2 Corintios 8 - TÄ̧DO Ä̧CUÄ̧ I̧HUȨNȨ

Diosrö esetö kä̧nö̧ ppädäcuähuä huȩnȩ

¹ Jitämä chö̧jä̧hua̧tö̧, cu̧huo̧juä̧tu̧cua̧ pä'ätöjä Macedonia rȩjȩttö̧ iglesias ruhuärö Dios ppädinömä.

² Jahuätörö rö̧ȩnä̧ surojö 'cuäopomenä, iso päi'önä adiu esehuätö. Ja̧'hua̧ta̧nö̧ usurä isotö ja̧'a̧nä̧, järe ruhuotö ttiyö'a̧nö̧ iyinätödo.

³ Ttö topinösä ttiya'anä. O'ca juiyönä ttu̧ju̧nä̧rö̧ttö̧'i̧nä̧ eseunu iyinätödo. Ja̧'hua̧ta̧nö̧ koronö ttu̧ju̧nä̧rö̧ttö̧'i̧nä̧ abonänö iyinätödo.

⁴ Jahuätö korotö tö̧jä̧hua̧tö̧rö̧ ppättäda pä'inätödo. Ja̧'hua̧nö̧ ja̧'a̧ttö̧ ujuturu jä'epinätödo ja̧'hua̧nö̧ ttiya pä'ö.

⁵ Ujutu tamöcuädäjittö'inä abonänö jȩpi̧nä̧tö̧do. Ä'canä jitötä ttamönä Ttu̧ru̧hua̧rö̧ iyäcuähuinätödo, Diosrö pä̧huä̧ rö̧jo̧mȩnä̧ jȩpö̧. Ja̧u̧nu̧ o'ca'a, ujuturu'inä iyäcuäu ppä'ädinätödo.

⁶ Ja̧'hua̧nö̧ ja̧'a̧ttö̧ Titorö hue'inätöjä ä'canä cuiyätucua pä'ö ucuturu jiähuina'attö, juhua'a yabonö ucuturu ppäda pä'ö, Diosrö iyähuänä adiu jȩcu̧'ä̧tu̧cua̧ pä'ö.

⁷ Iso päi'önä, ucutu adiu jȩpä̧tö̧jä̧ o'ca juiyönä. Esetäcuähuänä'inä, korotörö huo̧juȩcuä̧nä̧'i̧nä̧, i̧huȩnȩ huo̧juä̧huä̧nä̧'i̧nä̧ adiu jȩpä̧tö̧jä̧. Ja̧'hua̧ta̧nö̧ ujuturu ppä'ädö repe'ätöjä. Ja̧'hua̧nö̧ ja̧'a̧nä̧ ja̧'hua̧nö̧ tö̧jä̧hua̧tö̧rö̧ iyähuänä, adiu cuiyätucuaja.

⁸ Ttö pi̧yȩmä̧ hueähuä huȩnȩ päi'önämä ji'ähuocösä. Korotö ttiyö ta'anö cu̧huo̧juä̧tu̧cua̧ pä'ötä pä'ösä. Ucutu'inä iso päi'önä repecuhuätucua'a tocha pä'ösä.

⁹ Ucutumä täcö huo̧juä̧tö̧jä̧ Tu̧ru̧hua̧ Jesucristo adihuä juäi iyö ujuturu. Ja̧u̧ o'ca juiyönä ku̧nä̧ri̧nö̧do. Ja̧'hua̧nö̧ ja̧'a̧nä̧ ucuturu repe'ö usurä i̧sa̧ ta'anö pä'i'inödo, ucutu ja̧u̧ru̧ esetö, järe ruhuotö ta'anö cu̧ja̧cuä̧tu̧cua̧ pä'ö.

¹⁰ Ttötä chamöcuädö'inä ji'äusä ucuturu ppädäda pä'ö. Ucutu ni̧po̧ a̧'ȩnä̧ pä'ötä iyö jȩpi̧nä̧tö̧jä̧. Ja̧'a̧tä̧ jȩpo̧co̧tö̧ pi̧nä̧tö̧jä̧. Iso päi'önä eseunu iyö jȩpi̧nä̧tö̧jä̧.

¹¹ Jitä cäcuhuädätucuä' ju̧huȩnȩmä̧. Eseunu cuiyinätucu ta'anö, cu̧ju̧nä̧rä̧tu̧cu̧ttu̧ iyätucui.

¹² Ya̧tȩ ami iso'quinä esetö, iya päöttömä, Dios ȩmä̧cua̧ u̧ju̧nä̧rö̧ttö̧ iyomenä. Ja̧u̧mä̧, Diosmä, juitomenä jä'epocö.

¹³ Ja̧'hua̧ta̧nö̧ korotörö ppä'ädö cuiyätucuomenä, ucutu'inä jui'ötä cu̧ja̧cuä̧tu̧cua̧ pä'ö pä'ocösä ttömä.

