1 Corintios 9 - TÄ̧DO Ä̧CUÄ̧ I̧HUȨNȨ

Jesús hue'ähuotö ttö̧jö̧ huȩnȩ

¹ Ttömä Jesús huȩ'ä̧hua̧sä̧. Ja̧'hua̧nö̧ ja̧'a̧ttö̧ pi̧jä̧ ttöja̧rö̧ ädätocösä. Ttömä Tu̧ru̧hua̧ Jesúsru topinösä. Ja̧'hua̧ta̧nö̧ ucutumä Tu̧ru̧hua̧ hueö jȩcho̧mȩnä̧ esetinätöjä.

² Korotömä ttörö pä'ätö a̧'cua̧ra̧'a̧, ja̧u̧mä̧ Jesús hue'ähuocö pä'ö. Korotömä ja̧'hua̧nö̧ pättomenä, ucutu ttörö iso päi'önä huo̧juä̧tö̧jä̧. Ucutumä Curu̧hua̧tu̧cu̧ru̧ cuesetätucuomenä, huo̧juä̧tö̧jä̧ ja̧u̧mä̧ iso päi'önä Jesús huȩ'ä̧hua̧ pä'ö.

³ Ja̧'hua̧nö̧ ja̧'a̧ttö̧ pa̧'a̧nö̧ pä'ösä korotörö, ttörö huȩnȩtö̧ ji'ähuätörö.

⁴ ¿O'ca juiyönä cuäcuähuä'inä, ahuähuä'inä ttörö ttiyö juiyö'a̧nö̧ tä̧ji̧?

⁵ Ja̧'hua̧ta̧nö̧ korotö Jesús hue'ähuotö'inä, Tu̧ru̧hua̧ ö̧jä̧hua̧tö̧'i̧nä̧, Pedro'inä kara'a 'chä̧nö̧ ttirecuarö ttȩpö̧'a̧nö̧, ttö'inä ttörö pä̧huä̧ rö̧jö̧ttö̧mä̧ chirecuarö, Diosrö esetäjuru chȩpö̧'a̧nö̧ ja̧'a̧.

⁶ ¿Ttöcutä, Bernabécutä Dios i̧huȩnȩ ji'äu kä̧nö̧, tamönä taditö'a̧nö̧ ja̧'a̧ pä'ö amöcuädätöjä tä̧ji̧ ucutumä?

⁷ Ya̧tȩ su̧ro̧da̧u̧ rohuäu i̧'cho̧mȩnä̧, ¿chutä öäre pärätänä mitö tä̧ji̧? ¿Dijä̧ttö̧ cuäcuähuä ku̧nu̧mä̧, chutä'inä ucuoca'a kä̧nö̧? ¿Dijä̧ttö̧ o̧vȩja̧stö̧rö̧ tta̧'ä̧rö̧mä̧, chutä'inä ttatate isoya ahuoca'a kä̧nö̧?

⁸ Jitä pädäjimä pi̧jä̧ ttö̧ja̧ ttamöcuädö ji'ähuäji pä'ö cuamöcuädätucuä'. Moisés hueähuä huȩnȩ ja̧'hua̧ta̧nö̧ päa'a.

⁹ Hueähuä huȩnȩ cuyäru'tänä päa'a: “Päcäyä äbanä i̧so̧bö̧ cu̧'ca̧tä̧dä̧tu̧cuä̧' ya̧mö̧ ibi'ca'anä.” Ja̧'hua̧nö̧ pä'ö päcäyärötä amöcuädö pä'ocö pi̧nö̧do Diosmä.

¹⁰ Ujuturutä amöcuädö pä'inödo. Iso päi'önä ujuturu amöcuädö pä'inö ja̧u̧ huȩnȩ. Ya̧tȩ rȩjȩ aditö'inä, ka̧ra̧ ya̧mö̧ di'cö'inä, o'ca juiyönä aditätö jo̧mȩ päi'omenä, tta̧'ä̧rä̧tö̧ ttȩma̧ pä'ö jitötä ttu̧cuȩ.

