Efesios 1 - TÄ̧DO Ä̧CUÄ̧ I̧HUȨNȨ

Pablo Diosrö esetätörö Efeso ötahuiyänä ka̧cuä̧tö̧rö̧ huȩyu̧tu̧ hueinö huȩnȩ

¹ Ttö Pablo, Diosrö pä̧huä̧ rö̧jo̧mȩnä̧, Jesucristo huȩ'ä̧hua̧sä̧. Pi̧yȩ cuyäru huȩyu̧tu̧sä̧, Dios i̧tti̧mö̧rö̧, Cristo Jesúsru esetätörö, Efeso ötahuiyänä ka̧cuä̧tö̧rö̧.

² Tä'o Dios'inä, Tu̧ru̧hua̧ Jesucristo'inä ucuturu adiu ppättädäcua'a̧nö̧. Ja̧'hua̧ta̧nö̧ adiu kä̧cuä̧huä̧'i̧nä̧ ucuturu ttiyäcua'a̧nö̧.

Cristo ujuturu ppädinö huȩnȩ

³ Diosrö, Tu̧ru̧hua̧ Jesucristo Jä'orö, teseäcuähuätucuaja. Ja̧u̧ ujuturu iyinä̧u̧jä̧ Cristorö tesetomenä, o'ca juiyönä adihuä juäi mo̧ro̧jä̧ra̧'a̧ ka̧cu̧.

⁴ Dios pi̧jä̧ juiyäi'inä, Cristonä ȩmi̧nä̧u̧jä̧, chutä ä'ca jo̧mȩttö̧ yoröiso surojö juiyönä, adiunätä tö̧ja̧cua̧ pä'ö.

⁵ Ja̧'hua̧ta̧nö̧ ujuturu repe'ö, Jesucristorö tesetomenä, i̧tti̧mö̧ päti'a pä'ö hue'inö täbocö päi'önä. Ja̧'hua̧nö̧ churutä pä̧huä̧ rö̧jo̧mȩnä̧ hue'inödo.

⁶ Ja̧'hua̧nö̧ ja̧'a̧ttö̧ chutä adihuä I̧tti̧rö̧ tesetomenä, ujuturu adihuä juäi iyinömä amöcuädö, 'cuäopönä eseäcuähuätöjä Diosrö.

⁷ Dios ujuturu rö̧ȩnä̧ repea'attö, I̧tti̧ 'corupäi'omenä, ujutu suronä jȩtö̧ jȩpö̧ icuinö.

⁸ Ja̧'hua̧ta̧nö̧ iso päi'önä Dios ujuturu repe'ö iyinö o'ca juiyönä huo̧ju̧nä̧ tu̧huo̧jua̧ pä'ö.

⁹ Ja̧'hua̧ta̧nö̧ churutä pä̧huä̧ rö̧jo̧mȩnä̧ chutä jȩa̧ pä'ö amöcuädinö huȩnȩ, tu̧huo̧jua̧ pä'ö iyinä̧u̧jä̧.

¹⁰ Ja̧u̧ huȩnȩ amöcuädinömä, churutä pä̧huä̧ rö̧jo̧mȩnä̧ 'cuäopäcua'a. Ja̧u̧nu̧mä̧ Dios o'ca juiyönä, mo̧ro̧jä̧nä̧ ka̧cu̧'i̧nä̧, pi̧jä̧nä̧ ka̧cu̧'i̧nä̧, ca̧ca̧tö̧ i̧yä̧cua̧ Cristorö, o'ca juiyönä hueäcua'a̧nö̧.

¹¹ Ja̧'hua̧ta̧nö̧ ujutu Cristorö tesetomenä, Dios ȩmi̧nä̧u̧jä̧ pi̧jä̧ juiyäi'inä, ujutu'inä iyä̧cuȩ tȩma̧ pä'ö. Ja̧u̧ o'ca juiyönä 'cuäopa'a chutä amöcuädö pä̧huä̧ rö̧jo̧mȩnä̧.

¹² Chutä ja̧'hua̧nö̧ jȩpi̧nö̧do, ujutu ä'canä Cristorö esetinätömä, adiunä kä̧nö̧ Dios adihuä i̧sa̧ ja̧'a̧ttö̧ rö̧ȩnä̧ tesehuarö pä'ö.

