Apocalipsis 10 - TÄ̧DO Ä̧CUÄ̧ I̧HUȨNȨ

Ka̧ra̧ ángel koro cuyäru'tä 'chu̧huä̧ri̧nö̧ huȩnȩ

¹ Ja̧'hua̧ ja̧'a̧ttö̧ ka̧ra̧ ángel ju̧ru̧hua̧mä̧, mo̧ro̧jä̧ra̧'a̧ttö̧ i̧mȩyȩhua̧'a̧ topinösä. Ja̧u̧mä̧ ajiya isoppanä juä'opäcuähuinö. U huämenä huäyärobö ku̧nä̧ri̧nö̧. Ö'ämä mo̧ro̧ kä̧hua̧ ta'anö tȩa̧hui̧na̧'a̧. Öjahuiyä'inä koro juäi 'quiyö juäi isä'ca ocurä cuoa'a jä̧'i̧nö̧'a̧nö̧ hui̧nö̧.

² U̧mö̧nä̧ cuyäru'tä ji̧'qui̧cha̧jä'tä bahuecua'a 'chu̧'ä̧ri̧nö̧. Ö̧jä̧pö̧ u̧huo̧jua̧'a̧nä̧ dubora rö̧oranä kä̧mä̧dö̧, ö̧jä̧pö̧ ieruhua'anä pi̧jä̧nä̧ kä̧mä̧di̧nö̧.

³ Ja̧'hua̧ ja̧'a̧ yähui pä̧i̧cu̧nä̧ huoa'a jä̧'i̧nö̧'a̧nö̧, i̧huȩnȩnä̧ pä̧i̧cu̧nä̧ huopinö. Ja̧'hua̧nö̧ huomenä, ko̧ro̧mö̧ttö̧nö̧ todäre jo̧mȩnä̧ cu'upä cöröächina'a ttä̧ju̧cu̧nä̧.

⁴ Ja̧'hua̧nö̧ ko̧ro̧mö̧ttö̧nö̧ todäre jo̧mȩnä̧ cu'upä cöröächäji o'ca'a, chi̧huȩyu̧ta̧ pä'inösä. Ja̧'hua̧nö̧ ja̧'a̧nä̧ ya̧tȩ i̧huȩnȩ mo̧ro̧jä̧ra̧'a̧ttö̧ ttörö ucuocua'a ä̧ju̧cui̧nö̧sä̧. Ttörö päina'a: —'Corujuäinätä ku̧nä̧ri̧ ko̧ro̧mö̧ttö̧nö̧ todäre jo̧mȩnä̧ cu'upä cöröächa'a ttucuocuinö huȩnȩ. Huȩyu̧tu̧mä̧, cui̧huȩyu̧tä̧'.

⁵ Ja̧u̧nu̧ o'ca'a, ja̧u̧ ángel dubora rö̧oranä'inä, pi̧jä̧nä̧'i̧nä̧ kä̧mä̧dö̧ tochäjäcumä, u̧mö̧ u̧huo̧jua̧'a̧ i̧sä̧mö̧ mo̧ro̧jä̧ra̧'a̧cu̧ cä'epinö.

⁶ I̧huȩnȩnä̧ pä'ö 'cuäopönä ö̧jä̧cua̧ i̧mi̧nä̧'i̧nä̧, mo̧ro̧jä̧cu̧, pi̧jä̧cu̧, dubora rö̧oracu, o'ca juiyönä ja̧u̧ juäinä ka̧cu̧ aditinö i̧mi̧nä̧'i̧nä̧ pä'inö: —Täcö jo̧mȩ päi'a'a. Juhua'a yabocu tta̧huä̧rä̧cuä̧huä̧ juiya'a.

⁷ Ka̧ra̧ ángel ko̧ro̧mö̧ttö̧nö̧ ta̧ju̧nu̧ päi'önä jo̧mȩ päi'omenä, öäre trompeta ppöa pä'ö, Dios yä̧huä̧i̧nä̧ u̧ju̧nä̧ri̧nö̧ huȩnȩ, chutä umöhuäyotö i̧huȩnȩ jiäcuähuä isotörö jiähuinö huȩnȩ, täcö 'cuäopäcua'a jä̧cua̧'a̧, —pä'inö.

⁸ Ja̧u̧ huȩnȩ, mo̧ro̧jä̧ra̧'a̧ttö̧ ucuocuäji huȩnȩ, ttö chä̧ju̧cuä̧ji̧ huȩnȩ, pä'äji ta'anö ttörö ucuocuina'a. Ttörö päina'a: —Täi. Ȩmä̧ji̧ ja̧u̧ cuyäru'tä, ji̧'qui̧cha̧jä'tä bahuecuä'tä ja̧u̧ ángel dubora rö̧oranä'inä, pi̧jä̧nä̧'i̧nä̧ kä̧nö̧ 'chu̧huä̧rä'tä.

⁹ Ja̧'hua̧ ja̧'a̧ ja̧u̧ ángel ö̧ja̧'a̧cu̧ 'chä̧nö̧, jä'epinösä ja̧u̧ cuyäru'tä ji̧'qui̧cha̧jä'tä iyattö pä'ö. Ja̧u̧ pä'inö ttörö: —Ja̧ja̧. Cuiti, Cuänä maya ta'anö sa̧da̧'a̧nä̧, cu̧cuä̧ba̧nä̧ reäcua'a.

¹⁰ Ja̧'hua̧ ja̧'a̧ttö̧ ja̧u̧ ángel u̧mö̧ttö̧ ȩmi̧nö̧sä̧ ja̧u̧ cuyäru'tä ji̧'qui̧cha̧jä'tä. Ȩmä̧ji̧'ca̧ cuinösä. Chänä iso päi'önä sa̧di̧na̧'a̧. Ja̧'hua̧nö̧ ja̧'a̧nä̧ chucuäji o'ca'a, chu̧cuä̧ba̧nä̧ reina'a.

¹¹ Ja̧u̧nu̧ o'ca'a, ttörö pä'inätö: —Ucumä pä'äji ta'anö Dios i̧huȩnȩ ji̧cu̧huä̧huä̧cua̧jä̧ recuätö ttö̧ja̧rö̧'i̧nä̧, tti̧rȩjä̧nä̧'i̧nä̧, tti̧huȩnȩnä̧'i̧nä̧, ruhuotörö'inä.