2 Tesalonicenses 1 - TÄ̧DO Ä̧CUÄ̧ I̧HUȨNȨ

Pablo ahuaruhuäcu Tesalónica ötahuiyänä ka̧cuä̧tö̧rö̧ tti̧huȩyu̧ti̧nö̧ huȩnȩ

¹ Ttö Pablo, Silvanocu, Timoteocu pi̧yȩ cuyäru huȩyu̧tu̧ hue'ätöjä tö̧jä̧hua̧tö̧ iglesia ruhuärö, Tä'o Diosrö'inä, Tu̧ru̧hua̧ Jesucristorö'inä esetätörö, Tesalónica ötahuiyänä ka̧cuä̧tö̧rö̧.

² Tä'o Dios'inä, Tu̧ru̧hua̧ Jesucristo'inä ucuturu adiu ppättädäcua'a̧nö̧. Ja̧'hua̧ta̧nö̧ adiu kä̧cuä̧huä̧'i̧nä̧ ucuturu ttiyäcua'a̧nö̧.

Cristo ichomenä, suronä jȩpä̧tö̧rö̧ Dios pä̧cua̧ huȩnȩ

³ Tö̧jä̧hua̧tö̧, 'cuäopönä Diosrö eseunu ucuocuätöjä ucuturu amöcuädö. Ucutu juhua'a yabonö Diosrö cuesetätucu'inä, cuahuaruhuärö juhua'a yabonö repecuhuätucu'inä amöcuädö, teseu'a̧nö̧ ja̧'a̧.

⁴ Ja̧'hua̧nö̧ jȩcu̧'ä̧tu̧cua̧'a̧ totomenä, korome iglesia ruhuärö eseunu ji'ähuätöjä ucuturu. Ucuturu suronä jȩpö̧ ubara ttucuhuätucuomenä, cuami 'qui'ächi'ö cu̧ja̧cuä̧tu̧cu̧'i̧nä̧, Diosrö cuesetätucu'inä ji'ähuätöjä.

⁵ Ucutu cu̧ja̧cuä̧tu̧cua̧'a̧ topö huo̧juä̧tö̧jä̧ Dios o'ca toi'önärö yoräteunä jȩpö̧ pä'ö. Ucutu ubara ttucuhuätucua'attö, Dios pä̧huä̧ rö̧jä̧cu̧ chutä ö̧jo̧mȩcu̧ cu̧ja̧cuä̧tu̧cua̧ pä'ö.

⁶ Ucutu ubara ttucuhuätucua pä'ö jȩpä̧tö̧rö̧, ubara ttutta pä'ö jȩä̧cua̧ Dios, chutä adihuä i̧sa̧ ja̧'a̧ttö̧.

⁷ Ucutu ubara ttu'ätörö'inä, ujuturu'inä 'cuätächi'a pä'ö ppädäcuotöjä Diosmä, Tu̧ru̧hua̧ Jesús ocuräcu, ángeles juruhuätöcu mo̧ro̧jä̧ra̧'a̧ttö̧ ichö mo̧ro̧ päi'omenä.

⁸ Ja̧u̧mä̧ Diosrö esetocotörö'inä, Tu̧ru̧hua̧ Jesucristo i̧huȩnȩ esetocotörö'inä ö̧tä̧bo̧ta̧ pä'ö i̧chä̧cua̧.

⁹ Dios jahuätörö ö̧tä̧bo̧to̧mȩnä̧, yoröiso bettipächönä jȩä̧cuo̧tö̧. Jahuätömä Tu̧ru̧hua̧ ö̧jo̧mȩ'i̧nä̧, adihuä ujuru'inä yoröiso topocotö ttäcuotö.

¹⁰ Ja̧'hua̧nö̧ 'cuäopäcua'a chutä i̧tti̧mö̧, churutä esetätömä, churutä ttucuotarö pä'ö ichö mo̧ro̧ päi'omenä. Ujutu tu̧huo̧juȩti̧nö̧mä̧ cuesetinätucua'attö, ucutu'inä ja̧u̧ru̧ cucuotäcuotöjä.

¹¹ Ja̧u̧ 'cuäopä̧cuȩ amöcuädö, 'cuäopönä Diosrö ucuocu jä'epätöjä ucuturu, churutä pä̧huä̧ rö̧jo̧mȩnä̧ ȩmi̧na̧'a̧ttö̧, adiu jȩpö̧ cu̧ja̧cuä̧tu̧cua̧ pä'ö. Ja̧'hua̧ta̧nö̧ Diosrö ucuocu jä'epätöjä o'ca juiyönä adiu cuamöcuädätucu'inä, churutä esetö cuaditätucu'inä chutä ujurunä ppäda pä'ö ucuturu.

¹² Ja̧'hua̧nö̧ ucuocuätöjä ucutu Tu̧ru̧hua̧ Jesucristo i̧mi̧ cucuotätucua pä'ö. Ucutu ja̧'hua̧nö̧ cucuotätucuomenä, Dios'inä, Tu̧ru̧hua̧ Jesucristo'inä ucuturu ppättäda'attö, korotö ttucuotäcuotö ucuturu'inä.