2 Corintios 5 - TÄ̧DO Ä̧CUÄ̧ I̧HUȨNȨ

¹ Ujutu huo̧juä̧tö̧jä̧ pi̧yȩmä̧. Iso päi'önä tidepä, recuo ko̧cö̧mä̧, be'epö tticuttumä, Dios mo̧ro̧jä̧ra̧'a̧ttö̧ korode tojusode aditinödo, yoröiso beipocode, ttö̧ja̧ ttu̧mö̧nä̧'i̧nä̧ adicuocode.

² Pi̧jä̧ jähuä tidepänä kä̧nö̧, 'cuäopönä eseunu ka̧cuo̧co̧tö̧jä̧. Tojusode mo̧ro̧jä̧ra̧'a̧ kode amöcuädö, pä̧huä̧ rö̧jä̧u̧jä̧ juhuodenä tö̧ja̧cua̧ pä'ö.

³ Iso päi'önä juodenä kä̧nö̧, ttö̧'ca̧tä̧huä̧ti̧yu̧ jui'ö ttö̧ja̧'a̧ jä̧'i̧nö̧'a̧nö̧mä̧ ka̧cuo̧co̧tö̧jä̧.

⁴ Pi̧jä̧nä̧ tidepänä kä̧nö̧, 'cuäopönä eseunu ka̧cuo̧co̧tö̧jä̧. Ja̧'hua̧ta̧nö̧ 'cuäopönä suronä 'cuäopa'a ujuturu. Iso päi'önä tidepämä täbo jähuä do'opö ticua pätoca'anä, jareö kä̧cuä̧huä̧ ȩmö̧, tidepä jareö ȩmö̧, pi̧jä̧ttö̧ 'corupäi'äcuähuämä be'epö ticua pä'ätöjä.

⁵ Dios ujuturu ja̧'hua̧nö̧ 'cuäopa pä'ö aditinä̧u̧jä̧. Ja̧'hua̧ta̧nö̧ ä'canä Espíritu Santorö iyinä̧u̧jä̧, koro'inä yodoji i̧yä̧cuä̧u̧jä̧ tu̧huo̧jua̧ pä'ö.

⁶ Ja̧'hua̧nö̧ ja̧'a̧ttö̧ 'cuäopönä juruhuätöjä. Ujutu huo̧juä̧tö̧jä̧ ji̧nä̧ pi̧jä̧ jähuä tidepänä tö̧ja̧cua̧'a̧nä̧, Tu̧ru̧hua̧ ö̧jo̧mȩttö̧ ji̧nä̧ kara'a ka̧cuä̧tö̧jä̧ pä'ö.

⁷ Ja̧'hua̧ta̧nö̧ ja̧u̧ru̧tä̧ esetö cue'ächätöjä. Tö'ärenä totönätä amöcuädötä cue'ächocotöjä.

⁸ Ujutumä juruhuätöjä. Ja̧'hua̧ta̧nö̧ pi̧jä̧ jähuä tidepä jaropi'ö, Tu̧ru̧hua̧cu̧ tö̧ja̧cua̧ pä'ätöjä.

⁹ Ja̧'hua̧nö̧ ja̧'a̧ttö̧ pi̧jä̧ jähuä tidepänä tö̧jo̧mȩnä̧'i̧nä̧ tö̧jo̧co̧mȩnä̧'i̧nä̧, 'cuäopönä adiunä tö̧ja̧cua̧ pä'ätöjä, Tu̧ru̧hua̧ eseunu toatö pä'ö.

¹⁰ O'ca toi'önä pi̧jä̧nä̧ ka̧cuä̧tö̧, Cristo ö̧'o̧mȩ ä'ca jo̧mȩ tö̧jä̧mä̧dä̧cuo̧tö̧jä̧, pi̧jä̧ jähuä tidepänä kä̧nö̧, tö̧ji̧nö̧ ta'anö tȩma̧ pä'ö, koro adiu'inä, koro suronä'inä jȩti̧nö̧ micuä päi'önä.

Ttö̧ja̧ eseäcuähuä huȩnȩ

¹¹ Ja̧'hua̧nö̧ ja̧'a̧ttö̧ ujutu Tu̧ru̧hua̧rö̧ yecuäcuähuä tu̧huo̧jua̧'a̧ttö̧, pi̧jä̧ ttö̧ja̧ tteseta pä'ö ji'ähuätöjä. Ja̧'hua̧nö̧ ja̧'a̧nä̧ Dios ujuturu huo̧jua̧. Ja̧'hua̧ta̧nö̧ ucutu'inä ujuturu huo̧juä̧tö̧jä̧ a̧'cua̧ra̧'a̧.

