1 Corintios 7 - TÄ̧DO Ä̧CUÄ̧ I̧HUȨNȨ

Tti̧rȩcua̧mö̧rö̧ ku̧nä̧rä̧tö̧rö̧ huȩyu̧ti̧nö̧do

¹ Jitämä ucutu jäcuhue'inätucu ädätösä. Iso päi'önä u̧mä̧tö̧ tti̧rȩcua̧mö̧rö̧ ttȩmö̧ juiyöttömä, adihua'a.

² Juhuorö'inä recuätö nä̧tö̧rö̧ suronä usu jȩtta̧'a̧ttö̧, o'ca toi'önä u̧mä̧tö̧'i̧nä̧ jitötä ttirecuarö ttu̧ju̧nä̧rä̧cua̧'a̧nö̧. Ja̧'hua̧ta̧nö̧ nä̧tö̧'i̧nä̧ jitötä ttirecuorö ttu̧ju̧nä̧rä̧cua̧'a̧nö̧.

³ Ya̧tȩ irecuarö u̧ju̧nä̧ro̧mȩnä̧, jahuäjurutä öjö'ca'anä, o'ca juiyönä tti̧rȩcua̧mö̧rö̧ jȩttö̧'a̧nö̧ jȩä̧cua̧'a̧nö̧. Ja̧'hua̧ta̧nö̧ yajute kirecuorö ku̧ju̧nä̧ro̧mȩnä̧, ja̧u̧ru̧tä̧ köjö'ca'anä, o'ca juiyönä tti̧rȩcuo̧mö̧rö̧ jȩttö̧'a̧nö̧ jȩjä̧cua̧'a̧nö̧.

⁴ Yajute kirecuorö kȩmo̧mȩnä̧, ja̧u̧nu̧mä̧ yajutä kamönämä ruhuajucö̧. Ja̧u̧nu̧mä̧ yajutä kirecuo ku̧ru̧hua̧ pä'i'ö. Ja̧'hua̧ta̧nö̧ ya̧tȩ irecuarö ȩmo̧mȩnä̧, ja̧u̧nu̧mä̧ chutä amönämä ru̧hua̧cö̧. Ja̧u̧nu̧mä̧ chutä irecua uruhuaju pä'i'äju.

⁵ Ja̧'hua̧nö̧ ja̧'a̧ttö̧ cuirecuorö pä̧huä̧ rö̧jo̧mȩnä̧, cuhuarodätucuä'. Ja̧'hua̧ta̧nö̧ cuirecuarö pä̧huä̧ rö̧jo̧mȩnä̧, cuhuarodätucuä'. Ja̧'hua̧ta̧nö̧ recuonänö Diosrö cucuocuätucua pä'ö cuhuarodätucuttumä, ä'canä cuirecuorö ucuocu ji̧nä̧ yo̧mȩtȩnä̧ amöcuädö jȩpä̧tu̧cui̧. Ja̧u̧nu̧ o'ca'a cuirecuorö jȩpä̧tu̧cui̧, korotöcu suronä jȩcu̧'ä̧tu̧cu̧ juiyäcua'a̧nö̧ ähuettä hueomenä.

⁶ Ttömä ja̧'hua̧nö̧ hue'ömä hue'ocösä. Ja̧'hua̧nö̧ jȩcu̧'ä̧tu̧cu̧ttu̧mä̧, adihua'a pä'ö ji'äusä.

⁷ O'ca toi'önä ttö chö̧jö̧'a̧nö̧ ttö̧jö̧ttö̧mä̧, adihua'a ttörö. Ja̧'hua̧nö̧ ja̧'a̧nä̧ Dios ka̧ra̧rö̧'i̧nä̧, ka̧ra̧rö̧'i̧nä̧ i̧mi̧cu̧nä̧ ttö̧ja̧ pä'ö hue'inödo, churutä pä̧huä̧ rö̧jo̧mȩnä̧.

⁸ Ttirecuo to'ätö'inä, ttirecuo hua'ö tticuiniyä̧u̧'i̧nä̧ ttö ta'anö ttirecuo toönä ttö̧jö̧ttö̧mä̧, adihua'a pä'ösä ttömä.

⁹ Ja̧'hua̧ta̧nö̧ ttirecuo toönä kä̧nö̧, u̧mä̧tö̧rö̧'i̧nä̧, nä̧tö̧rö̧'i̧nä̧ ttusuttumä, yoröiso suroja'a. Ja̧'hua̧nö̧ ja̧'a̧ttö̧ ja̧'hua̧nö̧ jȩttö̧ juiya pä'ö, ttirecuorö ttȩmö̧'a̧nö̧ ja̧'a̧.

