2 Corintios 3 - TÄ̧DO Ä̧CUÄ̧ I̧HUȨNȨ

Jareö huȩnȩ esetö jȩä̧cuä̧huä̧ huȩnȩ

¹ Ja̧'hua̧nö̧ pätomenä: “Pä'äji ta'anö jitötä ttamönä adiu ucuocuätö” ¿ucutu pä'ätöjä tä̧ji̧? ¿Ujutumä cuyäru ujuturu adiu huȩyu̧cua̧'a̧ i'cächö tiyö'a̧nö̧ tä̧ji̧, ucuturu? Ja̧'hua̧ta̧nö̧ ¿ucutu'inä cuyäru ujuturu adiu huȩyu̧cua̧'a̧ cuiyätucu'a̧nö̧ tä̧ji̧, korotö jȩttö̧'a̧nö̧?

² Ja̧'hua̧nö̧mä̧cö̧. Ucuturu topö, yoröiso cuyäru pä'ocotöjä ujutumä. Ucutumä cuyäru tti̧huȩyu̧ta̧'a̧ jä̧'i̧nö̧'a̧nö̧ huotöjä ujuturu tami iso'quinä. O'ca toi'önä topö ttu̧huo̧jui̧'ä̧cua̧'a̧nö̧ ucuturu.

³ Iso päi'önä Cristo i̧huȩyu̧ta̧'a̧ jä̧'i̧nö̧'a̧nö̧ huotöjä. Ujutu i'cächö iyinätöjä ucuturu. Ja̧'hua̧ta̧nö̧ lápiz iso'quinä huȩyu̧cuo̧ca̧'a̧ jä̧'i̧nö̧'a̧nö̧ huotöjä. Espíritu Santo kö̧ jȩi̧nä̧u̧jä̧ ucutumä. Ja̧'hua̧ta̧nö̧ i̧nä̧bi̧nä̧ huȩyu̧cuo̧ca̧'a̧ jä̧'i̧nö̧'a̧nö̧ huotöjä. Ttö̧ja̧ ttami iso'quinä huȩyu̧cua̧'a̧ jä̧'i̧nö̧'a̧nö̧ huotöjä.

⁴ Iso päi'önä Diosrö esetö Cristonä ja̧'hua̧nö̧ huo̧juä̧tö̧jä̧ ucuturu.

⁵ Ujutu tamönä tujurunä yoröiso koro juäi jȩä̧cuä̧huä̧nä̧ juiyupätöjä. O'ca juiyönä jȩtö̧mä̧, Dios ppäda'attö jȩpä̧tö̧jä̧.

⁶ Ja̧u̧mä̧ jareö huȩnȩ iyö, ujuturu ppä'ädö ja̧u̧ huȩnȩ päö'a̧nö̧ jȩta̧ pä'ö. Ja̧u̧ jareö huȩnȩmä̧ huȩyu̧cuo̧ca̧'a̧do. Ja̧u̧mä̧ Espíritu Santottö ȩmä̧huä̧ ja̧'a̧do. Pi̧jä̧ hueähuä huȩnȩ ttö̧ja̧rö̧ cuä'ö icuähuä huȩnȩ. Ja̧'hua̧nö̧ ja̧'a̧nä̧'i̧nä̧ ja̧u̧ Espíritu Santo kä̧cuä̧huä̧ iyö.

^7-8 Täbocö Moisés hueähuä huȩnȩ i̧nä̧bi̧nä̧ huȩyu̧tu̧ ku̧ni̧nö̧do. Ja̧'hua̧nö̧ i̧huȩyu̧to̧mȩnä̧, rö̧ȩnä̧ tȩa̧hui̧na̧'a̧do mo̧ro̧jä̧ra̧'a̧ttö̧. Jahuätö Israel ttö̧ja̧ Moisés ö'änä tottö juiyönä ji̧na̧'a̧do tȩa̧u̧ kä̧dȩpa̧'a̧ttö̧. Ja̧'hua̧nö̧ ja̧'a̧nä̧ ja̧u̧ tȩa̧u̧mä̧ yoyonötä juiyächipina'ado. Ja̧'hua̧nö̧ ja̧'a̧nä̧'i̧nä̧ ja̧'hua̧nö̧ rö̧ȩnä̧ tȩa̧u̧nä̧ ja̧u̧ huȩnȩ, ttö̧ja̧rö̧ cuä'ö icuähuä huȩnȩ, i̧huȩyu̧ti̧nö̧ttö̧mä̧, iso päi'önä Espíritu Santo i'cächäcuähuä huȩnȩ esetö juhua'a yabo rö̧ȩnä̧ tteseu'a̧nö̧ ja̧'a̧.

