2 Timoteo 3 - TÄ̧DO Ä̧CUÄ̧ I̧HUȨNȨ

Röji mo̧ro̧ 'cuäopä̧cuȩ huȩnȩ

¹ Ucu huo̧jua̧jä̧, röji mo̧ro̧ päi'omenä, o'ca juiyönä ra̧huȩpi̧jä̧cua̧'a̧.

² U̧mä̧tö̧ jitöätä ttamöcuädäutä ttamöcuädäcuotö. Pärätä rö̧ȩnä̧ ttamöcuädäcuotö. Ttösä adihuä i̧sa̧ pättähuäcuotö. Diosrö suronä ttucuocuäcuotö. Ttä'o hueö jȩpo̧co̧tö̧ ttäcuotö. Ttahuaruhuärö esehuocotö ttäcuotö. Dios i̧huȩnȩ esetocotö ttäcuotö.

³ Ttahuaruhuärö repe'ocotö ttäcuotö. Korotörö tta̧'cua̧ tta̧nö̧ topocotö ttäcuotö. Amönä yapareu huȩnȩ jittähuä'chäcuotö. Jitörötä pä̧huä̧ rö̧jö̧tä̧ jȩttä̧cuo̧tö̧. Korotörö suronä jȩttä̧cuo̧tö̧. O'ca juiyönä adiu jȩä̧cuä̧huä̧ ttaboiyotö ttäcuotö.

⁴ Jitötä ttahuaruhuärö iyö tticuäcuotö. Ja̧'a̧tä̧ repeähuä juiyönä ttö̧ja̧cuä̧cuo̧tö̧. Jitötä ttamönätä repettäcuähuäcuotö. Pi̧jä̧ jähuä Dios i̧huȩnȩttö̧'i̧nä̧ abonänö ttamöcuädäcuotö.

⁵ Dios i̧huȩnȩ esetätöjä pätta'anä, Dios i̧huȩnȩ ujuru ttä̧ppö̧tä̧rä̧cuo̧tö̧. Ja̧'hua̧nö̧ jȩpä̧tö̧ttö̧ 'quȩ'i̧pä̧chi̧.

⁶ Jahuätöttö yotöte korotö ttojusodenä do'ächi'ö, o'ipächätö nä̧tö̧ juiyupätörö, suronä rö̧ȩnä̧ ku̧nä̧rä̧tö̧rö̧. Jahuätö nä̧tö̧mä̧ suronätä amöcuädö jȩpä̧tö̧.

⁷ Jahuätö ttu̧huo̧jui̧'a̧ pätta'anä yoröiso huo̧jui̧po̧co̧tö̧ iso päi'önä huȩnȩ.

⁸ Janescu, Jambrescu Moisésrö ttesetoca'a ji̧nö̧'a̧nö̧, ja̧'hua̧nö̧ jȩpä̧tö̧mä̧, iso päi'önä huȩnȩ esetocotö. Jahuätö ttamöcuädömä suronä amöcuädätö. Jahuätö Dios i̧huȩnȩ esetocotö.

⁹ Ja̧'hua̧nö̧ ja̧'a̧nä̧ juhua'a yabonömä rö̧ä̧chö̧nä̧ jȩpo̧co̧tö̧ ttäcuotö. O'ca toi'önä ttö̧ja̧ tottäcuotö amönä micuähuocö juäi jȩtta̧'a̧. Ja̧'hua̧nö̧ 'cuäopina'a Janesrö'inä, Jambresrö'inä, Moisésrö esetocotö pi̧nä̧tö̧rö̧.

Pablo Timoteorö röji hueinö huȩnȩ

^10-11 Ja̧'hua̧nö̧ ja̧'a̧nä̧ ucu ttö chu̧huo̧juȩtö̧ ta'anö jȩpö̧jä̧. Chö̧jö̧'i̧nä̧, jidäu'inä huo̧jua̧jä̧. Ja̧'hua̧ta̧nö̧ chesetö'inä, chami 'quidächi'ö'inä, repedö'inä huo̧jua̧jä̧. Ja̧'hua̧ta̧nö̧ ttörö suronä jȩtto̧mȩnä̧, ubara ttu'u jarochi'oca'a'inä huo̧jua̧jä̧. Antioquía ötahuiyättö'inä, Iconio ötahuiyättö'inä, Listra ötahuiyättö'inä ttörö 'cuäopinö huo̧jua̧jä̧. Juhua'attö suronä jȩtto̧mȩnä̧, ubara ttudinömä huo̧jua̧jä̧. Ja̧'hua̧nö̧ ja̧'a̧nä̧ Tu̧ru̧hua̧ ttörö ppä'ädinö, ja̧u̧ ubara ttudomenä.

¹² Iso päi'önä o'ca toi'önä Cristo Jesúsru adiu esetö ttö̧ja̧cua̧ pä'ätömä, jahuätörö suronä jȩtto̧mȩnä̧, ubara ttuttäcuotö.

¹³ Ja̧'hua̧nö̧ ja̧'a̧nä̧ suronä jȩpä̧tö̧'i̧nä̧, yapareu ucuocu jȩpä̧tö̧'i̧nä̧ ji̧nä̧ isocu suronä jȩttä̧cuo̧tö̧. Jahuätömä ji̧nä̧ isocu ttesetäcuotö yapareu huȩnȩ.

¹⁴ Ja̧'hua̧nö̧ ja̧'a̧nä̧ cu̧huo̧jui̧'i̧nö̧mä̧, adiu jȩpi̧. Ja̧u̧mä̧ iso päi'önä huȩnȩ huo̧jua̧jä̧. Ja̧'hua̧ta̧nö̧ ucu huo̧jua̧jä̧ ucuru huo̧juȩti̧nö̧rö̧.

¹⁵ Ucu ji̧nä̧ ji̧'qui̧cha̧huä̧ya̧ huo̧jui̧pi̧nö̧jä̧ adihuä Huȩyu̧cuä̧ Huȩnȩ. Ja̧u̧ Huȩyu̧cuä̧ Huȩnȩ ucuru huo̧juȩta̧'a̧. Ja̧'hua̧ta̧nö̧ ja̧u̧ Huȩyu̧cuä̧ Huȩnȩ cuesetomenä, Cristo Jesús suronä jȩcu̧'u̧ jȩpö̧ icu.

¹⁶ O'ca juiyönä adihuä Huȩyu̧cuä̧ Huȩnȩ Dios iyinö. Adihua'a huo̧juȩcuä̧nä̧. Ja̧'hua̧ta̧nö̧ adihua'a tä̧bo̧cuä̧nä̧'i̧nä̧. Korotö i̧mi̧cu̧nä̧ huȩnȩ jittähua'anä, pi̧yȩ huȩnȩ adihuä jiäcuähuänä. O'ca toi'önä huo̧jui̧cuä̧nä̧ adihua'a, adiu jȩpö̧ ttö̧ja̧cua̧ pä'ö.

¹⁷ Ya̧tȩ Diosrö esetömä o'ca juiyönä adihuä Huȩyu̧cuä̧ Huȩnȩ päö ta'anö jȩo̧mȩnä̧, o'ca juiyönä adiunätä jȩä̧cua̧.