¹¹ Ja̧'hua̧nö̧ ja̧'a̧ttö̧ iso päi'önä ujutumä ucuturu adihuä huȩnȩ ji'äu tu̧ju̧ni̧na̧'a̧ttö̧, ujuturu ppäcuhuädätucua pä'ö koro juäi iyö ¿suroja'a tä̧ji̧ ucuturu?

¹² Korotö ucuturu jittähuomenä, jahuätö “ppäcuhuädätucuatö” pä'ätö. Ja̧'hua̧ ja̧'a̧ jahuätöttö'inä abonänö ppäcuhuädätucua pä'ö ujuturu ¿adihua'adi̧? Iso päi'önä ujutumä jä'epocotö pi̧nä̧tö̧jä̧ ucuturu. Pärocua'acu o'ca juiyönä tami 'qui'ächi'inätöjä, adiu cuä̧ju̧cuä̧tu̧cua̧ pä'ö Cristo i̧huȩnȩ.

¹³ Ucutu huo̧juä̧tö̧jä̧ a̧'cua̧ra̧'a̧, ya̧tȩ Diosrö ucuocuäcuähuodenä aditömä, juhua'attö ȩmö̧ u̧cuȩmä̧. Ja̧'hua̧ta̧nö̧ ya̧tȩ sacrificio jȩtto̧mȩttö̧ aditömä, juhua'attö sacrificios jȩtto̧mȩnä̧, ȩmö̧ u̧cuȩ idepä.

¹⁴ Ja̧'hua̧ta̧nö̧ Tu̧ru̧hua̧ hue'inödo ttö̧ja̧ suronä jȩttö̧ jȩpö̧ icu huȩnȩ ji'ähuätörö'inä, i̧huȩnȩ ji'äu ttaditomenä, ja̧u̧ aditö ttö̧ja̧cuä̧cua̧'a̧nö̧.

¹⁵ Ttömä pa̧'a̧nö̧ jȩpo̧cö̧ pi̧nö̧sä̧. Jitä'inä huȩyu̧to̧cö̧sä̧ cuiyätucuattö pä'ö. Korotömä Dios i̧huȩnȩ jidähuinö micuä päi'önä, ttörö ttiya pättöttömä, chȩmo̧ca̧'a̧nä̧ 'corupädi'ö'a̧nö̧ jä̧cu̧sä̧.

¹⁶ Ttömä a'cuoyäunu ji'ähuocösä ttö̧ja̧ suronä jȩttö̧ jȩpö̧ icu huȩnȩ. Iso päi'önä ja̧u̧ huȩnȩ chesetina'attö, jidäu'a̧nö̧ ja̧'a̧. Ja̧'hua̧nö̧ jidäu juiyöttömä, suronä 'cuäopäcua'a ttörö.

¹⁷ Iso päi'önä ttörötä pä̧huä̧ rö̧jo̧mȩnä̧ jidäuttumä, adiu chȩmä̧cua̧'a̧nö̧ jidähuinö micuä. Juhuorö'inä pä̧huä̧ juiyönä jidäuttömä, Dios hueinäcusä pä'ö ji'äusä.

¹⁸ Ja̧'hua̧nö̧ ja̧'a̧ttö̧ ¿däjettö jidähuinö micuämä? Iso päi'önä ttö̧ja̧ suronä jȩttö̧ jȩpö̧ icu huȩnȩ jidähuomenä, korotörö koro juäi jädepoca'anä, ja̧u̧tä̧ ttö jidähuinö micuä. Ja̧'hua̧nö̧ jȩpö̧, ttömä ȩmo̧cö̧sä̧ koro juäi korotöttö micuä juiyönä Dios i̧huȩnȩ ji'äusä pä'ö kä̧nö̧.

¹⁹ Ttömä ka̧ra̧ huȩ'ä̧hua̧mä̧cö̧sä̧. Juhuorö'inä o'ca toi'önä Cristorö tteseta pä'ö, huȩ'ä̧hua̧ i̧sa̧ jö̧'a̧nö̧ kö̧sä̧.

