1 Timoteo 6 - TÄ̧DO Ä̧CUÄ̧ I̧HUȨNȨ

Korotöcu aditätö jȩttö̧ huȩnȩ

¹ Korotöcu aditätömä ttu̧ru̧hua̧rö̧ adiu ttucuotäcua'a̧nö̧. Ja̧'hua̧nö̧ ttucuotomenä, korotö Diosrö suronä ucuocuocotö. Ja̧'hua̧ta̧nö̧ ujutu tu̧huo̧juȩtö̧ huȩnȩ'i̧nä̧ suronä ucuocuocotö.

² Ja̧'hua̧ta̧nö̧ korotö ttu̧ru̧hua̧mä̧ Diosrö esetöcu ttaditomenä, ja̧u̧mä̧ tö̧jä̧hua̧ ja̧'a̧ttö̧, adiu tucuotococu pättö juiyö'a̧nö̧ ja̧'a̧. Pärocua'acu, ji̧nä̧ isocu adiu ttaditö'a̧nö̧ ja̧'a̧ ja̧u̧cu̧. Ja̧'hua̧nö̧ adiu ttaditomenä, adiu ppä'ädätö ttu̧ru̧hua̧ Diosrö esetörö, Dios repeäcuru. Ja̧'hua̧nö̧ hue'ö huo̧juȩti̧.

Koro huȩnȩmä̧ cuesetä'

^3-4 Ya̧tȩ koro huȩnȩ, adihuä huȩnȩ, Tu̧ru̧hua̧ Jesucristo i̧huȩnȩ, ujutu tu̧huo̧juȩtö̧ huȩnȩttö̧'i̧nä̧ i̧mi̧cu̧nä̧ jiäuttumä, jerupö a'cuoyäunu ji'äu. Rohuä huȩnȩtä̧ ucuocuäcuähuä kö̧'ca̧. Ja̧u̧ huȩnȩttö̧ räopa'a a'cuoyähuäcuähuä'inä, curä huȩnȩ'i̧nä̧, ttahuaruhuärö suronä ucuocuäcuähuä'inä, suronä amöcuädäcuähuä'inä.

⁵ Ja̧'hua̧ta̧nö̧ u̧mä̧tö̧ rohuähuätö korotö u̧mä̧tö̧cu̧. Jahuätömä yoröiso adiu amöcuädocotö. Iso päi'önä huȩnȩ päö'a̧nö̧ jȩpo̧co̧tö̧. Jahuätö amöcuädätö järe ȩmä̧huä̧ huȩnȩcö̧ pä'ö Dios i̧huȩnȩmä̧. Jahuätöttö 'quȩ'i̧pä̧chi̧.

⁶ Iso päi'önä Dios i̧huȩnȩ rö̧ȩnä̧ micuähua'a, ujutu tu̧ju̧nä̧rö̧ eseunu tamöcuädomenä.

⁷ Pi̧jä̧nä̧ uhuäpächömä, yoröiso i'cächocotö pi̧nä̧tö̧jä̧. Ja̧'hua̧ta̧nö̧ ujutu pi̧jä̧ttö̧mä̧, yoröiso ȩpo̧co̧tö̧jä̧.

⁸ Ujutu tu̧cuȩ'i̧nä̧, tö̧'ca̧tä̧huä̧ti̧yu̧'i̧nä̧ tu̧ju̧nä̧ro̧mȩnä̧, teseu'a̧nö̧ ja̧'a̧.

⁹ Iso päi'önä yotöte järe rö̧ȩnä̧ amöcuädätömä, Diosrö ttamöcuädoca'attö, suronä jȩpä̧tö̧. Jitötä ttamönä jähuä amöcuädö jȩpä̧tö̧. Ja̧'hua̧nö̧ jȩpö̧ kä̧nö̧, ttamönä be'ipächätö.

¹⁰ Pärätänätä tta̧'cua̧ huȩnä̧rä̧cuä̧huä̧nä̧, ja̧u̧ surojö kada'ca. Korotömä pärätä rö̧ȩnä̧ ttu̧ju̧nä̧ra̧ pä'ö, jaropi'inätö adihuä huȩnȩ. Ja̧'hua̧nö̧ ja̧'a̧ttö̧ rö̧ȩnä̧ ubara ttu'ätö.

Adiu ji'ähui röji mo̧ro̧ päi'önä

¹¹ Ja̧'hua̧nö̧ ja̧'a̧nä̧ ucu Dios huȩ'ä̧hua̧jä̧. Ja̧u̧ juäi surojöttö tö'ipächi. Adihuä juäitä jȩpö̧ kä̧hui̧. Diosrötä eseunu ucuocui. Adiu eseti. Cuahuaruhuärö repe'i. Cuami 'qui'ächi'ö kä̧hui̧. Korotörö adiu amöcuädö kä̧hui̧.

