2 Timoteo 4 - TÄ̧DO Ä̧CUÄ̧ I̧HUȨNȨ

¹ Dios ä'ca jo̧mȩttö̧'i̧nä̧, Tu̧ru̧hua̧ Jesucristo ä'ca jo̧mȩttö̧'i̧nä̧ pi̧yȩ huȩnȩ jicuhuähua pä'ö hue'ösä ucuru. Chutä Tu̧ru̧hua̧ Jesucristo ji̧nä̧ ka̧cuä̧tö̧rö̧'i̧nä̧, 'corupä'i'inätörö'inä: “Ucumä adiu jȩpi̧nö̧jä̧”, “Ucumä suronä jȩpi̧nö̧jä̧” päa pä'ö ru̧hua̧ päi'önä i̧chä̧cua̧.

² 'Cuäopönä ji'ähui pi̧yȩ huȩnȩ. Ttä̧ju̧cuo̧mȩnä̧'i̧nä̧, ttä̧ju̧cuo̧co̧mȩnä̧'i̧nä̧ ji'ähui. Korotörö tä̧bo̧tö̧ ji'ähui. Cuami 'qui'ächi'ö kä̧nö̧, adiu huo̧juȩti̧.

³ Koronö mo̧ro̧ päi'omenä, yoröiso ä̧ju̧cuo̧co̧tö̧ ttäcuotö adihuä huo̧juȩcuä̧ huȩnȩ. Jitötä ttamönä ttamöcuädö jȩpö̧, ottäcuotö huo̧juȩcuä̧ isotörö jitörötä pä̧huä̧ rö̧jö̧ä̧tä̧ ttu̧huo̧juȩta̧tö̧ pä'ö.

⁴ Jahuätö adihuä huȩnȩ jarotti'äcuotö. Täbo huȩnȩ, amönä huȩnȩtä̧, ttesetäcuotö.

⁵ Ja̧'hua̧nö̧ ja̧'a̧nä̧ ucutä cua̧'cua̧ pö̧nö̧ kä̧hui̧. Cuami 'qui'ächi'ö ubara ttu'i. 'Cuäopönä ttö̧ja̧ suronä jȩttö̧ jȩpö̧ icu huȩnȩ ji'ähui. Ucu cuaditähuä adiu jȩpi̧.

⁶ Ttömä sacrificios jȩtta̧'a̧ jä̧'i̧nö̧'a̧nö̧ pä'i'ösä. Täcö a̧'u̧cua̧'a̧tä̧ ja̧'a̧ttö̧ hua'ö chi̧cuä̧cua̧sä̧ Dios i̧huȩnȩ jidähua'attö.

⁷ Ttö adiu rohuähuinösä surojöcu. Ttö adiu jȩpi̧nö̧sä̧ o'ca juiyönä Dios hueinö. Ttö adiu esetinösä.

⁸ Adiu jȩchi̧na̧'a̧ttö̧, ttö̧ja̧rö̧ pojocuä mo̧ro̧ päi'omenä, Tu̧ru̧hua̧ adihuä juäi iya päinömä i̧yä̧cua̧ ttörö. Chutä adihuä Tu̧ru̧hua̧mä̧ o'ca toi'önärö pä̧cua̧. Ttörötä ya̧tȩrö̧tä̧mä̧ iyocö. O'ca toi'önä ja̧u̧ru̧ adiu esetö ichä̧cuȩ mo̧ro̧ tta̧'ä̧rä̧tö̧rö̧ i̧yä̧cua̧.

Timoteorö päinö huȩnȩ

⁹ Ttörö jurunä tocu'a ichi.

¹⁰ Demas pi̧jä̧ jähuä amöcuädö, ttörö jaropi'inö. Tesalónica ötahuiyära̧'a̧ i̧hui̧nö̧. Ka̧ra̧ Cresente'inä Galacia rȩjȩra̧'a̧ i̧hui̧nö̧. Tito'inä Dalmacia rȩjȩra̧'a̧ i̧hui̧nö̧.

