Apocalipsis 11 - TÄ̧DO Ä̧CUÄ̧ I̧HUȨNȨ

Ta̧ju̧ jittähuinö huȩnȩ

¹ Ja̧'hua̧ ja̧'a̧ttö̧ nä̧yö̧na̧, koro juäi pa̧ja̧cuabä jä̧'i̧nö̧'a̧nö̧, iyinätö ttörö. Pä'inätö: —Ä̧rä̧mi̧'i̧. Diosrö ucuocuäcuähuode'inä, Diosrö ucuocuäcuähuodä'inä pa̧ja̧ti̧. Ja̧'hua̧ta̧nö̧ ju̧huȩnȩ ucuocuätö'inä, tta̧'a̧nö̧ recuätö ja̧ pä'ö pa̧ja̧ti̧.

² Ja̧'hua̧nö̧ ja̧'a̧nä̧ Diosrö ucuocuäcuähuode u̧mi̧ isarä, cu̧'a̧tä̧'. Juhua'amä kara'attö ichäcuähuotörö iyähua'a. Jahuätömä cuarenta y dos kä̧hua̧tö̧ jo̧mȩnä̧, adihuä ötahuiyänä cuettächäcuotö.

³ Ttö chumöhuäyotöttö ta̧ju̧ru̧ huȩdä̧cua̧sä̧ ya'ute mil doscientos sesenta mo̧ro̧ jo̧mȩnä̧, ttö huedömä ttucuocua pä'ö. Jahuätömä ya̧tȩ 'corupäi'omenä, ajuäu ttö̧'ca̧tä̧hua̧'a̧ jä̧'i̧nö̧'a̧nö̧ ttö̧'ca̧tä̧huä̧cuo̧tö̧.

⁴ Pitö ta̧ju̧ umöhuäyotömä, olivos dauhuiyä toire'inä, lámparas ku̧nä̧huäcä tocäre'inä pi̧jä̧ttö̧ Tu̧ru̧hua̧ ä'ca ka̧cu̧ huotö.

⁵ Ya̧tȩ jahuätörö suronä jȩa̧ päöttömä, ocurä, ttaboiyotörö toönä cuo'ö icuarä, ttättö räopa'a. O'ca toi'önä jahuätörö suronä jȩtta̧ pä'ätömä, ja̧'hua̧nö̧ 'corupätti'äcuotö.

⁶ Pitö umöhuäyotömä, Dios i̧huȩnȩ jittähuome jubö, mo̧ro̧jä̧ mö̧ttȩpa̧ pä'ö pi̧jä̧nä̧ ajiya ichö juiya pä'ö juruhuätö. Ja̧'hua̧ta̧nö̧ ajiya ttö̧ja̧ ttucuoja päi'önä pärohuächa pä'ö juruhuätö. Ja̧'hua̧ta̧nö̧ jitörötä pä̧huä̧ rö̧jo̧mȩnä̧, pi̧jä̧ ttö̧ja̧rö̧ o'ca juiyönä surojö 'cuä'opö ubara ttutta pä'ö juruhuätö.

⁷ Ja̧'hua̧nö̧ ja̧'a̧nä̧ jahuätö ttaditähuä cättädomenä, ya̧tȩ pä̧i̧cua̧ i̧sa̧, reju yoröiso beipocojuttu rä'opö, jahuätörö ö̧ro̧huä̧huä̧cua̧. Ja̧'hua̧ta̧nö̧ jahuätörö rohuäu ujuruhuomenä, cuä'ö icuäcuä̧u̧.

⁸ Tto'co jähuä adihuä ötahuiyä, Tu̧ru̧hua̧rö̧ daunä ttu̧ju̧ni̧na̧'a̧ ötahuiyä mä̧nä̧nä̧ tticuipäcuotö. Ujutu tamöcuädönä ja̧u̧ ötahuiyä i̧mi̧ Sodoma'inä, Egipto'inä todärenä pä'ätöjä.

⁹ Ja̧'hua̧ ja̧'a̧ huäbodäcuä mo̧ro̧ o'ca'a, koro mo̧ro̧ kä̧hua̧ jueö kö̧rö̧ päi'omenä, o'ca juiyönä ötahuiyä ttö̧ja̧'i̧nä̧, pi̧jä̧ pa̧ja̧cu̧nä̧ ttö̧ja̧'i̧nä̧, tti̧huȩnȩ pö̧nä̧ ucuocuätö'inä, ko̧ro̧jä̧ tti̧rȩjä̧ttö̧ ichähuotö'inä tto'co jähuä tottäcuotö. Ttu'tura pä'ö hueähuoca'a jä̧cua̧'a̧.

¹⁰ Pi̧jä̧nä̧ ka̧cuä̧tö̧mä̧ ttesehuäcuotö, jahuätö ta̧ju̧ hua'ö tticuomenä. Tta̧'cua̧ adiunä ttäcuotö. Ja̧'hua̧nö̧ ji̧yä̧u̧ koro juäi mippoönä huettäcuotö korotö korotönörö. Jahuätö ta̧ju̧mä̧, Dios hueö ucuocuäjätömä, yoröiso surojötä jȩpi̧nä̧tö̧ pi̧jä̧nä̧ ka̧cuä̧tö̧rö̧.