¹² Ja̧'hua̧nö̧ pä'ö, pä'äji ta'anö ujutu tamönä huȩnȩcuo̧co̧tö̧jä̧. Ucututä adiu cu̧huo̧juä̧tu̧cua̧ pä'ätöjä ujuturu. Ja̧'hua̧nö̧ ja̧'a̧ korotö uhuäunä jȩttö̧ adihua'a pä'ö, ttami iso'quittö rä'opocö juäi ttucuocuomenä, adiu cuädätätucua pä'ätöjä ujutumä.

¹³ Iso päi'önä ujutu ttu̧'ȩpä̧ro̧co̧tö̧ ttö̧jö̧'a̧nö̧ tö̧jö̧ttö̧mä̧, Diosrö pä̧huä̧ rö̧jö̧ jȩta̧ pä'ö jȩpä̧tö̧jä̧. Ja̧'hua̧ta̧nö̧ ujutumä ttu̧'ȩpä̧rä̧tö̧ ttö̧jö̧'a̧nö̧ tö̧jö̧ttö̧mä̧, ucuturu ppätäda pä'ö jȩpä̧tö̧jä̧.

¹⁴ Cristo pi̧jä̧ ttö̧ja̧rö̧ repeö huȩnȩ hue'ähuotöjä ujutumä. Ja̧'hua̧ta̧nö̧ pa̧'a̧nö̧ esetätöjä. Ya̧tȩtä̧ o'ca toi'önärö mitäu 'corupä'i'inödo. Ja̧'hua̧nö̧ ja̧'a̧ttö̧ o'ca toi'önä 'corupä'i'ätöjä.

¹⁵ Chutä Cristo o'ca toi'önärö repe'ö, 'corupä'i'inödo, jitä ka̧cuä̧tö̧ jitötä ttamönä ttamöcuädönä ttö̧jö̧ juiya pä'ö. Churutä, 'corupä'i'äji'ca̧ tto'ächinörötä, ttamöcuäda pä'ö pä̧huä̧ rö̧jä̧cu̧.

¹⁶ Ja̧'hua̧nö̧ ja̧'a̧ttö̧ jitämä pi̧jä̧ ttö̧ja̧ ttamöcuädö ta'anö, korotörö amöcuädocotöjä. Pä'äjimä Cristorö amöcuädö, pi̧jä̧ ttö̧ja̧ ttamöcuädö ta'anö, amöcuädinätöjä ujutu'inä. Jitämä ja̧'hua̧nö̧mä̧ amöcuädocotöjä ja̧u̧ru̧.

¹⁷ Ja̧'hua̧nö̧ ja̧'a̧ttö̧ ya̧tȩ Cristorö esetomenä, ja̧u̧ ja̧rȩpa̧ ttö̧ja̧ i̧sa̧ pä'i'ö. Pä'äji jȩi̧nö̧ jaropi'ö, o'ca juiyönä jareönätä amöcuädö jȩpö̧.

¹⁸ Pi̧yȩ o'ca juiyönä jȩpö̧ Dios. Ja̧u̧mä̧ Cristorö tesetomenä, churutä tesehua pä'ö, eseäcuähuä iyinödo ujuturu. Ja̧'hua̧ta̧nö̧ hue'inödo ujuturu o'ca toi'önä ttesehuarö pä'ö jitähua pä'ö.

¹⁹ Ja̧'hua̧nö̧ pä'ö pä'ätöjä. Dios pi̧jä̧nä̧ ka̧cuä̧tö̧ Cristorö esetö ttesehuarö pä'ö hue'inödo, pi̧jä̧ ttö̧ja̧ suronä jȩttö̧ unichi'ö. Ja̧'hua̧ta̧nö̧ ujuturu hue'inödo ja̧u̧ eseäcuähuä huȩnȩ jitähua pä'ö.

²⁰ Ja̧'hua̧nö̧ ja̧'a̧nä̧ Cristo hueä̧u̧ ji'äu ichinätöjä. Ja̧'hua̧ta̧nö̧ ujutu jitähuomenä, Dios ucuturu ucuocua'a jä̧'i̧nö̧'a̧nö̧ ja̧'a̧. Ja̧'hua̧nö̧ ja̧'a̧nä̧ Cristonä pä'ätöjä ucuturu, Diosrö esehuätucui ucutu'inä.

²¹ Cristomä yoröiso suronä jȩpo̧cö̧ pi̧nö̧. Juhuorö'inä ujuturu repe'ö, ya̧tȩ suronä jȩpö̧rö̧ jȩtta̧'a̧ jä̧'i̧nö̧'a̧nö̧ jȩpi̧nö̧do Dios Cristorö, ujutu tesetiyarö pä'ö. Ja̧'hua̧ta̧nö̧ ja̧u̧ru̧ esetö, Diosrö pä̧huä̧ rö̧jo̧mȩnä̧ adiunä tö̧ja̧cua̧ pä'ö jȩpi̧nö̧do.