2 Corintios 2 - TÄ̧DO Ä̧CUÄ̧ I̧HUȨNȨ

¹ Ja̧'hua̧nö̧ ja̧'a̧ttö̧ ttö chamönä pä'inösä: “Pä'äji ta'anö tta̧'cua̧ tta̧ttȩcu̧ juiyäcua'a̧nö̧, ji'äu 'cho̧cö̧sä̧ jitämä.”

² Ttö cua̧'cua̧ tta̧ päi'önä jidäuttumä, ¿dijä̧ttö̧ chesehua pä'ö ji̧ä̧huä̧cua̧? Ucututä, cua̧'cua̧ tta̧ päi'ä̧u̧tä̧ jicuhuähuätucuäcua'a̧nö̧.

³ Ja̧'hua̧nö̧ ja̧'a̧ttö̧ chi̧huȩyu̧ti̧nö̧ ta'anö, huȩyu̧ti̧nö̧sä̧ ucuturu. Cha̧'cua̧ tta̧dȩcua̧ pä'ö jidähua pä'ocö pi̧nö̧sä̧. Ucuturu amöcuädö cheseu'a̧nö̧ ja̧'a̧ pä'inösä. Ja̧'hua̧ta̧nö̧ huo̧jua̧sä̧, ttö chesehuomenä, ucutu'inä o'ca toi'önä cuesehuäcuotöjäcö̧ pä'inösä.

⁴ Ucuturu ja̧'hua̧nö̧ chi̧huȩyu̧to̧mȩnä̧, rö̧ȩnä̧ cha̧'cua̧ tta̧'ȩcu̧ a̧mö̧cuä̧ri̧nö̧sä̧ chajuähuipönä. Ucutu cua̧'cua̧ tta̧cu̧huȩcuä̧tu̧cua̧ pä'ö huȩyu̧to̧cö̧ pi̧nö̧sä̧. Iso päi'önä ucuturu rö̧ȩnä̧ repeda'a cu̧huo̧juä̧tu̧cua̧ pä'ö huȩyu̧ti̧nö̧sä̧.

Suronä jȩpä̧tö̧ ji'äu tticu huȩnȩ

⁵ Ja̧'hua̧nö̧ ja̧'a̧nä̧ ucututtu ya̧tȩ suronä jȩpi̧nö̧mä̧, ttötä cha̧'cua̧ tta̧dȩcua̧ pä'ö jȩpo̧cö̧ pi̧nö̧. Ucututtu yotöcunä'inä cua̧'cua̧ tta̧cu̧huȩcuä̧tu̧cua̧ pä'ö jȩpi̧nö̧do. Yotöcunä pä'ösä pärocua'a rö̧ȩnä̧ ro̧dȩpö̧ juiyarö pä'ö.

⁶ Ucutu ji̧nä̧ yo̧mȩtȩnä̧ ucuocu ja̧u̧ru̧, suronä jȩpi̧nö̧rö̧, täcö ro̧'ȩpi̧nä̧tö̧jä̧ adiunä.

⁷ Jitämä ro̧cu̧huȩpi̧nä̧tu̧cu̧ o'ca'a, jȩi̧nö̧mä̧ unichi'ätucui. Ja̧u̧ru̧ ppä'ädätucui, rö̧ȩnä̧ a̧'cua̧ tta̧'ȩcu̧ kä̧nö̧, juhua'a yabonö a̧'cua̧ tta̧'ȩcu̧ juiyäcua'a̧nö̧.

⁸ Ja̧'hua̧nö̧ ja̧'a̧nä̧ pä'ösä ucuturu, ja̧u̧ru̧ ppä'ädätucui pä'äji ta'anö, u̧huo̧juä̧cua̧'a̧nö̧ ja̧u̧ru̧ repecuhuätucua'a.

⁹ Pä'äjimä pi̧yȩ huȩnȩ amöcuädö huȩyu̧ti̧nö̧sä̧. Iso päi'önä ttö huedömä jȩpä̧tö̧cö̧ pä'ö chu̧huo̧jua̧ pä'inösä ucuturu.

^10-11 Jitämä ucutumä suronä jȩpö̧rö̧ cunichi'ätucuomenä, ttö'inä ja̧u̧ru̧ chu̧ni̧chi̧'ä̧cua̧sä̧. Ttö chunichi'ö kö̧ttö̧mä̧, Cristo ä'ca jo̧mȩttö̧ ucuturu amöcuädö unichi'inösä, Satanás suronä jȩa̧'a̧cu̧ ujuturu. O'ca toi'önä ujutu huo̧juä̧tö̧jä̧ ja̧u̧ jȩö̧mä̧.

Troas ötahuiyänä kä̧nö̧ Pablo esehuocö pi̧nö̧do

¹² Troas ötahuiyära̧'a̧ 'chä̧hui̧'ö̧, Cristo i̧huȩnȩ jidähua pä'ö, rö̧ȩnä̧ Tu̧ru̧hua̧ i̧huȩnȩ adicuä ji̧na̧'a̧do. Recuätö ttä̧ju̧cua̧ pä'inätödo.

¹³ Ja̧'hua̧nö̧ ja̧'a̧nä̧ yoröiso adiunä jo̧ca̧'a̧ ji̧na̧'a̧ chami iso'quinä, tö̧jä̧hua̧ Tito toepa'attö. Ja̧'hua̧nö̧ ja̧'a̧ttö̧ jahuätöttö rä'opächö, Macedonia rȩjȩra̧'a̧ 'chi̧nö̧sä̧.

Cristorö esetö adiunä cueächäcuähuä huȩnȩ

¹⁴ Diosrö tesehuäcuähuätucuaja. Ja̧u̧tä̧ Cristo Jesúsru teseta'attö, ȩpö̧ ujuturu o'ca juiyönä tujuruhua pä'ö. Ja̧'hua̧ta̧nö̧ koro juäi adiu ameu 'cö̧tta̧'a̧ jä̧'i̧nö̧'a̧nö̧, ä̧ju̧cuä̧tö̧ chutä i̧huȩnȩ, pa̧ja̧cu̧nä̧ jitähuomenä.

¹⁵ Cristo Diosrö adihuä juäi iyömä amehua'a jä̧'i̧nö̧'a̧nö̧ huotöjä ujutumä, Diosrö esetätö ttö̧'quȩtȩnä̧'i̧nä̧, Diosrö esetocotö ttö̧'quȩtȩnä̧'i̧nä̧.

¹⁶ Korotömä Diosrö esetocotörö, pi̧yȩ ameumä ttö̧ja̧rö̧ cuä'ö icuähuä jä̧'i̧nö̧'a̧nö̧ ja̧'a̧. Ja̧'hua̧ta̧nö̧ Diosrö esetätörö, ja̧u̧ ameumä tta̧'cua̧rö̧ iyähuä jä̧'i̧nö̧'a̧nö̧ ja̧'a̧. Ja̧'hua̧nö̧ ja̧'a̧ttö̧ ¿dijä̧ttö̧ rö̧ȩnä̧ huo̧jua̧, Dios aditähuä adita pä'ö?

¹⁷ Ujutumä Dios i̧huȩnȩ ji'äu kä̧nö̧, koro pä'ö ȩmo̧co̧tö̧jä̧ korotö recuätö jȩttö̧'a̧nö̧. Ujutu jueönä ta̧'cua̧ pö̧nö̧ ji'ähuätöjä Dios hue'ähuotö jittäu ta'anö. Ja̧'hua̧ta̧nö̧ Dios ä'ca jo̧mȩttö̧ ji'ähuätöjä Cristo umöhuäyotö jittäu ta'anö.