1 Tesalonicenses 5 - TÄ̧DO Ä̧CUÄ̧ I̧HUȨNȨ

Tu̧ru̧hua̧ ichä̧cuȩ tta̧huä̧rä̧cuä̧huä̧ huȩnȩ

¹ Tö̧jä̧hua̧tö̧, ucuturu huȩyu̧tu̧ hue'ocotöjä, du'huo ä'canä päi'äcua'a pä'ömä, a̧'ȩ ä'canä päi'äcua'a pä'ömä.

² Ucutu täcö adiu huo̧juä̧tö̧jä̧, Tu̧ru̧hua̧ ichä̧cuȩ mo̧ro̧mä̧, nä̧u̧cuä̧rä̧cuä̧huä̧ i̧sa̧ yodo ichö'a̧nö̧, tta̧ttä̧ro̧cö̧ mo̧ro̧ i̧chä̧cua̧.

³ Ttö̧ja̧ pättomenä: “Jitämä o'ca juiyönä adihua'a, ra̧huȩpi̧jo̧ca̧'a̧”, jahuätörö ra̧huȩpi̧jö̧ ichäcua'a, isaju muchajuru kumodu kieruhua'anä barahuächi'a'a jä̧'i̧nö̧'a̧nö̧. Ja̧u̧ ra̧huȩpi̧jö̧ttö̧ ki̧'o̧co̧tö̧ ttäcuotö.

⁴ Ja̧'hua̧nö̧ ja̧'a̧nä̧ tö̧jä̧hua̧tö̧, yo̧ö̧nä̧ ko̧co̧tö̧jä̧. Ja̧'hua̧nö̧ ja̧'a̧ ji̧yȩnö̧ mo̧ro̧ päi'omenä, ucuturu ichocö jä̧cuȩ nä̧u̧cuä̧rä̧cuä̧huä̧ i̧sa̧ ichö'a̧nö̧mä̧.

⁵ Ucutumä o'ca toi'önä tȩa̧u̧ i̧tti̧mö̧jä̧, mo̧ro̧ i̧tti̧mö̧jä̧. Ujutumä yodo i̧tti̧mö̧mä̧cö̧jä̧, yo̧ö̧ i̧tti̧mö̧mä̧cö̧jä̧.

⁶ Ja̧'hua̧nö̧ ja̧'a̧ttö̧ korotö ttä'ö'a̧nö̧mä̧, ä'ocotöjä ujutumä. Ujutumä ta̧'cua̧ pö̧nö̧ kä̧nö̧, tta̧tä̧rä̧cuä̧u̧'a̧nö̧ ja̧'a̧.

⁷ Ä'ätömä, yodo ä'ätö. Tä̧'ä̧mä̧tö̧mä̧, yodo tä̧'ä̧mä̧tö̧.

⁸ Ja̧'hua̧nö̧ ja̧'a̧nä̧ ujutu, mo̧ro̧ i̧tti̧mö̧mä̧, adiu tamöcuädö'a̧nö̧ ja̧'a̧. Su̧ro̧da̧u̧ i̧sa̧ amöcanä 'quiyö juäi ö̧'ca̧tä̧hua̧'a̧ jä̧'i̧nö̧'a̧nö̧, ujutu'inä Diosrö adiu esetö, tahuaruhuärö repe'ö jȩtö̧'a̧nö̧ ja̧'a̧. Ja̧'hua̧ta̧nö̧ su̧ro̧da̧u̧ i̧sa̧ unä 'quiyö juäi u̧huä̧nä̧hua̧'a̧ jä̧'i̧nö̧'a̧nö̧, ujutu'inä suronä jȩtö̧ jȩpö̧ icuatö pä'ö, Diosrö tta̧tä̧rö̧'a̧nö̧ ja̧'a̧.

⁹ Dios uhuäbe'ocö pi̧nö̧ ujuturu ö̧tä̧bo̧ta̧tö̧ pä'ö. Ujuturu uhuäbe'inö i̧tti̧mö̧ päti'a pä'ö, Tu̧ru̧hua̧ Jesucristorö tesetomenä.

¹⁰ Jesucristo 'corupä'i'inö chutäcu tö̧ja̧cua̧ pä'ö ta̧'cua̧ro̧mȩnä̧'i̧nä̧, 'corupäti'omenä'inä.

