2 Juan 1 - TÄ̧DO Ä̧CUÄ̧ I̧HUȨNȨ

Iso päi'önä repeäunu kä̧cuä̧huä̧ huȩnȩ

¹ Ttö anciano hua̧ chi̧huȩnȩ hue'ösä ucuru chöjähuaju, Dios ȩmi̧nä̧cua̧rö̧. Cui̧tti̧mö̧rö̧'i̧nä̧ te'äusä. Iso päi'önä ucuturumä ttötä repe'ösä. Ja̧'hua̧nö̧ päda'anä'inä ttötä katämäcö̧. O'ca toi'önä Dios i̧huȩnȩ, iso päi'önä huȩnȩ, esetinätömä ucuturu repe'ätö.

² Iso päi'önä huȩnȩ o'ca toi'önä tami iso'quinä kö̧. Ja̧u̧ 'cuäopönä kä̧cua̧'a̧ ujutucutä. Ja̧u̧ iso päi'önä huȩnȩ chu̧ju̧nä̧ra̧'a̧ttö̧, ucuturu repe'ösä.

³ Tä'o Dios, I̧tti̧ Tu̧ru̧hua̧ Jesucristocu ucuturu adiu ppä̧dä̧cua̧, re rö̧jö̧nä̧ to̧ä̧cua̧, cua̧'cua̧ adiunä cu̧ja̧cuä̧tu̧cua̧ pä'ö ppä̧dä̧cua̧, iso päi'önä repe'önö cu̧ja̧cuä̧tu̧cua̧ pä'ö.

⁴ Ucu cui̧tti̧mö̧ttö̧ yotöte Tä'o Dios hueinö ta'anö, iso päi'önä huȩnȩ päö'a̧nö̧ jȩpö̧ ka̧cuä̧tö̧ pä'ö tochomenä, juiyo esehuinösä.

⁵ Jitä ucuru ji'äusä chöjähuaju, ujutu o'ca toi'önä repetäu'a̧nö̧ ja̧'a̧. Pi̧yȩ chi̧huȩyu̧tu̧mä̧ jareö hueähuä huȩnȩmä̧cö̧. Ja̧u̧tä̧ hueähuä huȩnȩ ku̧nä̧rä̧tö̧jä̧, äcuomenä tesetinomettö kä̧mä̧dö̧.

⁶ Repe'ätömä Dios hueähuä huȩnȩ päö'a̧nö̧ jȩpä̧tö̧. Ja̧'hua̧ta̧nö̧ ucutu cuesetinomettö kä̧mä̧dö̧, ä̧ju̧cui̧nä̧tö̧jä̧ Dios hueähuä huȩnȩ päa'a: “Repe'äunu ka̧cuä̧tu̧cui̧.”

Jesucristo u̧huo̧juȩti̧nö̧ttö̧'i̧nä̧ abonänö 'cuäoi'önä ttu̧huo̧juȩtö̧ huȩnȩ

⁷ Ja̧'hua̧ ja̧'a̧ recuätö yapareu ji'ähuätö pi̧jä̧nä̧ ka̧cuä̧tö̧. Jahuätö “Jesucristo ubo jö̧nä̧ ichinö” pä'ocotö. Ja̧'hua̧nö̧ jȩpö̧mä̧ yaparehua̧. Ja̧u̧mä̧ Cristo a̧bo̧i̧ya̧.

⁸ Ttu̧ȩcuä̧nä̧ ka̧cuä̧tu̧cui̧, cuaditinö micuä toei'ö juiya pä'ö, cuaditähuä ji̧nö̧ o'ca juiyönä cuȩmä̧tu̧cuä̧cua̧'a̧nö̧.

⁹ Jesucristo u̧huo̧juȩti̧nö̧ abonänö 'cuäoi'önä huo̧juȩtö̧mä̧, ja̧u̧mä̧ Jesucristo u̧huo̧juȩti̧nö̧ huo̧juȩtö̧ ko̧cö̧. Dios toönä kö̧. Jesucristo u̧huo̧juȩti̧nö̧ huo̧juȩtö̧ kö̧mä̧, Tä'o Dioscu, I̧tti̧ Jesucristocu kö̧.

¹⁰ Ya̧tȩ ucuturu huo̧juȩtö̧ ichömä, Jesucristo u̧huo̧juȩti̧nö̧ttö̧'i̧nä̧ i̧mi̧cu̧nä̧ u̧huo̧juȩtö̧ttö̧mä̧, cuojusodera̧'a̧ doächö juiya pä'ätucuirö. Ja̧'hua̧ta̧nö̧ ja̧u̧ru̧ tecuhuähuätucuä'.

¹¹ Ja̧u̧ru̧ te'äumä chutä suronä jȩö̧ ta'anö suronä jȩpö̧.

Röji teähuinö huȩnȩ

¹² Rö̧ȩnä̧ ucuturu jidähua päda'anä, cuyäru isojänä huȩyu̧tu̧ hueda pä'ocösä. Ucuturu do'ächö chicha pä'ösä, pätecuänö pä̧nö̧ tucuocua pä'ö. Ja̧u̧nu̧ chichomenä, rö̧ȩnä̧ tesehuäcuotöjä.

¹³ Cujähuaju Dios ȩmi̧nä̧cua̧, jahuäju ki̧tti̧mö̧'i̧nä̧ ucuru te'ähuätö.