Apocalipsis 9 - TÄ̧DO Ä̧CUÄ̧ I̧HUȨNȨ

¹ Ka̧ra̧ ángel, ji̧mö̧tȩ ru̧hua̧ päi'önä, öäre trompeta ppö'inö. Ppöomenä, ya̧tȩ siri'comä mo̧ro̧jä̧ra̧'a̧ttö̧ pi̧jä̧cu̧ ma̧'ö̧rö̧ topinösä. Ja̧u̧ siri'comä ttiyinäcu reju, yoröiso beipocoju llave.

² Ja̧u̧nu̧ o'ca'a, ja̧u̧ llavenä ba'epinö reju, yoröiso beipocoju. Jahuäju rejuttu, pan rö̧ȩnä̧ ȩttä̧huo̧mȩttö̧ ocurä isoppa räopa'a jä̧'i̧nö̧'a̧nö̧, ocurä isoppa räopina'a. Ja̧u̧ isoppattö, mo̧ro̧ kä̧hua̧'i̧nä̧, kä̧ru̧'coppa'inä yo̧i̧na̧'a̧.

³ Ja̧'hua̧ta̧nö̧ ja̧u̧ isoppattö cä̧'ö̧, pi̧jä̧ huämenä co̧'ä̧rä̧tö̧, rä'opinätö. Jahuätö cä̧'ö̧rö̧, pi̧jä̧nä̧ ka̧cuä̧tö̧ i̧di̧yu̧tu̧ ttujuru ta'anö ttujuruhua pä'ö ttiyinä̧u̧.

⁴ Pi̧jä̧nä̧ ka̧cu̧, isä'cua'inä, dauhuiyä'inä, koro juäi isä'cua jö̧ ta'anö ja̧'tu̧'i̧nä̧ suronä jȩtta̧ pä'ö hue'ähuocotö pi̧nä̧tö̧. Pi̧jä̧ ttö̧ja̧rö̧tä̧, ttö'änä Dios öäre sello ta'ähuocotörötä, suronä jȩtta̧ pä'ö hue'ähuotö pi̧nä̧tö̧.

⁵ Ja̧'hua̧nö̧ ja̧'a̧nä̧ ttö̧ja̧rö̧ cuä'ö tticuatö pä'ö hue'ähuocotö pi̧nä̧tö̧. Kä̧hua̧tö̧ ji̧mö̧tȩ ruhuä jo̧mȩnä̧, ttö̧ja̧ ubara ttutta pä'ö hue'ähuotö pi̧nä̧tö̧ jahuätö cä̧'ö̧mä̧. Ja̧'hua̧ta̧nö̧ ja̧u̧ ubara jȩtti̧nö̧mä̧, koro hua̧ idiyu rahuomenä, ubara jä̧'i̧nö̧'a̧nö̧ ji̧na̧'a̧.

⁶ Ja̧u̧nu̧ mo̧ro̧ ttö̧ja̧mä̧ 'corupätti'a pä'ö, amöcuädö ttusäcuotö. Ja̧'hua̧nö̧ ja̧'a̧nä̧ ttusomenä, 'corupä'i'ocotö ttäcuotö. Jahuätö 'corupätti'a pättomenä, 'corupäi'äcuähuä jahuätöttö oto jä̧cua̧'a̧.

⁷ Jahuätö cä̧'ö̧, ca̧ba̧llo̧stö̧ rohuäu 'chä̧cuä̧huo̧tö̧ jä̧'i̧nö̧'a̧nö̧ a̧'cua̧ri̧nä̧tö̧. Ttunä koro juäi ppöttähuä, orottö adicua'a jä̧'i̧nö̧'a̧nö̧ huȩnä̧ri̧nä̧tö̧. Ttö'ämä ya̧tȩ ttö̧ja̧ i̧sa̧ ö'ä jä̧'i̧nö̧'a̧nö̧ ji̧na̧'a̧.

⁸ Ttuhuo'che'inä yajute isaju kuhuo'che jä̧'i̧nö̧'a̧nö̧ ji̧na̧'a̧. Ttacu'inä, yähui acu jä̧'i̧nö̧'a̧nö̧ ji̧na̧'a̧.

⁹ Tta̧mö̧ca̧nä̧ koro juäi cuoräuttu adicua'a jä̧'i̧nö̧'a̧nö̧ ru̧nä̧ri̧nä̧tö̧. Ttujuabiyä'inä ca̧ba̧llo̧stö̧ rö̧ȩnä̧ caruquiyä rohuäu 'chä̧nö̧ dotta'a ucuocua'a jä̧'i̧nö̧'a̧nö̧ ucuocuina'a.

¹⁰ Tti̧hui̧ri̧pi̧yu̧ päjure idiyu jö̧ ta'anö hui̧nä̧tö̧. Ja̧'hua̧ta̧nö̧ tti̧hui̧ri̧pi̧yu̧nä̧ ttö̧ja̧rö̧ rarattomenä, ji̧mö̧tȩ ruhuä kä̧hua̧tö̧ ubara ttutta pä'ö juruhuinätö.

