Apocalipsis 12 - TÄ̧DO Ä̧CUÄ̧ I̧HUȨNȨ

Karaju isaju koro hua̧ i̧sa̧cu̧ huȩnȩ

¹ Ja̧'hua̧ ja̧'a̧ mo̧ro̧jä̧nä̧ koro juäi rö̧ȩnä̧ i̧jȩcuä̧ i̧jȩcui̧na̧'a̧. Yajute isaju, kö̧'ca̧tä̧huä̧ta̧ mo̧ro̧ kä̧hua̧ttö̧ 'ca̧tä̧huä̧ju̧ru̧ topinösä. Ja̧'hua̧ta̧nö̧ yodo kä̧hua̧rö̧ kö̧jä̧pö̧ dȩa̧'a̧ ku̧nä̧ri̧nä̧ju̧. Kunä'inä ppöttähuä ttö̧jä̧pö̧ttö̧nö̧ ta̧ju̧ si̧ri̧'cö̧ttö̧ adicua'a huȩnä̧ri̧nä̧ju̧.

² Jahuäju isaju muchaju kä̧nö̧, pä̧i̧cu̧nä̧ huopinäju ku̧bo̧du̧ma̧ ni̧yä̧cua̧.

³ Ja̧u̧nu̧ o'ca'a, koro juäi'inä i̧jȩcui̧na̧'a̧ mo̧ro̧jä̧nä̧. Koro hua̧ i̧sa̧, ojuo da'ä jä̧'i̧nö̧'a̧nö̧ hua̧, tu̧'hua̧mä̧, uhuiyä'inä ko̧ro̧mö̧ttö̧nö̧ todäre, u i̧sä̧juä̧'i̧nä̧ tomöre jähuä ppöttähuä koro unä'inä, koro unä'inä huȩnä̧rö̧ i̧jȩcui̧nö̧.

⁴ I̧hui̧ri̧pa̧nä̧ mo̧ro̧jä̧ttö̧ si̧ri̧'cö̧rö̧ ju'tomecutä do'opö ȩmi̧pö̧ pi̧jä̧ra̧'a̧cu̧ icuinö. Ja̧u̧ i̧sa̧mä̧ yajujua isaju ku̧bo̧du̧ma̧ ni̧yä̧cua̧ kä'ca jo̧mȩ kä̧mä̧di̧nö̧, ji̧'qui̧cha̧hua̧ uhuäpächomenä ucui'a pä'ö.

⁵ Jahuäju isaju ki̧tti̧ uhuäpächinö. Ja̧u̧mä̧, ki̧tti̧mä̧, pi̧jä̧nä̧ o'ca juiyönä cuo̧rä̧u̧jä̧ 'chu̧'ä̧rö̧ huetta'a jä̧'i̧nö̧'a̧nö̧ huȩä̧cua̧. Ja̧'hua̧ ja̧'a̧ ki̧tti̧rö̧ ȩmi̧pö̧ icu, Dios ö̧jo̧mȩ, i̧dȩä̧cä̧ ä'cacu ttȩpi̧nä̧cu̧.

⁶ Yajutä isajumä de'acu, Dios kö̧ja̧ pä'ö aditinomecu, tö'ipächinäju, ya'ute mil doscientos sesenta mo̧ro̧ päi'omenä, ku̧cuȩ ttiyaju pä'ö.

⁷ Ja̧u̧nu̧ o'ca'a, rö̧ȩnä̧ rohuähuinätö mo̧ro̧jä̧ra̧'a̧ttö̧. Arcángel Miguelcu, umöhuäyotö ángelescu rohuähuinätö ja̧u̧ ojuo da'ä jä̧'i̧nö̧'a̧nö̧ hua̧cu̧. Ja̧u̧ ojuo da'ä jä̧'i̧nö̧'a̧nö̧ hua̧cu̧, umöhuäyotöcu pärocua'acu rohuähuinätö.

⁸ Ja̧'hua̧nö̧ ttörohuähuomenä, yoröiso juiyupinätö. Ja̧'hua̧nö̧ ja̧'a̧ttö̧ mo̧ro̧jä̧nä̧ ttö̧ja̧cua̧ pä'ö juiyina'a.

⁹ Ja̧u̧ ojuo da'ä jä̧'i̧nö̧'a̧nö̧ hua̧rö̧, i̧sa̧rö̧, chutä täbocö ä̧ca̧ pi̧nö̧rö̧, ähuettä'inä, Satanás'inä pättäcuru, o'ca toi'önärö yapareu ji'äuru, ya'opö tticuinäcu. Chutäcu umöhuäyotöcu pi̧jä̧ rȩjȩra̧'a̧ do'opö tticuinäcu.

