2 Corintios 1 - TÄ̧DO Ä̧CUÄ̧ I̧HUȨNȨ

Pablo huȩyu̧tu̧ hue'inö Corinto ötahuiyä ttö̧ja̧rö̧

¹ Ttö Pablo, Diosrö pä̧huä̧ rö̧jo̧mȩnä̧, Jesucristo huȩ'ä̧hua̧sä̧. Ji̧nä̧ yo̧mȩtȩnä̧ chö̧jä̧hua̧ Timoteocu, huȩyu̧tu̧sä̧ pojä cuyäru isojänä chö̧jä̧hua̧tö̧rö̧, Dios i̧huȩnȩ esetätörö, Corinto ötahuiyänä ka̧cuä̧tö̧rö̧. Ja̧'hua̧ta̧nö̧ huȩyu̧tu̧sä̧ o'ca toi'önä Dios i̧tti̧mö̧rö̧ Acaya rȩjȩnä̧ ka̧cuä̧tö̧rö̧.

² Tä'o Dios'inä, Tu̧ru̧hua̧ Jesucristo'inä ucuturu adiu ppättädäcua'a̧nö̧. Ja̧'hua̧ta̧nö̧ adiu kä̧cuä̧huä̧'i̧nä̧ ucuturu ttiyäcua'a̧nö̧.

Pablo ubara ttuhuinö huȩnȩ

³ Tu̧ru̧hua̧ Jesucristo Jä'o Diosrö esehuätöjä. Ja̧u̧tä̧ Tä'omä re rö̧jö̧nä̧ topö ujuturu. Ja̧'hua̧ta̧nö̧ ja̧u̧tä̧ 'cuäopönä ppä'ädö ujuturu.

⁴ Ujutumä ubara ttutomenä, Dios ujuturu ppä'ädö, ujutu'inä, korotö ubara ttuttomenä, ppätäda pä'ö Diosmä ujuturu ppädinö ta'anö.

⁵ Cristorö esetö, rö̧ȩnä̧ ubara ttuta'attö, chutä Cristo'inä rö̧ȩnä̧ ppä'ädö ujuturu.

⁶ Ja̧'hua̧nö̧ ja̧'a̧ttö̧ ujutumä ubara ttututtumä, ucuturu ppä'ädö ttu'ätöjä, cuesetätucuäcua'a̧nö̧. Ja̧'hua̧ta̧nö̧ Dios ujuturu ppädöttömä, ucuturu'inä ppä'ädö, cuesetätucuäcua'a̧nö̧. Ja̧'hua̧nö̧ adiunä cuami 'qui'ächi'ö ubara ttucuhuätucuäcua'a̧nö̧, ujutu ubara ttutu ta'anö.

⁷ Iso päi'önä adiu esehuätöjä ucuturu. Ujutu huo̧juä̧tö̧jä̧ ja̧'hua̧nö̧ ubara ttucuhuätucuomenä, ja̧'hua̧ta̧nö̧ Dios ucuturu ppä'ädö pä'ö.

⁸ Chö̧jä̧hua̧tö̧, cu̧huo̧juä̧tu̧cua̧ pä'ätöjä ujuturu suronä 'cuäopinömä Asia rȩjȩnä̧ tö̧ja̧cuo̧mȩnä̧. Ja̧'hua̧nö̧ rö̧ȩnä̧ suronä 'cuäopa'anä, tujuru'inä jui'inätöjä. Tami 'quitächi'ö juiyönä päi'inä̧u̧jä̧. Täcö 'corupäti'äcuotöjäcö̧ pä'ö amöcuädinätöjä.

⁹ Korotö suronä jȩpä̧tö̧rö̧, ruhuotö cuä'ö tticuäcua'a ä'canä ttamöcuäda'a jä̧'i̧nö̧'a̧nö̧ amöcuädinätöjä. Ja̧'hua̧nö̧ 'cuäopina'ado, ujuturu juhua'a yabonö teseta pä'ö Diosrö, 'corupä'i'ätörö tto'ädörö. Ja̧'hua̧ta̧nö̧ ujutu tamönä tujurunä tesetö juiya pä'ö 'cuäopina'ado.

¹⁰ Ja̧u̧nu̧mä̧ Dios ppä'ädinö ujuturu 'corupäti'ö juiya pä'ö. Ja̧'hua̧ta̧nö̧ 'cuäopönä ppä'ädö ja̧'hua̧nö̧mä̧. Ja̧u̧ru̧tä̧ eseunu amöcuädätöjä 'cuäopönä tta̧huä̧ra̧ pä'ö ujuturu.

¹¹ Ja̧'hua̧nö̧ ja̧'a̧ttö̧ ucutu'inä Diosrö cucuocuätucuaja ujuturu. Ja̧'hua̧ta̧nö̧ recuätö Diosrö ttucuocuomenä, Dios ujuturu ppäda'a topö, recuätö ttesehuäcuotö Diosrö.

