2 Corintios 10 - TÄ̧DO Ä̧CUÄ̧ I̧HUȨNȨ

Jesús huȩ'ä̧hua̧ Pablo jiähuinö huȩnȩ

¹ Ttö Pablo, ucuturu repe'önö Cristo adihuä juäi iyö amöcuädö pä'ösä. Korotö pä'ätö ttörö ucutucu chö̧jo̧mȩnä̧, jä̧rö̧nä̧tä̧ usurä i̧sa̧ ta'anö kö̧sä̧. Ja̧'hua̧ta̧nö̧ ucututtu oto kara'a chö̧jo̧mȩnä̧, pä̧i̧cu̧nä̧ ucuocu jȩpö̧sä̧ pä'ätö korotömä.

² Ja̧'hua̧ ja̧'a̧ttö̧ adihua'a. Ucuturu do'ächö chi̧'cho̧mȩnä̧, ttamönä ttamöcuädömä jȩpä̧tö̧ suronä ttucuocuomenä ujuturu, pä̧i̧cu̧nä̧ chucuocua pä'ö jȩcu̧'ä̧tu̧cuä̧'. Jahuätö pä'ätö ujutu tamönä tamöcuädö ucuocuätöjä pä'ö. Ja̧'hua̧nö̧ ttucuocuttumä, iso päi'önä pä̧i̧cu̧nä̧ chu̧cuo̧cuä̧cua̧sä̧ jahuätöcu pä̧nö̧.

³ Ujutumä pi̧jä̧ ttö̧ja̧ ta'anä, pi̧jä̧ ttö̧ja̧ ttörohuäu ta'anö, rohuähuocotöjä ujutumä.

⁴ Ujutumä pi̧jä̧nä̧ rohuäcuähuä juäicumä rohuähuocotöjä. Dios ujurunä rohuähuätöjä, o'ca juiyönä Dios aboiyotö ttujuru pi̧jä̧nä̧ ka̧cu̧ be'epäjipö ticua pä'ö.

⁵ Ja̧'hua̧nö̧ ja̧'a̧nä̧ Diosrö ttu̧huo̧ju̧ juiya pä'ö jȩä̧cuä̧huä̧, o'ca juiyönä suräjuä huȩnȩ'i̧nä̧, koro a'cuoyäunu jȩä̧cuä̧huä̧'i̧nä̧ be'epäjipö icuätöjä. O'ca juiyönä pi̧jä̧ttö̧ amöcuädäcuähuä'inä Cristorö ji'ähuätöjä churutä pä̧huä̧ rö̧jo̧mȩnä̧ tamöcuäda pä'ö.

⁶ Ja̧'hua̧ta̧nö̧ ucutu o'ca juiyönä pätö ta'anö jȩcu̧'ä̧tu̧cu̧ o'ca'a, korotö ja̧'hua̧nö̧ jȩpo̧co̧tö̧rö̧ tö̧tä̧bo̧tä̧cuo̧tö̧jä̧.

⁷ Ucutu huämenätä topätöjä. Iso päi'önä ya̧tȩ “Cristo a̧hua̧ru̧hua̧sä̧” päöttömä, ujutu'inä chutä ta'anö Cristo ahuaruhuäjä pä'ö u̧huo̧juä̧cua̧'a̧nö̧.

⁸ Ja̧'hua̧ta̧nö̧ Cristo ujuturu hueinö huȩnȩ rö̧ȩnä̧ chucuocuttumä, yoröiso dä'äcuocösä. Tu̧ru̧hua̧ ja̧'hua̧nö̧ hue'inö ujuturu, ppätäda pä'ö ucuturu, juhua'a yabonö rö̧ä̧chö̧nä̧ cuesetätucua pä'ö be'epäjipö ticua pä'ömäcö̧.

⁹ Ucuturu cuyäru chi̧huȩyu̧to̧mȩnä̧, yecuhuipätucua pä'ö huȩyu̧to̧cö̧sä̧.

