2 Pedro 3 - TÄ̧DO Ä̧CUÄ̧ I̧HUȨNȨ

Tu̧ru̧hua̧ Cristo ichä̧cuȩ huȩnȩ

¹ Adihuä chö̧jä̧hua̧tö̧, pi̧yȩ cuyärunä todärenä päi'önä huȩyu̧tu̧ hue'ösä. Ucuturu ji'äu huȩyu̧tu̧sä̧, adiunä cuamöcuädätucua pä'ö.

² Täbocö adihuä Dios i̧huȩnȩ jiäcuähuä isotö jittähuinö huȩnȩ cunichi'ätucuä'. Ja̧'hua̧ta̧nö̧ Tu̧ru̧hua̧ hueähuä huȩnȩ, Jesús hue'ähuotö ttu̧huo̧juȩti̧nö̧ huȩnȩ'i̧nä̧ ucuturu ttu̧huo̧juȩti̧nö̧mä̧ cunichi'ätucuä'.

³ Pi̧yȩtä̧ a̧mö̧cuä̧rö̧nö̧ ka̧cuä̧tu̧cui̧. Röji mo̧ro̧ tö'cöhuächomenä, adihuä juäi huȩnȩ ya̧'ä̧huȩ'ö̧ ttichäcuotö. Jitötä ttamönä ttamöcuädötä jȩpö̧ ttichäcuotö.

⁴ Jahuätö jä'epö ttä̧ju̧cuä̧cuo̧tö̧: “Cristo i̧chä̧cua̧do pättina'amä, ¿tta̧'a̧nö̧ päi'ina'acuättö? Täbocö pi̧jä̧ aditäji o'ca'a ji̧nö̧tä̧, ja̧'a̧do jitä'inä. Tä̧do̧tö̧ mi̧nä̧'i̧nä̧ hua'ö tticuinö o'ca'a ttö̧ja̧cui̧nö̧ ta'anö ka̧cuä̧tö̧jä̧,” jä'epö ttä̧ju̧cuä̧cuo̧tö̧.

⁵ Mo̧ro̧jä̧ täbocötä ki̧na̧'a̧ pä'ömä tteseta pä'ocotö. Dios ucuocuomenä, pi̧jä̧ päi'ina'ado. Dios päomenä, ajiya jacuotottö rä'oi'ö, de'a päi'ina'ado. Ajiya 'chu̧huä̧ra̧'a̧do rȩjȩmä̧.

⁶ Ja̧'hua̧ta̧nö̧ aje suhuädomenä, o'ca juiyönä pi̧jä̧nä̧ ka̧cui̧nö̧mä̧ ma̧'ä̧chö̧ toei'ina'ado.

⁷ Ja̧'hua̧nö̧ ja̧'a̧nä̧ jitä ka̧cu̧mä̧, mo̧ro̧jä̧'i̧nä̧, pi̧jä̧'i̧nä̧ Diosrö pä̧huä̧ rö̧jo̧mȩnä̧ hua'adö ku̧ni̧nö̧do, churutä pä̧huä̧ rö̧jo̧mȩnä̧ ku icua pä'ö. Dios ttö̧ja̧rö̧ pojocuä mo̧ro̧, suronä jȩpä̧tö̧rö̧ to'ädö icu mo̧ro̧, jahuätö cuo'ö tticuäcuotödo ja̧u̧ ocuränä.

⁸ Ja̧'hua̧ta̧nö̧ adihuä chö̧jä̧hua̧tö̧, pi̧yȩ'i̧nä̧ cunichi'ätucuä'. Tu̧ru̧hua̧ amöcuädomenämä, ya'ute mo̧ro̧tä̧ mil a̧'ȩ ja̧'a̧do. Ja̧'hua̧ta̧nö̧ mil a̧'ȩ Tu̧ru̧hua̧ amöcuädomenä, ya'ute mo̧ro̧tä̧ ja̧'a̧do.

⁹ Korotö pättö'a̧nö̧mä̧ pä'ocödo Diosmä. Päinö ta'anö 'cuäopäcua'ado churutä pä̧huä̧ rö̧jo̧mȩnä̧. Ja̧u̧ ujuturu topö ami 'qui'ächi'ö. O'ca toi'önä pärocuäcutä ttamöcuäda pä'ödo, tottei'ö juiya pä'ö.

