2 Pedro 2 - TÄ̧DO Ä̧CUÄ̧ I̧HUȨNȨ

Yapareu ji'ähuinätö jittähuinö huȩnȩ

¹ Ja̧'hua̧nö̧ ja̧'a̧nä̧'i̧nä̧ yapareu huȩnȩ ji'ähuinätömä ka̧cui̧nä̧tö̧do Israel ttö̧ja̧ ttö̧'quȩtȩnä̧. Ja̧'hua̧ta̧nö̧ ucutu cu̧'quȩtȩtu̧cu̧nä̧ yapareu huȩnȩ ji'ähuätömä ttö̧ja̧cuä̧cuo̧tö̧. Jahuätö yä̧huä̧i̧nä̧ yapareu huȩnȩ ttu̧huo̧juȩtä̧cuo̧tö̧. Churutä, suronä jȩttö̧ jȩpö̧ icuinörö, ä̧ppö̧tä̧rö̧ ji'ähuätö. Ja̧'hua̧nö̧ ttu̧huo̧juȩto̧mȩnä̧, o'ca päi'önä ttamönä bettipächäcuotö.

² Jitörötä pä̧huä̧ rö̧jö̧ jȩpö̧ kä̧nö̧ ttu̧huo̧juȩto̧mȩnä̧, recuätö ttesetäcuotö jahuätörö. Ja̧'hua̧ta̧nö̧ adihuä huȩnȩmä̧, suräjuä huȩnȩ pä'ö ttucuocuäcuotö.

³ Pärätä rö̧ȩnä̧ ttȩma̧ pä'ö, ucuturu yapareu huȩnȩ ttu̧huo̧juȩtä̧cuo̧tö̧ cuiyätucuatö pä'ö. Yoröiso ttö̧ji̧pö̧ juiyönä, bettipächäcuotö ja̧'hua̧nö̧ huo̧juȩtä̧tö̧mä̧. Ja̧'hua̧nö̧ 'cuäopäcua'a, täbocö päi'önä amöcuädinödo Dios.

⁴ Angelesrö, suronä jȩpi̧nä̧tö̧rö̧, suronä jȩtti̧nö̧ jȩpö̧ icuocö pi̧nö̧do Dios. Ocurära̧'a̧ do'opö icuinä̧u̧do. Yo̧a̧'a̧ jacuä ttö̧ja̧cua̧ pä'ö do'opö icu, cuoräusanä nö'cö icuinä̧u̧, yodoji Dios ttö̧ja̧rö̧ pojocuä mo̧ro̧ päi'ome jubö.

⁵ Täbocö ka̧cui̧nä̧tö̧rö̧'i̧nä̧ suronä jȩtti̧nö̧ jȩpö̧ icuocö pi̧nö̧do Dios. Suropätö tottei'a pä'ö, aje suhuädönä hue'inödo. Noécu, adihuä juäi huȩnȩ ji'ähuinömä, korotö ko̧ro̧mö̧ttö̧nö̧ ta̧ju̧nu̧ ahuaruhuäcu ka̧cui̧pi̧nä̧tö̧do.

⁶ Ja̧'hua̧ta̧nö̧ Dios tä̧bo̧tö̧ be'epäjipö icu, ku icuinödo Sodoma ötahuiyä'inä, Gomorra ötahuiyä'inä. Ja̧u̧mä̧ o'ca'a, suronä jȩpö̧ ka̧cuä̧tö̧ topö ttu̧huo̧jua̧ pä'ö jȩpi̧nö̧do.

⁷ Ötahuiyä cuo'ö icuomenä, Lottä ki̧'i̧nö̧do. Ja̧u̧ adihuä i̧sa̧ pi̧nö̧do Dios ä'ca jo̧mȩttö̧. Chutä Lot korotö suronä jȩpä̧tö̧rö̧ tomenä, re rö̧jö̧nä̧ topinödo.

⁸ Mo̧ro̧ji̧nö̧ a̧'u̧cuä̧ ja̧u̧ adihuä i̧sa̧mä̧, jahuätö ttö̧'quȩtȩnä̧ ki̧nö̧mä̧, suronä jȩtta̧'a̧ tomenä, suronä ttucuocua'a ä̧ju̧cuo̧mȩnä̧, a̧'cua̧ tta̧'ȩcui̧nö̧do ami iso'quinä adiu amöcuäda'attö.

⁹ Diosrö adiunä esetätörö, suronä 'cuäopa'anä, Tu̧ru̧hua̧ ppä'ädö jahuätörö. Ja̧'hua̧ta̧nö̧ suronä jȩpä̧tö̧rö̧ hua'adö ku̧nu̧ ö̧tä̧bo̧ta̧ pä'ö Dios ttö̧ja̧rö̧ pojocuä mo̧ro̧ päi'omenä.

¹⁰ Ttu̧ru̧hua̧rö̧ jarode'ö jitötä ttamönä suronä ttamöcuädäu jȩpä̧tö̧rö̧, ji̧nä̧ isocu ö̧tä̧bo̧tä̧cua̧ Dios. Jahuätö yettecuoca'anä jarode'ätödo. Mo̧ro̧jä̧ ruhuärö yecuäcuähuä juiyönä suronä huopätödo.