¹¹ Ja̧'hua̧nö̧ ja̧'a̧nä̧ huäbodäcuä mo̧ro̧ o'ca'a, koro mo̧ro̧ kä̧hua̧ jueö kö̧rö̧ päi'omenä, Dios pä'äji ta'anö ttöädinä̧u̧, pä'äji ta'anö ttö̧ja̧cua̧ pä'ö. O'ca toi'önä ja̧'hua̧nö̧ tottomenä, juiyo rö̧ȩnä̧ ye'ecuinätö.

¹² Ja̧u̧nu̧ o'ca'a, jahuätö ta̧ju̧ umöhuäyotömä, ya̧tȩ i̧huȩnȩ mo̧ro̧jä̧ra̧'a̧ttö̧ pä̧i̧cu̧nä̧ ucuocua'a ä̧ju̧cui̧nä̧tö̧. Ja̧u̧ huȩnȩ päinä̧u̧: —Pocu, ju'tojucu 'cha'ächätucui. Jahuätömä ajiya isoppanä 'cha'ächinätö mo̧ro̧jä̧ra̧'a̧. Ja̧'hua̧nö̧ 'chattächa'a, ttaboiyotömä to̧ttä̧ri̧nä̧u̧.

¹³ Ja̧'hua̧nö̧ 'chattächinö pä̧nä̧, rȩjȩ'i̧nä̧ ttö̧ä̧hui̧na̧'a̧. Ötahuiyä ju'tomecutä ma̧ä̧chi̧na̧'a̧. Rȩjȩ ja̧'hua̧nö̧ ttö̧ä̧huo̧mȩnä̧, siete mil jo̧mȩnä̧ ttö̧ja̧ hua'ö icuinätö. Korotö ttö̧ja̧ ka̧cui̧pi̧nä̧tö̧mä̧ yettecua'attö, Diosrö, mo̧ro̧jä̧nä̧ kö̧rö̧ amöcuädö ucuocuinätö.

¹⁴ Ja̧'hua̧nö̧ päi'omenä, todäre jo̧mȩnä̧ surojö 'cuäopina'a. Ja̧'hua̧nö̧ ja̧'a̧nä̧ a̧'u̧cua̧'a̧ o'ca'a koro, huäbodäcuänä päi'omenä, surojö 'cuäopäcua'a.

Ko̧ro̧mö̧ttö̧nö̧ todäre trompeta ppöinö huȩnȩ

¹⁵ Ka̧ra̧ ángel, ko̧ro̧mö̧ttö̧nö̧ ta̧ju̧nu̧ päi'önä, öäre trompeta ppö'inö. Ppöomenä, recuätö tti̧huȩnȩ pä̧i̧cu̧nä̧ ttucuocua'a mo̧ro̧jä̧ra̧'a̧ttö̧ ttä̧ju̧cui̧na̧'a̧. Pa̧'a̧nö̧ ucuocuina'a: Jitämä pi̧jä̧nä̧ hueömä ujutu Tu̧ru̧hua̧ Cristo hueäcua'a̧nö̧. Ja̧u̧ 'cuäopönätä huȩä̧cua̧.

¹⁶ Ja̧'hua̧ ja̧'a̧ttö̧ jahuätö veinticuatro jo̧mȩnä̧ ancianos huotö, Dios ä'ca jo̧mȩttö̧ tti̧dȩäcä̧nä̧ pȩji̧nä̧tö̧mä̧, rȩjȩcu̧ ma̧'ä̧mö̧ Diosrö esehuinätö.

¹⁷ Pä'inätö: Tu̧ru̧hua̧, Dios o'ca juiyönä ju̧ru̧hua̧mä̧, ucuru eseunu ucuocuätöjä. Ucu jitä'inä, pä'äji'inä, yodoji'inä ru̧hua̧jä̧. Ucu cujurunä huecuhua pä'ö kö̧jä̧.

¹⁸ Korotö ttö̧ja̧ ra̧huä̧rä̧tö̧. Ja̧'hua̧nö̧ ja̧'a̧nä̧ ucu cu̧tä̧bo̧tö̧ mo̧ro̧ päi'a'a. Ja̧'hua̧ta̧nö̧ hua'ö icuinätörö: “Ucu adiu jȩpö̧jä̧”, “Ucu suronä jȩpö̧jä̧” päcu mo̧ro̧ päi'a'a. Ucutä cumöhuäyotö, ucu huecumä ucuocuätörö, adihuä juäi cui̧yä̧cua̧jä̧. Ucuru adiunä esehuätö'inä, cui̧mi̧ ucuotätö'inä, usurä isotö'inä, järe ruhuotö'inä ucuru esetätörö adihuä juäi cui̧yä̧cua̧jä̧. Korotö pi̧jä̧ be'epäjipö tticua pä'ö jȩpä̧tö̧rö̧, bettipächönä to'ädö cuicuometä päi'a'a.

¹⁹ Ja̧'hua̧ ja̧'a̧ttö̧ mo̧ro̧jä̧ra̧'a̧ttö̧ Diosrö ucuocuäcuähuode bahuecuächina'a. Hueähuä huȩnȩ ȩcä̧ca̧, adihuä i̧sä̧ca̧, Diosrö ucuocuäcuähuodettö uhuähuina'a. Ja̧u̧nu̧ pä̧nä̧mä̧ cu'upä'inä rohuinö. Koro juäi'inä rö̧ȩnä̧ ucuocuina'a. Cu'upä'inä cöröächina'a. Rȩjȩ'i̧nä̧ ttö̧ä̧hui̧na̧'a̧. Diyahuo'qui'inä ju'tojuttu ma̧i̧na̧'a̧.