⁹ Ja̧u̧nu̧mä̧ pi̧jä̧ hueähuä huȩnȩ, ttö̧ja̧rö̧ cuä'ö icuähuä huȩnȩ ȩmö̧, rö̧ȩnä̧ esehuinätödo. Ja̧'hua̧nö̧ ja̧'a̧ttö̧ iso päi'önä Dios ujutu suronä jȩtö̧ jȩpö̧ icu huȩnȩ esetö, ji̧nä̧ isocu tesehuäcua'a̧nö̧.

¹⁰ Iso päi'önä täbocö pi̧jä̧ hueähuä huȩnȩ, rö̧ȩnä̧ tesehuinö huȩnȩ, yoröiso adihuoca'a ja̧'a̧, jitämä adihuä huȩnȩ, ttö̧ja̧ suronä jȩttö̧ jȩpö̧ icuähuä huȩnȩ, amöcuädö.

¹¹ Ja̧'hua̧nö̧ ja̧'a̧ttö̧ ja̧u̧ täbo huȩnȩ, recuo ko̧cö̧ huȩnȩ, rö̧ȩnä̧ ttesehuinöttömä, iso päi'önä pi̧yȩ jareö huȩnȩ, 'cuäopönä kä̧cuȩ huȩnȩ, juhua'a yabonö rö̧ȩnä̧ teseu'a̧nö̧ ja̧'a̧.

¹² Iso päi'önä ujutumä ja̧u̧ tta̧tä̧ra̧'a̧ttö̧, yecuäcuähuä juiyönä ji'ähuätöjä.

¹³ Ujutumä Moisés jȩi̧nö̧ ta'anö jȩpo̧co̧tö̧jä̧. Ja̧u̧mä̧ i̧sä̧ta̧nä̧ ö'ä mö̧'ȩcui̧nö̧do, Israel ttö̧ja̧ tottö juiya pä'ö ja̧u̧ tȩa̧u̧ recuo ko̧ca̧'a̧ juiyächipomenä.

¹⁴ Jahuätömä yoröiso ä̧ju̧cuo̧co̧tö̧ pi̧nä̧tö̧do. Jitä mo̧ro̧ päi'önä, ja̧u̧ täbocö hueähuä huȩnȩ ttucuocuomenä, ja̧u̧ juäi i̧sä̧ta̧ ji̧nä̧ ra̧'a̧ jä̧'i̧nö̧'a̧nö̧ ja̧'a̧. Jitä'inä ttucuocumä yoröiso ä̧ju̧cuo̧co̧tö̧. Ja̧u̧ i̧sä̧ta̧ tto̧ȩcuä̧rä̧ta̧, ya̧tȩä̧tä̧ Cristotä jȩpö̧ icu.

¹⁵ Ja̧'hua̧nö̧ ja̧'a̧nä̧ jitä päi'önä Moisés i̧huȩyu̧ti̧nö̧ huȩnȩ ttucuocuomenä, jahuä̧ta̧ i̧sä̧ta̧ tto̧ȩcuä̧ra̧'a̧ttö̧, yoröiso ä̧ju̧cuo̧co̧tö̧.

¹⁶ Ja̧'hua̧nö̧ ja̧'a̧nä̧ ya̧tȩ Tu̧ru̧hua̧rö̧ esetomenä, ja̧u̧ i̧sä̧ta̧ yoröiso jȩpö̧ icudo Tu̧ru̧hua̧mä̧.

¹⁷ Ja̧'hua̧ta̧nö̧ Tu̧ru̧hua̧mä̧ Espíritu Santo päi'önä kö̧. Chutä Espíritu Santo ö̧jo̧mȩmä̧, adiunä kä̧cuä̧hua̧'a̧.

¹⁸ Ja̧'hua̧nö̧ ja̧'a̧ttö̧ jitämä ujutu jui'ätöjä ja̧u̧ i̧sä̧ta̧mä̧, tö'ä mö̧ȩcuä̧ri̧nä̧ta̧mä̧. Ujutu ttö'ä toäcuähuodä jä̧'i̧nö̧'a̧nö̧ huotöjä. Korotö ujuturu tottomenä, Tu̧ru̧hua̧ öadihuä topätö. Ja̧'hua̧ta̧nö̧ eseäcuähuä rö̧ȩnä̧ tu̧ju̧nä̧ra̧'a̧ttö̧, chutä jö̧ ta'anö pä'i'ätöjä. Ja̧'hua̧nö̧ jȩpö̧ Tu̧ru̧hua̧mä̧, Espíritu Santo ja̧'a̧nä̧.