1 Juan 5 - TÄ̧DO Ä̧CUÄ̧ I̧HUȨNȨ

Pi̧jä̧ jähuättö'inä abonänö adiunä ttö̧jö̧ huȩnȩ

¹ O'ca toi'önä Jesúsmä Cristo ja̧'a̧ pä'ö esetätömä, Dios i̧tti̧mö̧. Ya̧tȩ ta̧hua̧ru̧hua̧ i̧tti̧mö̧ ku̧nä̧rö̧rö̧ repetöttömä, ja̧u̧tä̧ i̧tti̧mö̧rö̧'i̧nä̧ repe'ätöjä.

² Diosrö repetomenä, chutä hueinö ta'anö jȩto̧mȩnä̧, iso päi'önä huo̧juä̧tö̧jä̧ Dios i̧tti̧mö̧rö̧'i̧nä̧ repe'ätöjä.

³ Dios hueinö ta'anö jȩto̧mȩnä̧, Diosrö repe'ätöjä. Dios i̧huȩnȩ päö'a̧nö̧ jȩä̧cuä̧huä̧mä̧ 'quiyoca'a.

⁴ O'ca toi'önä Dios i̧tti̧mö̧ pi̧jä̧ jähuättö'inä abonänö juruhuätö. Ja̧'hua̧nö̧ ja̧'a̧ adiu tesetomenä, pi̧jä̧ jähuättö'inä abonänö juruhuätöjä.

⁵ Jesúsma̧ iso päi'önä Dios I̧tti̧ ja̧'a̧ pä'ö esetätötä pi̧jä̧ jähuättö'inä abonänö juruhuätö.

Dios I̧tti̧rö̧ kä̧cuä̧huä̧ i'co jiähuinö huȩnȩ

⁶ Jesucristomä ichinö ajiyanä'inä, ucuojanä. Ja̧'hua̧nö̧ ja̧'a̧ ajiyanätä ichocö pi̧nö̧. Ajiyanä'inä, ucuojanä ichinö. Ja̧'hua̧nö̧ ichinö pä'ö Espíritu Santo ji'äu. Espíritu Santomä iso päi'önä yapareu huȩnȩ ji'ähuocö.

⁷ Mo̧ro̧jä̧nä̧ kä̧nö̧ ji'ähuätömä, huämetucuä ja̧'a̧. Tä'o Dios'inä, I̧huȩnȩ'i̧nä̧, Espíritu Santo'inä. Jahuätö huämetucuä ya̧tȩtä̧ ja̧'a̧.

⁸ Ja̧'hua̧ta̧nö̧ pi̧jä̧nä̧ ji'ähuätömä, huämetucuä ja̧'a̧: Espíritu Santo'inä, ajiya'inä, ucuoja'inä. Jahuätö huämetucuä ji̧nä̧ ji̧yȩtȩ ji'ähuätö.

⁹ Ttö̧ja̧ jittäumä ujutu ä̧ju̧cu̧ esetätöjä. Ja̧'hua̧nö̧ ja̧'a̧ Dios jiäumä ttö̧ja̧ jittäuttu'inä abonänö micuähua'a. Pi̧yȩ jiäumä Dios ji'ähuinö I̧tti̧rö̧ tteseta pä'ö.

¹⁰ Dios I̧tti̧rö̧ esetätömä ttami iso'quinä hua'adö ku̧nä̧tö̧ ja̧u̧ Dios jiähuinömä. Diosrö esetocotömä “Dios yaparehua̧” pä'ätö, Diosmä I̧tti̧rö̧ tteseta pä'ö jiähuinömä ttesetoca'attö.

¹¹ Ja̧'hua̧nö̧ ja̧'a̧ Dios ji'ähuinö kä̧cuä̧huä̧ i'co ujuturu iyinömä. Pi̧yȩ kä̧cuä̧huä̧ i'comä I̧tti̧rö̧tä̧ esetö ȩmä̧tö̧jä̧.