¹³ Ucutu adihuä iso päi'önä huȩnȩ, suronä jȩttö̧ jȩpö̧ icu huȩnȩ ä̧ju̧cu̧, Cristorö cuesetätucuomenä, ja̧u̧cu̧ ji̧nä̧ yo̧mȩtȩnä̧ chutä i̧tti̧mö̧ päcuhui'ätucua pä'ö hueinä̧u̧jä̧, Espíritu Santonä iya päinö ta'anö.

¹⁴ Espíritu Santorö iyinödo ujuturu, iso päi'önä yodoji iyä̧cuȩ'i̧nä̧, i̧yä̧cua̧ ujuturu tu̧huo̧jua̧ pä'ö. Ja̧u̧ iya pä'inö Dios, chutä i̧tti̧mö̧rö̧ surojöttö ejädö icu cädö o'ca'a. Ja̧'hua̧ta̧nö̧ Dios adihuä i̧sa̧ ja̧'a̧ttö̧ ja̧u̧ru̧ tesehuäcua'a̧nö̧.

Pablo Diosrö esetätö rö̧ȩnä̧ ttu̧huo̧jua̧ pä'ö Diosrö jäepinö huȩnȩ

^15-16 Ja̧'hua̧nö̧ ja̧'a̧ttö̧ ucutu Tu̧ru̧hua̧ Jesúsru cuesetätucu'inä, o'ca toi'önä Dios i̧tti̧mö̧rö̧ repecuhuätucu'inä chä̧ju̧cuo̧mȩnä̧, 'cuäopönä ucuturu eseunu amöcuädö ucuocusä Diosrö.

¹⁷ Tu̧ru̧hua̧ Jesucristo adihuä Jä'o Diosrö jä'epösä mo̧ro̧jä̧ttö̧ huo̧juä̧huä̧ iyatö pä'ö, adiu cu̧huo̧juä̧tu̧cua̧ pä'ö chutä u̧huo̧juȩtö̧mä̧. Ja̧'hua̧ta̧nö̧ Diosrö'inä rö̧ä̧chö̧nä̧ cu̧huo̧juä̧tu̧cua̧rö̧ pä'ö jä'epösä.

¹⁸ Ja̧'hua̧ta̧nö̧ cuamöcuädätucunä ppäda pä'ö jä'epösä Diosrö, chutä ucuturu huoinömä tta̧cu̧huä̧rä̧tu̧cu̧ adiu cu̧huo̧juä̧tu̧cua̧ pä'ö. Ja̧'hua̧ta̧nö̧ Dios i̧tti̧mö̧rö̧ iyäcua'a, iso päi'önä adihuä juäi ja̧'a̧ cu̧huo̧juä̧tu̧cua̧ pä'ö.

^19-20 Ujuru'inä, ujutu ja̧u̧ru̧ esetätörö adita'a, yoröiso beipoca'a, iso päi'önä o'ca juiyönä juruhua'a cu̧huo̧juä̧tu̧cua̧ pä'ö jä'epösä. Ja̧u̧ ujurumä rö̧ȩnä̧ juruhua'a pä'ö i̧jȩpi̧nö̧do Dios, Cristorö 'corujuottächomettö ttoädomenä. Ja̧u̧ru̧ tto'ädäji'ca̧ hue'inödo, mo̧ro̧jä̧ra̧'a̧ttö̧ chutä u̧huo̧jua̧'a̧nä̧ ö̧'ä̧mä̧da̧ pä'ö.

²¹ O'ca juiyönä ruhuotö hueähuä'inä, ttujuru'inä, kä̧cuä̧huä̧'i̧nä̧, o'ca juiyönä jitä'inä, yodoji'inä ucuocuäcuähuä'inä huea pä'ö hue'inödo Cristorö.

²² O'ca juiyönä Cristo ö̧jä̧pö̧ dȩa̧'a̧nä̧ rötinödo Dios. Ja̧'hua̧ta̧nö̧ ja̧u̧ru̧ esetätörö hue'inödo Cristorö ttu päi'önä ö̧ja̧ pä'ö.

²³ Iso päi'önä Diosrö esetätömä, Cristo jä̧ttä̧pä̧ya̧ päi'önä ka̧cuä̧tö̧jä̧. Chutä, Cristomä, suhuädi'önä kö̧ ujutu tami iso'quinä. Ja̧'hua̧ta̧nö̧ Cristomä o'ca juiyönä pi̧jä̧nä̧ suhuädi'önä kö̧.