1 Timoteo 2 - TÄ̧DO Ä̧CUÄ̧ I̧HUȨNȨ

Diosrö ucuocuäcuähuä jiähuinö huȩnȩ

¹ Äcuomenä pä'ösä ucuru: O'ca toi'önärö jä'epö ttucuocu'a̧nö̧ ja̧'a̧ Diosrö. Ja̧'hua̧ta̧nö̧ Diosrö eseunu ttucuocu'a̧nö̧ ja̧'a̧ ppädäji amöcuädö.

² Ja̧'hua̧ta̧nö̧ ruhuotörö'inä, ttippeyä ruhuotörö'inä Diosrö ttucuocu'a̧nö̧ ja̧'a̧, Diosrö esetö kä̧nö̧, adiu eseunu tö̧ja̧cuä̧cua̧'a̧nö̧. Ja̧'hua̧ta̧nö̧ o'ca juiyönä surojö juiyönä tö̧ja̧cuä̧cua̧'a̧nö̧.

³ Ja̧'hua̧nö̧ adiu jȩä̧cuä̧huä̧. Ja̧'hua̧nö̧ jȩto̧mȩnä̧, Tu̧ru̧hua̧ Dios eseu ujuturu.

⁴ Chutä Dios pä̧huä̧ rö̧jä̧cu̧ o'ca toi'önä ttö̧ja̧ ttesetarö pä'ö. Ja̧'hua̧ta̧nö̧ pä̧huä̧ rö̧jä̧cu̧ iso päi'önä huȩnȩ ttu̧huo̧jua̧ pä'ö.

⁵ Ya̧tȩtä̧ kö̧ Dios. Ja̧'hua̧ta̧nö̧ ya̧tȩtä̧ Dios ä'ca jo̧mȩttö̧ pi̧jä̧ ttö̧ja̧ ttucuocuomenä ji'äu. Ja̧u̧ ubomä Jesucristo.

⁶ Jesucristo iyähuinödo cuä'ö tticuarö pä'ö, o'ca toi'önä pi̧jä̧ ttö̧ja̧ suronä jȩttö̧ mitäu. Ja̧'hua̧nö̧ 'corupä'i'inö Diosrö pä̧huä̧ rö̧jo̧mȩnä̧, o'ca toi'önä topö ttu̧huo̧jua̧ pä'ö.

⁷ Ja̧u̧ huȩnȩ jiäcuähuä i̧sa̧ päi'önä huȩ'ä̧hua̧sä̧. Diosrö esetäcuähuä huȩnȩ'i̧nä̧, iso päi'önä huȩnȩ'i̧nä̧ chu̧huo̧juȩta̧ pä'ö judíos huocotörö huȩ'ä̧hua̧sä̧. Cristorö cheseta'attö, iso päi'önä ji'äusä. Yapareumä ji'ähuocösä.

⁸ Ja̧'hua̧nö̧ ja̧'a̧ttö̧ u̧mä̧tö̧ ttidepiyu pa̧ja̧cu̧nä̧ ttami iso'quinä surojö juiyönä ttu̧mö̧ cä'epö, Diosrö ttucuocua pä'ösä. Ja̧'hua̧ta̧nö̧ ttahuaruhuärö ra̧huä̧rä̧cuä̧huä̧ juiyönä'inä, amönä rohuäcuähuä huȩnȩ ucuocuäcuähuä juiyönä'inä ttucuocu'a̧nö̧ ja̧'a̧.

⁹ Nä̧tö̧'i̧nä̧ ttö̧'ca̧tä̧huä̧ta̧ adiunänö jä̧ta̧, tta̧'cua̧ eseunu ttö̧'ca̧tä̧hua̧ pä'ösä. Ttuhuo'che hui'äu'inä, orottö adicuä ttä̧ja̧ jähuä'inä, räu rö̧ȩnä̧ huȩnä̧rä̧cuä̧huä̧'i̧nä̧, ttö̧'ca̧tä̧huä̧ta̧ rö̧ȩnä̧ micuäu'inä ttamöcuädö juiyäcua'a̧nö̧.

¹⁰ Pärocua'acu nä̧tö̧'i̧nä̧ Diosrö esetätö jȩttö̧'a̧nö̧ adiunätä jȩttä̧cua̧'a̧nö̧.

¹¹ Ja̧'hua̧ta̧nö̧ nä̧tö̧mä̧ ucuotönö 'corunätä ttu̧huo̧jui̧'ä̧cua̧'a̧nö̧.

¹² U̧mä̧tö̧ ttö̧ja̧cuo̧mȩ nä̧tö̧ ttu̧huo̧juȩta̧ pä'ö hue'ocösä. Ja̧'hua̧ta̧nö̧ nä̧tö̧ u̧mä̧tö̧ttö̧'i̧nä̧ abonänö ttu̧huo̧juȩta̧ pä'ö, hue'ocösä. 'Corunätä ttö̧ja̧cuä̧cua̧'a̧nö̧.

¹³ Dios äcuomenä aditinö Adánrö. Ja̧u̧nu̧ o'ca'a Evarö'inä aditinö.

¹⁴ Ja̧'hua̧ta̧nö̧ ähuettä Adánrö yapareu ji'ähuocö pi̧nö̧. Isajurutä yapareu ji'ähuinö. Jahuäju ähuettä hueö keseta'attö, suronä jȩpi̧nä̧ju̧.

¹⁵ Ja̧'hua̧nö̧ ja̧'a̧nä̧ nä̧tö̧ adiu esetö, ttahuaruhuärö repe'ö, adiu jȩpö̧ ttamöcuädomenä, tti̧tti̧mö̧rö̧ ttuhuäbecuomenä, Dios suronä jȩttö̧ jȩpö̧ i̧cuä̧cua̧ jahuätörö.