1 Tesalonicenses 3 - TÄ̧DO Ä̧CUÄ̧ I̧HUȨNȨ

¹ Ucuturu rö̧ȩnä̧ re rö̧jö̧nä̧ tota päta'anä, tichö juiyönä jä̧u̧jä̧. Ja̧'hua̧nö̧ ja̧'a̧ttö̧ Atenas ötahuiyänä tö̧ji̧pa̧ pä'ö amöcuädinätöjä.

² Ujutu ju̧huȩnȩtä̧ ki̧'i̧pö̧, ucuturu toa pä'ö hue'inätöjä tö̧jä̧hua̧ Timoteorö, Dios huȩ'ä̧hua̧rö̧, ujutucu adihuä huȩnȩ, Cristo i̧huȩnȩ, ji'äu aditörö. Ja̧u̧tä̧ ucuturu ucuocu ppä̧dä̧cua̧, juhua'a yabonö Diosrö cuesetätucua pä'ö.

³ Suronä 'cuäopomenä, jarocu'i'ätucua pä'ocotöjä. Ucutu huo̧juä̧tö̧jä̧, ja̧u̧mä̧ o'ca toi'önärö 'cuäopö.

⁴ Ja̧'hua̧nö̧ ja̧'a̧nä̧ ujutumä ucutucu kä̧nö̧, ubara ttutäcuotöjä pä'ö ji'ähuinätöjä. Ucutu huo̧juä̧tö̧jä̧, ujutu jitähuinö ta'anö, 'cuäopina'a.

⁵ Ja̧'hua̧nö̧ ja̧'a̧ttö̧ ttömä ucuturu rö̧ȩnä̧ tocha päda'anä, Diosrö cuesetätucu huȩnȩ jä'epö ä̧ju̧cua̧ pä'ö, hue'inösä Timoteorö. Ujutu taditähuä ji̧nö̧ micuäu juiyönä ähuettä suronä jȩi̧nä̧u̧cö̧ pä'ö amöcuädinösä.

Tesalónica ötahuiyä ttö̧ja̧ adiu ttö̧ji̧nö̧ huȩnȩ

⁶ Ja̧'hua̧nö̧ ja̧'a̧nä̧ Timoteo täcö ppa̧'ä̧chi̧nö̧ ucutu cu̧ja̧cuä̧tu̧cua̧'a̧ttö̧mä̧, ujutu tö̧ja̧cua̧'a̧cu̧. Ucutu adiu repecuhuätucu'inä, cuesetätucu'inä adiu ji'ähuinö ujuturu. Ucutu ujuturu repe'ö a̧mö̧cuä̧rä̧tö̧ pä'ö ji'ähuinö. Ja̧'hua̧ta̧nö̧ ujutu'inä ucuturu tota pätö ta'anö, ucutu'inä ujuturu tocu'a päcuhuätucumä ji'ähuinö.

⁷ Ja̧'hua̧nö̧ ja̧'a̧ttö̧ tö̧jä̧hua̧tö̧, ujuturu rö̧ȩnä̧ suronä 'cuäopa'anä, Diosrö adiu cuesetätucua'a ä̧ju̧cu̧, rö̧ȩnä̧ esehuätöjä.

⁸ Ucutumä Tu̧ru̧hua̧rö̧ adiu cuami 'qui'ächi'ö cuesetätucuomenä, ujutu'inä adiu eseunu ka̧cuä̧tö̧jä̧.

⁹ Dios ä'ca jo̧mȩttö̧ ucuturu rö̧ȩnä̧ eseunu amöcuädö, Diosrö ucuocu juhua'a yabonö, ¿tta̧'a̧nö̧ tesehuäcua'ajä̧ttö̧ ucuturu?

¹⁰ Mo̧ro̧'i̧nä̧, yodo'inä Diosrö ucuocuätöjä, ucuturu topö ticha pä'ö. Juhua'a yabonö Diosrö cuesetätucua pä'ö, ppätäda pä'ätöjä.

¹¹ Ucuturu topö ticha pä'ö, chutä Tä'o Dios'inä, Tu̧ru̧hua̧ Jesucristo'inä ppättädatö pä'ätöjä.

¹² Ja̧'hua̧ta̧nö̧ Tu̧ru̧hua̧ ucuturu ppäda pä'ö, juhua'a yabonö esetö, ucuturu repetö ta'anö, ka̧ra̧rö̧'i̧nä̧, ka̧ra̧rö̧'i̧nä̧, o'ca toi'önärö repecuhuätucua pä'ätöjä.

¹³ Cuami iso'quitucunä cuami 'qui'ächi'ö esetö, Tä'o Dios ä'ca jo̧mȩttö̧ Tu̧ru̧hua̧ Jesús chutä ahuaruhuäcu ichomenä, Tu̧ru̧hua̧ ppäda'attö, adiunä jȩpö̧ surojö juiyönä cu̧ja̧cuä̧tu̧cua̧ pä'ätöjä.