¹¹ Ja̧'hua̧nö̧ ja̧'a̧ttö̧ juhua'a yabonö cujuruhuätucua pä'ö ppä'ädö huo̧juȩtä̧tu̧cui̧, ka̧ra̧ ka̧ra̧rö̧'i̧nä̧ jitä jȩcu̧'ä̧tu̧cu̧ ta'anö.

Huo̧juȩcuä̧ isotörö ucuotäcuähuä huȩnȩ

¹² Tö̧jä̧hua̧tö̧, ucuturu pä'ätöjä. Ucutucu aditätörö, ucuturu huo̧juȩtä̧tö̧rö̧, ucuturu Tu̧ru̧hua̧ i̧huȩnȩ ji'ähuätörö ucuotätucui.

¹³ Jahuätö ttaditähuä topö, ucuotönö repe'ätucui jahuätörö. Cua̧'cua̧ adiunä ka̧cuä̧tu̧cui̧ korotöcu.

¹⁴ Tö̧jä̧hua̧tö̧, ja̧'hua̧ta̧nö̧ pä'ätöjä ucuturu. Ötähuätörö adiu ucuocu ji'ähuätucui. Ye'ecuätörö ppä'ädätucui. Juiyupätörö'inä ppä'ädätucui. O'ca toi'önärö cuami 'qui'ächi'ö ka̧cuä̧tu̧cui̧.

¹⁵ Ya̧tȩ ka̧ra̧rö̧ suronä jȩo̧mȩnä̧, pärocua'attö suronä jȩö̧ juiyarö pä'ö ji'ähuätucui. Ucutumä 'cuäopönä ka̧ra̧ ka̧ra̧rö̧'i̧nä̧ o'ca toi'önärö adiu jȩpö̧ ka̧cuä̧tu̧cui̧.

¹⁶ 'Cuäopönä esehuätucui.

¹⁷ 'Cuäopönä ucuocuätucui Diosrö.

¹⁸ O'ca juiyönä eseunu ucuocuätucui Diosrö. Ja̧'hua̧nö̧ jȩcu̧'ä̧tu̧cuo̧mȩnä̧, Cristo Jesúsru cuesetätucua'attö, Diosrö pä̧huä̧ rö̧jö̧mä̧ jȩpä̧tö̧jä̧.

¹⁹ Espíritu Santo adita'anä, ja̧'a̧tä̧ topätucui.

²⁰ Diosttö huo̧juȩcuä̧ huȩnȩ jittähuomenä, suronä cuamöcuädätucuä'.

²¹ O'ca juiyönä ka̧cuä̧mö̧ topätucui. Adihuä huȩnȩtä̧ esetätucui.

²² O'ca juiyönä surojöttö rä'opächätucui.

²³ Dios, tami iso'quinä eseunu kä̧cuä̧huä̧ iyömä, adiunätä jȩcu̧'ä̧tu̧cua̧ pä'ö ppädäcua'a̧nö̧ ucuturu. Ja̧'hua̧ta̧nö̧ Tu̧ru̧hua̧ Jesucristo ichome jubö päi'önä, surojö juiyönä tta̧huä̧rä̧cua̧'a̧nö̧ cua̧'cua̧rö̧'i̧nä̧, cua̧'cua̧ru̧hua̧rö̧'i̧nä̧, jättäpäyotörö'inä.

²⁴ Chutä, ucuturu ȩmi̧nö̧mä̧, yoröiso adiunätä jȩpö̧. Ja̧u̧ jȩpö̧ o'ca juiyönä päömä.

Röjinä teähuinö huȩnȩ

²⁵ Tö̧jä̧hua̧tö̧, Diosrö ucuocuätucui ujuturu.

²⁶ Ja̧'hua̧ta̧nö̧ o'ca toi'önä tö̧jä̧hua̧tö̧rö̧ juhua'atä ka̧cuä̧tö̧rö̧, cu̧mö̧tu̧cu̧nä̧ 'chu'ädö te'ähuätucui.

²⁷ Ttö pä'ösä ucuturu Tu̧ru̧hua̧ u̧ju̧ru̧nä̧. Pi̧yȩ cuyäru ucuocuätucui o'ca toi'önä tö̧jä̧hua̧tö̧rö̧.

²⁸ Tu̧ru̧hua̧ Jesucristo ucuturu ppädäcua'a̧nö̧. Amén.