¹² Adihuä juäi huȩnȩ ji'äu, surojöcu rohuäu kä̧hui̧. Kä̧cuä̧huä̧ i'co cu̧ju̧nä̧ra̧ pä'ö adiu amöcuädi. Dios ja̧'hua̧nö̧ cu̧ja̧ pä'ö ȩmi̧nä̧cu̧jä̧ recuätö ttä'ca jo̧mȩttö̧ esetö jicuhuähuomenä.

¹³ Jitämä Dios, o'ca toi'önärö tta̧'cua̧rö̧ iyähuä i̧sa̧ ä'ca jo̧mȩttö̧, Tu̧ru̧hua̧ Jesucristo, Poncio Pilatorö adihuä i̧huȩnȩ ji'ähuinö ä'ca jo̧mȩttö̧, ucuru hue'ösä.

¹⁴ Ttö huedömä o'ca juiyönä jȩpi̧, koro huȩnȩ jȩcu̧'o̧ca̧'a̧. Tu̧ru̧hua̧ Jesucristo ichome jubö päi'önä adiu jȩpö̧ kä̧hui̧, suronä ttucuocua'acu.

¹⁵ Chutä Cristomä Diosrö pä̧huä̧ rö̧jo̧mȩnä̧ i̧chä̧cua̧. Dios chu ä̧cua̧tä̧ adihuä i̧sa̧mä̧, o'ca juiyönä ju̧ru̧hua̧mä̧. Chutä o'ca toi'önä Ttu̧ru̧hua̧do.

¹⁶ Chutämä yoröiso hua'ocödo. Adiu tȩa̧u̧nä̧ kö̧ pi̧jä̧ ttö̧ja̧ tti̧rȩbȩhuo̧co̧mȩ. Pi̧jä̧ ttö̧ja̧ yoröiso topäcuähuocö pä'äji'inä, jitä'inä ja̧u̧ru̧. 'Cuäopönä ttucuotäcua'a̧nö̧. Ja̧'hua̧ta̧nö̧ 'cuäopönä ujuruhuäcua'a̧nö̧. Amén.

¹⁷ Ji'ähui järe ruhuotörö, pi̧jä̧nä̧ ka̧cuä̧tö̧rö̧, usurä isotörö, suronä huottäcuäu juiyäcua'a̧nö̧. Ja̧'hua̧ta̧nö̧ ji'ähuitö ttöärenätä tta̧'cua̧ ttu̧huȩnä̧rö̧ juiyäcua'a̧nö̧. Ttöäremä yoröiso 'quiyocö. Pärocua'acu Dios kö̧rö̧, o'ca juiyönä tu̧ju̧nä̧ra̧ pä'ö repeähuä juiyönä iyörö, tta̧'cua̧ ttu̧huȩnä̧ra̧ ji'ähuitö.

¹⁸ Ya̧tȩ järe ru̧hua̧ rö̧ȩnä̧ u̧ju̧nä̧ra̧'a̧ jä̧'i̧nö̧'a̧nö̧, rö̧ȩnä̧ adihuä juäi ttu̧ju̧nä̧rä̧cua̧'a̧nö̧, adiunätä jȩtta̧ pä'ö ji'ähuitö. Ttöäre'inä korotö jui'ätörö ttiya pä'ö ji'ähuitö.

¹⁹ Ja̧'hua̧nö̧ jȩtto̧mȩnä̧, yodoji adihuä juäi ttu̧ju̧nä̧ra̧ pä'ö jȩpä̧tö̧. Ja̧'hua̧ta̧nö̧ kä̧cuä̧huä̧ i'co'inä ttu̧ju̧nä̧rä̧cuo̧tö̧.

Timoteorö röjinä jiähuinö huȩnȩ

²⁰ Ucu Timoteo, ucuru jidähuäjimä adiu tta̧'ä̧rä̧cuä̧hui̧. Pi̧jä̧ jähuä amönä ttucuocu huȩnȩ cuesetä'. Pi̧jä̧ jähuä yapareu huo̧juä̧huä̧ cuesetä'.

²¹ Korotömä pi̧jä̧ jähuä yapareu huo̧juä̧huä̧ tteseta'attö, jaropi'inätö adihuä huȩnȩ. Dios ucuru adiu ppädäcua'a̧nö̧. Amén.