¹¹ Ya̧tȩtä̧ Lucastä, ttöcu kö̧mä̧. Marcosrö ocuhuipaja. Ja̧u̧mä̧ ttörö ppä̧dä̧cua̧.

¹² Tíquicorö hue'inösä Efeso ötahuiyära̧'a̧.

¹³ Cuichomenä chö̧'ca̧tä̧huä̧ta̧, huäme i̧sä̧ta̧, Troas ötahuiyänä Carpo ojusodenä chu̧ju̧ni̧'i̧nä̧ta̧, cui'cächaja. Cuyäru'inä cui'cächaja. Ttötä chöäre cuyäru'inä cunichi'o.

¹⁴ Alejandro, cuoräu 'quiyö juäi adicuä i̧sa̧, ttörö rö̧ȩnä̧ suronä jȩpi̧nö̧. Tu̧ru̧hua̧tä̧ i̧mi̧tä̧cua̧ ja̧u̧ ttörö jȩi̧nö̧mä̧.

¹⁵ Ucu'inä Alejandrorö ttu̧ȩcuä̧nä̧ kä̧hui̧. Ja̧u̧mä̧ ujutu tu̧huo̧juȩtö̧mä̧ yoröiso kö'cocö.

¹⁶ Ruhuotö ttä'ca jo̧mȩttö̧ äcuomenä chucuocuomenä, ya̧tȩ'i̧nä̧ ppä'ädocö pi̧nö̧ ttörö. O'ca toi'önä jarotti'inäcusä. Dios jahuätörö ö̧tä̧bo̧tö̧ juiya pä'ösä.

¹⁷ Ja̧'hua̧nö̧ ja̧'a̧nä̧ Tu̧ru̧hua̧tä̧ ppä'ädinö ttörö. Ja̧u̧ chujuru iyinö, o'ca toi'önä judíos huocotörö ttö̧ja̧ suronä jȩttö̧ jȩpö̧ icu huȩnȩ ttä̧ju̧cu̧nä̧ jidähua pä'ö. Ja̧'hua̧nö̧ ppädomenä, yähuittö ttö̧ji̧pa̧'a̧ jä̧'i̧nö̧'a̧nö̧, ki̧'i̧nö̧sä̧.

¹⁸ Ja̧'hua̧ta̧nö̧ ttörö suronä jȩtto̧mȩnä̧, Tu̧ru̧hua̧ ppä̧dä̧cua̧ ttörö. Ttörö tta̧huä̧rä̧cua̧ mo̧ro̧jä̧ra̧'a̧ chi̧'cho̧mȩ jubö päi'önä. ¡'Cuäopönä Tu̧ru̧hua̧rö̧ ttesehuäcua'a̧nö̧! Amén.

Röjinä teähuinö huȩnȩ

¹⁹ Te'ähui Priscarö'inä, Aquilarö'inä, Onesíforo ahuaruhuä chutä ojusodenä ka̧cuä̧tö̧rö̧'i̧nä̧.

²⁰ Erastomä Corinto ötahuiyänä ki̧'i̧nö̧. Trófimo'inä Mileto ötahuiyänä na̧huä̧chi̧yä̧cu̧ chu̧ju̧ni̧'i̧nä̧cu̧.

²¹ A̧'ȩ ä'canä ttö chö̧ja̧'a̧cu̧ ichi. Eubulocu, Pudentecu, Linocu, Claudiacu, o'ca toi'önä tö̧jä̧hua̧tö̧cu̧ te'ähuätö ucuru.

²² Tu̧ru̧hua̧ Jesucristo ucucu ö̧jä̧cua̧'a̧nö̧. Ja̧'hua̧ta̧nö̧ Dios ucuturu o'ca toi'önärö ppädäcua'a̧nö̧. Amén.