Apocalipsis 8 - TÄ̧DO Ä̧CUÄ̧ I̧HUȨNȨ

Ko̧ro̧mö̧ttö̧nö̧ todäre sello huȩnȩ

¹ Chutä Cordero ko̧ro̧mö̧ttö̧nö̧ todäre jo̧mȩnä̧ sello, cuyäru'tänä tahuähuäyu jȩpö̧ icuomenä, a̧'u̧cua̧'a̧tä̧ yoröiso 'corujina'a mo̧ro̧jä̧ra̧'a̧ttö̧.

² Ja̧u̧nu̧ o'ca'a, ko̧ro̧mö̧ttö̧nö̧ ta̧ju̧nu̧ ángeles Dios ä'ca jo̧mȩ ttö̧ja̧cua̧'a̧ topinösä. Jahuätörö ko̧ro̧mö̧ttö̧nö̧ todäre trompetas ttiyinä̧u̧.

³ Ja̧u̧nu̧ o'ca'a, ka̧ra̧ ángel, koro juäi rö̧ȩnä̧ ameu ku icuähuo̧'ta̧, orottö adicuo̧'ta̧ 'chu̧'ä̧rö̧ ichinö. Diosrö ucuocuäcuähuodä ä'ca kä̧mä̧di̧nö̧. Ja̧u̧ru̧ rö̧ȩnä̧ ameu ttiyinäcu, o'ca toi'önä Dios i̧tti̧mö̧ ttucuocua'a ppä'ädö, Diosrö ucuocuäcuähuodänä, orottö adicuodänä, chutä i̧dȩä̧cä̧ ä'cattö ku icua pä'ö.

⁴ Ja̧'hua̧ ja̧'a̧ ja̧u̧ rö̧ȩnä̧ ameu isoppa'inä, Dios i̧tti̧mö̧ ttucuocuina'a huȩnȩ'i̧nä̧ ángel u̧mö̧ttö̧ 'chahuächina'a Dios ö̧jo̧mȩcu̧.

⁵ Ja̧u̧nu̧ o'ca'a, ja̧u̧ ángel ja̧u̧ rö̧ȩnä̧ ameu ku icuähuo̧'ta̧ 'chu̧'ä̧rö̧, ocu i̧sa̧ri̧ Diosrö ucuocuäcuähuodättö ȩmä̧ji̧'ca̧ ȩni̧nö̧ ju̧huo̧'ta̧nä̧. Ja̧'hua̧nö̧ ȩnä̧ji̧'ca̧, rȩjȩcu̧ icuinö. Ja̧'hua̧nö̧ icuomenä, cu'upä'inä cöröächina'a. Koro'inä rö̧ȩnä̧ ucuocuina'a. Cu'upä'inä rohuinö. Rȩjȩ'i̧nä̧ ttö̧ä̧hui̧na̧'a̧.

Trompeta ppöttinö huȩnȩ

⁶ Ja̧'hua̧ ja̧'a̧ttö̧ jahuätö ko̧ro̧mö̧ttö̧nö̧ ta̧ju̧nu̧ ángeles, ko̧ro̧mö̧ttö̧nö̧ todäre trompetas 'chu̧'ä̧rä̧tö̧mä̧ ppötta pä'ö jo̧mȩ pä'i'inätö.

⁷ Äcuomenä ángel öäre trompeta ppö'inö. Ppöomenä, diyahuo'qui'inä, ocurä'inä ttucuojacu huihuaunä ma̧i̧na̧'a̧ pi̧jä̧ra̧'a̧. Rȩjȩ'i̧nä̧ ju'tomecutä, dauhuiyä'inä ju'tomecutä, o'ca juiyönä isä'cua'inä juiyönä cuo'ö icuina'a.

⁸ Ka̧ra̧ ángel, ta̧ju̧ päi'omenä, öäre trompeta ppö'inö. Ppöomenä, koro juäi möä'ca, rö̧ä'ca, ocurä cuoä'ca jä̧'i̧nö̧'a̧nö̧ ma̧i̧na̧'a̧, dubora rö̧oranä. Ja̧'hua̧nö̧ ma̧o̧mȩnä̧, dubora rö̧ora ju'tomecutä ttucuoja päi'önä juoächina'a.

⁹ Ja̧'hua̧ta̧nö̧ o'ca toi'önä isotö, dubora rö̧oranä ka̧cuä̧tö̧ttö̧ ju'totä hua'ö icuinätö. Ja̧'hua̧ta̧nö̧ huoi'quiyu'inä ju'totä toei'ina'a.

¹⁰ Ka̧ra̧ ángel, huämetucuä päi'önä, öäre trompeta ppö'inö. Ppöomenä, ya̧tȩ siri'comä, koro juäi lámpara cuo̧ä̧ra̧ ma̧'a̧ jä̧'i̧nö̧'a̧nö̧, mo̧ro̧jä̧ra̧'a̧ttö̧ ma̧i̧na̧'a̧. Ajehuiyänä'inä, aje i̧sä̧ri̧yä̧nä̧'i̧nä̧ ju'tomecutä ma̧i̧na̧'a̧.

¹¹ Ja̧u̧ siri'co i̧mi̧mä̧ Ajenjo pä'ö mi̧cui̧nö̧. Ja̧'hua̧nö̧ ma̧o̧mȩnä̧, o'ca juiyönä ajiya ju'tomecutä reönä juoächina'a. Ja̧'hua̧ta̧nö̧ ja̧u̧ ajiya rea'attö, recuätö ttö̧ja̧ hua'ö icuinätö.

¹² Ka̧ra̧ ángel, pa̧ja̧cuä̧nö̧ päi'önä, öäre trompeta ppö'inö. Ppöomenä, mo̧ro̧ kä̧hua̧'i̧nä̧, yodo kä̧hua̧'i̧nä̧, si̧ri̧'cö̧'i̧nä̧ ju'tomecutä surojuo'ächinätö. Ja̧'hua̧nö̧ surojuottächomenä, yoröiso yo̧i̧na̧'a̧ ttitejädoca'attö. Ja̧'hua̧ta̧nö̧ mo̧ro̧'i̧nä̧, yodo'inä ju'tomecutä, a̧'u̧cua̧'a̧tä̧ yoröiso tejädocotö pi̧nä̧tö̧.

¹³ Ja̧u̧nu̧ o'ca'a tochomenä, ya̧tȩ ángel mo̧ro̧jä̧nä̧ co̧ä̧ra̧'a̧, i̧huȩnȩ ä̧ju̧cui̧nö̧sä̧. Ja̧u̧ i̧huȩnȩnä̧ pä̧i̧cu̧nä̧ pä'inö: —Iso päi'önä korotö huämetucuä ángeles ttöäre trompetas ppöttomenä, pi̧jä̧nä̧ ka̧cuä̧tö̧mä̧ yoröiso tta̧'cua̧ tta̧'ȩcu̧ ubara ttuttäcuotö, —pä'inö.