1 Corintios 8 - TÄ̧DO Ä̧CUÄ̧ I̧HUȨNȨ

Ttu̧mö̧nä̧ adicuä juäi, ttamöcuädö huȩnȩ

¹ Jitämä ji'äusä koro huȩnȩ, cuäcuähuä ttucuäcua'a ä'canä, ttu̧mö̧nä̧ adicuä juäi ttä'ca ttucuocu huȩnȩ. Ja̧u̧ juäi huȩnȩ amöcuädö, o'ca toi'önä pä'ätöjä ttö ja̧u̧ juäi rö̧ȩnä̧ huo̧jua̧sä̧ pä'ö. Ja̧'hua̧nö̧ pätomenä, iso päi'önä adiu ppädoca'a ujuturu. Ji̧yȩä̧cuȩtä̧ tahuaruhuärö repeähuätä adiu ppäda'a ujuturu.

² Ja̧'hua̧nö̧ ja̧'a̧ttö̧ ya̧tȩ o'ca juiyönä huo̧jua̧sä̧ pä'ö amöcuädöttömä, ja̧u̧mä̧ yoröiso koro juäi'inä jȩru̧pa̧.

³ Ja̧'hua̧nö̧ ja̧'a̧nä̧ Diosrö repeöttömä, Dios huo̧jua̧ ja̧u̧ru̧.

⁴ Ja̧'hua̧ ja̧'a̧ttö̧ cuäcuähuä ttucuäcua'a ä'canä, ttu̧mö̧nä̧ adicuä juäi ttä'ca ttucuocuomenä, yoröiso micuähuoca'a huo̧juä̧tö̧jä̧. Iso päi'önä huo̧juä̧tö̧jä̧ ya̧tȩä̧tä̧ kö̧ Diosmä.

⁵ Ja̧'hua̧ta̧nö̧ korotö pä'ätö: “Pi̧jä̧nä̧'i̧nä̧, mo̧ro̧jä̧nä̧'i̧nä̧ recuätö ttö̧ä̧nä̧hua̧tö̧'i̧nä̧, tturuhuotö'inä ka̧cuä̧tö̧.”

⁶ Ja̧'hua̧nö̧ pätta'anä, ujutumä huo̧juä̧tö̧jä̧ ya̧tȩä̧tä̧ Tä'o Diostä kö̧. Ja̧u̧ Tä'o o'ca juiyönä aditinödo. Ujutu'inä ja̧u̧ru̧ pä̧huä̧ rö̧jo̧mȩnä̧ ka̧cuä̧tö̧jä̧. Ja̧'hua̧ta̧nö̧ Tu̧ru̧hua̧mä̧ ya̧tȩä̧tä̧ kö̧. Ja̧u̧mä̧ Tu̧ru̧hua̧ Jesucristo. Ja̧u̧ru̧ pä̧huä̧ rö̧jo̧mȩnä̧, ujutu'inä ka̧cuä̧tö̧jä̧, pi̧jä̧nä̧ ka̧cu̧'i̧nä̧ o'ca juiyönä ka̧cua̧'a̧.

⁷ Ucututtu yotöcunä ja̧u̧ huȩnȩmä̧ huo̧juo̧co̧tö̧. Yotöte ucututtu ttu̧mö̧nä̧ adicuä juäi esetinätömä, ji̧nä̧ jitä päi'önä cuätö ttu̧cuȩmä̧, pä'äji jȩpö̧ ttucuinö'a̧nö̧ amöcuädö. Ja̧'hua̧nö̧ jȩtto̧mȩnä̧, ttami iso'quinä o'ca juiyönä ttesetoca'attö, suronä jȩpä̧tö̧jä̧ pä'ö amöcuädätö.

⁸ Iso päi'önä koro juäi cuä̧nö̧ Dios ä'ca jo̧mȩttö̧ adihuä isotö pä'i'ocotöjä. Koro juäi cuä̧nö̧, adiunä ka̧cuo̧co̧tö̧jä̧. Ja̧'hua̧ta̧nö̧ koronö koro juäi cuä̧nö̧, suronämä ka̧cuo̧co̧tö̧jä̧.

⁹ Juhuorö'inä ttu̧ȩcuä̧nä̧ ka̧cuä̧tu̧cui̧, korotö Diosrö a̧'u̧cu̧nä̧tä̧ esetätö suronä jȩttö̧ juiya pä'ö, ucuturu topö o'ca juiyönä cucuätucuomenä.

¹⁰ Pa̧'a̧nö̧ pä'ösä ucuturu, ucututtu ya̧tȩ huo̧jua̧mä̧, koromettö ttu̧mö̧nä̧ adicuä juäi ttä'ca ttucuocuomettö pä̧mä̧dö̧ ucuomenä, ka̧ra̧'i̧nä̧ ji̧'qui̧cha̧nö̧ esetömä 'cuä'opö tomenä, ttö'inä ja̧'hua̧ta̧nö̧ pä̧mä̧dö̧ chucu'a̧nö̧ ja̧'a̧cuä̧ pä'ö amöcuädäcua'a̧nö̧, ka̧ra̧ ö̧jä̧hua̧rö̧ topö.

¹¹ Ja̧'hua̧nö̧ ja̧'a̧ttö̧ ya̧tȩ cu̧jä̧hua̧mä̧ ji̧'qui̧cha̧nö̧ esetömä, ucutu jȩcu̧'ä̧tu̧cua̧'a̧ tomenä, ami iso'quinä esetoca'anä jȩö̧ttö̧mä̧, ucutumä toä̧u̧jä̧ suronä jȩpä̧tö̧jä̧ cu̧huo̧juä̧tu̧cua̧'a̧nä̧'i̧nä̧. Cristomä 'corupä'i'inödo ja̧u̧ru̧'i̧nä̧.

¹² Ja̧'hua̧nö̧ ja̧'a̧ttö̧ cu̧jä̧hua̧tö̧ ji̧'qui̧cha̧nö̧ esetätö, ucuturu topö suronä jȩtto̧mȩnä̧, ucutu'inä Cristorö suronä jȩpä̧tö̧jä̧.

¹³ Ja̧'hua̧ ja̧'a̧ttö̧ ttömä koro juäi chucuomenä, ya̧tȩ chö̧jä̧hua̧mä̧ ttörö topö suronä amöcuädöttömä, ja̧u̧nu̧ o'ca'a ttömä yoröiso cuocösä idepämä, korotö ttörö topö suronä ttamöcuädö juiyäcua'a̧nö̧.