2 Timoteo 1 - TÄ̧DO Ä̧CUÄ̧ I̧HUȨNȨ

Pablomä, Timoteorö i̧huȩyu̧ti̧nö̧ huȩnȩ

¹ Ttö Pablo, Diosrö pä̧huä̧ rö̧jo̧mȩnä̧ Jesucristo huȩ'ä̧hua̧sä̧ Cristo Jesúsru ttesetomenä, kä̧cuä̧huä̧ i'co iya päinö huȩnȩ jidähua pä'ö.

² Pi̧yȩ cuyäru huȩyu̧tu̧ hue'ösä ucuru Timoteo, Cristonä chi̧tti̧ repedäcuru. Tä'o Dios'inä, Tu̧ru̧hua̧ Jesucristo'inä rö̧ȩnä̧ ppättädäcua'a̧nö̧ ucuru. Ja̧'hua̧ta̧nö̧ re rö̧jö̧nä̧ tottäcua'a̧nö̧ ucuru. Ja̧'hua̧ta̧nö̧ rö̧ȩnä̧ eseunu kä̧cuä̧huä̧ ttiyäcua'a̧nö̧ ucuru.

Timoteo adiu esetinö huȩnȩ

³ Mo̧ro̧'i̧nä̧, yodo'inä Diosrö chucuocuomenä, ucuru eseunu amöcuädösä. Chä̧do̧tö̧ mi̧nä̧ ttesetinäcuru, ttö'inä adiu amöcuädö esetösä.

⁴ Ucu cuajuähuina'a chamöcuädomenä, ucuru tocha pä'ösä rö̧ȩnä̧ chesehua pä'ö.

⁵ Ttö 'cuäopönä amöcuädösä Diosrö adiu cueseta'a. Ucu cuä̧da̧ Loida pä'ö micuaju'inä, ucu cua̧ju̧ Eunice'inä ucu cuesetäcua'a ä'canä esetinätödo. Ttö huo̧jua̧sä̧, iso päi'önä ucu'inä esetöjä.

⁶ Ttö hue'ösä ucuru, chu̧mö̧ mȩ'ö̧ huedina'amä ocurä tti̧rȩdȩta̧'a̧ jä̧'i̧nö̧'a̧nö̧, rȩdȩti̧ cuami iso'quinä Dios ucuru iyinö.

⁷ Ujutu yetecua pä'ö iyocö pi̧nö̧ Dios. Adiu tujuruhua pä'ö iyinö. Ja̧'hua̧ta̧nö̧ tahuaruhuärö repeta pä'ö iyinö. Ja̧'hua̧ta̧nö̧ ta̧'cua̧ pö̧nö̧ tö̧ja̧cua̧ pä'ö iyinö.

⁸ Tu̧ru̧hua̧ i̧huȩnȩ korotörö ucuocu cudäpecuä'. Ttö Chu̧ru̧hua̧rö̧ cheseta'attö, cärenä pö̧rö̧'i̧nä̧ cudäpecuä'. Dios ujurunä, ttö̧ja̧ suronä jȩttö̧ jȩpö̧ icu huȩnȩ esetö, ucu'inä ubara ttu'i.

⁹ Dios ujutu suronä jȩtö̧ jȩpö̧ icuinö. Ja̧'hua̧ta̧nö̧ adiu tö̧ja̧cui̧ya̧rö̧ pä'ö huoinä̧u̧jä̧. Ujutu yoröiso adiu jȩpo̧co̧tö̧ pi̧nä̧tö̧jä̧. Diostä ujuturu pä̧huä̧ rö̧ji̧nä̧cu̧. Pi̧jä̧ juiyäi Dios ujuturu repe'inö, Cristo Jesúsru teseta'attö.

¹⁰ Ja̧'hua̧nö̧ ja̧'a̧nä̧ Tu̧ru̧hua̧ Jesucristo ichomenä, Dios ucuturu repeömä i̧jȩpi̧nö̧. Chutä Jesucristo hua'are ujuru be'epö icuinö. Ttö̧ja̧ suronä jȩttö̧ jȩpö̧ icu huȩnȩ i'cächö, kä̧cuä̧huä̧ i'co beipocömä i̧jȩpi̧nö̧.

¹¹ Dios hue'inö ttörö pi̧yȩ huȩnȩ jidähua pä'ö. Ja̧'hua̧ta̧nö̧ huȩ'ä̧hua̧sä̧ judíos huocotörö chu̧huo̧juȩta̧ pä'ö.

¹² Ja̧'hua̧nö̧ ja̧'a̧ttö̧ jitä ubara ttu'usä. Ja̧'hua̧nö̧ ja̧'a̧nä̧ dä'äcuocösä. Ttö cha̧'cua̧ chu̧huȩnä̧rä̧cu̧ru̧ huo̧jua̧sä̧. Ja̧'hua̧ta̧nö̧ ttörö iyinömä, röji mo̧ro̧ päi'omenä tta̧huä̧rä̧cua̧'a̧ huo̧jua̧sä̧.

¹³ Ucuru adiu huo̧juȩcuä̧ jidähuinömä, 'cuäopönä amöcuädö kä̧hui̧. Cristo Jesúsru adiu esetö, cuahuaruhuärö repe'ö kä̧hui̧.

¹⁴ Espíritu Santo, tami iso'quinä kö̧, ppädomenä, Dios ucuru iyinömä adiu tta̧'ä̧ri̧.

¹⁵ Ucu huo̧jua̧jä̧, o'ca toi'önä Asia rȩjȩ ttö̧ja̧'i̧nä̧, Figelo'inä, Hermógenes'inä, juhua'atä ttö̧ja̧, ttörö jaropi'inätö.

¹⁶ Onesíforo pä'ö mi̧cua̧ ahuaruhuärö Tu̧ru̧hua̧ adiu re rö̧jö̧nä̧ toö'a̧nö̧ ja̧'a̧. Ja̧u̧ ttörö rö̧ȩnä̧ ppä'ädinö. Cärenä chö̧'a̧'a̧ topö ichäji'ca̧, ttörö dä'äcuocö pi̧nö̧.

¹⁷ Ja̧'hua̧ta̧nö̧ Roma ötahuiyära̧'a̧ ichomenä, ttörö usinö ttörö ö̧'o̧cui̧'o̧mȩ jubö päi'önä.

¹⁸ Tu̧ru̧hua̧rö̧ ttucuotarö pä'ö ichö mo̧ro̧ päi'omenä, Tu̧ru̧hua̧ ja̧u̧ru̧ re rö̧jö̧nä̧ toö'a̧nö̧ ja̧'a̧. Ucu huo̧jua̧jä̧, ujuturu adiu ppä'ädinö Efesos ötahuiyänä kä̧nö̧.