Jesúsnä aditinä̧u̧jä̧, adihuä juäi jȩpö̧ tö̧ja̧cua̧ pä'ö, chutä täbocö pi̧jä̧ juiyäi amöcuädinö ta'anö.

Cristorö tesetomenä, eseäcuähuä tu̧ju̧nä̧rö̧ huȩnȩ

¹¹ Ja̧'hua̧nö̧ ja̧'a̧ttö̧ pä'äji cu̧ja̧cui̧nä̧tu̧cu̧ ta'anö amöcuädätucui. Ucutu judíos huocotö pi̧nä̧tö̧jä̧. Judíos huotö u̧mä̧tö̧mä̧, circuncisión jȩpä̧tö̧ ttöäre jättäpäyotö. Ja̧'hua̧nö̧ ja̧'a̧ttö̧ jahuätö: “Circuncidados huotöjä ujutumä” pä'ätö. Ucuturu: “Circuncidados huocotöjä” pä'ätö.

¹² Ja̧u̧nu̧ pä̧nä̧ ucutu jerupinätöjä Cristorö. Israel ttö̧ja̧ttö̧'i̧nä̧ i̧mi̧cu̧nä̧ ka̧cui̧nä̧tö̧jä̧. Ja̧'hua̧ta̧nö̧ Dios i̧huȩnȩ'i̧nä̧, Dios iya päinö huȩnȩ'i̧nä̧ jerupinätöjä. Ucutu pi̧jä̧nä̧ ka̧cui̧nä̧tö̧jä̧, yoröiso adihuä juäi huȩnȩ tta̧cu̧huä̧rä̧tu̧cuo̧ca̧'a̧. Ja̧'hua̧ta̧nö̧ Dios toönä ka̧cui̧nä̧tö̧jä̧, cuesetätucuoca'a.

¹³ Ja̧'hua̧nö̧ ja̧'a̧nä̧ ucutu pä'äji oto ka̧cui̧nä̧tö̧mä̧, jitämä Cristo Jesús 'corupäi'inö huȩnȩ cuesetätucuomenä, ja̧u̧cu̧ tö'cö ka̧cuä̧tö̧jä̧.

¹⁴ Iso päi'önä Cristo eseäcuähuä iyö ujuturu. Ja̧u̧mä̧ judíos huotörö'inä, judíos huocotörö'inä ji̧nä̧ yo̧mȩtȩnä̧ ttö̧ja̧cua̧ pä'ö hue'inödo. Ja̧u̧tä̧ jahuätö i̧mi̧cu̧nä̧ ttö̧ja̧cui̧nö̧ juäi, ttami iso'quinä tto̧ȩpä̧ra̧'a̧ jä̧'i̧nö̧'a̧nö̧ ji̧nö̧mä̧, be'epäjipö icuinödo.

¹⁵ Chutä jä̧ttä̧pä̧ya̧nä̧ täbocö hueähuä huȩnȩ be'epäjipö icuinödo. Jahuätöttö i̧mi̧cu̧nä̧ ttö̧ja̧cua̧'a̧nä̧, ja̧u̧ru̧ jareönä esetö, ji̧nä̧ yo̧mȩtȩnä̧ ttö̧ja̧cua̧ pä'ö hue'inödo. Ja̧'hua̧nö̧ jȩpö̧, o'ca toi'önärö eseäcuähuä iyinödo.

¹⁶ Ja̧'hua̧nö̧ ja̧'a̧nä̧ dau isodänä 'corujuoächomenä, Cristo be'epäjipö icuinö o'ca juiyönä rohuäcuähuä jahuätöttö. Ja̧'hua̧nö̧ ja̧'a̧ttö̧ jahuätö o'ca toi'önä judíos huotö'inä, judíos huocotö'inä Diosrö ttesehua pä'ö hue'inödo. Ja̧'hua̧nö̧ ja̧'a̧nä̧ jahuätö o'ca toi'önä ya̧tȩnä̧tä̧ pä'i'inätö.

¹⁷ Cristo ichö, ji'ähuinö adihuä eseäcuähuä huȩnȩ o'ca toi'önärö, ucutu oto huotörö'inä, judíos ttö̧ja̧, Diosrö tö'cö huotörö'inä.

¹⁸ Iso päi'önä Cristorö esetö, o'ca toi'önä judíos huotö'inä, judíos huocotö'inä Tä'o Diosrö tö'cöpächätöjä Espíritu Santonä ya̧tȩnä̧tä̧.

¹⁹ Ja̧'hua̧nö̧ ja̧'a̧ttö̧ jitämä ucutu kara'attö ichätö jä̧'i̧nö̧'a̧nö̧ huocotöjä. Jitämä o'ca toi'önä Dios i̧tti̧mö̧ cu'ätucua'attö, yorätehuätöjä. Ucutu Dios ahuaruhuä päi'önä ka̧cuä̧tö̧jä̧ jitä.

²⁰ Ucutumä isode jä̧'i̧nö̧'a̧nö̧ huotöjä. Jesús hue'ähuotö'inä, Dios i̧huȩnȩ jiäcuähuä isotö'inä, jittähuinö huȩnȩ esetö ka̧cuä̧tö̧jä̧. Chutä Jesucristo ji̧nä̧ isocu adihuo'qui isode jueö isä'ca kö̧'a̧nö̧ kö̧do.

²¹ Ja̧'hua̧nö̧ ja̧'a̧ttö̧ chutä Cristonä aditätöjä isode ttadita'a jä̧'i̧nö̧'a̧nö̧. Ja̧'hua̧nö̧ aditätöjä Tu̧ru̧hua̧ ö̧jo̧mȩ, adihuome päi'önä chutä ö̧ja̧ pä'ö ujutucu.

²² Ja̧'hua̧ta̧nö̧ ja̧'a̧nä̧ ucutu'inä Cristorö cuesetätucuomenä, o'ca toi'önä ji̧nä̧ yo̧mȩtȩcu̧ pä'i'ätöjä isode jä̧'i̧nö̧'a̧nö̧, Dios adihuä ö̧jo̧mȩ päi'önä, chutä Espíritu Santo ujutucu ö̧ja̧'a̧ttö̧.