¹² Dios I̧tti̧rö̧ ku̧nä̧rö̧mä̧, kä̧cuä̧huä̧ i'co ku̧nä̧rö̧. Dios I̧tti̧rö̧ ku̧nä̧ro̧cö̧mä̧, kä̧cuä̧huä̧ i'co jui̧'a̧.

Dios ujutu jätepomenä ä̧ju̧cua̧'a̧ttö̧, iyö huȩnȩ

¹³ O'ca juiyönä pi̧yȩ huȩnȩ huȩyu̧tu̧sä̧ ucuturu, Dios I̧tti̧rö̧ esetätörö, cu̧huo̧juä̧tu̧cua̧ pä'ö kä̧cuä̧huä̧ i'co ku̧nä̧rä̧tö̧jä̧ pä'ö.

¹⁴ Ujutu huo̧juä̧tö̧jä̧ Diosrö pä̧huä̧ rö̧jö̧ jä'epö tucuocuomenä, ujuturu ä̧ju̧cua̧'a̧ttö̧, ja̧u̧ru̧ ta̧'cua̧ huȩnä̧rä̧tö̧jä̧.

¹⁵ Ujutu huo̧juä̧tö̧jä̧ Dios ujutu jätepö ä̧ju̧cua̧'a̧ttö̧, huo̧juä̧tö̧jä̧ ujuturu iyö ja̧u̧ru̧ jätepömä.

¹⁶ Ya̧tȩ ö̧jä̧hua̧ suronä jȩa̧'a̧ toöttömä, 'corupäi'a pä'ö suronä jȩpo̧cö̧, Diosrö jä'epö ucuocu'a̧nö̧ ja̧'a̧ ö̧jä̧hua̧rö̧, kä̧cuä̧huä̧ iya pä'ö, suronä jȩpö̧ 'corupäi'a pä'ö jȩö̧ juiyöttömä. Ja̧'hua̧nö̧ ja̧'a̧ koro suronä jȩä̧cuä̧huä̧ ka̧'a̧, 'corupätti'a pä'ö jȩä̧cuä̧huä̧. Diosrö cucuocuätucu'a̧nö̧ ja̧'a̧ jö̧nä̧mä̧ pä'ocösä.

¹⁷ O'ca juiyönä jarode'ö jȩä̧cuä̧huä̧mä̧, suronä jȩä̧cuä̧huä̧ ja̧'a̧. Ja̧'hua̧nö̧ ja̧'a̧ koro'inä 'corupätti'ö juiyönä jȩä̧cuä̧huä̧'i̧nä̧ ka̧'a̧.

¹⁸ Ujutu huo̧juä̧tö̧jä̧ Dios i̧tti̧mö̧ suronä jȩpö̧ ko̧co̧tö̧, Dios I̧tti̧ jahuätörö tta̧'ä̧rö̧. Ähuettä jahuätörö mȩ'ö̧'i̧nä̧ mȩ'o̧cö̧.

¹⁹ Ujutu huo̧juä̧tö̧jä̧ Dios i̧tti̧mö̧jä̧. Korotö pi̧jä̧ jähuänä ka̧cuä̧tö̧rö̧ hue'ö ähuettämä.

²⁰ Ujutu huo̧juä̧tö̧jä̧ Dios I̧tti̧ ichinö. Huo̧juä̧tö̧jä̧ ujuturu huo̧juȩti̧nö̧ Dios iso päi'önä kö̧rö̧ tu̧huo̧juä̧chi̧'ö̧nä̧. Iso päi'önä kö̧cu̧ ka̧cuä̧tö̧jä̧ ujutumä, I̧tti̧ Jesucristocu tö̧ja̧'a̧ttö̧. Ja̧'hua̧nö̧ ja̧'a̧ iso päi'önä Dios ja̧u̧tä̧ ja̧'a̧do. Ja̧u̧tä̧ kä̧cuä̧huä̧ i'co ja̧'a̧do.

²¹ Chi̧tti̧mö̧, koro juäinä cua̧'cua̧ cu̧huȩnä̧rä̧tu̧cuä̧'. Amén.