Apocalipsis 16 - TÄ̧DO Ä̧CUÄ̧ I̧HUȨNȨ

Ro̧ȩcuä̧ huȩnȩ

¹ Ja̧'hua̧ ja̧'a̧ttö̧ ji̧nä̧ isocu Dios adihuä ö̧jo̧mȩttö̧ ya̧tȩ i̧huȩnȩ pä̧i̧cu̧nä̧ ucuocua'a ä̧ju̧cui̧nö̧sä̧. Ja̧u̧ huȩnȩ jahuätörö ko̧ro̧mö̧ttö̧nö̧ ta̧ju̧ ángelesrö päina'a: —Ja̧u̧ juäi, ko̧ro̧mö̧ttö̧nö̧ to̧'ta̧rȩ rö̧ȩnä̧ ro̧ȩcuä̧ Diosttö ichäcua'a ȩcö̧mä̧, to'äu icuätucui rȩjȩra̧'a̧cu̧.

² Äcuomenä ángel i̧sa̧ 'chä̧ji̧'ca̧, öäre i̧so̧'ta̧ to'inö rȩjȩra̧'a̧cu̧. O'ca toi'önä ttö̧ja̧mä̧, ja̧u̧ pä̧i̧cua̧ i̧sa̧ öäre sello ta'ähuotö'inä, ja̧u̧ pä̧i̧cua̧ i̧sa̧ a̧'u̧cuä̧ esehuinätö'inä, ttöttahuiyä rö̧ȩnä̧ suronä barahuä̧u̧ na̧'ä̧chi̧nä̧tö̧.

³ Ka̧ra̧ ángel, ta̧ju̧ päi'önä, öäre i̧so̧'ta̧ dubora rö̧orara̧'a̧ to'inö. Ya̧tȩ 'corupä'i'äji'ca̧ ucuoja jä̧'i̧nö̧'a̧nö̧ juoächina'a juhuora dubora ajiya. O'ca toi'önä juhuoranä ka̧cui̧nä̧tö̧mä̧ hua'ö icuinätö.

⁴ Ka̧ra̧ ángel'inä, huä̧mȩtu̧cuä̧ päi'önä, öäre i̧so̧'ta̧ ajehuiyänä'inä, aje i̧sä̧ri̧yä̧nä̧'i̧nä̧ to'inö. Ja̧'hua̧ ja̧'a̧ ttucuojatä juoächina'a.

⁵ Ja̧u̧nu̧ o'ca'a, chutä ángel ajiya u̧ru̧hua̧ pi̧nö̧mä̧ päa'a ä̧ju̧cui̧nö̧sä̧. Pä'inö: —Tu̧ru̧hua̧ Dios, adihuä i̧sa̧mä̧, jitä'inä kö̧, pä'äji'inä ki̧nö̧mä̧, ja̧'hua̧nö̧ ro̧'ȩpö̧ jȩcu̧'o̧mȩnä̧, adiunätä jȩpö̧jä̧.

⁶ Jahuätömä ucuru esetinätörö'inä, ucu huecuhuinö ucuocuinätörö'inä ttucuoja erönä jȩpi̧nä̧tö̧. Jitämä jitötä ttucuoja ttahua pä'ö jȩcu̧'i̧nä̧u̧. Iso päi'önä huäinä 'cuäopäcuä̧u̧.

⁷ Ja̧'hua̧ta̧nö̧ ka̧ra̧ i̧huȩnȩ Diosrö ucuocuäcuähuodättö ucuocua'a ä̧ju̧cui̧nö̧sä̧. Ja̧u̧ huȩnȩ päina'a: —Iso päi'önä Tu̧ru̧hua̧, Dios o'ca juiyönä ju̧ru̧hua̧mä̧, iso päi'önä adiu jueönä ro̧'ȩpö̧ jȩpö̧jä̧.

⁸ Ka̧ra̧ ángel'inä, pa̧ja̧cuä̧nö̧ päi'önä, öäre i̧so̧'ta̧ mo̧ro̧ kä̧hua̧nä̧ to'inö. Ja̧'hua̧ta̧nö̧ mo̧ro̧ kä̧hua̧rö̧ ujuru iyina'a ttö̧ja̧rö̧ ku icua pä'ö udupunä.

⁹ O'ca toi'önä rö̧ȩnä̧ cuo'ö ki̧nä̧tö̧. Ja̧'hua̧nö̧ ja̧'a̧nä̧ pärocuäcutä amöcuädocotö pi̧nä̧tö̧. Diosrö esehuocotö pi̧nä̧tö̧. Pi̧yȩ surojö o'ca juiyönä ju̧ru̧hua̧rö̧ suronätä ucuocuinätö.

¹⁰ Ka̧ra̧ ángel'inä, ji̧mö̧tȩ ruhuä päi'önä, öäre i̧so̧'ta̧ ja̧u̧ pä̧i̧cua̧ i̧sa̧ i̧dȩä̧cä̧nä̧ to'inö. O'ca juiyönä hueömä yo̧i̧na̧'a̧, ja̧'hua̧nö̧ toomenä. Ttö̧ja̧'i̧nä̧ tti̧nȩnä̧ yö̧'ä̧hui̧nä̧tö̧ rö̧ȩnä̧ barahuä̧u̧.

