Apocalipsis 20 - TÄ̧DO Ä̧CUÄ̧ I̧HUȨNȨ

Ya'ute mil a̧'ȩ jo̧mȩnä̧ 'cuäopä̧cuȩ huȩnȩ

¹ Ja̧u̧ juäi 'cuäopäji o'ca'a, ya̧tȩ ángelrö mo̧ro̧jä̧ra̧'a̧ttö̧ i̧mȩyȩhua̧'a̧ topinösä. Ja̧u̧ reju yoröiso beipocoju öäre llave'inä, cuoräusa rö̧äsa'inä u̧mö̧nä̧ 'chu̧'ä̧ri̧nö̧.

² Ja̧u̧ ángel ojuo da'ä jä̧'i̧nö̧'a̧nö̧ hua̧rö̧, ja̧u̧ täbocö ä̧ca̧ pi̧nö̧rö̧, 'chu'ädinö. Ja̧u̧ ojuo da'ä̧ jä̧'i̧nö̧'a̧nö̧ hua̧mä̧ ähuettä'inä, Satanás'inä päi'önä kö̧. Ja̧u̧ru̧ 'chuhuädäji o'ca'a, ya'ute mil a̧'ȩ jo̧mȩnä̧ päi'önä, cuoräusa nö'cähua'a ki̧nö̧.

³ Ja̧'hua̧nö̧ önö'cäji o'ca'a, jahuäju rejunä, yoröiso beipocojunä, do'opö icuinäcu. Ju̧huȩnȩ äpate 'quiyönä mö̧'ȩpi̧nö̧. Ja̧'hua̧nö̧ jȩinä̧cu̧ pi̧jä̧ ttö̧ja̧rö̧ yapareu jiäu juiya pä'ö ya'ute mil a̧'ȩ päi'ome jubö. Ya'ute mil a̧'ȩ o'ca'a, pä'äji ta'anö beometä ja̧u̧ru̧ rä'epö tticuäcuotö.

⁴ Ja̧u̧nu̧ o'ca'a, tti̧dȩä̧qui̧yä̧ topinösä. Ja̧u̧ juäi tti̧dȩä̧qui̧yä̧nä̧ pȩji̧nä̧tö̧, ttö̧ja̧rö̧ ro̧ttȩpa̧ pä'ö huettinä̧u̧. Ja̧'hua̧ta̧nö̧ korotö Jesús i̧huȩnȩ jittähua'attö, ttu 'cui'opö tticuinä̧u̧, Dios hueö'inä esetinätörö topinösä. Jahuätömä ja̧u̧ pä̧i̧cua̧ i̧sa̧rö̧'i̧nä̧, chutä a̧'u̧cuä̧'i̧nä̧ esehuocotö, ja̧u̧ pä̧i̧cua̧ i̧sa̧ öäre sello ttö'änä'inä, ttu̧mö̧nä̧'i̧nä̧ ta'ähuocotö tta̧'cua̧ru̧hua̧rö̧ topinösä. Jahuätö pä'äji ta'anö ttö̧ja̧cua̧'a̧. Cristocu ya'ute mil a̧'ȩ jo̧mȩnä̧ huetta'a topinösä.

⁵ Ja̧'hua̧nö̧ ja̧'a̧nä̧ korotö hua'ö icuinätömä, ja̧u̧ ya'ute mil a̧'ȩ jo̧mȩnä̧ 'cuäopinö o'ca'atä, pä'äji ta'anö ka̧cui̧nä̧tö̧. Ja̧u̧tä̧ äcuomenä ttoächäcuähuä.

⁶ Äcuomenä ttottächomettö tto'ächätömä eseunu ttö̧ja̧cuä̧cuo̧tö̧. Ja̧'hua̧ta̧nö̧ Dios ä'ca jo̧mȩttö̧ adihuä isotö päi'önä ttö̧ja̧cuä̧cuo̧tö̧. Todärenä 'corupätti'omettö yoröiso 'cuäopoca'a jä̧cua̧'a̧ jahuätörö. Jahuätömä Dios ä'ca jo̧mȩttö̧'i̧nä̧, Cristo ä'ca jo̧mȩttö̧'i̧nä̧ sacerdotes isotö pätti'äcuotö. Ja̧u̧cu̧ ya'ute mil a̧'ȩ jo̧mȩnä̧ huettäcuotö.