¹⁰ Ja̧'hua̧ta̧nö̧ ttirecuorö ku̧nä̧rä̧tö̧rö̧ hue'ösä, isaju kirecuorö yoröiso jaroji'ö juiya pä'ö. Ttömä ja̧'hua̧nö̧ hue'ocösä. Tu̧ru̧hua̧ ji̧nä̧ isocu hue'ö ja̧'hua̧nö̧mä̧.

¹¹ Juhuorö'inä yajute isaju kirecuorö jaroji'öttömä, ka̧ra̧rö̧ yoröiso kȩmö̧ juiyäcua'a̧nö̧. Kirecuorötä pä'äji ta'anö kö̧jä̧cua̧'a̧nö̧. Ja̧'hua̧ta̧nö̧ ya̧tȩ ubo'inä irecuarö yoröiso jaroi'ö juiyäcua'a̧nö̧.

¹² Ja̧'hua̧ta̧nö̧ korotörö ttötä chamöcuädö ji'äusä, Tu̧ru̧hua̧ i̧huȩnȩmä̧cö̧. Yajute isaju, Diosrö esetocojumä, ya̧tȩ Diosrö esetöcu eseunu kö̧jo̧mȩnä̧ kirecuo päi'önä, huäinä ö̧jä̧cua̧. Ja̧u̧mä̧ ubomä jahuäjuru, irecuarö, jaroi'ö juiyäcua'a̧nö̧ pä'ösä.

¹³ Ja̧'hua̧ta̧nö̧ ja̧'a̧nä̧ ya̧tȩ Diosrö esetocömä, yajute Diosrö esetäjucu eseunu ö̧jo̧mȩnä̧ irecua päi'önä, huäinä kö̧jä̧cua̧. Jahuäjumä isajumä ja̧u̧ru̧, kirecuorö, jaroji'ö juiyäcua'a̧nö̧ pä'ösä.

¹⁴ Ya̧tȩ Diosrö esetocömä, irecua Diosrö esetäjucu ö̧jo̧mȩnä̧, Dios a̧'cua̧ tta̧ jö̧nä̧ topö ja̧u̧ru̧. Ja̧'hua̧ta̧nö̧ yajute Diosrö esetocojumä, kirecuo Diosrö esetöcu kö̧jo̧mȩnä̧, Dios a̧'cua̧ tta̧ jö̧nä̧ topö jahuäjuru. Ja̧'hua̧nö̧ ja̧'a̧ttö̧ Dios a̧'cua̧ tta̧ jö̧nä̧ topö jahuätö tti̧tti̧mö̧rö̧, korotö ja̧u̧ru̧ esetätö tti̧tti̧mö̧rö̧ toö ta'anö.

¹⁵ Ja̧'hua̧nö̧ ja̧'a̧nä̧ ya̧tȩ Diosrö esetocömä, irecuarö jaroi'a päöttömä, huäinä jaropi'ö. Ja̧'hua̧ta̧nö̧ yajute Diosrö esetocojumä, kirecuorö jaroji'a päjöttömä, huäinä jaropi'äju. Ja̧u̧nu̧ Diosrö esetäjimä adiunä ö̧jä̧cua̧. Isaju'inä Diosrö esetäjäjumä adiunä kö̧jä̧cua̧ju̧. Iso päi'önä Dios huoinä̧u̧jä̧ ujutu adiu eseunu tö̧ja̧cua̧ pä'ö.

¹⁶ Isaju ¿tta̧'a̧nö̧ cu̧huo̧jua̧'a̧ttö̧ cuirecuo Diosrö ȩsȩtä̧cua̧ pä'ö? Ucumä ubomä ¿tta̧'a̧nö̧ cu̧huo̧jua̧'a̧ttö̧, cuirecua Diosrö kesetäcuaju pä'ö?

Dios huoinö ta'anö ka̧cuä̧tu̧cui̧

¹⁷ Dios ucuturu huomenä, cu̧ji̧nä̧tu̧cu̧ ta'anö, adiu ka̧cuä̧tu̧cui̧. Ja̧'hua̧ta̧nö̧ Tu̧ru̧hua̧ ucuturu iyinö ta'anö, ka̧cuä̧tu̧cui̧. Pa̧'a̧nö̧ hue'ösä o'ca toi'önä iglesia ruhuärö̧.

¹⁸ Diosmä ya̧tȩ circuncidado hua̧rö̧ huoöttömä, ja̧u̧mä̧ huäinä circuncidado ö̧jä̧cua̧. Ja̧'hua̧ta̧nö̧ Diosmä ya̧tȩ circuncidado huocörö'inä huoöttömä, ja̧u̧mä̧ huäinä circuncidado huocö'inä ö̧jä̧cua̧.