¹¹ Ja̧'hua̧nö̧ ja̧'a̧nä̧ ja̧'hua̧nö̧ 'cuäopa'anä'inä, yoröiso pärocuäcutä amöcuädocotö pi̧nä̧tö̧, suronä jȩtta̧'a̧ jarotti'a pä'ö. Rö̧ȩnä̧ ubara ttutta'attö'inä, ttöttahuiyä na̧ttä̧cha̧'a̧ttö̧'i̧nä̧ Diosrö, mo̧ro̧jä̧nä̧ kö̧rö̧, suronätä ucuocuinätö.

¹² Ka̧ra̧ ángel'inä, ko̧ro̧mö̧ttö̧nö̧ ya̧tȩ päi'önä, öäre i̧so̧'ta̧ aje rö̧oto, Eufrates ajenä to'inö. Ja̧'hua̧nö̧ toomenä, ajemä joipächina'a mä̧nä̧ päi'önä, korotö ruhuotö kä̧hua̧ räopa'acuttu tticha pä'ö.

¹³ Ja̧u̧nu̧ o'ca'a, huämetucuä espíritus suropätö, hua̧jo̧tö̧ jä̧'i̧nö̧'a̧nö̧ huotö, ojuo da'ä jä̧'i̧nö̧'a̧nö̧ hua̧ ättö'inä, pä̧i̧cua̧ i̧sa̧ ättö'inä, yapareu huȩnȩ ji'äu ättö'inä rättopa'a topinösä.

¹⁴ Pitö espíritus suropätömä, ähuettä umöhuäyotö koro ttö̧ja̧ ttieru juäi jȩpi̧nä̧tö̧ pi̧nä̧tö̧. Jahuätömä, o'ca toi'önä pi̧jä̧ ruhuotörö ca̧ca̧tö̧ rä'opinätö, Dios, o'ca juiyönä ju̧ru̧hua̧, ttö̧ja̧rö̧ ro̧ȩcuä̧ mo̧ro̧ päi'omenä ttörohuähua pä'ö.

¹⁵ “Topätucui. Ttömä tta̧ttä̧ro̧ca̧'a̧nä̧, nä̧u̧cuä̧rö̧ i̧sa̧ ichö'a̧nö̧ ichösä. Chutä äoca'anä tta̧'ä̧rö̧mä̧, ö̧'ca̧tä̧huä̧ta̧ ku̧nä̧rö̧mä̧, eseunu ö̧jä̧cua̧, ö̧'ca̧tä̧huä̧ta̧ juiyönä korotö ttä'ca jo̧mȩttö̧ dä'äcu cueächoca'attö.”

¹⁶ Ja̧'hua̧ ja̧'a̧ jahuätö ruhuotömä hebreos tti̧huȩnȩnä̧ Armagedón pä'ö micuome ttö̧ca̧ca̧ta̧ pä'ö i'cächinätö.

¹⁷ Ka̧ra̧ ángel'inä, ko̧ro̧mö̧ttö̧nö̧ ta̧ju̧ päi'önä, öäre i̧so̧'ta̧ kä̧ru̧'coppanä to'inö. Ji̧nä̧ isocu Dios adihuä ö̧jo̧mȩ i̧dȩä̧cä̧ttö̧, ya̧tȩ i̧huȩnȩ pä̧i̧cu̧nä̧ ucuocuina'a. Ja̧u̧ huȩnȩ päina'a: —Täcö 'cuäopa'a.

¹⁸ Ja̧'hua̧ ja̧'a̧ttö̧ cu'upä'inä rohuinö. Koro juäi'inä rö̧ȩnä̧ ucuocuina'a. Cu'upä'inä cöröächina'a. Ttö̧ja̧ pi̧jä̧nä̧ äcuomenä ttö̧ja̧cui̧nö̧ kä̧mä̧dö̧, jitä pä̧nä̧ päi'önä, pi̧jä̧ pä'äji ttö̧ä̧hui̧nö̧ttö̧'i̧nä̧ abonänö rö̧ȩnä̧ ttö̧ä̧hui̧na̧'a̧.

¹⁹ Ötahuiyä rö̧ome, huäbodäcuä ötahuiyä jo̧mȩnä̧ päi'ina'a. Pi̧jä̧ttö̧ ötahuiyä'inä päcua'acu ma̧ä̧chi̧na̧'a̧. Ja̧'hua̧ ja̧'a̧nä̧ Dios amöcuädinö ötahuiyä rö̧ome, Babilonia ötahuiyä. Chutä ö̧ra̧huä̧ra̧'a̧ttö̧, ro̧ȩcuä̧ vino ttahua pä'ö hue'inö juhua'a ötahuiyänä ka̧cuä̧tö̧rö̧.

²⁰ O'ca juiyönä kä'co o̧sa̧'i̧nä̧, möä'quiyu'inä yoröiso juiyönä päi'ina'a.

²¹ Ja̧'hua̧ta̧nö̧ diyahuo'qui rö̧o'qui, cuarenta kilos jo̧mȩnä̧ amäco'qui, mo̧ro̧jä̧ra̧'a̧ttö̧ ma̧i̧na̧'a̧ pi̧jä̧ ttö̧ja̧rö̧. Ja̧u̧ diyahuo'qui ma̧o̧mȩnä̧, rö̧ȩnä̧ ro̧ȩcuä̧ ji̧na̧'a̧. Ja̧'hua̧nö̧ ja̧'a̧ttö̧ pi̧jä̧ ttö̧ja̧ ja̧u̧ juäi suronä 'cuäopä̧u̧ suronä ucuocuinätö Diosrö.