¹¹ Jahuätö cä̧'ö̧mä̧ ttu̧ru̧hua̧'i̧nä̧ ku̧nä̧ri̧nä̧tö̧. Ja̧u̧ ttu̧ru̧hua̧mä̧ reju beipocoju ángel pi̧nö̧. Ja̧u̧ i̧mi̧mä̧ hebreos tti̧huȩnȩnä̧ Abadón mi̧cui̧nö̧. Ja̧'hua̧ta̧nö̧ griegos tti̧huȩnȩnä̧ Apolión mi̧cui̧nö̧. Ujutu pä'ätöjä Be'epö Icuähuä I̧sa̧ pä'ö.

¹² Täcö äcuomenä surojömä 'cuäopina'a. Ja̧'hua̧nö̧ ja̧'a̧nä̧ ji̧nä̧ todäre jo̧mȩnä̧ surojö 'cuäopäcua'a.

¹³ Ka̧ra̧ ángel, ko̧ro̧mö̧ttö̧nö̧ ya̧tȩ päi'önä, öäre trompeta ppö'inö. Ppöomenä, ya̧tȩ i̧huȩnȩ Diosrö ucuocuäcuähuodä, orottö adicuodättö, kara'anä ä'codättö'inä, kara'anä ä'codättö'inä, Dios ä'ca jo̧mȩ kodättö ucuocua'a ä̧ju̧cui̧nö̧sä̧.

¹⁴ Ja̧u̧ huȩnȩ chutä ko̧ro̧mö̧ttö̧nö̧ ya̧tȩ ángelrö, trompeta 'chu̧'ä̧rö̧rö̧, päina'a: —Aje rö̧oto, Eufrates aje jäyoto, pa̧ja̧cuä̧nö̧ ángeles nö'cähuotö pȩjä̧tö̧rö̧ ejädö icui.

¹⁵ Ja̧'hua̧nö̧ päomenä, jitöja pa̧ja̧cuä̧nö̧ ángelesrö ejädö icuinö, pi̧jä̧ ttö̧ja̧rö̧ ju'tomecutä cuä'ö tticua pä'ö. Jahuätö ángeles ja̧u̧nu̧ pä̧nä̧ tta̧ttä̧ra̧ pä'ö hue'ähuotö pi̧nä̧tö̧.

¹⁶ Ja̧'hua̧ta̧nö̧ su̧ro̧da̧u̧ ca̧ba̧llo̧stö̧nä̧ huä̧mä̧dö̧ rohuähuätömä pa̧'a̧nö̧ recuätö ä̧ju̧cui̧nö̧sä̧. Jahuätö doscientos millones jo̧mȩnä̧ pi̧nä̧tö̧.

¹⁷ 'Cuo̧ti̧nä̧ pa̧'a̧nö̧ topinösä ca̧ba̧llo̧stö̧rö̧'i̧nä̧, ca̧ba̧llo̧stö̧nä̧ huä̧mä̧di̧nä̧tö̧rö̧'i̧nä̧. Jahuätömä tta̧mö̧ca̧nä̧ tto̧ȩcuä̧ra̧'a̧ koro tu'inä, ja̧'tu̧'i̧nä̧, tu'unänö'inä tuhuecua'a ru̧nä̧ri̧nä̧tö̧. Ca̧ba̧llo̧stö̧mä̧, ttumä yähui u jä̧'i̧nö̧'a̧nö̧ hui̧nä̧tö̧. Ttättö räopina'a ocurä'inä, isoppa'inä, koro juäi azufre pättö juäi'inä.

¹⁸ Ja̧'hua̧ta̧nö̧ pi̧jä̧ ttö̧ja̧ttö̧ ju'tomecutä, pi̧yȩ huäbodäcuä juäi, ocuräcu, isoppacu, azufrecu, ca̧ba̧llo̧stö̧ ttättö räopinöttö 'corupä'i'inätö.

¹⁹ Pitö ca̧ba̧llo̧stö̧ ttättö'inä, tti̧hui̧ri̧pi̧yu̧ttu̧'i̧nä̧ juruhuinätö. Tti̧hui̧ri̧pi̧yu̧ koro hua̧ ä̧ca̧, u ku̧nä̧rö̧ jä̧'i̧nö̧'a̧nö̧ hui̧nä̧tö̧. Tti̧hui̧ri̧pi̧yu̧cu̧ suronä jȩpi̧nä̧tö̧.

²⁰ Ja̧'hua̧nö̧ ja̧'a̧nä̧ korotö ttö̧ja̧ ja̧u̧ juäittö 'corupä'i'ocotömä, yoröiso pärocuäcutä amöcuädocotö pi̧nä̧tö̧. Pä'äji jȩtti̧nö̧mä̧ jarotti'a pä'ö amöcuädocotö pi̧nä̧tö̧. Espíritus suropätörö'inä, ttu̧mö̧nä̧ adicuä juäi, orottö'inä, pärätättö'inä, broncettö'inä, ido'quittö'inä, dauttu'inä adicua'a, yoröiso tocö juäi'inä, ä̧ju̧cuo̧cö̧ juäi'inä, cueächocö juäi'inä jarotti'a pä'ö amöcuädocotö pi̧nä̧tö̧.

²¹ Ja̧'hua̧ta̧nö̧ ttö̧ja̧rö̧ cuä'ö icuähuä'inä, huarähuä'inä, nä̧tö̧rö̧ suronä jȩä̧cuä̧huä̧'i̧nä̧, nä̧u̧cuä̧rä̧cuä̧huä̧'i̧nä̧ jarotti'a pä'ö pärocuäcutä amöcuädocotö pi̧nä̧tö̧.