1 Timoteo 3 - TÄ̧DO Ä̧CUÄ̧ I̧HUȨNȨ

Iglesia ruhuärö tta̧huä̧rä̧cuä̧huä̧ i̧sa̧ ö̧jö̧ huȩnȩ

¹ Pi̧yȩ iso päi'önä huȩnȩ. Ya̧tȩ iglesia ruhuärö tta̧huä̧rä̧cuä̧huä̧ i̧sa̧ ö̧ja̧ pä'ömä, iso päi'önä adiu amöcuädö.

² Ja̧'hua̧nö̧ ja̧'a̧ttö̧ tta̧huä̧rä̧cuä̧huä̧ i̧sa̧ päi'önä kö̧mä̧ korotö suronä ttucuocu juiyarö pä'ö adiunätä jȩpö̧ ö̧jä̧cua̧'a̧nö̧. Irecua'inä yajuterötä u̧ju̧nä̧rä̧cua̧'a̧nö̧. Ja̧u̧mä̧ a̧'cua̧ pö̧nö̧ ö̧jä̧cua̧'a̧nö̧. Ja̧u̧mä̧ korotö ttä'ca jo̧mȩ adiu ö̧jä̧cua̧'a̧nö̧. Korotö'inä ja̧u̧ru̧ ttucuotäcua'a̧nö̧. Ja̧'hua̧ta̧nö̧ koromettö ichätörö ppädäcua'a̧nö̧. Ja̧'hua̧ta̧nö̧ ahuaruhuärö huo̧juȩtä̧cuä̧huä̧ u̧huo̧juä̧cua̧'a̧nö̧.

³ Ja̧u̧mä̧ tä̧'ä̧mo̧cö̧. Ja̧u̧mä̧ ahuaruhuäcu rohuähuocö. Ja̧u̧mä̧ pärätä yapareu ucuocu ȩmo̧cö̧. Pärocua'acu ahuaruhuärö adiu ppä'ädö. Adiu kö̧ korotö ttä'ca jo̧mȩ. Ja̧u̧mä̧ pärätä u̧ju̧nä̧ra̧ pä'ömä amöcuädocö.

⁴ I̧tti̧mö̧rö̧'i̧nä̧, ahuaruhuärö'inä adiu hue'ö. I̧tti̧mö̧mä̧ o'ca juiyönä hueö jȩpä̧tö̧. Ja̧'hua̧ta̧nö̧ i̧tti̧mö̧ ucuotönö repe'ätö ja̧u̧ru̧.

⁵ Ja̧u̧mä̧ i̧tti̧mö̧rö̧'i̧nä̧, ahuaruhuärö'inä tta̧huä̧rä̧cuä̧huä̧nä̧ ieruttumä, ¿tta̧'a̧nö̧ tta̧huä̧rä̧cua̧'a̧jä̧ttö̧ Diosrö esetätörö?

⁶ Jareönä esetömä tta̧huä̧rä̧cuä̧huä̧ i̧sa̧ päi'önä ko̧cö̧. Ja̧'hua̧nö̧ jareönä esetö ö̧jö̧ttö̧mä̧, korotöttö'inä abonänö huo̧jua̧sä̧ pä'ö amöcuädäu'a̧nö̧ ja̧'a̧. Ja̧'hua̧nö̧ jȩpö̧ amöcuädöttömä, Dios ähuettärö ö̧tä̧bo̧ti̧nö̧ ta'anö, ö̧tä̧bo̧tä̧cua̧ ja̧u̧ru̧.

⁷ Ja̧'hua̧ta̧nö̧ Diosrö esetocotö ttä'ca jo̧mȩ adiu ö̧jä̧cua̧'a̧nö̧, suronä ttucuocu juiyarö pä'ö, ähuettä'inä suronä jȩö̧ juiyarö pä'ö.

Diáconos huotö ttö̧jö̧ huȩnȩ

⁸ Ja̧'hua̧ta̧nö̧ diáconos huotörö'inä ttucuotäcua'a̧nö̧. Yapareu ucuocuocotö. Jahuätömä tä̧'ä̧mo̧co̧tö̧. Jahuätömä pärätä rö̧ȩnä̧ amöcuädö ko̧co̧tö̧.

⁹ Dios i̧huȩnȩ, ujutu tesetö huȩnȩ, adiu amöcuädö esetätö. Ja̧'hua̧ta̧nö̧ o'ca juiyönä adiu amöcuädö jȩpä̧tö̧.

¹⁰ Ä'canä ka̧cuä̧mö̧ topätucuitö. Ja̧'hua̧nö̧ ka̧cuä̧mö̧ tocu'ätucuomenä, adiu ttö̧jö̧ttö̧mä̧, diáconos huotö päi'önä ttö̧ja̧cua̧ hue'ätucuitö.

¹¹ Ja̧'hua̧ta̧nö̧ korotömä diáconos huotö ttirecuarö ttucuotäcua'a̧nö̧. Diáconos huotö ttirecua amönä yapareu huȩnȩ ji'ähuä'chocotö. Jahuätömä tta̧'cua̧ pö̧nö̧ ka̧cuä̧tö̧. O'ca juiyönä adiu jȩpä̧tö̧.

¹² Ja̧'hua̧ta̧nö̧ diácono hua̧ irecua'inä yajuterötä u̧ju̧nä̧rä̧cua̧'a̧nö̧. I̧tti̧mö̧rö̧'i̧nä̧, ahuaruhuärö'inä adiu hue'ö.

¹³ Iso päi'önä diáconos huotö adiu jȩtto̧mȩnä̧, o'ca toi'önä ucuotätö jahuätörö. Ja̧'hua̧ta̧nö̧ Cristo Jesúsru esetäcuähuä huȩnȩ yecuäcuähuä juiyönä ttucuocuomenä, o'ca toi'önä ä̧ju̧cuä̧tö̧ ttucuocumä.

Dios i̧huȩnȩ jittäu huȩnȩ

¹⁴ Ucuru topö chicha päda'anä, cuyäru'tä huȩyu̧tu̧ hue'ösä jitämä.

¹⁵ Jurunänö chichö juiyöttömä, Dios i̧tti̧mö̧ kä̧cuä̧huä̧ cu̧huo̧jua̧ pä'ö huȩyu̧tu̧sä̧. Jahuätömä, Dios i̧tti̧mö̧mä̧, Dios kö̧rö̧ esetätö. Jahuätömä adihuä huȩnȩ esetö tta̧'ä̧rä̧tö̧.

¹⁶ Iso päi'önä ujutu huo̧juä̧tö̧jä̧ Dios i̧huȩnȩ, pä'äji ttieruhuinö huȩnȩ, iso päi'önä adihuä huȩnȩ ja̧'a̧. Dios pi̧jä̧ra̧'a̧ ichinödo ujutu jö̧ ta'anö hua̧. Espíritu Santo i̧jȩcui̧nä̧cu̧do adihuä i̧sa̧ ja̧'a̧ttö̧. Angeles topinätödo ja̧u̧ru̧. O'ca toi'önä pa̧ja̧cuä̧chö̧nä̧ ä̧ju̧cui̧nä̧tö̧do ja̧u̧ru̧. Pi̧jä̧ pa̧ja̧cu̧nä̧ esetinätödo ja̧u̧ru̧. Mo̧ro̧jä̧ra̧'a̧ cä'ecuächinödo.