1 Pedro 3 - TÄ̧DO Ä̧CUÄ̧ I̧HUȨNȨ

Ttirecuarö ȩmö̧ kä̧cuä̧huä̧ huȩnȩ

^1-2 Ucutu'inä nä̧tö̧, cuirecuorö adiu jȩpö̧ ka̧cuä̧tu̧cui̧, ya̧tȩ Dios i̧huȩnȩ esetoca'anä, irecua adiu cuejächa'a topö, esetäcua'a̧nö̧ yajutä kucuocuoca'anä'inä. Adiu kö̧ja̧'a̧ topö, esetäcua'a̧nö̧.

³ Cuhuo'che sa̧huȩcuä̧cuä̧huä̧'i̧nä̧, orottö adicuä juäi'inä, cu̧'ca̧tä̧huä̧ta̧ adihuä̧ta̧'i̧nä̧, amöcuädö cu̧ja̧cuä̧tu̧cuä̧'.

⁴ Pärocua'acu cuami iso'quittö räopö juäi, yoröiso beipächocö juäi, amöcuädö ka̧cuä̧tu̧cui̧. Ja̧'hua̧ta̧nö̧ korotörö'inä eseunu cua̧'cua̧ adiunä amöcuädö ka̧cuä̧tu̧cui̧. Ja̧u̧tä̧ rö̧ȩnä̧ micuähua'a Dios ä'ca jo̧mȩttö̧.

⁵ Pä'äji'inä adihuä juäi jȩpö̧ ka̧cui̧nä̧tö̧do nä̧tö̧, Diosrö adiunä esetinätömä. Jahuätömä Diosrö amöcuädinätödo. Ttirecuo hueö'inä jȩpi̧nä̧tö̧do.

⁶ Ja̧'hua̧nö̧ jȩpi̧nä̧ju̧do Sara mi̧nä̧. Jahuäju kirecuo Abraham mi̧nä̧ hueö jȩpi̧nä̧ju̧do. Ja̧'hua̧ta̧nö̧ kirecuo Abraham mi̧nä̧rö̧ “Chu̧ru̧hua̧” pä'inäjudo. Adiu jȩcu̧'ä̧tu̧cu̧ttu̧mä̧, jahuäju kö̧ji̧nö̧ ta'anö, yecuäcuähuä juiyönä jȩpö̧, cu̧ja̧cuä̧cuo̧tö̧jä̧.

⁷ Ucutu'inä u̧mä̧tö̧, cuirecuarö repe'ö ka̧cuä̧tu̧cui̧. Adiu ucuotönö amöcuädätucui jahuätörö, ucututtu'inä abonänö juiyupätörö. Diosrö pä̧huä̧ rö̧jo̧mȩnä̧, ucuturu iyinö ta'anö, jahuätörö'inä iyinö cunichi'ätucuoca'a ka̧cuä̧tu̧cui̧. Ja̧'hua̧nö̧ jȩpä̧tu̧cui̧, Diosrö cucuocuätucuomenä, surojö juiyäcua'a̧nö̧.

Adihuä juäi jȩä̧cuä̧huä̧nä̧ ubara ttuttu huȩnȩ

⁸ Ja̧'hua̧nö̧ ja̧'a̧ttö̧ o'ca toi'önä korotöcu eseunu cua̧'cua̧ tta̧nö̧ jö̧nä̧ ji̧nä̧ yo̧mȩtȩ amöcuädö ka̧cuä̧tu̧cui̧, tö̧jä̧hua̧tö̧rö̧ repetö ta'anö, repe'önö kä̧nö̧. Eseäcuähuätucui. Usurä isotö ttö̧ja̧cu̧'a̧nö̧ ka̧cuä̧tu̧cui̧.

⁹ Ucuturu suronä jȩtto̧mȩnä̧, ppa̧'ä̧dö̧ jȩcu̧'ä̧tu̧cuä̧'. Ja̧'hua̧ta̧nö̧ ucuturu ra̧huä̧rä̧'chö̧ huottomenä, ppa̧'ä̧dö̧ huocu'ätucuä'. Pärocua'acu ttö̧ra̧huä̧ro̧mȩnä̧, adiunätä jȩpä̧tu̧cui̧tö̧. Dios ucuturu ppäda pä'ö huoinä̧u̧jä̧.

¹⁰ Huȩyu̧cuä̧ Huȩnȩ päa'a: Ya̧tȩ adiunä eseunu ö̧ja̧ pä'ömä, i̧huȩnȩnä̧ suräjuä huȩnȩ'i̧nä̧, yapareu huȩnȩ'i̧nä̧ ättö amöcuädö ucuocuocö.