¹⁴ O'ca toi'önä ttu̧ju̧nä̧ra̧ pä'ösä. Ja̧'hua̧nö̧ jȩpö̧ jitämä ucutumä rö̧ȩnä̧ ku̧nä̧rä̧tö̧jä̧. Ja̧'hua̧nö̧ ja̧'a̧ttö̧ jahuätörö cuiyätucu'a̧nö̧ ja̧'a̧. Ja̧'hua̧ta̧nö̧ koronö'inä ucutu juicuhuätucuomenä, jahuätö pärocua'acu ttiyö'a̧nö̧ ja̧'a̧ ucuturu. Ja̧'hua̧nö̧ jȩpö̧ yoräteunä ppä'ädätöjä korotö korotönörö.

¹⁵ Huȩyu̧cuä̧ Huȩnȩ ja̧'hua̧ta̧nö̧ päa'a: “Ya̧tȩ rö̧ȩnä̧ u̧ju̧nä̧ro̧mȩnä̧, pärocuä rö̧ȩnä̧ ku̧nä̧ro̧cö̧. Ja̧'hua̧ta̧nö̧ ya̧tȩ ji̧'qui̧cha̧nö̧tä̧ u̧ju̧nä̧ro̧mȩnä̧, pärocuä juiyönämä ko̧cö̧.”

Titorö huettinö huȩnȩ

¹⁶ Diosrö esehuätöjä jitämä. Dios Tito ami iso'quinä ucuocu hue'inödo Titorö, ucuturu rö̧ȩnä̧ amöcuäda pä'ö ttö chamöcuädö ta'anö.

¹⁷ Ja̧u̧ru̧ chucuocuomenä, i̧'cha̧ pä'inödo cu̧ja̧cuä̧tu̧cua̧'a̧cu̧. Ja̧u̧'i̧nä̧ ucuturu toa pä'inödo.

¹⁸ Ja̧'hua̧ta̧nö̧ Titocu hue'ätöjä ka̧ra̧ tö̧jä̧hua̧rö̧, adiu ttucuocuäcuru iglesias ruhuämä. Ja̧u̧'i̧nä̧ ttö̧ja̧ suronä jȩttö̧ jȩpö̧ icu huȩnȩ ji'äu adiu aditinödo.

¹⁹ Ja̧'hua̧ta̧nö̧ pottö, iglesias ruhuä ja̧u̧ru̧ o'ipö hue'inätödo ujuturu ppä'ädö cueächa pä'ö pi̧yȩ eseunu iyähuä ȩpö̧, Tu̧ru̧hua̧rö̧ ttucuota pä'ö. Ja̧'hua̧ta̧nö̧ ucutu eseunu cuiyätucua'a totta pä'ö ppä'ädätöjä.

²⁰ Ja̧'hua̧nö̧ jȩpä̧tö̧jä̧ korotömä ucuturu ppätäda'a tottomenä, suronä ttucuocu juiya pä'ö, cuiyätucu topö.

²¹ O'ca juiyönä uhuäunä jȩta̧ pä'ätöjä Tu̧ru̧hua̧ ä'ca jo̧mȩttö̧'i̧nä̧, pi̧jä̧ ttö̧ja̧ ttä'ca jo̧mȩttö̧'i̧nä̧.

²² Ja̧'hua̧ta̧nö̧ jahuätöcu ka̧ra̧ tö̧jä̧hua̧rö̧ hue'ätöjä. Ja̧u̧'i̧nä̧ rö̧ȩnä̧ esehua'a topinätöjä, koro jȩo̧mȩnä̧. Ja̧'hua̧ta̧nö̧ ucuturu rö̧ȩnä̧ eseu adiu jȩä̧cua̧.

²³ Korotö Titorö jättepöttömä, ja̧u̧mä̧ Pablo u̧mö̧huä̧ya̧ päi'önä aditödo, ujuturu ppä'ädö pä'ö cuädätätucuaja. Ja̧'hua̧ta̧nö̧ korotö tö̧jä̧hua̧tö̧rö̧'i̧nä̧ jättepöttömä, jahuätö Cristorö pä̧huä̧ rö̧jo̧mȩnä̧ ttadita pä'ö, iglesias ruhuättö hue'ähuotödo pä'ö cuädätucuaja.

²⁴ Ja̧'hua̧nö̧ ja̧'a̧ttö̧ iglesias ru̧huä̧ ttu̧huo̧jua̧ pä'ö iso päi'önä jahuätörö repecuhuätucua'a, adiu jȩpä̧tu̧cui̧tö̧. Ujutu'inä adiunä tesehuäcua'a̧nö̧ ucuturu, adiu jȩpä̧tu̧cui̧ jahuätörö.