¹⁰ Korotö pä'ätö ttörö: “Chutä cuyäru i̧huȩyu̧to̧mȩnä̧, pä̧i̧cu̧nä̧ jiähua'a cuyärunä. Juhuorö'inä chutä ö̧jo̧mȩnä̧, yoröiso ya̧tȩ jui̧yu̧pa̧ ö̧jö̧'a̧nö̧ kö̧. I̧huȩnȩ'i̧nä̧ adiunä ucuocuocö,” pä'ätö korotömä.

¹¹ Ja̧'hua̧nö̧ pä'ätö ttu̧huo̧juä̧cua̧'a̧nö̧do. Ujutu oto kä̧nö̧ ti̧huȩyu̧tu̧ ta'anö, ucuocu jȩtä̧cuo̧tö̧jä̧ ucutucu kä̧nö̧.

¹² Ujutumä korotö jitötä ttamönä adiu ucuocuätöcu yorätehuocotöjä. Jahuätömä “Korotöttö'inä abonänö adihuä isotöjä” pätta'anä, suripächätö ttucuocua'a jä̧'i̧nö̧'a̧nö̧ ucuocuätö. Ja̧'hua̧ta̧nö̧ “Korotöcu korotöcu'inä yorätehuätöjä” pätta'anä, yoröiso suripächätö ttucuocua'a jä̧'i̧nö̧'a̧nö̧ ucuocuätö.

¹³ Ja̧'hua̧ta̧nö̧ ujuturu hueocö ji̧nö̧mä̧, yoröiso ji'ähuocotöjä. Diostä ji'äu ujuturu taditäcuome. Ja̧u̧tä̧ hue'inö ujuturu cu̧ja̧cuä̧tu̧cuo̧mȩ Corinto ötahuiyära̧'a̧ ti̧'cha̧ pä'ö.

¹⁴ Ja̧'hua̧nö̧ ja̧'a̧ttö̧ ujuturu hueinöttö'inä i̧mi̧cu̧nä̧ jȩpo̧co̧tö̧ pi̧nä̧tö̧jä̧, ucuturu ji'äu ti̧'cho̧mȩnä̧. Ujutumä korotö tti̧'chä̧cua̧'a̧ ä'canä, ji'äu 'chi̧nä̧tö̧jä̧ adihuä Cristo i̧huȩnȩ ucuturu.

¹⁵ Ja̧'hua̧ta̧nö̧: “Ja̧u̧mä̧ ujutu taditähuä” pä'ocotöjä korotö ttaditömä. Pärocua'acu, tta̧'ä̧rä̧tö̧jä̧ ucutu juhua'a yabonö cuesetätucua pä'ö, ji̧nä̧ isocu Dios hueinö ta'anö tadita pä'ö ucutucu.

¹⁶ Ja̧u̧nu̧ o'ca'a, cu̧ja̧cuä̧tu̧cuo̧mȩttö̧ 'chä̧nö̧, juhua'a yabo ka̧cuä̧tö̧rö̧'i̧nä̧ ttö̧ja̧ suronä jȩttö̧ jȩpö̧ icu huȩnȩ jitähua pä'ätöjä. Juhuorö'inä korotö ttaditäjome, tadita pä'ocotöjä.

¹⁷ Ja̧'hua̧nö̧ ja̧'a̧ttö̧ ya̧tȩ chutä amönä “Adiu jȩpö̧sä̧” pä'äumä, “Chu̧ru̧hua̧tä̧ adiu jȩpö̧” päö'a̧nö̧ ja̧'a̧.

¹⁸ Ya̧tȩ o'ca toi'önä adiu ttucuocuäcumä, chutä amönä a'cuoyäunu ucuocuäcuähuocö. Iso päi'önä o'ca toi'önä adiu ttucuocuäcumä, Tu̧ru̧hua̧tä̧ adiu ucuocu ja̧u̧ru̧.