¹¹ Angeles'inä, ja̧'hua̧nö̧ suronä huopätöttö'inä abonänö juruhuätödo. Ja̧'hua̧nö̧ ja̧'a̧nä̧ suronä huopätö huottö'a̧nö̧mä̧, suronä huopocotödo ángeles, mo̧ro̧jä̧ ruhuärö Tu̧ru̧hua̧ ä'ca jo̧mȩttö̧.

¹² Pitö u̧mä̧tö̧ de'a isotö ta'anö ä̧ju̧cuo̧co̧tö̧. Topötä ka̧cuä̧tö̧do. 'Chu'ädö cuä'ö tticuatö pä'ötä böo juo'ätö. Ttä̧ju̧cu̧ juiyönä ucuocuätö suräjuä huȩnȩ. De'a i̧sa̧ 'corupäi'ö'a̧nö̧ 'corupätti'äcuotö.

¹³ Korotörö ttutta pä'ö jȩtti̧nö̧'a̧nö̧, ubara ttuttäcuotö jahuätö'inä. Pi̧jä̧ jähuä amöcuädö kä̧cuä̧huä̧mä̧ adiunä ttö̧ja̧ji̧cö̧ pä'ö jȩpä̧tö̧. Ucutucu fiesta jȩtto̧mȩnä̧, korotö ttödäpecuächi'önä jȩpä̧tö̧, yapareu jȩpö̧ kä̧nö̧.

¹⁴ Isajuru tottö juiyö'a̧nö̧ huotö. 'Cuä'ächi'ocotö suronä jȩpä̧'chö̧. Juiyupätörö yapareu jȩpä̧tö̧. O'ca juiyönä ttȩma̧ pä'ätö jitötä ttöäre päi'önä. Jahuätömä suropätö.

¹⁵ Mä̧nä̧, adihuä mä̧nä̧ttö̧ re'tehuächö cue'ächätö. Beor i̧tti̧ Balaam i̧'chi̧nö̧ ta'anö 'chä̧tö̧. Ja̧u̧ Balaam, suronä jȩpö̧ kä̧nö̧, pärätä ȩma̧ pä'inödo.

¹⁶ Burro i̧huȩnȩ jui̧'a̧mä̧, ttö̧ja̧ tti̧huȩnȩ jä̧'i̧nö̧'a̧nö̧ ucuocuinödo Balaam suronä jȩa̧'a̧ ji'äu. Burro ucuocuäcu, unichi'inödo chutä usuri'äji.

¹⁷ Pitö u̧mä̧tö̧mä̧ dubora ajiya jora jä̧'i̧nö̧'a̧nö̧ ka̧cuä̧tö̧. Ja̧'hua̧ta̧nö̧ kä̧ru̧'coppa ajiya isoppa 'cha̧'a̧ jä̧'i̧nö̧'a̧nö̧ ka̧cuä̧tö̧. Yo̧a̧'a̧ jacuä, yoröiso beipoca'a jacuä ttö̧ja̧cua̧ pä'ö hueinä̧u̧do Dios.

¹⁸ Jahuätömä a'cuoyäunu micuähuocö juäi ucuocuätö. Jitötä ttamönä pä̧huä̧ rö̧jö̧tä̧ suronä jȩpö̧ ttö̧ja̧cui̧nö̧ttö̧ rä'opächinätörö huo̧juȩtä̧tö̧ pi̧jä̧ ttö̧ja̧ ttamöcuädö huȩnȩ.

¹⁹ Korotörö surojö juiyönä kä̧cuä̧huä̧mä̧ huo̧juȩtä̧tö̧. Ja̧'hua̧nö̧ ja̧'a̧nä̧ jahuätörö ttu̧huo̧juȩtö̧'a̧nö̧mä̧ jȩtto̧ca̧'a̧, suronätä jȩpö̧ ka̧cuä̧tö̧. O'ca toi'önä tamöcuädötä jȩpä̧tö̧jä̧.

²⁰ Tu̧ru̧hua̧ Jesucristorö huo̧juä̧tö̧mä̧, suronä ttö̧ja̧cui̧nö̧ttö̧ rä'opächinätö. Ja̧'hua̧nö̧ ja̧'a̧ pä'äji ta'anö suronä jȩpö̧ ppa̧ttä̧chö̧ttö̧mä̧, äcuomenä ttö̧ja̧cui̧nö̧ttö̧'i̧nä̧ abonänö suronä ka̧cuä̧tö̧.

²¹ Adihuä huȩnȩ eseti'cotö, jaroi'äcuähuänämä suroja'ado. Ja̧'hua̧nö̧ ja̧'a̧ttö̧ adihuä huȩnȩ ttieruhuomenä, ja̧u̧ huȩnȩ jaroi'äcuähuättö'inä abonänö adihua'ado.

²² Täbocö päinö huȩnȩ päa'a: “Ähuiri edecui'i'ca̧, edehua pä'äji ta'anö cu. Ja̧'hua̧ta̧nö̧ cuchi aje i'i'ca̧, redähuanä pä'äji ta'anö borepö.” Ja̧'hua̧nö̧ ja̧'a̧ttö̧ adihuä huȩnȩ jaropi'ätömä, pi̧yȩ päinö huȩnȩ päö'a̧nö̧ jȩpä̧tö̧do.