¹⁹ Ja̧u̧ juäimä, circuncisión jȩä̧cuä̧huä̧mä̧, adiunä micuähuocö. Ji̧yȩä̧cuȩtä̧ Diosrö pä̧huä̧ rö̧jo̧mȩnä̧ jȩä̧cuä̧huä̧tä̧, adiu micuähua'a.

²⁰ O'ca toi'önä Dios huoäcua'a ä'canä ttö̧ji̧nö̧'a̧nö̧, ttö̧ja̧cuä̧cua̧'a̧nö̧ jitä'inä.

²¹ Dios ucuru huomenä, ¿ka̧ra̧ u̧mö̧huä̧ya̧ i̧sa̧ päi'önä micuä juiyönä aditinöjä tä̧ji̧? Juhua'acumä huäinä ja̧'a̧. Koronö päi'omenä, ja̧u̧ru̧ räcuhuopächa pä'ö jö̧ttö̧mä̧, huäinä ja̧u̧ru̧ jaropi'ö räcuhuopächaja.

²² Iso päi'önä Dios huomenä, ya̧tȩ ka̧ra̧ u̧mö̧huä̧ya̧ i̧sa̧ pi̧nö̧mä̧, ja̧u̧mä̧ Tu̧ru̧hua̧ ä'ca jo̧mȩttö̧ ka̧ra̧ u̧mö̧huä̧ya̧ i̧sa̧ jö̧'a̧nö̧ ko̧cö̧. Ja̧'hua̧ta̧nö̧ Dios huomenä, ya̧tȩ ka̧ra̧ u̧mö̧huä̧ya̧ i̧sa̧ pocö pi̧nö̧mä̧, ja̧u̧mä̧ Tu̧ru̧hua̧ u̧mö̧huä̧ya̧ i̧sa̧ päi'önä kö̧.

²³ Diosmä rö̧ȩnä̧ mitö ȩmi̧nä̧u̧jä̧ ucuturu. Ja̧'hua̧nö̧ ja̧'a̧ttö̧ pi̧jä̧ ttö̧ja̧rö̧ pä̧huä̧ rö̧jö̧ huettö jȩpö̧, ttumöhuäyotö päi'önä cu̧ja̧cuä̧tu̧cuä̧'.

²⁴ Ja̧'hua̧ ja̧'a̧ttö̧ chö̧jä̧hua̧tö̧, Dios ucuturu huoäcua'a ä'canä cu̧ji̧nä̧tu̧cu̧ ta'anö, ka̧cuä̧tu̧cui̧ jitä'inä, churutä pä̧huä̧ rö̧jö̧tä̧ jȩpö̧.

Ttirecua to'ätörö ji'ähuinödo

²⁵ Ttirecua to'ätörö Tu̧ru̧hua̧ttö̧ hueähuä huȩnȩ jui̧'a̧sä̧. Ja̧'hua̧nö̧ ja̧'a̧nä̧ Diosrö pä̧huä̧ rö̧jo̧mȩnä̧ huȩ'ä̧hua̧ cha'attö, ttötä chamöcuädö ji'äusä.

²⁶ Iso päi'önä jitä rö̧ȩnä̧ surojö 'cuäopa'attö, ttirecuarö ttȩmö̧ juiyöttömä, adihua'a ttörö.

²⁷ Juhuorö'inä cuirecuarö cu̧ju̧nä̧rö̧ttö̧mä̧, jarocuhuipä' cuirecuarö. Ja̧'hua̧ta̧nö̧ cuirecua toöttömä, cuȩma̧ pä'ö cuamöcuädä'.

²⁸ Ja̧'hua̧ta̧nö̧ ja̧'a̧nä̧ cuirecuarö cuȩmö̧ttö̧mä̧, suronämä jȩpo̧cö̧jä̧. Isaju'inä kirecuorö kȩmö̧ttö̧mä̧, jahuäju'inä suronämä jȩpo̧co̧ju̧. Ja̧'hua̧nö̧ ja̧'a̧nä̧ ttirecuarö ȩmä̧tö̧rö̧, jitämä pi̧jä̧nä̧ kä̧nö̧ pi̧jä̧ttö̧ rö̧ȩnä̧ surojö 'cuäopäcua'a. Ja̧'hua̧nö̧ surojö 'cuättopö juiya pä'ö ji'äusä pi̧yȩmä̧.

²⁹ Chö̧jä̧hua̧tö̧, pa̧'a̧nö̧ ji'äusä: Recuome ka̧cuo̧co̧tö̧jä̧ pi̧jä̧nä̧mä̧. Ja̧'hua̧nö̧ ja̧'a̧ttö̧ jitä mo̧ro̧ kä̧mä̧dö̧, ttirecuorö ku̧nä̧rä̧tö̧mä̧, ttirecua toa'a jä̧'i̧nö̧'a̧nö̧, ttö̧ja̧cuä̧tu̧cuä̧cua̧'a̧nö̧.

