1 Pedro 5 - TÄ̧DO Ä̧CUÄ̧ I̧HUȨNȨ

Diosrö esetätörö päinö huȩnȩ

¹ Ttö chi̧huȩnȩ hue'ösä jitämä ancianos huotörö, iglesia ruhuärö tta̧'ä̧rä̧tö̧rö̧. Ttö'inä anciano hua̧sä̧, jahuätö ta'anö. Cristo ubara ttuhua'a topinösä. Ttö'inä jahuätö ta'anö, eseunu chö̧jä̧cua̧sä̧ Cristo ichä̧cuȩ mo̧ro̧ päi'omenä.

² O̧vȩja̧stö̧rö̧ tta̧huä̧rä̧cuä̧huä̧ i̧sa̧ tta̧huä̧rö̧'a̧nö̧, Dios i̧tti̧mö̧rö̧, ucuturu hueinä̧u̧ru̧, tta̧'ä̧rö̧ ka̧cuä̧tu̧cui̧. Suronä päcuhuätucuoca'a, Diosrö pä̧huä̧ rö̧jo̧mȩnä̧ adiunä eseunu tta̧'ä̧rä̧tu̧cui̧. Ja̧'hua̧ta̧nö̧ pärätä cuamöcuädätucuoca'a, adiu tta̧'ä̧rä̧tu̧cui̧. Adiunä aditätucui cuaditähuätucu.

³ Korotö ttumöhuäyotörö huettö'a̧nö̧, huecuhuätucuä' iglesia ruhuärö. Adihuä juäitä jȩpä̧tu̧cui̧, ucuturu topö adiu jȩttä̧cua̧'a̧nö̧.

⁴ Ja̧'hua̧nö̧ jȩpö̧ kä̧nö̧, adihuä Tta̧huä̧rä̧cuä̧huä̧ I̧sa̧ ichomenä, adiu jȩcu̧'ä̧tu̧cua̧'a̧ttö̧ adihuä juäi ojiyä hua'ö icu jö̧'a̧nö̧mä̧ jo'ö icuocödo cuȩmä̧tu̧cuä̧cuȩmä̧.

⁵ Ucutu'inä u̧mä̧tö̧ möäyotö, o'ca juiyönä ancianos huotö huettömä ä̧ju̧cu̧ jȩpä̧tu̧cui̧. Ja̧'hua̧ta̧nö̧ o'ca toi'önä korotörö ppä'ädö eseunu ka̧cuä̧tu̧cui̧. Huȩyu̧cuä̧ Huȩnȩ päa'a: Diosmä a'cuoyäunu jȩpä̧tö̧rö̧ kö'cocö. Usurä isotörötä eseunu ppä'ädö.

⁶ Ja̧'hua̧nö̧ ja̧'a̧ttö̧ usurä isotö ttö̧jö̧'a̧nö̧, ka̧cuä̧tu̧cui̧ Dios ujurunä. Ja̧'hua̧nö̧ cu̧ja̧cuä̧tu̧cu̧ttu̧mä̧, Diosrö pä̧huä̧ rö̧jo̧mȩnä̧, korotö ucuturu ttucuota pä'ö jȩä̧cuo̧tö̧jä̧.

⁷ O'ca juiyönä cuamöcuädätucumä, Diosrö ji'ähuätucui. Ja̧u̧tä̧ a̧mö̧cuä̧rö̧ ucuturu.

⁸ Cua̧'cua̧ pö̧nö̧ ka̧cuä̧tu̧cui̧. 'Cuäopönä mo̧ro̧jö̧ a̧'u̧cuä̧ Diosrö ucuocu ka̧cuä̧tu̧cui̧. Ucuturu ami suru topö cua̧bo̧i̧ya̧tu̧cu̧ ähuettä cue'ächö. Yähui ra̧huä̧rö̧ u̧cuȩ usu'a̧nö̧ cue'ächö.

⁹ Ja̧u̧ru̧ jarodi'ätucui. Adiu Jesucristorö esetätucui. Ucutu huo̧juä̧tö̧jä̧, iso päi'önä o'ca toi'önä tö̧jä̧hua̧tö̧ pi̧jä̧nä̧ pa̧ja̧cu̧nä̧ ka̧cuä̧tö̧, ujutu ubara ttutu ta'anö, ubara ttu'ätö jahuätö'inä.

¹⁰ Ucutu a̧'u̧cu̧nä̧tä̧ ubara ttucuhuätucu o'ca'a, Dios cujuru'inä iyäcuotöjä. Ja̧'hua̧ta̧nö̧ cuami 'qui'ächi'ö cu̧ja̧cuä̧tu̧cua̧ pä'ö ȩmä̧cuo̧tö̧jä̧. Ja̧u̧tä̧ Dios o'ca juiyönä ppä'ädö ujuturu. Ujuturu ȩmi̧nö̧, Jesucristocu eseunu tö̧ja̧cua̧ pä'ö 'cuäopönä.

¹¹ 'Cuäopönä Diosrö ttesehuäcuähuäcua'a̧nö̧. 'Cuäopönä Dios ujuruhuäcua'a̧nö̧. Amén.

Röjinä teähuinö huȩnȩ

¹² Silvano, Cristonä chö̧jä̧hua̧ ppädomenä, pi̧yȩ cuyäru ji̧'qui̧cha̧nö̧tä̧ huȩyu̧tu̧ hue'ösä ucuturu, ji'äu ppädädätucuacu pä'ö. Ja̧'hua̧ta̧nö̧ ucuturu repea'attö, o'ca juiyönä adihuä juäi iyinödo Dios ucuturu cu̧huo̧juä̧tu̧cua̧ pä'ö huȩyu̧tu̧sä̧. Pi̧yȩ esetönö ka̧cuä̧tu̧cui̧.

¹³ Babilonia ötahuiyänä ka̧cuä̧tö̧, iglesia ruhuä te'ähuätö ucuturu. Dios ucuturu ȩmi̧nö̧ ta'anö, ȩmi̧nä̧u̧do jahuätörö'inä. Ja̧'hua̧ta̧nö̧ chi̧tti̧ Marcos'inä te'äu ucuturu.

¹⁴ Cu̧mö̧tu̧cu̧nä̧ 'chu'ädö te'ähuätucui o'ca toi'önärö. Ja̧'hua̧ta̧nö̧ o'ca toi'önä Jesucristorö esetätö cuesehuäcuähuätucuäcua'a̧nö̧. Amén.