⁷ Ja̧u̧ ya'ute mil a̧'ȩ jo̧mȩnä̧ 'cuäopö o'ca'a, Satanásrö ejädö tticuäcuotö cärenä ö̧jo̧mȩttö̧.

⁸ O'ca toi'önä pi̧jä̧ pa̧ja̧cu̧nä̧ ttö̧ja̧rö̧ yapareu jȩa̧ pä'ö rä̧o̧pä̧cua̧. Gog ötahuiyänä'inä, Magog ötahuiyänä'inä yapareu jȩä̧cua̧. Juhua'attö su̧ro̧da̧u̧ isotö recuätörö dubora rö̧ora jäyora pä̧ba̧ jä̧'i̧nö̧'a̧nö̧, ttirecuomettö ö̧ca̧ca̧tä̧cua̧ ttörohuähua pä'ö.

⁹ Ja̧'hua̧ ja̧'a̧ttö̧ pi̧jä̧ rö̧omettö ichinätö. Dios umöhuäyotö ttö̧ja̧cuo̧mȩcu̧'i̧nä̧, ja̧u̧ ötahuiyäcu, Dios repeinomecu, u̧mi̧cu̧ isobö päi'önä ca̧ca̧cui̧pi̧nä̧tö̧. Ja̧'hua̧nö̧ ja̧'a̧nä̧ Dios mo̧ro̧jä̧ra̧'a̧ttö̧ ocurä hue'inö, jahuätörö o'ca toi'önä bettipächönä cuo'ö tticua pä'ö.

¹⁰ Ja̧u̧tä̧ ähuettämä, jahuätörö yapareu ji'ähuinörö, ocurä rö̧arä azufrenä cuoarära̧'a̧, ja̧u̧ pä̧i̧cua̧ i̧sa̧rö̧'i̧nä̧, ka̧ra̧ yapareu ji'ähuinörö'inä do'opö tticuinarära̧'a̧, do'opö tticuinäcu. Juhua'a 'cuäopönätä, mo̧ro̧'i̧nä̧, yodo'inä ubara ttuttäcuotö.

Adihuä i̧dȩä̧cä̧ tȩä̧cä̧ Dios ro̧ȩcuä̧ 'cuäopä̧cuȩ huȩnȩ

¹¹ Ja̧'hua̧ ja̧'a̧ttö̧ adihuä i̧dȩä̧cä̧ tȩä̧cä̧ topinösä. Ja̧'hua̧ta̧nö̧ ju̧huä̧cä̧nä̧ ya̧tȩ pi̧nö̧. Ju̧huȩnȩ dȩä̧cä̧nä̧ pö̧ ä'ca jo̧mȩttö̧ pi̧jä̧'i̧nä̧, mo̧ro̧jä̧'i̧nä̧ juiyönä toei'ina'a. Ttö̧jo̧mȩ yoröiso juiyina'a.

¹² Ja̧'hua̧ta̧nö̧ 'corupä'i'inätörö, tä̧mö̧'i̧nä̧, ppo̧'ä̧tö̧'i̧nä̧ Dios ä'ca jo̧mȩ ttö̧ja̧'a̧ topinösä. Cuyäru bahuecuächina'a. Koro cuyäru'inä kä̧cuä̧huä̧ i'co cuyäru'tä bahuecuächina'a. 'Corupä'i'inätörö pä'äji jȩtti̧nö̧ cuyäru'tänä huȩyu̧cua̧'a̧ topö ro̧ȩpi̧nä̧u̧.

¹³ Dubora rö̧orattö 'corupä'i'inätö'inä duborattö rä'opinätö. 'Corupäi'äcuähuättö'inä, 'corupätti'omettö'inä 'corupä'i'inätömä rä'opinätö. O'ca toi'önärö, pä'äji jȩtti̧nö̧ topö, ro̧ȩpi̧nä̧u̧.

¹⁴ Ja̧u̧nu̧ o'ca'a, 'corupäi'äcuähuä'inä, 'corupätti'ome'inä ocurä rö̧arära̧'a̧ do'opö icuinä̧u̧. Ja̧u̧ ocurä rö̧arä todärenä 'corupäi'äcuähuä ja̧'a̧.

¹⁵ Ja̧'hua̧ta̧nö̧ o'ca toi'önärö, tti̧mi̧mä̧ kä̧cuä̧huä̧ i'co cuyäru'tänä huȩyu̧cuo̧co̧tö̧rö̧ juhuarä ocurä rö̧arära̧'a̧ do'opö icuinä̧u̧.