³⁰ Tta̧'cua̧ tta̧'ȩcuä̧tö̧'i̧nä̧, tta̧'cua̧ tta̧'ȩcuo̧co̧tö̧ jȩttö̧'a̧nö̧, jȩttä̧cua̧'a̧nö̧. Esehuätö'inä, esehuocotö jȩttö̧'a̧nö̧, jȩttä̧cua̧'a̧nö̧. Koro juäi jä'epö ȩmä̧tö̧'i̧nä̧, korotö ttöäre päi'önä ttȩmö̧'a̧nö̧, jȩttä̧cua̧'a̧nö̧.

³¹ Pi̧jä̧nä̧ aditö ȩmä̧tö̧'i̧nä̧, ttȩmö̧ juiyönä jȩttä̧cua̧'a̧nö̧. Pi̧jä̧mä̧ totömä beipächä̧ra̧'a̧.

³² Ucutumä koro koronö cuamöcuädätucu juiya pä'ösä ttömä. Ya̧tȩ irecua to̧'a̧, 'cuäöpönä Tu̧ru̧hua̧rö̧ adiu amöcuädö jȩpö̧, Tu̧ru̧hua̧ esehua pä'ö ja̧u̧ru̧.

³³ Pärocua'acu ya̧tȩ irecuarö ku̧nä̧rö̧mä̧, pi̧jä̧ jähuä amöcuädö jȩpö̧, irecua kesehua pä'ö ja̧u̧ru̧.

³⁴ Ja̧'hua̧ta̧nö̧ ja̧'a̧nä̧ nä̧tö̧'i̧nä̧, yajute kirecuo to'aju, Tu̧ru̧hua̧rö̧ adiu amöcuädö jȩpä̧ju̧, Dios ä'ca jo̧mȩttö̧ adiu kö̧jä̧cua̧'a̧nö̧ ka̧'cua̧ru̧hua̧nä̧'i̧nä̧, jättäpäyajunä'inä. Ja̧'hua̧ta̧nö̧ kirecuoru ku̧nä̧rä̧ju̧, pi̧jä̧ jähuä amöcuädö jȩpä̧ju̧, kirecuo esehua pä'ö jahuäjuru.

³⁵ Ttömä pa̧'a̧nö̧ ji'äusä ucuturu, ttö̧ja̧ ucuturu ttucuotönä cu̧ja̧cuä̧tu̧cuä̧cua̧'a̧nö̧, o'ca juiyönä cuami iso'quitucunä jȩpö̧ Tu̧ru̧hua̧ hueömä. Hueähuä huȩnȩ päi'önä huȩyu̧tu̧ ji'ähuocösä ucuturu.

³⁶ Ya̧tȩ ittiju böa juojomenä, kirecuorö kȩma̧ päjöttömä, kä'o'inä kirecuorö kȩma̧ päöttömä, huäinä kȩma̧ja̧ kirecuorö. Ja̧u̧mä̧ surojömäcö̧.

³⁷ Ja̧'hua̧ta̧nö̧ ka̧ra̧ iso päi'önä ami iso'quinä amöcuädöttömä, chittijumä iso päi'önä kirecuo toönä adiu kö̧jä̧cua̧ju̧, suronä jȩä̧cuä̧huä̧ juiyönä pä'ö amöcuädöttömä, ittiju kirecuorö kȩmo̧ca̧'a̧ jö̧ttö̧mä̧, adihua'a.

³⁸ Ja̧'hua̧nö̧ ja̧'a̧ttö̧ ya̧tȩ ittijuru hueomenä kirecuorö kȩma̧ pä'ö, adiu jȩpö̧. Juhuorö'inä ya̧tȩ ittijuru hueoca'anä kirecuorö kȩma̧ pä'ö, ka̧ra̧ttö̧'i̧nä̧ abonänö adiu jȩpö̧.

³⁹ Ja̧'hua̧ta̧nö̧ yajute kirecuorö ku̧nä̧rä̧ju̧mä̧, ja̧u̧ru̧tä̧, kirecuorötä, kö̧jä̧cua̧'a̧nö̧ hua'ö icuome jubö päi'önä. Ja̧'hua̧nö̧ ja̧'a̧nä̧ kirecuo hua'ö icuomenätä, ka̧ra̧rö̧ Diosrö esetörö kö̧ja̧ päjöttömä kö̧jä̧cua̧'a̧nö̧.

⁴⁰ Juhuorö'inä kirecuo hua'ö icuomenä, ka̧ra̧rö̧ kö̧jö̧ juiyöttömä, rö̧ȩnä̧ kesehuäcuaju. Ttö ja̧'hua̧nö̧ amöcuädösä. Ja̧'hua̧ta̧nö̧ ttö'inä Espíritu Santorö ku̧nä̧rö̧sä̧.