3 Juan 1 - TÄ̧DO Ä̧CUÄ̧ I̧HUȨNȨ

Gayo adiu jȩi̧nö̧ huȩnȩ

¹ Ttö anciano hua̧ chi̧huȩnȩ hue'ösä ucuru, chö̧jä̧hua̧ Gayo. Iso päi'önä ttötä repedäcujä.

² Chö̧jä̧hua̧, Diosrö jä'epö ucuocusä, ucu cua̧'cua̧ adiunä cu̧ja̧ pä'ö. Ye, ttömä huo̧jua̧sä̧ ucuru adiu eseunu kö̧jä̧ pä'ö Dioscu.

³ Ja̧'hua̧ ja̧'a̧ korotö tö̧jä̧hua̧tö̧ ichö jittähuomenä, ucu esetö'inä cueseta'anä, iso päi'önä huȩnȩ päö'inä adiu jȩcu̧'a̧'a̧mä̧ ä̧ju̧cu̧, esehuinösä ttömä.

⁴ Chu̧huo̧juȩto̧mȩttö̧mä̧ chi̧tti̧mö̧ iso päi'önä huȩnȩ päö'a̧nö̧ adiu jȩcu̧'ä̧tu̧cu̧ chä̧ju̧cuo̧mȩnä̧, koro juäi eseäcuähuättö'inä abonänö eseusä.

⁵ Chö̧jä̧hua̧, ucu adiu jȩpö̧jä̧ tö̧jä̧hua̧tö̧rö̧ ppäcuhuädömä, kara'attö ichäcuähuotörö cuieruhuä̧u̧ru̧'i̧nä̧.

⁶ Ji̧nä̧ yo̧mȩtȩ ca̧ca̧tö̧, iglesia ruhuärö ji'ähuinätö jitörötä adiu jȩcu̧'i̧nö̧, eseunu repe'önänö ppäcuhuädinömä. Ja̧'hua̧nö̧ cue'ächätörö yabocu tti̧'cho̧mȩnä̧, ppäcuhuädö'a̧nö̧ ja̧'a̧ Diosrö pä̧huä̧ rö̧jo̧mȩnä̧.

⁷ Jahuätö rä'opö 'chi̧nä̧tö̧ Jesucristo i̧huȩnȩ jittähua pä'ö. Ja̧'hua̧nö̧ tti̧'cho̧mȩnä̧, Jesucristorö esetocotöttö ȩmo̧co̧tö̧ recuä rö̧jö̧mä̧.

⁸ Ja̧'hua̧nö̧ ja̧'a̧ ujutucu ji̧nä̧ ji̧yȩtȩ esetätörömä, iso päi'önä huȩnȩ ji'ähuätörömä, ppätädö'a̧nö̧ ja̧'a̧.

Diótrefes suronä amöcuädinö huȩnȩ

⁹ Iglesia ruhuärö, cuidepiyura̧'a̧ ka̧cuä̧tö̧rö̧, chi̧huȩnȩ huedinö, Diótrefesmä ä̧ju̧cu̧ esetocö pi̧nö̧. Chutätä cu̧ru̧hua̧tu̧cu̧ ö̧ja̧ pä̧huä̧ rö̧jä̧cu̧.

¹⁰ Ucuturu ttö do'ächö chichöttömä, o'ca juiyönä jȩö̧'i̧nä̧, ujuturu amönä yapareu jiäu'inä ji̧dä̧huä̧cua̧sä̧. Ja̧'hua̧ta̧nö̧ Tu̧ru̧hua̧ Jesucristo i̧huȩnȩ ji'ähuätörö ppä'ädocö. Ja̧'hua̧ta̧nö̧ ppättäda pä'ätörö ppäcuhuädätucuä' pä'ö ro̧'ȩpo̧'ä̧rö̧. Ju̧hȩnȩ yabonä'inä 'quȩ'ȩpö̧ icuatö pä'inö.

¹¹ Suronä jȩpä̧tö̧ jȩttö̧'a̧nö̧ jȩcu̧'ä̧' chö̧jä̧hua̧. Adiu jȩpä̧tö̧ jȩttö̧'a̧nö̧ jȩpi̧. Adiu jȩpö̧mä̧, Dios i̧tti̧ päi'önä kö̧. Suronä jȩpö̧mä̧, Diosrö topocö pi̧nö̧.

Demetrio adiu amöcuädinö huȩnȩ

¹² O'ca toi'önä adiu ji'ähuätö Demetriorö. Iso päi'önä huȩnȩ päö'a̧nö̧ jȩpö̧ kö̧. Ujutu'inä Demetrio adiu jȩpö̧ pä'ö ji'ähuätöjä. Jitäumä iso päi'önä huȩnȩ ja̧'a̧, ucutu huo̧juä̧tö̧jä̧.

Röji teähuinö huȩnȩ

¹³ Rö̧ȩnä̧ jidähua päda'anä, huȩyu̧tu̧ hueda pä'ocösä.

¹⁴ Koronö juhua'atä tochacu pä'ösä. Ja̧u̧nu̧ pätecuänö pä̧nö̧ tucuocuäcuotöjä.

¹⁵ Adiu eseunu kä̧hui̧. Chahuaruhuä po ka̧cuä̧tö̧mä̧ ucuru te'ähuätö. Ya̧cu̧nä̧ te'ähui chahuaruhuä o'ca toi'önärö.