Colosenses 4 - TÄ̧DO Ä̧CUÄ̧ I̧HUȨNȨ

¹ Ucutu ruhuotö'inä, adiu mitätucui ucutucu aditätörö, o'ca juiyönä ttaditö micuä päi'önä. Ja̧'hua̧nö̧ jȩpö̧ cunichi'ätucuä' Cu̧ru̧hua̧'i̧nä̧ kö̧ mo̧ro̧jä̧ra̧'a̧.

² 'Cuäopönä mo̧ro̧ji̧nö̧ a̧'u̧cuä̧ ucuocuätucui Diosrö. Ja̧'hua̧ta̧nö̧ eseunu ucuocu tta̧'ä̧rä̧tu̧cui̧ ja̧u̧ru̧tä̧.

³ Ujuturu'inä Diosrö ucuocuätucui, Tu̧ru̧hua̧ ppäda pä'ö adiu jitähuäcua'a̧nö̧ i̧huȩnȩ, Cristorö ttieru huȩnȩ. Ja̧u̧ huȩnȩ jidähua'attö, cärenä pö̧sä̧ jitämä.

⁴ Ttörö'inä Diosrö ucuocuätucui, jueönä jidähuäcua'a̧nö̧ ja̧u̧ huȩnȩ, churutä pä̧huä̧ rö̧jö̧ ta'anö.

⁵ Jueönä ka̧cuä̧tu̧cui̧ Diosrö esetocotö ttä'ca jo̧mȩttö̧, 'cuäopönä ucuocu jahuätörö ttesetäcua'a̧nö̧.

⁶ Cucuocuätucuomenä, 'corujuäinä ucuocuätucui huo̧ju̧nä̧, korotö ttö̧ra̧huä̧rö̧ juiyäcua'a̧nö̧. Ja̧'hua̧ta̧nö̧ ädätäcuähuänä'inä huo̧ju̧nä̧ ädätätucui o'ca toi'önärö.

Röjinä teähuinö huȩnȩ

⁷ Adihuä ta̧hua̧ru̧hua̧ Tíquico o'ca juiyönä ji̧ä̧huä̧cua̧ ucuturu, ttörö 'cuäopäjimä. Iso päi'önä ja̧u̧ ppä'ädö adiu aditinö ttöcu Tu̧ru̧hua̧ aditähuä.

⁸ Ja̧'hua̧nö̧ ja̧'a̧ttö̧ ja̧u̧ru̧ hue'ösä ucuturu jiähua pä'ö ujuturu. Ja̧'hua̧ta̧nö̧ ucuturu'inä ppädäcua'a̧nö̧.

⁹ Ja̧u̧cu̧ i̧chä̧cua̧ adihuä ta̧hua̧ru̧hua̧ Onésimo'inä. Ja̧u̧ adiu aditinö ttöcu Tu̧ru̧hua̧ aditähuä. Ja̧u̧mä̧ ucututä i̧sa̧. Jahuätömä o'ca juiyönä pȩnȩ 'cuäopäjimä jittähuäcuotö ucuturu.

¹⁰ Pottömä Aristarco, ttöcu cärenä pö̧mä̧, te'äu ucuturu. Ja̧'hua̧ta̧nö̧ Bernabé ö̧jä̧hua̧ Marcos te'äu ucuturu. Ucutu täcö huedinömä ä̧ju̧cui̧nä̧tö̧jä̧ ja̧u̧ru̧. Cuidepiyura̧'a̧ ichöttömä, adiu ppä'ädätucuirö.

¹¹ Ja̧'hua̧ta̧nö̧ Jesús te'äu ucuturu. Ja̧u̧mä̧ koro i̧mi̧mä̧ Justo pä'ö mi̧cua̧. Pitötä judíos ttö̧ja̧ttö̧ ji̧nä̧ yo̧mȩtȩ aditinätö ttöcu, Dios Ttu̧ru̧hua̧ päi'önä ö̧jä̧cuȩ huȩnȩ ji'äu. Iso päi'önä adiu ppä'ädinätö ttörö.

¹² Epafras'inä, ucutu i̧sa̧, te'äu ucuturu. Ja̧u̧'i̧nä̧ Cristocu aditö. Ja̧u̧mä̧ 'cuäopönä ucuocu Diosrö ucuturu, cuami 'qui'ächi'ö kä̧nö̧, o'ca juiyönä Diosrö pä̧huä̧ rö̧jö̧ jȩpö̧ cu̧ja̧cuä̧tu̧cua̧ pä'ö.

¹³ Iso päi'önä ttömä huo̧jua̧sä̧ ja̧u̧mä̧, Epafrasmä, rö̧ȩnä̧ a̧mö̧cuä̧rö̧ ucuturu. Ja̧'hua̧ta̧nö̧ Laodicea ötahuiyänä ka̧cuä̧tö̧rö̧'i̧nä̧, Hierápolis ötahuiyänä ka̧cuä̧tö̧rö̧'i̧nä̧ a̧mö̧cuä̧rö̧ kö̧.

¹⁴ Jitämä adihuä ta̧hua̧ru̧hua̧ Lucas, jahuapö aditömä, ucuturu te'äu. Ja̧'hua̧ta̧nö̧ Demas'inä ucuturu te'äu.

¹⁵ Jitä'inä ujutu ucuturu hue'ätöjä tö̧jä̧hua̧tö̧rö̧, Laodicea ötahuiyänä ka̧cuä̧tö̧rö̧, tecuhuähuätucua pä'ö. Ninfasrö'inä, kojusodenä Dios i̧huȩnȩ ucuocuätörö'inä te'ähuätucui.

¹⁶ Ye, chahuaruhuä, pi̧yȩ cuyäru cucuocuätucu o'ca'a, hue'ätucui Laodicea ötahuiyära̧'a̧, iglesia ruhuä ttucuocua pä'ö jahuätö'inä. Ja̧'hua̧ta̧nö̧ cuyäru Laodicea ötahuiyära̧'a̧ huedinömä, ucuocuätucui ucutu'inä.

¹⁷ Pa̧'a̧nö̧ ji'ähuätucui Arquiporö: “O'ca juiyönä Tu̧ru̧hua̧ hueinö ucuru, adiu jȩpö̧ aditi.”

¹⁸ Ttö, Pablo, pi̧yȩ cuyäru huȩyu̧tu̧sä̧ ttötä chu̧mö̧nä̧. Ttömä cärenä chö̧'a̧'a̧nä̧'i̧nä̧ cunichi'ätucuä'. Ja̧'hua̧ta̧nö̧ Dios ucuturu ppädäcua'a̧nö̧. Amén.