Pablo Corinto ötahuiyära̧'a̧ i̧'cha̧ päa'anä, i̧'chö̧ juiyönä ji̧nä̧cu̧do

¹² Pi̧yȩ amöcuädö esehuätöjä. Ujutu tami iso'quinä tamöcuädomenä, huo̧juä̧tö̧jä̧ iso päi'önä adiunä ta̧'cua̧ pö̧nö̧ cue'ächätöjä pi̧jä̧nä̧ ucutu cuä'catucu jo̧mȩttö̧. Diostä ujuturu repe'ö ppä'ädinö ja̧'hua̧nö̧ cuetächa pä'ö. Ujutu tamönä tamöcuädönä ja̧'hua̧nö̧mä̧ cue'ächocotöjä.

¹³ Ujutumä ucuturu ti̧huȩyu̧to̧mȩnä̧, topö cu̧huo̧jui̧'ä̧tu̧cuä̧cuȩtä̧ huȩyu̧tä̧tö̧jä̧, koro tamöcuädoca'attö. Ja̧'hua̧nö̧ ja̧'a̧ttö̧ adiu topö cu̧huo̧jui̧'ä̧tu̧cua̧ pä'ätöjä.

¹⁴ Iso päi'önä täcö koromä huo̧juä̧tö̧jä̧. Tu̧ru̧hua̧ Jesucristo ichomenä, ujuturu eseunu tocu'ätucuäcua'a̧nö̧. Ja̧'hua̧ta̧nö̧ ujutu'inä eseunu totäcua'a̧nö̧ ucuturu.

¹⁵ Ja̧'hua̧nö̧ amöcuädö, ä'canä ucuturu todärenä dodächa pä'ö amöcuädinösä cuesehuätucua pä'ö.

¹⁶ Äcuomenä Macedonia rȩjȩra̧'a̧ 'chä̧nö̧, ucuturu dodächa pä'inösä. Ja̧'hua̧ta̧nö̧ Macedonia rȩjȩttö̧ i̧u̧, pä'äji ta'anö ucuturu dodächa pä'ö amöcuädinösä. Ja̧'hua̧nö̧ do'ächö 'chä̧nö̧: “Jahuätömä ttörö ppättädäcua'a̧nö̧ Judea rȩjȩra̧'a̧ chi̧'cho̧mȩnä̧” pä'inösä.

¹⁷ Ja̧'hua̧nö̧ chamöcuädomenä, ¿adiunä amöcuädocö pi̧nö̧sä̧ tä̧ji̧? ¿Korotömä pi̧jä̧ jähuä amöcuädätö todärenä pättö'a̧nö̧ pä'ösä ttö'inä pä'ö amöcuädätöjä tä̧ji̧?

¹⁸ Diosmä ujuturu huo̧jua̧. Ja̧'hua̧nö̧mä̧ todärenä pä'ocotöjä ucuturu.

¹⁹ Iso päi'önä Silvanocu, Timoteocu, ttöcu ucuturu i̧huȩnȩ jitähuäcu, Cristo Jesús, Dios I̧tti̧mä̧ yoröiso todärenä ji'ähuocö pi̧nö̧. Cristomä 'cuäopönä iso päi'önä huȩnȩtä̧ ji'äu.

²⁰ Chutä o'ca juiyönä Dios päömä jȩpö̧. Ja̧'hua̧nö̧ ja̧'a̧ttö̧ Diosrö eseunu tucuocuomenä, Cristo Jesús i̧mi̧nä̧ “Amén” pä'ätöjä.

²¹ Ja̧'hua̧ta̧nö̧ Dios ujuturu'inä, ucuturu'inä Cristorö esetö tami 'qui'ächi'ö tö̧ja̧cua̧ pä'ö ppä'ädö. Ja̧'hua̧ta̧nö̧ ja̧u̧tä̧ ujuturu aditö icuinödo.

²² Ja̧u̧mä̧ ujuturu hue'inödo i̧tti̧mö̧ päti'a pä'ö. Ja̧'hua̧ta̧nö̧ iyinödo Espíritu Santorö tami iso'quinä. Ja̧'hua̧nö̧ jȩpö̧ huo̧juä̧tö̧jä̧, iso päi'önä iyömä tȩmä̧cuo̧tö̧jä̧.

²³ Ttömä Dios ä'ca jo̧mȩttö̧ ji'äusä jitämä. Ttö chamöcuädinömä ji̧nä̧ ichocö päjisä Corinto ötahuiyära̧'a̧ ucuturu ji'äu, cua̧'cua̧ tta̧'ȩcu̧ cu̧ja̧cuä̧tu̧cu̧ juiya pä'ö. Ja̧'hua̧nö̧ yapareu jidäuttumä, 'corupädi'ö'a̧nö̧ ja̧'a̧.

²⁴ Üjutu ji'äu hue'ocotöjä ucutu cuesetätucumä. Täcö cuami 'qui'ächi'ö esetätöjä. Ja̧'hua̧nö̧ ja̧'a̧ttö̧ juhua'a yabonö cuesehuätucua pä'ö, ppätäda pä'ätöjä.