²⁰ Judíos ttö̧ja̧cu̧ cuedächomenä, jahuätö jȩttö̧'a̧nö̧ jȩpö̧sä̧ ttö'inä, Diosrö ttesetäcua'a̧nö̧. Ja̧'hua̧nö̧ pädomenä, pa̧'a̧nö̧ pä'ösä. Moisés hueähuä huȩnȩ jȩpä̧tö̧cu̧ cuedächomenä, ttö'inä ja̧u̧ huȩnȩ päö'a̧nö̧ jȩpö̧sä̧ pä'ö kä̧nö̧, iso päi'önä ja̧u̧ huȩnȩ jȩcho̧ca̧'a̧nä̧ pä'ösä, jahuätö'inä Diosrö ttesetäcua'a̧nö̧.

²¹ Ja̧'hua̧ta̧nö̧ korotö Moisés hueähuä huȩnȩ jȩpo̧co̧tö̧cu̧ cuedächomenä, jahuätö cuettächö'a̧nö̧ cue'ächösä Diosrö ttesetäcua'a̧nö̧. Juhuorö'inä ttötä Dios hueähuä huȩnȩ jȩpö̧sä̧, Cristo ttörö huea'attö.

²² Ja̧'hua̧ta̧nö̧ korotö ji̧'qui̧cha̧nö̧ tteseta'attö juiyupätöcu cuedächomenä, ya̧tȩ jui̧yu̧pa̧ ö̧ja̧'a̧ jä̧'i̧nö̧'a̧nö̧ ki̧nö̧sä̧, jahuätö'inä adiu ttesetäcua'a̧nö̧ Diosrö. Ja̧'hua̧nö̧ pä'ösä ttömä o'ca toi'önäcu kä̧nö̧, jahuätö ttö̧jö̧'a̧nö̧ ki̧nö̧sä̧, yotöte Diosrö ttesetäcua'a̧nö̧.

²³ Ttömä ja̧'hua̧nö̧ jȩpö̧sä̧ Dios i̧huȩnȩ, ttö̧ja̧ suronä jȩttö̧ jȩpö̧ icu huȩnȩ esetö, ttö'inä chȩmä̧cua̧'a̧nö̧ adihuä juäi, ja̧u̧ huȩnȩ päö'a̧nö̧.

²⁴ Iso päi'önä huo̧juä̧tö̧jä̧ ucutu, koro juäi jopö ttöärehuomenä, o'ca toi'önä pä̧i̧cu̧nä̧ jopätö. Juhuorö'inä o'ca toi'önä jottomenä, ya̧tȩtä̧ ttiyömä ȩmä̧cua̧. Ja̧'hua̧nö̧ jä̧'i̧nö̧'a̧nö̧ jopätucui, adihuä juäi cuȩmä̧tu̧cuä̧cua̧'a̧nö̧.

²⁵ Ja̧'hua̧ta̧nö̧ o'ca toi'önä joäcuähuänä ttöärehua pä'ätömä, o'ca juiyönä do'opö icuätö tottei'ö juiya pä'ö. Jahuätö ja̧'hua̧nö̧ jȩpä̧tö̧, ppöttähuä isojättö adicuä ttȩma̧ pä'ö. Ja̧u̧mä̧ yoröiso recuo ko̧cö̧. Ujutumä koro ppöttähuä, yoröiso beipächocohuättö tȩma̧ pä'ö rohuähuätöjä.

²⁶ Ttömä adiunätä jopösä. Ja̧'hua̧ta̧nö̧ ja̧'a̧tä̧ra̧'a̧mä̧ rohuähuocösä ttömä.

²⁷ Pärocua'acu ttömä chamönä ro̧'ȩpä̧cuä̧u̧sä̧ jȩcha̧ pädömä jȩcha̧ pä'ö. Ttömä ja̧'hua̧nö̧ jȩpö̧sä̧, korotörö jidäu o'ca'a, ttö'inä suronä jȩpö̧ rädopächö juiyäcua'a̧nö̧.