¹¹ Surojöttö'inä rä'opächö, adiutä jȩpö̧. Ja̧'hua̧ta̧nö̧ adihuä juäi eseäcuähuä usäji'ca̧, eseunu kö̧.

¹² Dios adiunä jȩpä̧tö̧rö̧ tta̧'ä̧rö̧. Churutä ttucuocua'a'inä ä̧ju̧cu̧. Ja̧'hua̧nö̧ ja̧'a̧nä̧'i̧nä̧ suronä jȩpä̧tö̧ Ttu̧ru̧hua̧mä̧cö̧, päa'a Huȩyu̧cuä̧ Huȩnȩ.

¹³ Ucutu adiu jȩcu̧'ä̧tu̧cu̧ttu̧mä̧, ¿ditäjä̧ttö̧ suronä jȩpa̧ji̧mä̧ ucuturu?

¹⁴ Adiu cu̧ja̧cuä̧tu̧cuo̧mȩnä̧'i̧nä̧, ubara ttucuhuätucuttumä, eseunu cu̧ja̧cuä̧cuo̧tö̧jä̧. Ttö̧ja̧rö̧mä̧ yecuhuecuätucuä'.

¹⁵ Cristorötä, cuami iso'quitucunä Cu̧ru̧hua̧tu̧cu̧ päi'önä kö̧rö̧tä̧, ucuotätucui. Korotö ucutu tta̧cu̧huä̧rä̧tu̧cu̧ jättepöttömä, cuädätätucuä̧cuȩ ku̧nä̧rä̧tu̧cui̧. Cuädätätucuomenä, adiunä ucuotönö ädätö ucuocuätucui.

¹⁶ Adiunä amöcuädö ka̧cuä̧tu̧cui̧, korotö ucutu adiu cu̧ja̧cuä̧tu̧cua̧'a̧ topö suronä ttucuocuomenä, jitötä ttucuocuäji amöcuädö ttödäpecuäcua'a̧nö̧.

¹⁷ Diosrö pä̧huä̧ rö̧jo̧mȩnä̧, adiunä jȩpö̧ kä̧nö̧ ubara ttuta'anä, suronä jȩpö̧ kä̧nö̧, ubara ttututtu'inä abonänö adihua'ado.

¹⁸ Iso päi'önä Cristomä ya'utenätä o'ca toi'önärö suronä jȩttö̧ jȩpö̧ icua pä'ö ubara ttu'u 'corupä'i'inö. Chutä yoröiso adihuä i̧sa̧ ja̧'a̧nä̧, ujutu suronä jȩpä̧tö̧mä̧ suronä jȩtö̧ jȩpö̧ icu, ubara ttu'inö Dios ö̧ja̧'a̧cu̧ ti̧'cha̧ pä'ö. Chutä idepämä 'corupäi'äja'anä, a̧'cua̧ru̧hua̧ pä'äji ta'anö tto'ächäji'ca̧ ki̧nö̧.

¹⁹ A̧'cua̧ru̧hua̧nä̧ kä̧nö̧, korotö tta̧'cua̧ru̧hua̧rö̧ cärenä pȩjä̧tö̧rö̧ ji'ähuinö.

²⁰ Täbocö Noé ö̧ji̧nö̧, jahuätö Diosrö jarode'inätödo. Noé huoi'ca adita'anä, Dios ami 'qui'ächi'önä tta̧'ä̧ri̧nö̧do. Aje suhuädomenä, ko̧ro̧mö̧ttö̧nö̧ huämetucuänö ttö̧ja̧ Noé aditinä'canä ka̧cui̧pi̧nä̧tö̧do.

²¹ Ja̧u̧ aje suhuädinömä bautizando jȩtta̧'a̧ jä̧'i̧nö̧'a̧nö̧ ji̧na̧'a̧do. Ujutu'inä bautizando jȩto̧mȩnä̧, suronä jȩtö̧ jȩpö̧ icu Dios. Bautizando jȩtö̧mä̧, ujutu tidepämä töcö icuocödo. Ji̧yȩä̧cuȩtä̧ Diosrö jäecuätä ta̧'cua̧ adiu iyömä. Ja̧'hua̧ta̧nö̧ Jesucristo ttoächinö huȩnȩ esetö, ujutu suronä jȩtö̧ jȩpö̧ icudo.

²² Chutä Jesucristo mo̧ro̧jä̧ra̧'a̧ cä'ecuächinö. Jitämä Dios u̧huo̧jua̧'a̧nä̧ kö̧do. Ja̧'hua̧ta̧nö̧ o'ca toi'önä ángeles'inä, hue'ähuotö'inä Ttu̧ru̧hua̧ päi'önä kö̧do Jesucristomä.