Apocalipsis 13 - TÄ̧DO Ä̧CUÄ̧ I̧HUȨNȨ

Ta̧ju̧ pä̧i̧cuä̧tö̧ isotö huȩnȩ

¹ Ttö dubora rö̧ora jäyoto rȩba̧nä̧ chö̧jo̧mȩnä̧, pä̧i̧cua̧ i̧sa̧, uhuiyä'inä ko̧ro̧mö̧ttö̧nö̧ todäre ku̧nä̧rö̧mä̧, u i̧sä̧juä̧'i̧nä̧ to̧mö̧rȩ jähuä ku̧nä̧rö̧mä̧, juhuorattö räopa'a topinösä. Koro u i̧sä̧juä̧nä̧'i̧nä̧, koro u i̧sä̧juä̧nä̧'i̧nä̧ ppöttähuä huȩnä̧ri̧nö̧. Koro unä'inä, koro unä'inä Diosrö suronä pä'ö huȩnȩ huȩyu̧cui̧na̧'a̧.

² Ja̧u̧ pä̧i̧cua̧ i̧sa̧mä̧, tochäjäcumä yähui ta'anö hui̧nö̧. Ö̧jä̧pi̧yä̧mä̧ oso ta'anö hui̧nö̧. Ä'inä león ta'anö hui̧nö̧. Ja̧u̧ ojuo da'ä jä̧'i̧nö̧'a̧nö̧ hua̧mä̧ ja̧u̧ pä̧i̧cua̧ i̧sa̧rö̧ ujuru'inä, i̧dȩä̧cä̧'i̧nä̧, rö̧ȩnä̧ hueähuä'inä iyinäcu.

³ Ja̧u̧ pä̧i̧cua̧ i̧sa̧ u ji'ute cuä'ö tticuäja'a jä̧'i̧nö̧'a̧nö̧ ji̧na̧'a̧. Ja̧'hua̧nö̧ ja̧'a̧nä̧ cuä'ö tticuäja'a adiu päi'inäcu. Ja̧'hua̧nö̧ päi'omenä, o'ca toi'önä pi̧jä̧ ttö̧ja̧ to̧ttä̧ro̧mȩnä̧, ja̧u̧ o'ca'anä 'chi̧nä̧tö̧.

⁴ Chutä ojuo da'ä jä̧'i̧nö̧'a̧nö̧ hua̧rö̧, ja̧u̧ pä̧i̧cua̧ i̧sa̧rö̧ huea pä'ö hueäja'attö, eseunu ucuocuinätö. Ja̧u̧ pä̧i̧cua̧ i̧sa̧rö̧'i̧nä̧ eseunu ucuocu pä'inätö: —Pide jö̧ ta'anö hua̧mä̧, ¿tidejä̧ttö̧? Pidecu örohuäu'a̧nö̧ hua̧mä̧, ¿tidejä̧ttö̧?

⁵ Ja̧'hua̧ta̧nö̧ ja̧u̧ pä̧i̧cua̧ i̧sa̧mä̧ koro huȩnȩ ja̧'a̧tä̧ ucuocuäcuähuä'inä, Diosrö suronä ucuocuäcuähuä'inä huettinäcu. Ja̧'hua̧ta̧nö̧ cuarenta y dos kä̧hua̧tö̧ huea pä'ö huettinäcu.

⁶ Ja̧'hua̧nö̧ jȩpi̧nö̧. Diosrö'inä, Dios i̧mi̧nä̧'i̧nä̧, Dios ö̧jo̧mȩ'i̧nä̧, mo̧ro̧jä̧nä̧ ka̧cuä̧tö̧rö̧'i̧nä̧ suronä ucuocuinö.

⁷ Ja̧'hua̧ta̧nö̧ Dios i̧tti̧mö̧rö̧, umöhuäyotörö, örohuähua pä'ö huettinäcu. Jahuätöttö'inä abonänö juruhuinö. O'ca toi'önä pa̧ja̧cu̧nä̧ ttö̧ja̧rö̧'i̧nä̧, o'ca juiyönä ötahuiyä ttö̧ja̧rö̧'i̧nä̧, tti̧huȩnȩ pö̧nä̧ ucuocuätörö'inä, ko̧ro̧jä̧ tti̧rȩjä̧nä̧ ka̧cuä̧tö̧rö̧'i̧nä̧ huea pä'ö huettinäcu.

⁸ O'ca toi'önä pi̧jä̧nä̧ ka̧cuä̧tö̧mä̧, Cordero 'corupä'i'inö u̧ju̧närä̧'tänä, kä̧cuä̧huä̧ i'co cuyäru'tänä, Dios pi̧jä̧ aditinö mo̧ro̧ i̧huȩyu̧ti̧nö̧'tänä tti̧mi̧ jui'ätömä, ja̧u̧ pä̧i̧cua̧ i̧sa̧rö̧ esehuinätö.

⁹ Ya̧tȩ ä̧ja̧ ku̧nä̧rö̧mä̧, ä̧ju̧cui̧.

