Apocalipsis 15 - TÄ̧DO Ä̧CUÄ̧ I̧HUȨNȨ

Ko̧ro̧mö̧ttö̧nö̧ todäre suronä 'cuäopä̧cuȩ huȩnȩ

¹ Mo̧ro̧jä̧ra̧'a̧ttö̧ koro juäi, adihuä juäi, tottocö juäi i̧jȩcua̧'a̧ topinösä. Ko̧ro̧mö̧ttö̧nö̧ ta̧ju̧nu̧ ángeles ko̧ro̧mö̧ttö̧nö̧ todäre surojö 'cuäopä̧cuȩ 'chu̧ttä̧ra̧'a̧ topinösä. Ja̧u̧tä̧ Dios ö̧ra̧huä̧rä̧cua̧'a̧ röjinä.

² Ja̧'hua̧ta̧nö̧ koro'inä, dubora rö̧ora i̧sä̧yu̧ttö̧'i̧nä̧, ocurättö'inä adicuora jä̧'i̧nö̧'a̧nö̧ ja̧'a̧ topinösä. Ttö̧ja̧mä̧, ja̧u̧ pä̧i̧cua̧ i̧sa̧rö̧'i̧nä̧, chutä a̧'u̧cuä̧'i̧nä̧, chutä i̧mi̧ número huȩyu̧cuä̧'i̧nä̧ ttesetoca'a juruhuinätömä, juhuora dubora rö̧ora i̧sä̧yu̧ttö̧ adicuora jäyä ttöäre arpas, ttu̧mö̧nä̧ 'porähuä Dios iyinö 'chu̧'ä̧rö̧ ka̧cui̧nä̧tö̧.

³ Moisés, Dios u̧mö̧huä̧ya̧, ra̧hui̧nö̧'i̧nä̧, Cordero ra̧hui̧nö̧'i̧nä̧ ra̧'i̧nä̧tö̧. Pa̧'a̧nö̧ ra̧'i̧nä̧tö̧: Tu̧ru̧hua̧, Dios o'ca juiyönä ju̧ru̧hua̧mä̧, o'ca juiyönä jȩcu̧'u̧mä̧ yoröiso adihua'a. O'ca toi'önä Ttu̧ru̧hua̧, ucu cu̧mä̧nä̧ jueönätä 'chä̧mä̧mä̧. Iso päi'önä 'chä̧mä̧mä̧.

⁴ Tu̧ru̧hua̧, ucuru ye'ecuocömä ¿dijä̧ttö̧? Ucuru esehuocömä ¿dijä̧ttö̧? Ucutä, ya̧tȩä̧tä̧, adihuä i̧sa̧jä̧. O'ca toi'önä pa̧ja̧cu̧nä̧ ttö̧ja̧, iso päi'önä o'ca juiyönä jȩcu̧'u̧mä̧ adihua'a tottomenä, ichi'ö ttesehuäcuotö ucurutä.

⁵ Pi̧yȩ 'cuäopäji o'ca'a tochomenä, mo̧ro̧jä̧ttö̧ Diosrö ucuocuäcuähuodettö, ji̧nä̧ isocu Dios ö̧jo̧mȩ, hueähuä huȩnȩ huȩyu̧cuodiyä hua'adö ku̧nä̧huo̧mȩ bahuecuächa'a topinösä.

⁶ Juhua'attö, ji̧nä̧ isocu Dios adihuä ö̧jo̧mȩttö̧ jitöja ko̧ro̧mö̧ttö̧nö̧ ta̧ju̧ ángeles ja̧u̧ juäi ko̧ro̧mö̧ttö̧nö̧ todäre surojö 'cuäopä̧cuȩmä̧ ȩpä̧tö̧mä̧ rä'opinätö. I̧sä̧ta̧ i̧di̧cuo̧co̧ta̧nä̧, adiu tȩa̧huä̧ta̧nä̧ 'ca̧tä̧hui̧nä̧tö̧. Tta̧mö̧ca̧nä̧ isäya orottö adicua'a ru̧nä̧ri̧nä̧tö̧.

⁷ Ja̧u̧nu̧ o'ca'a, pa̧ja̧cuä̧nö̧ isotö a̧'cua̧rä̧tö̧ttö̧ ya̧tȩ, jahuätö ko̧ro̧mö̧ttö̧nö̧ ta̧ju̧ ángelesrö i̧so̧'ta̧, orottö adicuo̧'ta̧ iyinö. Ju̧huo̧'ta̧ i̧so̧'ta̧nä̧ ȩqui̧na̧'a̧ rö̧ȩnä̧ ro̧ȩcuä̧, 'cuäopönä kö̧mä̧ Diosttö ichäcua'a.

⁸ Ji̧nä̧ isocu Dios adihuä ö̧jo̧mȩ ocurä isoppanä suhuädina'a. Ja̧u̧ isoppa Dios öadihuättö'inä, ujuruttu'inä ichina'a. Jahuätö ko̧ro̧mö̧ttö̧nö̧ ta̧ju̧ ángeles ko̧ro̧mö̧ttö̧nö̧ todärenä surojö 'cuäopä̧cuȩmä̧ 'cuäopome jubö päi'önä, ya̧tȩ'i̧nä̧ yoröiso doächäcuähuome juiyina'a juhua'amä.