¹⁰ Tta̧ttä̧ro̧cö̧ mo̧ro̧ i̧chä̧cua̧do Tu̧ru̧hua̧mä̧. Nä̧u̧cuä̧rä̧tö̧ yodo ttichö'a̧nö̧, i̧chä̧cua̧do. Mo̧ro̧jä̧ra̧'a̧ttö̧ juruhuächi'ö ucuocuäcua'ado. Mo̧ro̧jä̧nä̧ ka̧cuä̧tö̧mä̧ kä̧hua̧tö̧'i̧nä̧, si̧ri̧'cö̧'i̧nä̧ o'ca toi'önä ocuränä cuo'ö icu bettipächäcuotödo. Pi̧jä̧ rȩjȩ'i̧nä̧, pi̧jä̧nä̧ ka̧cu̧'i̧nä̧ o'ca juiyönä cuo'ö icu beipächä̧cuȩdo.

¹¹ Ja̧'hua̧nö̧ beipächä̧cuȩ amöcuädö, iso päi'önä ucutu eseunu cua̧'cua̧ pö̧nö̧ cu̧ja̧cuä̧tu̧cuä̧cua̧'a̧nö̧.

¹² Tta̧'ä̧rä̧tu̧cui̧ Dios i̧chä̧cuȩ mo̧ro̧. Ja̧'hua̧ta̧nö̧ “Jurunä ichaja” pä'ätucuirö. Ja̧u̧nu̧ mo̧ro̧jä̧'i̧nä̧, mo̧ro̧jä̧nä̧ ka̧cuä̧tö̧'i̧nä̧, kä̧hua̧tö̧'i̧nä̧, si̧ri̧'cö̧'i̧nä̧ ocuränä japächi'ö cuo'ö tticuäcuotödo.

¹³ Ja̧'hua̧nö̧ ja̧'a̧nä̧ ujutumä tta̧'ä̧rä̧tö̧jä̧ mo̧ro̧jä̧ ja̧rȩä̧jä̧'i̧nä̧, pi̧jä̧ ja̧rȩä̧jä̧'i̧nä̧, Dios iya päinö. Juhua'a o'ca juiyönä yoräteunä adihuä juäinä tö̧ja̧cuä̧cuo̧tö̧jä̧.

¹⁴ Ja̧'hua̧nö̧ ja̧'a̧ttö̧ chö̧jä̧hua̧tö̧, pi̧yȩ 'cuäopa pä'ö tta̧cu̧huä̧rä̧tu̧cuo̧mȩnä̧, o'ca juiyönä jȩpä̧tu̧cui̧ adiunätä Dios ä'ca jo̧mȩttö̧, cuahuaruhuärö eseunu kä̧nö̧, idicu juiyönä.

¹⁵ Pi̧yȩmä̧ cunichi'ätucuä'. Tu̧ru̧hua̧ ujuturu ami 'qui'ächi'ö tomenä, ujutu suronä jȩtö̧ jȩpö̧ icua pä'ö tta̧'ä̧rö̧. Ja̧'hua̧ta̧nö̧ tö̧jä̧hua̧ Pablo, Dios huo̧juȩcuä̧nä̧ huȩyu̧ti̧nö̧do ucuturu.

¹⁶ O'ca juiyönä huȩyu̧tu̧ hueinömä ja̧'hua̧ta̧nö̧ pä'ö huȩyu̧ti̧nö̧do ucuturu. Koromä ttä̧ju̧cu̧ juiyönä jerudo. Korotömä jerupätö'inä, esetäcuähuänä juiyupätö'inä ttä̧ju̧cuo̧ca̧'a̧ttö̧, i̧mi̧cu̧nä̧ ji'ähuätödo. Ja̧'hua̧ta̧nö̧ koro Huȩyu̧cuä̧ Huȩnȩ päa'attö'inä, i̧mi̧cu̧nä̧ ji'ähuätödo. Ja̧'hua̧nö̧ i̧mi̧cu̧nä̧ ji'äu, jitötä ttamönä be'ipächätödo.

¹⁷ Ja̧'hua̧nö̧ ja̧'a̧ttö̧ adihuä chö̧jä̧hua̧tö̧, täcö cu̧huo̧juä̧tu̧cua̧'a̧ttö̧, ttu̧ȩcuä̧nä̧ ka̧cuä̧tu̧cui̧. Korotö suronä jȩpä̧tö̧ yapareu jittäu cuesetö juiyätucuaja jahuätörö, cuami 'qui'ächi'ö kä̧nö̧, suronä jȩpö̧ ma̧cu̧huä̧chä̧tu̧cu̧ juiya pä'ö.

¹⁸ Tu̧ru̧hua̧ Jesucristorö juhua'a yabonö adiunä huo̧jui̧pä̧tu̧cui̧. Ja̧'hua̧ta̧nö̧ juhua'a yabonö esehuätucui Tu̧ru̧hua̧rö̧. Jitä'inä, yodoji'inä tesehuäcuähuätucuaja ja̧u̧ru̧tä̧ 'cuäopönä. Amén.