¹⁰ Korotömä korotörö cärenä ttö̧'a̧ pä'ö ȩpä̧tö̧mä̧, jitötä'inä cärenä ttö̧'ä̧cuo̧tö̧. Korotömä korotörö curodänä cuä'ö icuätömä, ja̧'hua̧ta̧nö̧ curodänä cuä'ö tticuäcuotö jahuätörö. Ja̧'hua̧nö̧ ja̧'a̧ttö̧ Dios i̧tti̧mö̧mä̧ ttami 'quittächi'ö'a̧nö̧ ja̧'a̧. Ja̧'hua̧ta̧nö̧ adiunä ttesetö'a̧nö̧ ja̧'a̧.

¹¹ Ja̧u̧nu̧ o'ca'a, ka̧ra̧ pä̧i̧cua̧ i̧sa̧'i̧nä̧ pi̧jä̧ttö̧ räopa'a topinösä. Ja̧u̧ pä̧i̧cua̧ i̧sa̧mä̧ oveja i̧tti̧ ta'anö, todäre u i̧sä̧juä̧ ku̧nä̧ri̧nö̧. Ja̧'hua̧nö̧ ja̧'a̧nä̧ ojuo da'ä jä̧'i̧nö̧'a̧nö̧ hua̧ ucuocu'a̧nö̧ ucuocuinö.

¹² Chutä äcuomenä pä̧i̧cua̧ i̧sa̧ ä'ca jo̧mȩttö̧ hueinö ta'anö hue'inö o'ca juiyönä. Ja̧u̧mä̧ pi̧jä̧'i̧nä̧, pi̧jä̧nä̧ ka̧cuä̧tö̧rö̧'i̧nä̧ äcuomenä pä̧i̧cua̧ i̧sa̧rö̧ cuä'ö tticuina'anä ki̧'i̧nö̧rö̧, ttamöcuädarö pä'ö hue'inö ja̧u̧ röji pä̧i̧cua̧ i̧sa̧mä̧.

¹³ Ja̧'hua̧ta̧nö̧ rö̧ȩnä̧ ttö̧ja̧ ttieru juäi'inä jȩpi̧nö̧. Ocurä'inä mo̧ro̧jä̧ttö̧ pi̧jä̧ra̧'a̧cu̧ ma̧ pä'ö jȩpi̧nö̧, pi̧jä̧ ttö̧ja̧ totta'anä.

¹⁴ Pi̧yȩ juäi äcuomenä pä̧i̧cua̧ i̧sa̧ ä'ca jo̧mȩttö̧ jȩa̧'a̧nä̧, pi̧jä̧nä̧ ka̧cuä̧tö̧rö̧ yapareu ji'ähuinö. Ja̧u̧ hue'inö pi̧jä̧ ttö̧ja̧rö̧, koro juäi ja̧u̧ pä̧i̧cua̧ i̧sa̧rö̧, curodänä cuä'ö tticuinö o'ca'a ki̧'i̧nö̧rö̧, a̧'u̧cuä̧ ttadita pä'ö.

¹⁵ Röji pä̧i̧cua̧ i̧sa̧rö̧, ja̧u̧ äcuomenä pä̧i̧cua̧ i̧sa̧rö̧ a̧'u̧cuä̧ ttaditinö juäi, ö̧ja̧ pä'ö hueäcua'a̧nö̧ ujuru ttiyinäcu. Ja̧'hua̧nö̧ jȩtti̧nä̧cu̧ ja̧u̧ a̧'u̧cuä̧ ttaditinömä ucuocua pä'ö. Ja̧'hua̧ta̧nö̧ o'ca toi'önä ja̧u̧ru̧ eseunu ucuocuocotörö cuä'ö icua pä'ö jȩtti̧nä̧cu̧.

¹⁶ Ja̧'hua̧ta̧nö̧ pi̧yȩttö̧'i̧nä̧ abonänö o'ca toi'önärö, ppo̧'ä̧tö̧rö̧'i̧nä̧, tä̧mö̧rö̧'i̧nä̧, järe ruhuotörö'inä, usurä isotörö'inä, korotöcu aditätörö'inä, korotöcu aditocotörö'inä hue'inö korotörö ttu̧mö̧ u̧huo̧jua̧'a̧nä̧, korotörö ttö'änä, koro juäi sello tattatö pä'ö.

¹⁷ Ja̧u̧ juäi sello tahuähua'a'inä, ja̧u̧ pä̧i̧cua̧ i̧sa̧ i̧mi̧'i̧nä̧, ja̧u̧ pä̧i̧cua̧ i̧sa̧rö̧ número pa̧ja̧cuä̧'i̧nä̧ jui'ätömä, yoröiso ȩmö̧'i̧nä̧, ȩmo̧co̧tö̧ ttäcuotö. Iyö'inä iyocotö ttäcuotö.

¹⁸ Pi̧yȩmä̧ amöcuädö huo̧ju̧nä̧ ttu̧huo̧juä̧cua̧'a̧nö̧. Iso päi'önä huo̧jua̧mä̧, ja̧u̧ pä̧i̧cua̧ i̧sa̧ öäre número amöcuädö'a̧nö̧. Ja̧u̧ pä̧i̧cua̧ i̧sa̧ öäre número ka̧ra̧ ttö̧ja̧ i̧sa̧ öäre número yorätehua'a. Ja̧u̧ juäi número seiscientos sesenta y seis jo̧mȩnä̧ ja̧'a̧.