¹⁰ Ja̧'hua̧ ja̧'a̧ttö̧ ya̧tȩ i̧huȩnȩ mo̧ro̧jä̧ra̧'a̧ttö̧ pä̧i̧cu̧nä̧ ucuocua'a ä̧ju̧cui̧nö̧sä̧. Ja̧u̧ huȩnȩ päina'a: —Ttö̧ja̧ suronä jȩttö̧ jȩpö̧ icuähuä'inä, Dios ujuru'inä, Tä̧do̧ ä̧cua̧ Dios hueähuä'inä, I̧tti̧ Cristo hueähuä'inä täcö ichäja'a. Ujutu tö̧jä̧hua̧tö̧rö̧ Tä̧do̧ ä̧cua̧ Dios ä'ca jo̧mȩttö̧ mo̧ro̧'i̧nä̧, yodo'inä suronä ucuocuinömä, täcö ya'opö tticuinäcu.

¹¹ Ujutu tö̧jä̧hua̧tö̧ chutä Corderomä ucuojanä imitähuina'attö'inä, chutä i̧huȩnȩ jittähuina'attö'inä, ja̧u̧ suronä jȩpi̧nö̧ttö̧'i̧nä̧ abonänö juruhuinätö. Jahuätö 'corupäi'äcuähuä ye'ecuocotö pi̧nä̧tö̧. Jahuätömä “Ujutu Dios i̧huȩnȩ jitähuomenä, 'corupäti'öttömä huäinä ja̧'a̧” pä'inätö.

¹² Esehuätucui mo̧ro̧jä̧'i̧nä̧, mo̧ro̧jä̧nä̧ ka̧cuä̧tö̧'i̧nä̧. Ja̧'hua̧nö̧ ja̧'a̧nä̧ pi̧jä̧nä̧ ka̧cuä̧tö̧'i̧nä̧, dubora rö̧oranä ka̧cuä̧tö̧'i̧nä̧ suronä 'cuäopäcua'a, chutä ähuettämä ra̧huä̧rö̧ kä̧nö̧ i̧mȩyȩhui̧na̧'a̧ttö̧ ucuturu. Ja̧u̧mä̧ a̧'u̧cua̧'a̧tä̧ ö̧jä̧cuȩ'i̧nä̧ huo̧jua̧.

¹³ Ja̧'hua̧ ja̧'a̧ chutä ojuo da'ä jä̧'i̧nö̧'a̧nö̧ hua̧ pi̧jä̧ra̧'a̧ do'opö tticuinäcu tomenä, yajutä isajuru, ki̧tti̧rö̧ jareönä uhuäbecuäjäjuru, usinö.

¹⁴ Ja̧'hua̧nö̧ ja̧'a̧nä̧ yajujua isajuru kujuabiyä rö̧o̧ abiyä águilas ttu̧ju̧nä̧rö̧'a̧nö̧ tti̧yi̧nä̧cua̧, ku̧jo̧mȩ de'acu co̧jä̧ra̧ pä'ö, ja̧u̧ ä̧ca̧ttö̧ ototä kö̧ja̧ pä'ö. Ju̧huȩnȩmä̧ ku̧cuȩ kucua pä'ö huäbodäcuä a̧'ȩ, koro a̧'ȩ'i̧nä̧ kä'conä päi'omenä, ttiyäcuotö.

¹⁵ Ja̧u̧ ä̧ca̧ ajiya edecuähuinö ättö aje suhuädi'önä, yajujua isaju kijihuächa pä'ö.

¹⁶ Ja̧'hua̧nö̧ ja̧'a̧nä̧ pi̧jä̧mä̧ jahuäju isajuru ppädina'a. Pi̧jä̧ rȩjȩmä̧ ba'ecuächö, ja̧u̧ aje, ojuo da'ä jä̧'i̧nö̧'a̧nö̧ hua̧ ättö räopinoto rahuädina'a.

¹⁷ Ja̧'hua̧nö̧ 'cuäopomenä, ja̧u̧ ojuo da'ä jä̧'i̧nö̧'a̧nö̧ hua̧ ji̧nä̧ isocu ra̧huä̧ri̧nö̧ jahuäju isajuru. Korotörö, kahuaruhuä o'cotörö, Dios hueö adiu jȩpä̧tö̧rö̧, Jesucristo i̧huȩnȩ päö ta'anö adiu cue'ächätörö, örohuähua pä'ö 'chi̧nö̧.